Oferta educativa de Formación Profesional

 

Neste vídeo móstrase a oferta educativa do IES Perdouro para Formación Profesional: Ciclos Básicos, Medios, Superiores e Cursos de Especialización. 

Vente á FP!

Educación emocional con María Navarrete

Nos últimos anos, María Navarrete Fa acompáñanos nunha semana na que o alumnado recibe varias sesións do que ela chama Ximnasia Emocional. 

Do 16 ao 19 de xuño, as alumnas e alumnos de 2º e 3º ESO, 1º CB de Fabricación e Montaxe e 1º CM de Mecanizado desfrutaron dun total de catro sesións con María nas que se tratou de mellorar a autoestima e de profundar na personalidade e nas intelixencias de cada un para aumentar a percepción do benestar emocional. 

Podedes ver as imaxes AQUÍ.

Resumo da IV Feira TecnoCienciArte

 

Neste vídeo repásanse as participacións deste curso na Feira TecnoCienciArte. Un gran traballo obra de todos!

Neste enlace tedes todos os proxectos que interviñeron na mostra. 

E máis imaxes da xornada AQUÍ. 

Proxecto Neo.14 Curso 24-25

Foi un curso de consolidación e apertura, no que mantivemos viva a radio escolar como espazo de aprendizaxe, encontro e servizo á comunidade.

Despois da continuidade garantida grazas á colaboración de Radio Foz e á implicación dos docentes envolvidos no equipo de radio, mantivemos unha programación estable desde outubro ata xuño, con máis de trinta programas divulgados nas emisoras asociadas e nas redes do IES Perdouro.

Neste curso, incorporáronse novas voces como Javier Mogo, Nádia Cabral, Érica Gomes, Belanice Costa e Helena Paredes, entre outras. Con eles e elas reforzamos o compromiso coa diversidade lingüística, incluíndo sotaques do galego e do portugués, e dando acubillo a testemuños chegados de Cabo Verde, Colombia ou Brasil.

Cómpre salientar tamén dúas colaboracións regulares que enriqueceron a estrutura do programa: por unha banda, a profesora de Lingua Castelá Sonia Rey, que dinamizou dúas seccións xa imprescindíbeis —A noticia do día e Horrografía (mensual)—; e por outra, o profesor de Bioloxía Fernando Losada, que achegou as súas didácticas Pílulas das ciencias, conectando o saber científico coa realidade cotiá do alumnado. Mensualmente programamos un Especial Radio Saúde Burela, actividade que forma parte da Estratexia de Promoción da Saúde e Prevención do Sistema Nacional de Saúde, unha iniciativa dentro do Plan Estratéxico de Saúde Nacional.

Proxecto Neo mantivo o seu vínculo co territorio. Falamos do mar con Pepe do Caxoto e Balbino Trelles; de iniciativas empresariais baseadas no compromiso coa nosa terra e co ambiente, como Mel do Trevo ou Terras de Miranda; da cultura con artistas como Cristina Castro, Ugia Pedreira, Xosé Constenla e Lupe Blanco; e da literatura coa colaboración de Antonio Reigosa, Raquel Miragaia, Paco Rivas e Manuel Rivero. Ademais, recibimos a visita de Manuel Núñez Singala grazas ao programa Lectura Infinita.

As colaboracións chegaron tamén doutros centros: de Vila de Cruces, de Xinzo de Limia, de Catarroja (Valencia) e mesmo do arquipélago caboverdiano, grazas á colaboración do director da Escola do Salineiro, Josefino Quedi Barbosa.

Participamos en actividades como Expomar, o intercambio con Francia e a excursión a Portugal. Conectamos así a radio escolar co mundo, mantendo como fío condutor a palabra dos estudantes.

Neste ano, Proxecto Neo foi, unha vez máis, escola de comunicación bidireccional, ponte entre xeracións e motor de cohesión social.

Vanesa Vilaverde Lamas, coordinadora de Proxecto Neo

Rematamos a 14ª edición de Proxecto Neo cun xantar de confraternidade entre os integrantes de Masa Coral Modelo Burela. 

Aquí están as fotos da entrega de diplomas aos reporteiros/as de Proxecto Neo 24-25.

