Despedida de 2º de Bacharelato 2024

Chegou o día tan desexado para o alumnado de 2º de Bacharelato, a data da súa graduación.

O martes, día 14 de maio, celebramos a cea de despedida. Reunímonos 51 alumnos e profesores para celebrar o final dunha etapa bonita a pesar do paso dunha pandemia mundial.

Moitos parabéns a Ana, Ester e Ramón por levar matrícula de honra con 10. Mais tamén queremos felicitar a Paula López Martínez, Nerea, Paula Rodil, Ivana, Manuela e Lucía por sacar unha media superior a 9.

Moita sorte a todxs na ABAU e/ou outros destinos!

Promoción 2018-2024: Luna, Juanma, Pablo Balseiro, Melanie, Abril, Mario, Jorge, David, Raúl, Simón, Imanol, Daniel, Paula Fraga, Carmen, Nerea, Ana, Sabela, Roi, Noa Gudín., Yorel, Paula L. Calvo, Paula L. Martínez, Ivana, Diego, Noa Martínez, Saray, Pablo Méndez, Pablo Míguez, Iago, Jorge Neira, Mateo, David José, Celia, Mara, Jaime, Gabriela, Félix, Lucía, Laura, Ramón, Pablo Rivas, Ester, Paula Rodil, Lola, Marta, Marina, Andrés, Manuela, Andrea, Denisa, Silveria.

Podedes acceder a máis imaxes AQUÍ. 

Carteis Letras galegas 2024: Luísa Villalta

O alumnado de 4º ESO de Proxecto competencial elaborou este curso a exposición de carteis das Letras galegas, dedicadas a Luísa Villalta. 

Podedes encontrar máis información sobre Luísa Villalta no Portal da Lingua. Alí podedes acceder a outras exposicións de carteis sobre a autora. 

Encontro literario con María Reimóndez

O martes 14 de maio María Reimóndez conversará co alumnado de 2º de ESO sobre a obra Furia.

Pílulas formativas do alumnado de Xeoloxía e Ciencias Ambientais de 2º de Bacharelato

O alumnado de Xeoloxía e Ciencias Ambientais de 2º de Bacharelato leva preparando nas últimas semanas breves pílulas formativas para explicarnoss de maneira doada algúns dos conceptos que estudan na aula. 

Con estes experimentos e exposicións gráficas entenderemos moito mellor a Xeoloxía e as Ciencias Ambientais. Grazas polo voso labor de divulgación. 

Aquí están os últimos vídeos que prepararon para explicarnos a densidade, a presión e a illa de calor: 

Exposición Especial BD para a Microrrede

A Microrrede de Bibliotecas Escolares Plambe da Mariña rende este ano unha especial homenaxe a Francisco Ibañez. A exposición conxunta que se celebrará en Viveiro do 7 ao 10  de maio leva por título 13 rúa da Microrrede, coincidindo coa edición nº 13 da exposición.

No IES Perdouro, quixemos plasmar nunha viñeta os protagonistas da familia Trapisonda de Ibañez. Para iso, inspirámonos no traballo da artista galega de banda deseñada, Bea Lena, recén galardoada no Festival de BD de Angoulème coa súa obra Corpo de Cristo. Ela borda os seus debuxos en formato téxtil.

Un grupo de alumnado de 4º ESO confeccionou empregando a técnica das arpilleiras (cosendo a man e a máquina, bordando e pasando o ferro) os elementos que ían compoñer a viñeta de 95x75cm. Os retais foron doados por Arranxos a quen agradecemos moito a súa xenerosidade. En definitiva, fixemos un traballo cooperativo de custo cero. 

Tamén participamos cunha viñeta nunha tira cómica colaborativa, Supermariña e Martiño, entre os 20 centros que forman a Microrrede. O resultado final desta aventura poderá verse na exposición da Sala de Multiusos do Concello do Viveiro.

Ademais, temos feitos uns xogos para medir os teus coñecementos en canto a personaxes de BD. Aceptas o reto? Adiante.

XOGO 1 . Heroes e heroínas de BD

 

XOGO 2: Personaxe de BD francófonos

Taller de minerais

O pasado xoves catro de abril tivemos o pracer de recibir o renomeado xeólogo Fran Canosa no noso centro para que nos impartira unha agradable clase. Nela explicou, a fume de carozo e de xeito ameno e exemplificado, as propiedades dos minerais. Non era a primeira vez que se realizaba unha actividade con este xeólogo, quen destaca tanto polo ensino como por ser un bo divulgador e defensor do patrimonio xeolóxico. 

O taller foi impartido no laboratorio para o alumnado de primeiro da ESO e para o de Bioloxía de segundo de Bacharelato. Cabe destacar as capacidades pedagóxicas do xeólogo, pois explicaba dun xeito tal que os pequenos comprendían perfectamente propiedades mineralóxicas que sorprenderon ata aos máis maiores, profesorado incluído. 

Fran, despois de deixar ben clara a diferenza entre rocha e mineral, explicou o hábito, a dureza, a cor da raia o brillo... e as propiedades que máis chamaron a atención: a fluorescencia e a fosforescencia. Sempre de xeito interactivo e cunha peza a disposición para exemplificar cada unha das explicacións, porque o alumnado científico do centro quere convencerse a base de probas. 

Podedes acceder ás imaxes aquí.

