Alumnos de 3º de ESO facendo o Camiño Norte - Lourenzá

PERCORRIDO A PÉ POLO CAMIÑO NORTE (LOURENZÁ)

O día 19 de decembro un grupo de alumnos de 3º de ESO  desprazouse ata o Concello de Lourenzá para percorrer a pé un tramo do Camiño de Santiago (Camiño Norte), actividade programada polos Departamentos de Ciencias Sociais e Relixión Católica. Durante o percorrido, o alumnado escoitou as explicacións dos profesores acompañantes, Maribel e Antón, que lles axudaron a comprender varios aspectos da ruta a Santiago.

Nun agradable paseo polo centro de Lourenzá, o grupo detívose diante da Casa Natal do recoñecido escritor Francisco Fernández del Riego, onde se informou da súa vida e obra, facendo fincapé en que ocupou o cargo de Presidente da Real Academia da Lingua.

Moi pretiño de Lourenzá, en pleno val, está o Pazo de Tovar. Alí puideron ver os traballos de restauración desta fortaleza que, dentro de pouco, albergará un museo.

Despois dun tempo de lecer, a mañá rematou na Igrexa de Lourenzá e no Museo de Arte Sacra, onde unha guía municipal informou detalladamente ao alumnado sobre os lugares incluídos na visita: fachada da Igrexa, interior do templo, sancristía, relicario, sepulcro do Conde Santo…

Na viaxe de volta o comentario xeral era que Lourenzá conserva un rico patrimonio histórico e artístico que paga a pena coñecer.

Fixádevos na seguinte reportaxe fotográfica canto aprenderon!