Equipo docente Proxecto Neo 24-25 coa nosa fotógrafa Lucía Rivas

Vídeo promocional Fabricación Aditiva IES Perdouro 24-25

Oferta educativa 25-26

 

Acto de presentación da revista escolar da A. C. Os Matos - Maruxía nº 31

A asociación cultural Os Matos do IES Perdouro presentou o nº 31 da publicación Maruxía en colaboración co Equipo de Dinamización e coa Biblioteca.

Esta mañá, a biblioteca do centro acolleu un evento moi especial: a presentación do número 31 da revista escolar Maruxía. O acto estivo conducido por Hugo Lorenzo, alumno de 4º de ESO TIC, quen guiou con soltura e entusiasmo a sesión.

Durante a presentación, Maeve Díaz e Noa Burgos compartiron con todos os asistentes a experiencia do equipo na preparación desta nova edición, salientando o valor do traballo conxunto e da colaboración continua para superar os diferentes retos que xurdiron ao longo do proceso.

Como nestes últimos anos, foi o alumnado de 4° ESO quen maquetou a revista escolar e varias decenas de estudantes e profes de calquera das ensinanzas que se imparten no IES Perdouro redactaron os textos que ocupan as súas páxinas. Ademais, a revista inclúe os relatos e poemas premiados no XVIII Concurso de Relato Curto e Poesía, así como as imaxes galardoadas no XVI Concurso de Imaxe, certames organizados cada ano pola Asociación Cultural Os Matos.

Antes de rematar o acto, o profesor de TIC, Cristovo Balseiro, tomou a palabra para compartir a experiencia que supuxo para el e o seu equipo de alumnado enfrontarse ao reto de aprender a manexar un novo programa de maquetación, o Scribus, que non resulta precisamente sinxelo.

Para rematar, Xema Sanjurjo, coordinadora do EDLG e Karina Parga, presidenta da Asociación Cultural fixeron entrega dos premios aos gañadores destes certames, que cada ano fomentan a expresión literaria e artística no centro. 

Aproveitamos o acto para facer entrega do diploma de participación ao equipo formado por Sara Villarquide, Breogán Fernández e Hugo Fernández, alumnos de 3º ESO, que representou ao IES Perdouro na fase territorial do concurso radiofónico ODS Onda – O Futuro é Teu. Os estudantes de ESO de catro centros galegos protagonizaron a primeira edición dun concurso que pretende transformar a educación en materia de sustentabilidade nunha experiencia interactiva, divertida e emocionante aproveitando o alcance e a influencia da radio local en todo o Estado. Este concurso realizouse simultaneamente en Galicia, Andalucía, Catalunya e na comunidade autónoma de Madrid.

👉 Podes acceder á reportaxe fotográfica completa premendo AQUÍ.

📖 Consulta a revista Maruxía nº31 en formato PDF, dispoñible aquí.

Maruxía nº31

Fin de curso: boas vacacións!

Hoxe rematou o período lectivo do curso 24-25. Todo pasou voando. 

Enchestes o patio de conversas, risas e baile. Que alegría contaxiades!

Agora a descansar. Desfrutade do tempo libre para facer o que máis vos guste. O verán é fantástico para estar en contacto coa natureza, para ler, para coñecer xente nova, para compartir coa familia e cos amigos...

Nós estaremos aquí ata finais de xullo: aínda queda recoller as notas, solicitar os libros de texto e matricularse para o vindeiro curso. 

Iremos informando das datas. 

Podedes ver máis imaxes AQUÍ.

Maruxía nº 31

O alumnado de 4º de ESO TIC capitaneado por Cristovo Balseiro rematou estes días de compoñer o número 31 da revista MARUXÍA. Xa está na imprenta. 

A biblioteca acollerá o acto de presentación de revista escolar así como a entrega de premios dos certames literarios e de imaxe da A.C. os Matos, o vindeiro venres 20 de xuño ás 11h30. 

Viaxe de fin de curso por Portugal

O pasado martes 3 de xuño o alumnado de 1° de Bacharelato, xunto coas profesoras  de  portugués  e  francés,  saímos  cara  a  unha  viaxe  na  cal percorreriamos o país veciño. A nosa primeira visita de Portugal foi o Mosteiro do Bom Jesus, en Braga. Alí, puidemos desfrutar dos seus preciosos xardíns en harmonía coa arquitectura barroca. Ademais de baixar polas súas innumerables escaleiras, tivemos a oportunidade de remar en barca tras o xantar. A continuación, dirixímonos a Espinho, onde nos aloxariamos os seguintes días para visitar Porto. 