 Gabriela Pedre Lastra - 2º Bacharelato A

I Semana do Benestar emocional e a Convivencia: charla sobre resiliencia

O luns 8 de abril veu ao instituto, co gallo da Semana do Benestar e a Convivencia, Raquel Marqués, unha muller de 35 anos con discapacidade visual. Xunto a ela viña tamén a súa cadela guía, Estela. Durante a charla, Raquel explicounos todas as dificultades que tivo que pasar para poder lograr facer o que ela quería. Durante a súa vida estudou dúas carreiras, Enfermería e Fisioterapia, e tivo diversos traballos como: dependenta, camareira en discotecas, azafata promocionando bebidas, nunha residencia de maiores... 

Actualmente Raquel ten parella e un fillo de dous anos, cos que vive en Foz. Ela aportounos unha ensinanza moi valiosa: que hai que esforzarse para conseguir o que queiras por moitas dificultades que che poña a vida por diante. Tamén nos dixo que a sociedade te valora pola discapacidade e non pola capacidade, algo sen dúbida moi inxusto para os que a sofren. Por sorte, para poder enfrontarse a todos os problemas da sociedade actual, sempre contou co apoio da súa familia e dos seus amigos. 

Podedes ver a foto aquí.

Aleixo Fernández Maseda – 3º ESO A

Rúa da Microrrede - Exposición da Microrrede de Bibliotecas Escolares da Mariña

O martes 7 de maio, ás 17h00 inaugúrase a exposición anual da Microrrede de Bibliotecas Escolares PLAMBE da Mariña á que pertencemos. 

As obras que aí se presentan brinda unha pequena homenaxe a Ibañez, humorista gráfico creador de Mortadelo e Filemón.

O cartel é obra da alumna de 2º de bach de Arte do IES Monte Castelo, Laura González Freire que agradecemos por brindarnos a portada que abre as portas ao noso traballo colaborativo. 

A exposición conta con 20 cadros e dun cómic artístico colaborativo, un por cada biblioteca da Microrrede, e poderá verse no salón multiusos do Concello de Viveiro de 18h a 20h do 7 ao 10 de maio de 2024.

Accede o programa AQUÍ.

MICRORREDE DAS BIBLIOTECAS ESCOLARES DA MARIÑA 

1. EEI SAN ROQUE (Viveiro)
2. CEP LOIS TOBÍO (Viveiro)
3. CEIP de CELEIRO (Celeiro-Viveiro)
4. CEIP Plurilingüe de COVAS (Covas-Viveiro)
5. CEIP Plurilingüe SANTA RITA (Galdo-Viveiro)
6. CEIP O VICEDO
7. CEIP Plurilingüe PEDRO CASELLES ROLLÁN (Xove)
8. CEIP PENÍNSULA DA PAZ (San Cibrao)
9. CEIP de CERVO (Cervo)
10. CEIP Fondo Nois (Foz)
11. CEIP Plurilngue SANTA MARÍA DO VALADOURO (Valadouro)
12. CEIP Plurilingüe VISTA ALEGRE (Burela)
13. CEIP GREGORIO SANZ (Ribadeo)
14. IES MARÍA SARMIENTO (Viveiro)
15. IES VILAR PONTE (Viveiro)
16. IES ILLA DE SARÓN (Xove)
17. IES MONTE CASTELO (Burela)
18. IES PERDOURO (Burela)
19. IES ALFOZ-VALADOURO
20. EOI Luz Pozo (Viveiro)

 

Aulas Limpas do mes de marzo: a de 4º ESO B volve a ser a mellor aula

De novo a aula 204 volve a ser a máis limpa e ordenada. O mobiliario está sempre en orde e destaca a recollida de pilas e de material escolar. Ademais, o seu taboleiro está ben organizado e con traballos expostos de tamaño mural e A4. 

Séguea en puntos a aula 101, pertencente a 4º ESO PDC, e en 3º lugar está a aula 401, de 4 º ESO A, polo que felicitamos o alumnado de 4º ESO, que este mes ocupou os tres primeiros postos de Aulas Limpas. 

Parabéns e ánimo para o resto dos grupos, que aínda quedan un par de meses para ter a aula máis limpa e ordenada. 

Recordade: todas as aulas deben ter caixa ou recipiente para recoller pilas e material escolar. Lembrade tamén deixar as ventás e persianas dos extremos pechadas e as do medio, abertas. As limpadoras recórdannos que deixemos as mesas separadas das paredes para poder pasar limpando por ambos os lados de todas as mesas e que se revisan estas por debaixo para que ninguén pegue chicles. 

Charla formativa aberta para as familias: "Altas capacidades"

Programamos unha ponencia sobre as altas capacidades. Olalla Méndez Arias, orientadora, axudaranos a coñecer e comprender mellor as altas capacidades para contribuír ao desenvolvemento intelectual, social e emocional dos nosos adolescentes. Saberemos como detectar as altas capacidades, como evolucionan e como atendelas ao longo da vida.

Conferencia aberta a todas as familias de adolescentes ou preadolescentes. É preciso anotarse chamando ao 982 87 01 02. 

Non faltedes á cita. Vémonos na biblioteca do IES Perdouro.

Mércores 08/05/2024 ás 18h30

Día do Libro 2024: A nosa vida en libros

O alumnado de 2º ESO preséntanos a súa vida en libros. Coa axuda da súa profesora de Lingua Castelá, Mª José Andión, elaboraron maquetas ou murais nos que colocaron nunha árbore os libros que influíron neles desde a súa máis tenra infancia ata a actualidade. Logo teñen que expoñer esas lecturas emocionantes aos seus compañeiros de clase. 