Pasamos todo o mércores na cidade de Porto, onde quedamos abraiados cos azulexos que recobren as fachadas da estación de San Bento e doutras moitas edificacións. Observamos a colorida paisaxe da Ribeira, xunto ao Douro, e no Mercado de Bolhão probamos doces típicos portugueses. Fixemos tamén un roteiro alternativo para coñecer a verdadeira esencia da cidade e do seu pobo; exploramos  a  física  do  son  na  Casa  da  Música  e  vimos  monumentos inconfundibles que nos mostraron a riqueza histórica da cidade.

O xoves despedímonos de Porto e de Espinho para dirixírmonos cara a Aveiro. A primeira hora, aprendemos sobre a industria tradicional que sustentou á súa poboación  durante  séculos,  as  salinas.  Logo,  paseamos  entre  as  coloridas edificacións tan características da arquitectura de Aveiro. Tamén, montamos en barcos moliceiros, dende os cales, grazas a un guía, aprendemos a historia da vila dende as canles que a atravesan.

Este mesmo día rematámolo xa en Lisboa, onde desfrutamos da gastronomía tradicional portuguesa preto da Praça do Comércio. Na mañá seguinte, subimos ao  miradoiro  da  Senhora  do  Monte  e  adentrámonos  polas  rúas  da  cidade. Desprazámonos en metro, mais tivemos a oportunidade de montar nos coloridos tranvías e de escapulirnos polas rúas en trotineta.Na praza do Carmo fixémonos conscientes da historia aínda latente no corazón da cidade; descubrimos o barrio de Alfama e aprendemos sobre as figuras literarias máis destacadas da cultura portuguesa tras visitar a Feira do Livro de Lisboa. Así, visitamos tamén o Castelo de São Jorge, unha fortaleza medieval situada no punto máis alto da cidade pola cal pasaron todas as civilizacións que poboaron Lisboa ao longo da historia. Dende  alí,  tivemos  unha  preciosa  panorámica  da  paisaxe  debuxada  pola diversidade botánica e harmonía arquitectónica de Lisboa xunto coas augas do Texo.

O sábado apuramos o último día de viaxe comezando polo museo Quake, acerca do gran terremoto que asolou Lisboa en 1755. Alí tivemos a oportunidade de sentir persoalmente a experiencia de tal fenómeno e así comprender mellor o sucedido  na  cidade  e  como  isto  mesmo  afectou  a  súa  configuración  na modernidade. Logo, vistamos Belém, xunto coa súa famosa Torre e o Mosteiro dos Jerónimos, onde se atopan os sepulcros do explorador Vasco da Gama e o gran poeta Fernando Pessoa. Logo, relaxámonos nunha longa tarde de praia antes de voltar ao centro de Lisboa para cear e recollernos ata partir deviaxe de volta na mañá seguinte.

Chegamos a Burela por volta das nove da noite, tras unha viaxe en bus con intervalos de recordos sobre a experiencia e moito, moito sono, o que nos mostra canto desfrutamos dela. Paramos tamén en Ponte da Lima a xantar e visitamos o seu mercado de antigüidades antes de despedírmonos finalmente da nosa última  gran  viaxe  como  curso  en  conxunto.  Desta  viaxe  quedámonos  con innumerables recordos construídos nun ambiente que combinou a convivencia e os  risos  coa  cultura,  facendo  dela  unha  experiencia  inolvidable para  todos. Finalmente, tan só queda dicir que ficamos muito gratas e gratos por termos a oportunidade  de  compartilhar  esta  experiência  com  as  profesoras  Vanesa  e Karina,  assim  comoJosé  Luis,  sem  os  quais  não  poderia-mos  terdesfrutado tanto da nossa viagem. 

Carla Paz Trelles, 1° BAC A

Accede AQUÍ ao albúm de fotos da viaxe. 

Plano e proxectos da IV Feira TecnoCienciArte

O luns 16 de xuño celebraremos a IV Feira TecnoCienciArte e esta será a distribución da mesma.

No enlace podes consultar os proxectos que se exporán este curso.