As árbores están expostas por distintos lugares do centro. Son unha preciosidade!

Viaxe a Samos e ao Cebreiro

O venres día 5 de abril fomos de excursión a Samos, para ver o Mosteiro de San Xillao. Cando chegamos, deixáronnos media hora para explorar un pouco a vila e despois reuníronnos nas portas do mosteiro; aquí, explicáronnos datos sobre a fachada (estilo, referencias...), a historia do mosteiro e como viven os monxes que habitan aquí. 

A continuación fomos á Capela do Ciprés, para explicarnos a súa historia tamén. Despois tornamos ao mosteiro para realizar a visita guiada cunha rapaza moi simpática, que nos explicou a historia, tanto da arquitectura coma dos murais. 

Ao rematar, camiñamos ata o restaurante A Veiga para comer e poder ter tempo libre despois, antes de volver cara ao autobús e seguir a nosa viaxe. 

Laura Eijo – 3º ESO B 

Logo visitamos O Cebreiro, unha pequena localidade por onde pasa o Camiño de Santiago. 

Ao chegar alí, comezamos a xogar coa neve ata que chegamos ao albergue do Cebreiro. Ao seu carón, explicáronnos que un albergue é un lugar onde a xente que vai facer o Camiño de Santiago, é dicir, os peregrinos, se quedan a pasar a noite se xa acabaron a etapa que lles tocaba facer ese día. 

A continuación, tiñamos a intención de entrar nel pero non puidemos xa que a persoa que está a cargo non estaba presente nese momento. Despois do albergue fomos ata a igrexa. Esta igrexa chámase de Santa María e é unha igrexa prerrománica. Tamén nos falaron dun busto que había xusto ao lado da igrexa. Dixéronnos que o que estaba alí representado se chamaba Elías Valiña, que foi un sacerdote e escritor español, que pintou frechas amarelas por todo o Camiño de Santiago, desde Roncesvalles, para facilitar o percorrido aos peregrinos. Foi unha persoa moi importante á hora de dar a coñecer o Camiño. Estiveron contándonos algunha cousa máis sobre a igrexa e logo marchamos. 

Por último, fixemos un pequeno tramo do Camiño, dende a igrexa ata o límite con Castela e León que haberá algo máis dun quilómetro. Alí, as persoas que quixeron cruzaron a fronteira e tamén nos explicaron que esa era a fin do tramo que iamos percorrer e a continuación volvemos para deixar O Cebreiro atrás. 

Podedes acceder ás imaxes aquí.

Diego Anello e Antía González – 3º ESO A

Obradoiro de gominolas saudables

O día 3 de abril, María José e Begoña -integrantes de Gaia- viñeron ensinarnos como facer larpeiradas sen azucre. Comezaron presentándose e de seguido ensináronnos unhas breves e importantes informacións sobre os ingredientes malos das lambetadas. Cando remataron de explicar, fixemos un divertido taller de como preparar as nosas propias lambetadas de maneira saudable. 

O taller comezou coa explicación dos ingredientes das larpeiradas: neste caso en concreto usamos a mandarina e unha xelatina chamada agar-agar. De seguido, explicáronnos o proceso de elaboración que iamos seguir. Os pasos foron moi sinxelos: primeiro de todo había que espremer a mandarina e despois escoala. Cando xa a tíñamos líquida, puxémola ao lume coa xelatina. Unha vez feito isto, baleiramos o contido nuns moldes con formas e deixámolos arrefriar ao redor duns vinte minutos. Como último paso, deleitámonos con elas. 

Podedes acceder as fotos aquí.

Antía Domínguez Piñeiroa - 1º ESO AB

Xeorruta con Fran Canosa

O venres 21 de marzo o alumnado de 4º de ESO puidemos desfrutar das explicacións do recoñecido xeólogo Fran Canosa. 

Tras saír do instituto a primeira hora, dirixímonos cara a área xeolóxica do Perdouro, onde observamos diferentes tipos de pregamentos e formacións xeolóxicas coma os arcos da “igrexa de Coedo”. Nesta etapa da ruta, Canosa explicounos a orixe e importancia dos monumentos xeolóxicos que se atopan en Burela. Comentounos como as rochas que forman a nosa paisaxe foron orixinadas hai 500 millóns de anos en praias preto da Antártida e, despois de movementos tectónicos e procesos de erosión, preséntanse hoxe en día a simple vista. 

A continuación, Canosa recalcou a importancia xeolóxica da nosa vila, pois constitúe un límite de recoñecemento internacional no que remata a rasa cantábrica, composta principalmente por rochas metamórficas, coma a lousa e a cuarcita, e comeza o litoral granítico que se estende cara o oeste de Galicia. Esta distinción converte a Burela nun geosite de interese mundial. 

Logo, exploramos a xeoloxía granítica dirixíndonos cara á praia da Marosa mentres nos detiñamos de cando en vez para atender ás explicacións de Canosa. Durante esta etapa, apreciamos as diferenzas do litoral da rasa cantábrica cara ao leste e do granítico dende unha nova perspectiva. Observamos tamén diferentes formacións en bloques de granito, coma pías ou pedras cabaleiras formadas pola erosión do vento en combinación coa auga e o salitre, destacando a “pena do neno”, denominada así pola forma que inspira dun meniño deitado. 

Continuamos descubrindo diferentes estruturas costeiras como faias e as distinguidas diáclases ortogonais da Marosa. Así, rematamos a interesante xeorruta con Fran Canosa, que puxo en valor como se merecen as distintas áreas xeolóxicas de Burela.

Para ver máis fotos preme aquí.

Carla Paz Trelles - 4º ESO A

Concursos AC Os Matos 2024

 Convocamos os Concursos anuais da Asociación Cultural Os Matos.

Buscamos os mellores traballos de poesía, relato curto e debuxo que exploren a temática das viaxes, das travesías tanto emocionais como físicas. Compartide a vosas experiencia ou botade a voar a vosa imaxinación.

Tedes ata o 20 de maio para participar. 

Entregaremos dous premios en cada categoría.

Lembra: en lingua galega. 

XVII Concurso literario     
    + de relato curto  
    + de poesía
 
XVI Concurso de Imaxe

Ver bases aquí.
 

 Tamén estamos á procura dos mellores debuxos ou composición fotográfica de temática libre para a portada e contraportada da revista escolar Maruxía n°30.

Tedes ata o 20 de maio para participar. Lembra: en lingua galega.

 

I Semana do Benestar e a Convivencia: recital de Lúa Mosquetera

O xoves 11 de abril de 12:00 a 13:00h terá lugar na Casa da Cultura o recital da poeta Lúa Mosquetera que estará acompañada polo músico Pablo Seijas e da súa guitarra. 

Lúa Mosquetera (Miño, 1988) é graduada en Lingua e Literatura Galegas pola USC. Conta con dous poemarios autoeditados: Rasrás (2018) e Aunque seas rara y seas pájaro (2020). O seu terceiro poemario escribiuno en galego e titúlase Espíderman (Galaxia, 2022). Un dos poemas incluídos neste libro, "Anorak de pel de caribú", mereceu o premio ARitmar de Mellor Poesía da Galiza 2021. Ese mesmo ano foi campioa do Poetry Slam galego e finalista do campionato nacional. ¡Yo vivo! é a súa primeira novela. 

A súa linguaxe é directa e incisiva e a súa forma de recitar non deixa indiferente. Insírese no "Spoken word", que fusiona poesía con música ou teatro e ao que fai gústalle chamarlle recital acústico. 

É ademais artista que decora pratos con mensaxes poéticas e inspiradoras, imparte talleres de bordado e tamén de escritura. 

Aquí tedes máis información sobre ela. 

Yolanda Fernández e Ana Lestao falan da Semana do Benestar e a Convivencia en Radio Cope

A raíz da primeira actividade da Semana do Benestar Emocional e a Convivencia, Ana Lestao (alumna de 4º ESO) e Yolanda Fernández (coordinadora de benestar e convivencia do IES Perdouro) foron entrevistadas en Radio Cope. 

AQUÍ tedes o enlace no que podedes escoitar a entrevista. Nela resumen a temática da charla de resiliencia da fisioterapeuta Raquel Marqués e informan sobre o resto de actividades preparadas para esta semana. 

Ben falado!

Aportamos o noso gran de area coa carreira contra a leucemia infantil

Hoxe celebramos a carreira "La vuelta al cole" contra a leucemia infantil promovida pola Fundación Unoentrecienmil.  

O noso alumnado de 1º e 2º ESO e algúns membros do profesorado percorreron o circuíto ata facer 448 voltas, co que conseguiron 448 €. O grupo que máis voltas conseguiu foi 1º ESO A con 91 voltas e, individualmente destacaron Sofía Ben, Óscar Fustes, Iago Maseda e Lucas  Basanta que deron 6 voltas ao circuíto. 

Á contía anterior súmase o resto da recadación reunida e a aportación económica da ANPA. En total son 860 € os que enviaremos á fundación para que a investigación sobre a leucemia infantil continúe avanzando.

Moitas grazas polas vosas ganas de colaborar e pola vosa xenerosidade.

Podedes acceder ás fotos AQUÍ. 

Participamos na carreira solidaria da Fundación Unoentrecienmil contra a leucemia infantil

Este venres 5 de abril de 10:00 a 11:00h celebrarase no IES Perdouro a carreira solidaria contra a leucemia infantil correspondente ao curso 2023-24. 

O alumnado de 1º e 2º ESO, profesorado e persoal non docente está convocado a participar na carreira que contará coa axuda do CM de Xestión Administrativa na súa organización. 

Pídese ás familias que actúen como patrocinadores e aporten os seus donativos. Cantas máis voltas se dean ao circuíto que se establecerá no camiño dos Colexios, maior será a doazón para a Fundación Unoentrecienmil. 

Esta fundación leva dez anos aportando fondos para a investigación contra a leucemia infantil, que é o tipo de cáncer máis frecuente durante a infancia. Avanzouse moito durante estes dez anos e queremos que o avance sexa o máis rápido posible. Fixéronse cambios no protocolo de tratamento da leucemia infantil en toda España e agora sabemos que o deporte axuda á curación, que a leucemia ten un compoñente xenético e que isto pode favorecer a prevención. 

Corremos por unha boa causa. Colabora con ela enviando o teu donativo ao centro a través da túa filla ou fillo ata o venres 5 de abril.

Charla formativa aberta para as familias: "A comunicación cos adolescentes"

Contaremos coa psicóloga Nuria Revuelto Crespo para abordar a comunicación cos adolescentes. Esta actividade insírese no programa Lectura e Familias e tamén dentro da celebración da I Semana do Benestar Emocional e a Convivencia do IES Perdouro. 