E este é o horario no que se desenvolverá: 

Fallo do xurado Concursos OS MATOS 2025

O xurado resolveu outorgarlles os premios aos traballos presentados polos seguintes alumnos:

XVIII Concurso literario da As. Cultural Os Matos

RELATO CURTO:

Categoría ESO

• 1º premio: Sara Álvarez Fernández, (1º ESO D)

Categoría Bacharelato e  CF

• 1º premio: Carla Paz Trelles (1º Bac A)
• 2º premio: Ana Lestao Ben (1º Bac B)

POESÍA:

Categoría ESO

• 1º premio: Hernán Rodríguez Pérez (1º ESO D)
• 2º premio: Lara Romo Leivas (1º ESO D)
  

Categoría Bacharelato e  CF

• 1º premio: Ana Lestao Ben (1º Bac B)
• 2º premio: Carla Paz Trelles (1º Bac A)

XVI Concurso de Imaxe da As. Cultural Os Matos

Categoría ESO:

• 1º premio: Sofía Ben Martínez (3ºESO B)
• 2º premio: Nicol Gonçalves Semedo ( 1º ESO B)

Concurso de Portada da Revista Maruxía

• 1º premio: Ana Lestao Ben (1º Bac B)
• 2º premio: Uxía Oroza Combarro (4º ESO B)

Festival de fin de curso: concurso de talentos

Participa no concurso de talentos cunha canción versionada en galego. 

Estas son as bases: 

1. Obxecto do concurso 

O concurso de talentos ten como finalidade fomentar o uso da lingua galega a través da música, promovendo a creatividade e o respecto pola diversidade cultural e social do noso alumnado. 

2. Participantes 

Poden participar todos os estudantes matriculados no IES Perdouro. 

3. Modalidade 

O alumnado deberá versionar unha canción da súa elección traducíndoa ou adaptándoa ao galego, mantendo a melodía orixinal. 

4. Requisitos das versións 

• As letras versionadas deben ser respectuosas con todas as persoas e colectivos, evitando calquera tipo de linguaxe sexista, ofensiva, discriminatoria ou que incite á violencia ou ao odio. 

• Non se permitirá o uso de contidos que atenten contra a dignidade das persoas ou que promovan estereotipos negativos. 

• A música e a letra deben entregarse en formato escrito ao profesorado do departamento de lingua galega. 

5. Entrega 

• As letras e as partituras ou bases musicais deben entregarse ao profesorado do departamento de lingua galega antes do 16 de xuño. 

• A entrega debe facerse preferentemente en formato dixital (PDF, Word, ou audio mp3) ou en soporte físico, se fose o caso. 

6. Actuacións 

• As interpretacións serán en directo o día do festival, o 20 de xuño, último día lectivo do curso. 

7. Criterios de valoración 

• Creatividade na adaptación ao galego.

• Calidade e coherencia da letra adaptada. 

• Respeto e adecuación aos valores do concurso. 

• Calidade da interpretación e presenza escénica. 

8. Premios 

O xurado entregará premios para os mellores traballos, fomentando o recoñecemento do esforzo e a participación. 

9. Aceptación das bases 

A participación implica a aceptación total destas bases e o compromiso de respectar as normas establecidas.

IV Feira da Ciencia Tecnocienciarte

O luns 16 de xuño celebraremos a IV Feira da tecnoloxía, a ciencia e a arte, TecnoCienciArte.

Experimentos, proxectos, creacións... sairán das aulas para ser mostrados na feira a toda a comunidade educativa do IES Perdouro. 

Pola mañá os nosos convidados serán as rapazas e rapaces de 6º de Educación Primaria do CEIP Virxe do Carme e pola tarde, a partir das 16:15h, as familias poderán visitarnos para ver os postos da feira.

Animádevos a participar cos vosos traballos na feira deste curso!

Día dos océanos: ODS 14 - vida submarina

O domingo, 8 de xuño, é o Día Mundial dos Océanos, e este é un bo momento para dar a coñecer un traballo que estivo realizando o alumnado de Cultura Científica, do 1º curso de Bacharelato: un completo vídeo de 21 minutos e medio sobre un dos Obxectivos de Desenvolvemento Sostible da ONU: concretamente, o nº 14 (Vida Submarina). 

A primeira parte do vídeo é unha explicación sobre as metas deste obxectivo, explicada a modo de "draw my life" (explicación dos contidos mentres unha persoa debuxa). Seguidamente, entrevistan a 4 docentes (Ana Orol, Miguel Rodríguez, Xan Barcia e Alfredo Llano). A duración das dúas últimas era excesiva, polo que subimos á parte as entrevistas completas de Xan Barcia (LIGAZÓN AO VÍDEO) e Alfredo Llano (LIGAZÓN AO VÍDEO). Seguen as entrevistas a 18 representantes do alumnado dos 4 cursos da ESO, con máis preguntas sobre a vida submariña. E a parte final inclúe as tomas falsas e os créditos.