 

A especialista en Educación Emocional impartirá un obradoiro destinado a nais e pais para a adquisición de habilidades e competencias persoais e emocionais no ámbito familiar dos adolescentes co obxectivo de reducir os conflitos e mellorar a convivencia xestionando de forma apropiada as emocións negativas e aprendendo a xerar emocións positivas.

Aberta a todas as familias de adolescentes ou preadolescentes. É preciso anotarse chamando ao 982 87 01 02. 

Non faltedes á cita. Vémonos na biblioteca do IES Perdouro.

Mércores 10/04/2024 ás 18h30

I Semana do Benestar Emocional e da Convivencia no IES Perdouro

Despois dunha traxectoria de varios cursos atendendo á Educación Emocional do alumnado, organízase a Iª Semana do Benestar Emocional e da Convivencia.

O IES Perdouro participa ademais no programa Educación Responsable e esta semana de actividades comparte obxectivos co programa anterior: 

1. Promover o desenvolvemento saudable do alumnado, a partir do traballo co profesorado, co alumnado e coas familias.

2. Coñecer e comprender o que é a educación emocional, social e creativa. 

3. Utilizar a propia competencia emocional, social e creativa para acadar un maior benestar persoal, social e laboral. 

4. Incorporar na práctica educativa o desenvolvemento das competencias emocionais, sociais e creativas no alumnado. 

5. Contribuír á mellora do clima de convivencia no centro educativo e ao éxito escolar do seu alumnado.

Remata o prazo da recollida de pilas para o concurso Pilabot. Traede todas as que poidades!

Mañá venres 22 de marzo acaba o prazo para a recollida de pilas. Traede todas as pilas e baterías de litio que poidades e vádeas depositando na caixa da aula ou botádeas directamente no colector de diante de conserxería. 

O venres 22, titores ou delegados, como vós acordedes, debedes encargarvos de levar as pilas da aula á entrada do edificio 1, diante de conserxería. 

A organización do concurso pasará polos centros para pesalas como o curso pasado. 

Grazas pola vosa colaboración!

De novo 4º ESO B gaña o concurso mensual de Aulas Limpas

Por terceiro mes consecutivo 4º ESO B gañou o concurso mensual de Aulas Limpas. 

Neste mes de febreiro destacaron tamén a aula 101, de 4º PDC, e a 211, de 2º Bacharelato A. O grupo de 4º ESO PDC tivo o segundo posto durante estes tres meses e a súa aula é a que, polo momento, máis se achega á puntuación de 4º ESO B. 

As aulas que están en primeiro lugar destacan pola orde e a limpeza no chan, o taboleiro ordenado e a recollida de pilas e material escolar. Ademais, deixan sempre as luces, o ordenador e o proxector apagados. No único que terían que fixarse máis é en deixar as persianas e as ventás na colocación correcta: cunha ventá central aberta para ventilar e nos extremos as persianas baixadas e as ventás cerradas. 

Recordamos que non se poden pegar chicles debaixo das mesas porque iso tamén se revisa. 

Moitos parabéns ao grupo gañador e recomendamos constancia para o resto dos grupos. Quedan os resultados de catro meses de curso, de marzo a xuño. Aínda estades a tempo de gañar o concurso mensual Aulas Limpas e conseguir premio de cafetería no recreo para todo o grupo. 

Participamos no reparto de froita do Fondo Galego de Garantía Agraria

Este curso 2023-24 participamos no reparto de froita fresca do Fondo Galego de Garantía Agraria. Este reparto está financiado con Fondos Europeos. Con esta iniciativa foméntase o consumo de froita fresca e promóvense hábitos de alimentación saudable. 

Aproveitade para tomar froita fresca nos recreos!

Podedes ver máis imaxes do reparto de froita AQUÍ. 

Elaboración do mural 8M

Desde o Equipo de Biblioteca, propúxese que cada clase elaborara un mural en tamaño cartolina con imaxes de mulleres relevantes para elas e eles. Hai mulleres que foron ou son importantes a nivel histórico, cultural, deportivo... pero tamén moitas mamás. 

Nun día no que se reivindica o papel da muller e os seus dereitos, esta é a nosa contribución. 

Manifesto 8M 2024

Este é o noso manifesto para conmemorar o Día Internacional da Muller, lido polas compañeiras Nati Pedreira e Laura Alonso, de 1º de Bacharelato. 

O futuro será feminino ou non será!

Día da Enxeñaría na Escola Politécnica de Enxeñaría de Ferrol (EPEF)

O 16 de febreiro, o alumnado de 1º de Bacharelato A tivo unha saída a Ferrol para participar no Día da Enxeñaría, que organizou a Escola Politécnica de Enxeñaría de Ferrol, da prestixiosa facultade da Universidade de Coruña (UDC). 

Unha vez na escola, explicáronnos un pouco como funcionaba. Despois xa fomos visitar talleres coma o de enxeñaría naval, industrial, automatización… Durante este percorrido, fixemos experimentos prácticos, como un pequeno motor e unha madalena de formigón. 

Ademais de explorar os talleres, tivemos a oportunidade de observar un proxecto impresionante: un coche eléctrico que participará nas carreiras do campionato Greenpower Iberia (carreiras de resistencia de coches eléctricos). 

Por último, participamos nun emocionante escape room de ciencias, onde puxemos a proba as nosas habilidades de resolución de problemas e traballo en equipo. Ao completar o desafío, déronos uns agasallos. 