Agardamos que este labor divulgativo dea os seus froitos.

Visita á Ribeira Sacra e Portomarín

O día 14 de maio o alumnado de Relixión e Francés de 4º ESO e 1º de Bacharelato fixemos unha viaxe á Ribeira Sacra, onde visitamos o Canón do Sil, Monforte e Portomarín. 

O día comezou cunha longa viaxe ata o Canón do Sil. Alí collemos un catamarán que nos amosou as fermosas paisaxes que rodean o río. A metade norte do río pertence á provincia de Lugo, mentres que a sur está en Ourense e teñen varias diferenzas, como nos explicou a guía do barco. Na metade de Lugo aínda se seguen cultivando uvas para facer viño, que se soben cuns raís ata a parte superior da ladeira. En cambio, a zona de Ourense xa non está cultivada e a maioría das plantacións foron abandonadas co paso do tempo. 

Ao longo do percorrido puidemos ver unha central hidroeléctrica, unhas rochas con formas que intentamos adiviñar e unhas casas rodeadas de árbores cun significado, xa que antigamente os cipreses indicaban que nesa casa se ofrecía comida, bebida e hospedaxe, dependendo do número de árbores. 

Cando rematou o percorrido volvemos ao bus para dirixirnos a Monforte. Alí subimos ao alto do monte, onde está o Parador, para comer. Unha vez rematada a comida, distribuímonos en grupos para comezar un xogo de preguntas por toda a vila. Nel, tiñamos que percorrer as rúas e buscar a información que se nos pedía para completar a folla. Ademais, debiamos sacar unha foto onde conseguiamos a información, como en carteis informativos ou coa xente á que lle preguntabamos. Ao final de todo tiñamos que montar un vídeo coas fotos de todo o día. 

Esta viaxe foi incrible xa que coñecemos unha parte moi famosa da nosa provincia e aprendemos que ás veces non fai falta desprazarse moito para ver sitios fermosos, senón que todo é cuestión de aprender a valorar o que temos preto. Ademais, desfrutamos dunha agradable tarde realizando o xogo. 

Ana Lestao Ben - 1º Bacharelato B

Ese mesmo día o alumnado de 4º de ESO e 1º de Bacharelato que estuda Francés e Relixión visitou Portomarín, unha pequena vila chea de historia por onde pasa o Camiño de Santiago Francés. 

A actividade tivo lugar pola tarde e comezou cun xogo de pistas explicado pola nosa profesora de Relixión, Begoña. O alumnado dividiuse en grupos e recibiu as instrucións para participar no xogo, no cal percorrerían os lugares máis importantes do vila. 

Esta actividade consistía en completar unha serie de preguntas que se podían contestar empregando diferentes recursos: falando con peregrinos que se encontraban facendo o Camiño, lendo carteis colocados polas prazas… Unha vez rematada a actividade, cada grupo debía montar un vídeo con todo o material recompilado e enviárllelo ás profesoras, quen máis tarde seleccionarían os gañadores. 

Foi un mércores moi divertido e distinto, cheo de aprendizaxe fóra do instituto e que fortaleceu o traballo en equipo.

Accede ao albúm de fotos AQUÍ.

Claudia Romo Leivas - 4º ESO A

 

 

Lectura e familias: Que consomen os adolescentes?

Maite Lanza Méndez, traballadora social da Unidade de Drogodependencias de Burela, informaranos de cales son os principais consumos na adolescencia na actualidade. Aclararanos as consecuencias de tomar substancias adictivas e, sobre todo, proporcionaranos información de como podemos aconsellar e axudar aos nosos fillos. 

Agardámosvos na biblioteca o xoves 22 de maio de 18:00 a 19:30h. 

Letras galegas 2025: As cantareiras

No ano 2025 o Día das Letras galegas está dedicado a sete mulleres que souberon manter a tradición da nosa música popular para que chegara ata os nosos días. 

O alumnado de 1º de ESO de Proxecto Competencial e de 4º ESO PDC elaborou unha exposición de carteis para dar a coñecer a figura das cantareiras e o legado que herdamos delas. 