Para rematar a viaxe, visitamos o Museo da Construción Naval, no que puidemos observar maquetas de barcos, restos de naufraxios e pezas de barco históricas como paneis de control, partes de radares…

Para ver máis fotos prema aquí

Natividad Pedreira e Elena Pumares 1º BACHARELATO-A

Semana da muller: Encontros literarios con Andrea Maceiras

O mércores 6 de marzo Andrea Maceiras conversará co alumnado de 3º e 4º de ESO e de 1º de Bacharelato sobre o proceso de creación das súas novelas e sobre a súa vocación como escritora. 

Profundará, concretamente, sobre Que me pare o corazón se te esquezo. Hai moitas razóns polas que o corazón está no título desta novela que trata temas como os retos nas redes sociais, a saúde mental, a amizade e o amor na adolescencia. Agardamos que nos vaia debullando os motivos que a levaron a tratar estas cuestións para así coñecer mellor o corazón da súa novela. 

Semana da muller: obradoiro de escrita creativa e encontro literario con Antía Yáñez

Este luns 4 e martes 5 de marzo Antía Yáñez estará no IES Perdouro para comezar cos actos da Semana da Muller con motivo de conmemorar o 8M. 

O alumnado de 1º ESO participará nun obradoiro de escrita creativa, o de 4º de ESO analizará a novela Non penses nun elefante rosa e o de 1º de Bacharelato, profundará no tratamento da muller en Senlleiras. 

19 de febreiro: Día Internacional contra a LGTBIfobia no deporte

O 19 de febreiro é o Dia Internacional contra a LGTBIfobia no deporte. Elixiuse esta data para facer referencia ao día de nacemento de Justin Fashanu, o primeiro xogador de fútbol que falou da súa orientación sexual de maneira pública. Isto foi en 1990 e, naquel momento, foi vítima de acoso, tivo que acabar a súa carreira prematuramente e rematou coa súa vida oito anos despois. 

Para que sexamos conscientes de que está nas nosas mans acabar con estas inxustizas, o alumnado de 2º ESO A e de 1º ESO A e B elaboraron algúns traballos. Se pinchades AQUÍ, accederedes aos murais de 1º ESO e a continuación mostrámosvos a presentación de 2º ESO A. Se clicades no nome dos deportistas, coñeceredes a súa biografía. 

Semana do 8M 2024

 

Curso AFD de Mecanizado por arranque de labra

Se es unha persoa desempregada e queres formarte, con este curso ampliarás as túas saídas profesionais podendo dedicarte ás construcións metálicas e a fabricación e reparación para o sector industrial, eólico e naval.

Contacta co centro para reservar a túa praza. 

Maratón de lectura do Día de Rosalía

Todo o alumnado de 2º ESO participou no maratón de lectura do Día de Rosalía organizado en colaboración do Concello de Burela. 

Aquí tedes as imaxes das rapazas e rapaces que leron de forma entusiasta poemas rosalianos durante 45 minutos seguidos. Coa coordinación do seu profesor, Noé Vázquez, o alumnado recitou algunhas das composicións intimistas, sociais e costumistas máis coñecidas da autora da que se conmemoraba o día do seu nacemento. 

Obradoiro de banda deseñada con Cristian F. Caruncho

O xoves 22 e o venres 23 de febreiro o alumnado de 1º ESO e o de 4º ESO de Proxecto Competencial participará nun obradoiro de banda deseñada impartido por Cristian F. Caruncho. 

Cristian Fojón Caruncho (Ortigueira, 1997) gañou a edición do ano 2011 do concurso de Banda Deseñada na Mariña convocado pola Asociación Cultural Os Matos e a biblioteca do IES Perdouro na categoría aberta. A obra gañadora foi a primeira parte de O home que liberou a fraga, a cal se incluíu na terceira revista Banda desexada. 

Recibiu, entre outros recoñecementos, o premio Carlos Casares-Kristina Berg en 2020 e o premio Castelao de Banda Deseñada da Deputación da Coruña en 2023. 

Este historietista, faneditor e ilustrador ten publicado xa numerosas obras de banda deseñada e participado en campañas gráficas e clips musicais. 

AULAS LIMPAS e CONCURSO PILABOT

A mellor aula de decembro e xaneiro foi a 204. O alumnado de 4º ESO B destacou por manter a orde e a limpeza na clase. Tamén tivo especial coidado en apagar ordenador e proxector, ventilar, colocar as persianas na posición correcta e, sobre todo, recolleu material escolar gastado e pilas. 

Recordamos que estamos participando no concurso PILABOT e que temos de prazo ata o 25 DE MARZO para recoller o máximo número de pilas que poidamos. A partir dese día virán pesar e recoller os colectores de pilas. Por favor, TRAEDE TODAS AS QUE POIDADES CONSEGUIR. 

Parabéns para o grupo gañador e moito ánimo para os restantes. Se cada membro da comunidade educativa colabora en non tirar lixo e ordenar, o centro será un lugar máis agradable para todos. Aínda estades a tempo de conseguir o premio final!

Teatro, visita a El Progreso e ao Museo Provincial de Lugo

Este mércores, 17 de xaneiro, todo o alumnado de 3º ESO realizamos unha saída á capital da nosa provincia, Lugo. 

Primeiro asistimos ao auditorio Gustavo Freire, onde puidemos gozar da obra de teatro Entre pasos y zancadas interpretada pola produtora MIC producciones. Foi unha representación de tres obras do século XVI: dous pasos de Lope de Rueda (A terra de Jauja e As Olivas) e un entremés de Cervantes (O vello celoso). 