Graduación de 2º de Bacharelato 2025

O noso alumnado de 2º de Bacharelato remata a súa etapa de Educación Secundaria. Para moitos deles foron seis anos nas aulas do IES Perdouro. Non lles tocou unha etapa fácil. Foi xusto en 1º de ESO cando tiveron que quedar nas casas por mor da pandemia, mais souberon afrontar as adversidades co mellor dos sorrisos como vimos onte no vídeo preparado por Miguel, profesor seu de Xeografía e Historia. 

Onte celebraron a súa graduación nunha cea agradable na que algúns abriron a cápsula do tempo que a súa titora, Yolanda, preparou en 1º de ESO. Despois celebrámolo con música e conversas e a longa e feliz xornada rematou pola mañá ás portas do instituto. 

Aínda non imos ver estes días ata que chegue a PAU, pero que saibades que esas portas sempre seguirán abertas para vós, para que veñades contarnos como vos vai e que, pouco a pouco, ides cumprindo os vosos soños. 

Moitos parabéns por rematar esta etapa e moita sorte para o futuro!

AQUÍ tedes algunhas imaxes da xornada de onte. 

Viaxe a Londres

O día 3 de maio de 2025, o alumnado de 4º ESO comezamos a nosa viaxe a Londres indo ata Santiago e collendo un voo directo a Londres. Dende alí leváronnos en autobús ata o hotel, acompañados por un guía que nos foi explicando contidos. 

Ao saír do hotel dirixímonos cara á estación de metro para ir ata Covent Garden, onde desfrutamos dun tempo libre para somerxernos polo Apple Market. A continuación, puxemos rumbo a Picadilly Circus, intersección de rúas icónica na capital británica, pasando por Chinatown, onde conseguimos deixar de lado a Toni entre a multitude. Por último, fomos ata Trafalgar Square, quedando marabillados coa típica foto do Big Ben que se asoma detrás dos leóns, e Leicester Square, lugar onde ceamos todos os días e realizamos visitas express ás grandes tendas de Lego e M&Ms. Ao rematar, dirixímonos cara ao hotel para dar este día por acabado. 

No segundo día, a primeira parada foi o British Museum, onde puidemos observar grandes reliquias de diversas civilizacións históricas, destacando a exipcia e a grega. Máis tarde, dirixímonos á City de Londres, distrito financeiro e corazón da cidade, onde vimos o Banco de Inglaterra, o Ledenhall Market e the Monument, cuxa función é conmemorar o gran incendio do século XVII. A continuación, dirixímonos cara a Tower Bridge, onde tamén puidemos observar a Tower of London. Despois de comer en St Katherine’s Docks, cruzamos a ponte e demos un paseo por South Bank ata chegar a Borough Market, alí tivemos unhas boas vistas do famoso Skyline de Londres e recoñecemos lugares como o City Hall, o Globe Theatre ou a Tate Modern. Logo, cruzamos o Millenium Bridge ata Saint Paul's Cathedral. Despois de observala, collemos o metro ata King Cross Station, onde vimos o popular andén 9 ¾ de Harry Potter e tamén a St Pancras. 

O seguinte día comezámolo nun dos lugares máis alternativos de Londres, o Camdem Market, no cal tivemos tempo libre para observar todas as tendas e decoracións tan orixinais. A seguinte parada serían os Kensington Gardens, co Kensington Palace de por medio, e o Albert Memorial e o Royal Albert Hall, momento no cal tivemos a sorte de ver unha homenaxe aos oitenta anos do discurso de Winston Churchill anunciando o final da II Guerra Mundial con avións de guerra. A continuación, dirixímonos ata o Natural History Museum e máis tarde a Harrods, inmensos e luxosos almacéns nos que non fomos capaces de atopar moitos produtos ao noso alcance. Por último, fomos a Hyde Park, onde vimos o seu espectacular lago cos fermosos cisnes e tamén onde pasamos un momento moi divertido xogando a xogos tradicionais ao aire libre. Cando rematamos de pasear polo parque collemos un dos famosos buses ata Picadilly, o Double Decker de dous pisos. Ceamos e volvemos ao hotel para rematar ese intenso día. 