Tras o espectáculo puidemos interactuar cos actores e resolver as nosas dúbidas sobre a obra ou sobre a súa profesión. Máis tarde, fixemos outra parada no diario El Progreso onde nos explicaron o proceso de elaboración do periódico, dende a redacción ata a impresión do mesmo. Tamén nos falaron sobre a historia dos xornais. Posteriormente, fixemos un percorrido polas súas instalacións, onde puidemos ver toda a maquinaria que se emprega diariamente para a súa impresión. 

Tras facer unha breve parada para xantar nas Termas, continuamos a nosa viaxe cara ao Museo Provincial de Lugo. Alí explicáronnos datos sobre a Idade dos Metais, vimos algúns mosaicos e tamén entramos nunha sala dedicada a unha colección de torques atopados en Galicia, entre eles o de Burela. Finalmente, observamos unha colección de retratos e autorretratos. 

Ata aquí a nosa saída! 

Podedes ver máis imaxes AQUÍ.

Noa Burgos Pernas - 3º ESO A

Visita do xornalista Marco Pereira

O día 8 de febreiro tivemos unha grata sorpresa: visitounos Marco Pereira Oliveira, un home de 30 anos de idade que padece unha minusvalía visual desde que naceu e que o deixou cego. 

Nacido no concello de Xove, estudou o ensino primario e secundario en Xove, o bacharelato en San Cibrao e o ciclo superior de Administración e Finanzas no IES Perdouro. Titulado en Xornalismo pola Universidade de Santiago, agora está ampliando estudos a través dun Mestrado en Comunicación. 

Desde 2016 dirixe un programa radiofónico de contidos musicais: o Grandes Vozes. O alumnado de 1º de ESO participou activamente no coloquio e posteriormente fixemos exposicións escritas sobre a actividade. 

En conxunto, coincidimos nas nosas valoracións. Para Luís Méndez "Marco é unha persoa que ten moito mérito; é un exemplo a seguir. A pesar de que padece un glaucoma que case non lle deixa ver, foi capaz de completar os estudos e é capaz de levar unha vida case normal, sen renderse nunca". 

Pola súa parte, a Andrea Maseda o que máis a sorprendeu foi que "xa nacera cego e que lograse obter o título de Bacharelato en catro anos". Outros compañeiros e compañeiras fixéronse máis na aplicación do programa "Voice over", na sesión práctica sobre o código braille e mesmo na súa oratoria brillante. 

Adrián Piqueras / Raúl Neira - 1º ESO A

Semana dos afectos igualitarios

AVISO ESPECIAL: Ábrese o servizo postal para enviar cartas de agarimo a quen queiras, compañeirxs, noivxs, profesores, persoal non docente. 

Os emisarios de Cupido pasaron polas aulas a semana pasada para avisar que o seu servizo de mensaxería estará operativo a partir do xoves 15. 

Adícalle á persoa que aprecias uns dos teus mellores versos. Deixa a túa carta na caixa instalada no hall de entrada. Non esquezas indicar o nome completo do/a destinatario/a e o seu curso e envíao nun sobre.

Poderanse dirixir as cartas a calquera membro da comunidade educativa, sempre e cando estean escritas dende o respecto.

Tes ata o día 19 para mandar versos afectuosos a quen queiras.

Vídeos Entroido 2024

AQUÍ tedes os vídeos das vosas estelares actuacións. 

Entroido 2024

O venres 9 de febreiro celebramos o festival de Entroido. Pasou o temporal e a choiva permitiunos rematar as actuacións. 

Puxestes moita ilusión e creatividade neste festival. Foi un bo traballo de coordinación entre os grupos tanto para a coreografía como para os disfraces e decorados. 

AQUÍ tedes as imaxes dun gran día!

Os gañadores foron: 

Premio na Olimpíada Informática Galega para Hugo Gorgojo

Hugo Gorgojo Basanta, alumno de 1º de Bacharelato A, conseguiu quedar no 4º posto na Olimpíada Informática Galega despois de superar os seis retos que a organización propoñía. Foi só cuestión dun segundo que o seu programa non fora tan rápido como desexaba. 

É un posto supermeritorio, Hugo. Transmitímosche os nosos parabéns!

Preparando o festival de Entroido

O venres 9 de febreiro celebraremos o Entroido no Perdouro. 

Vade ensaiando as vosas coreografías e entregando a música para que todo estea preparado para as actuacións. 

Participarán 15 grupos de alumnado, 2 participantes individuais e un grupo de profesorado. 

Entrega de premios do Campionato San Xoán Bosco 2024

Esta mañá, mércores 31 de xaneiro, Día de San Xoán Bosco, patrón do ensino profesional,  a Asociación Cultural Os Matos fixo entrega  de premios aos campións e subcampións na modalidade de xogo individual. Felicitamos aos gañadores así como a todos e todas aquelas que participastes no campionato. O resultado foi o seguinte:

Xadrez 

• 1° premio: Alexandre García Pousa / 1º Bac
  
• 2° premio: Saúl Rodríguez Rodríguez / 1º Bac

Damas 

• 1° premio: Ramón Real González / 2º Bac
  
• 2° premio: Maite Candia Bazrreiro / 3º ESO

Cubo de Rúbik

• 1° premio: Hugo Gorgojo Basanta / 1º Bac
  
• 2° premio: Jorge Neira Cociña / 2º Bac

Os campionatos de fútbol sala e balón cesto están a celebrarse nos recreos. No mes de marzo está prevista a gran final.