No noso último día por Londres, as primeiras paradas serían Trafalgar Square e o Buckingham Palace. Máis tarde, dirixímonos ata St James Park, onde descansamos para despois dar un paseo ata a Westminster Abbey e o Big Ben. Ao rematar de apreciar estes asombrosos monumentos, cruzamos o Westminster Bridge, contemplamos as Houses of Parliament e comemos nos Jubilee Gardens, onde esperamos o momento de subir ao London Eye, dende onde teriamos unhas espectaculares vistas sobre a cidade, especialmente do Big Ben e do Palacio de Westminster. Máis cara á noite, visitamos a famosa tenda de xoguetes Hamley’s, en Regent Street, onde vimos espectáculos de todo tipo. Dende alí, marchamos cara a Carnaby Street e logo a Oxford Street, onde tivemos tempo libre para explorar as diferentes tendas. Por último, collemos o bus, ceamos e fomos cara ao hotel nun ambiente que xa soaba a despedida. 

O quinto día sería o momento de despedirnos totalmente de Londres, pois nada máis espertar marchamos cara ao aeroporto de Gatwick para coller o noso voo de volta a Santiago, lugar onde nos esperaba o bus para chegar a Burela e, finalmente, dar por rematada esta gran aventura. 

Podedes acceder a máis imaxes AQUÍ.

Ángel Blanco e Antía González - 4º ESO A

Concursos AC Os Matos 2025

Este ano celebramos as letras das cantareiras e da poesía popular oral. 

A Asociación Cultural Os Matos convoca os seus certames anuais.

 

O primeiro, o literario  (relato curto e poesía)

Así que como tes imaxinación de sobra, serás quen de crear un relato curto ou unha poesía. Pero pedímosche que incorpores unha copla de entre as seleccionadas polo alumnado de 1º de ESO. Pica aquí para abrir o documento.

 

O segundo, o de imaxe.

Inspirándote dunha destas coplas, fai un debuxo formato A4 horizontal.

 

Tes ata o 26 de maio para participar. 

 

Lembra: en lingua galega.

 

Entregaremos dous premios en cada categoría. Ler bases aquí.

Concurso de Portada da revista escolar Maruxía.

Tamén estamos á procura dos mellores debuxos ou composición fotográfica de temática libre para a portada e contraportada da revista escolar Maruxía n°31. 

Ollo co formato deste ano: Formato A3 horizontal para facer a contraportada e portada conxuntamente e deberá incluír o texto: Maruxía nº31

 

 

 

Orgullo galego: O galego nas redes sociais

O 24 de abril tivemos unha charla sobre canto usamos o idioma no noso día a día. Unha gran parte dos que alí estabamos usámolo a diario tanto na escola como cos amigos e nas nosas casas, así que cando usamos as redes sociais, este tamén acostuma ser o idioma utilizado. 

Algo que nos gusta moito, e que agora podemos facer, é ler, oír música en galego en calquera lado, pois temos uns grandes músicos no noso país. Coñécenos en todo o mundo a través das redes sociais, como, por exemplo, a música folk que tan ben fai Treixadura, as Tanxugueiras ou o gran gaiteiro Carlos Núñez. Podemos escoitar tamén debates ou un partido de fútbol, así como algunha película. 

Borxa, de Orgullo Galego, contounos cousas moi interesantes que nós descoñeciamos: que a Galipedia en galego naceu no 2003 ou que no 2006 no Facebook xurdiu a forma de escribir no noso idioma. Soubemos que en Francia se fai un estudo cada cinco anos sobre o uso das linguas en Internet e, no 2023, o galego aparece no posto 37 no Twitch. E, a nivel europeo, o galego está no posto 170 por número de falantes por territorio. 

Orgullosos de ser Galegos/as. 

Irene Rivas Iglesias - 3º ESO B

Borxa González, de Orgullo Galego, foinos preguntando canto tempo empregabamos as redes sociais no noso día a día, o tempo que perdemos nelas e cales tiñamos. Despois, explicounos pouco a pouco a importancia que tiña o galego a nivel de Galicia e a nivel mundial e tamén nos ensinou varios vídeos de xente coñecida usando o galego nas súas redes e, finalmente, ensinounos as súas canles e o que facía nelas. 

A miña opinión persoal é que me gustou bastante ter esta conferencia porque, aos poucos, vou apreciando máis o galego. 

Podedes acceder a máis imaxes AQUÍ.

Noel Cayón Meitín - 3º ESO B

Lectura e familias.- Despois da ESO: o Bacharelato e a Formación Profesional

Visita de AFAN ao CM de Peiteado e Cosmética Capilar

Hoxe volvemos a vernos! Si, é un gusto volver recibir os membros da asociación AFAN de Burela un curso máis co propósito de axudarlles no mantemento e mellora da súa imaxe persoal. 