Accede ao álbum de fotos dos medallistas AQUÍ.

Campionatos San Xoán Bosco 2024

 

No gran día da festividade de San Xoán Bosco, faremos entrega dos premios aos campións e subcampións das modalidades de Xadrez, Damas e Rubik. 

 

Será na biblioteca o 31/01/2024 ás 11h.

Aquí tamén se fala galego

Participamos na iniciativa cultural e de dinamización lingüística Aquí tamén se fala galego. 

Foi iniciada polo IES Rafael Dieste da Coruña e xa son 160 os centros educativos que se adheriron a esta marea na que a mocidade é protagonista en poñer en valor o uso da lingua en calquera ámbito laboral.

Son aínda moitos máis os centros educativos que se queren adherir e en Burela non imos ser menos. Abofé! Aquí tamén se fala galego!

Premios para o IES Perdouro de traballos por proxectos e de convivencia e benestar emocional

Esta semana recibimos as noticias de que o labor do IES Perdouro foi premiado no IX Concurso de Traballos por Proxectos e no I Premio ConVivimos, ambos convocados pola Dirección Xeral de Ordenación e Innovación Educativa.

No contexto do PLAN LIA de Bibliotecas Escolares (Lectura, Información e Aprendizaxe) convocouse o IX Concurso de Traballos por Proxectos 2022-23 baixo a coordinación (ou coa participación) da biblioteca escolar. A finalidade do proxecto, de carácter interdisciplinario, foi a elaboración dun invernadoiro para o centro. Realizouse dun modo DIY (Do It Yourself – Faino ti mesmo), para que o proceso fora exportable e cadaquén puidese construílo na súa casa. Instalóuselle tamén a infraestrutura necesaria (sensores de temperatura, humidade etc) para realizar unha plantación de vexetais totalmente ecolóxica, aprendendo sobre os mesmos no relativo á data de plantación, coidados, recolección, usos e incluso análise da súa forma. Para todo isto empregouse un sistema de traballo que combina a busca e tratamento da información, o método científico e a aprendizaxe baseada en proxectos, de xeito que o alumnado, ao ir superando os distintos obxectivos do currículo, observaba unha finalidade no seu proceso de ensino-aprendizaxe, traballando distintos temas transversais e adquirindo as correspondentes competencias curriculares. Este proxecto, que comezou coa idea de construír un invernadoiro, foise desenvolvendo de xeito que se acadaron moitos outros fins, por iso recibiu o nome de: Construímos unha estrutura xeodésica e plantamos un fractal? - Construímos un invernadoiro e plantamos unha coliflor?”

O proxecto comezou analizando as necesidades de crear un espazo para o cultivo de vexetais durante o período escolar no centro educativo, de xeito que se puidera levar a idea a outras persoas que quixeran facer o mesmo (DIY) e seleccionar cultivos para distintos fins. Neste proxecto o estudo das estruturas xeodésicas e dos tipos de cultivo foron o medio para acadar o fin. Tralo estudo das estruturas xeodésicas, comezouse a elaboración dun proxecto técnico que supoñía: deseñar e realizar o cálculo da estrutura xeodésica, deseñar a disposición das macetas/mesas de cultivo, elaborar os detectores de temperatura interior e os detectores de humidade para controlar o regado das plantas. Investigouse sobre os cultivos que se ían realizar, completando o traballo coa información facilitada polas familias, empregáronse as formas da natureza (coliflor, brócoli, col romanescu e suculentas) para estudar os fractais e utilizáronse as plantas aromáticas (lavanda, menta etc) para elaborar distintos tipos de xabón. Finalmente, procedeuse á difusión do proxecto e á realización de agasallos cos cultivos conseguidos e produtos elaborados.

A contía que recibiu o centro foi de 2000 € como se pode comprobar na resolución que fai pública a relación de centros premiados. 

Por outra parte, co fin de recoñecer o esforzo realizado polos centros educativos na mellora da convivencia e do benestar emocional, convococouse o I Premio ConVivimos 2023 de convivencia e benestar emocional, para recoñecer aquelas actuacións e proxectos de carácter individual e/ou colectivas que implicaran un alto grao de compromiso coa mellora da citada convivencia escolar e benestar emocional. Para esta convocatoria presentouse un proxecto de todas as actividades relacionadas coa educación emocional que se realizaron no centro durante o ano pasado. Nestas actividades participou alumnado de todo o centro (ESO, BACH, FP) e colaboraron diferentes departamentos grazas á formación recibida no PFPP e á coordinación das profesoras Yolanda Fernández e Montserrat Seco, esta última a través do Programa de Educación Responsable. O alumnado recibiu sesións de Educación Emocional, realizou un estudo sobre emocións no IES Perdouro, construíu unha estrutura suspendida, redactou relatos e poemas, o Coro das Emocións interpretou varias cancións etc.

Ao IES Perdouro outorgóuselle polo proxecto #EmociónsNoPerdouro un áccesit, quedando no 4º posto dos 50 centros da comunidade autónoma que se presentaron nesta primeira convocatoria como consta na relación de premiados. 

Cartas aos xeriátricos para felicitar o Nadal

Un ano máis, o alumnado de 1ESO do IES Perdouro participou na actividade de elaboración e envío de cartas a distintos xeriátricos da Mariña para felicitar as festas aos nosos maiores e arroupar a aqueles que poidan sentirse sós. 

Agardamos ter sorte e, que á volta das vacacións de Nadal, algúns se animen a respondernos!