Vaia por diante o noso recordo para aqueles usuarios que por desgraza non puideron chegar a estar hoxe entre nós. Queremos achegar o noso agarimo na súa memoria aos seus familiares, amigos e coidadores. 

Desde o departamento de Imaxe persoal do IES Perdouro sumámonos tamén ao sentimento de tristeza que deixou a despedida en cada unha das cooperantes desta marabillosa asociación que fixeron un labor extraordinario por e para eles e para todo o conxunto da sociedade. Por suposto que, AFAN, sempre deixades unha pegada nas nosas vidas e sobre todo na do noso alumnado que hoxe rematou esta actividade de peiteado entre choros de emoción ao despedirse ata o vindeiro curso. 

Foron os nosos estudantes de primeiro curso do ciclo de Peieado e cosmética capilar os que empatizaron co labor desta asociación querendo aportar o seu gran de area na desestigmatización, botándose a traballar coas diferentes técnicas de hixiene e acondicionamento capilar, peiteados e estética de mans. Todas as técnicas aprendidas no centro educativo hoxe desenvolvéronse dentro dun ambiente de respecto. Coa tranquilidade de saber como afecta unha enfermidade neurolóxica ao individuo e como impacta na propia persoa e no seu contorno foron quen de traballar coa seguridade de que saben como facelo en equipo, planificando e organizando o contorno de traballo para que os usuarios de AFAN puideran ser recibidos e atendidos con éxito no coidado da súa imaxe sen contribuír nin o máis mínimo a ocasionarlles danos. 

Logo da visita, as modelos de peiteado agasallaron o noso alumnado e profesorado cuns chaveiros feitos á man acompañados dunha tarxeta que reflectía a seguinte frase: “GRAZAS POLO VOSO ESFORZO E DEDICACIÓN, SEREDES UNS GRANDES PROFESIONAIS.” 

Concordamos coa frase tan acertada. O elenco de profesorado que formamos parte deste ciclo formativo sabemos que grazas á colaboración destas entidades con nós faise posible que formemos en conciencia os futuros profesionais de peiteado co obxectivo de abordar os servizos que se prestan acompañados dun trato e atención exquisita a persoas que requiren dunha atención máis persoal. 

Acabamos cunha frase moi familiar: “mentres uns tratan de lembrar, nós estaremos aquí sempre para non esquecervos! 

Ata sempre queridos amigos! Sodes unha honra! 

Tedes imaxes desta entrañable visita AQUÍ.

Dpto. de Imaxe Persoal. IES PERDOURO.

O IES Perdouro vencedor da IV Olimpíada de Robótica da Universidade da Coruña

O pasado 4 de abril celebrouse no Campus de Ferrol a IV Olimpíada de Robótica, organizada pola Escola Politécnica de Enxeñaría da Universidade da Coruña (UDC). No evento participaron arredor de cincuenta equipos, repartidos entre as categorías Promesas e Elite.

O alumnado do IES Perdouro competiu cunha actuación moi meritoria, logrando catro dos sete premios posibles, entre eles o do equipo vencedor absoluto na categoría Elite.

Había tres tipos de probas, nas que levabamos varias semanas traballando e preparando. A primeira era un segueliñas, que consistía en que o robot debía seguir unha liña marcada no chan e sortear os obstáculos. A segunda proba era o varredor, que consistía en localizar e expulsar catro latas de refresco nun ring circular sen saírse del. E a última proba era a de sumo, que consistía en expulsar ao opoñente do ring e que o teu robot permanecera nel.

Despois de cinco horas de competición con pequenas pausas para comer e descansar, remataron as probas e os máis de 200 estudantes que competimos dirixímonos ao salón de actos do campus, onde nos recibiron varias autoridades e profesorado da Universidade da Coruña. Despois de varias intervencións nas que felicitaron a todo o alumnado participante e falaron da Olimpíada e da Escola de Enxeñaría, continuaron coa entrega de premios.

O equipo Burela-bot, de 4º de ESO, proclamouse vencedor absoluto da Olimpíada, obtendo o premio Todoterreo (premio ao equipo máis regular). Ademais, o equipo Torques-bot quedou primeiro nas probas de sumo (premio Titán de Ouro) e de segueliñas (premio Correcamiños de Ouro). Nesta última proba, o equipo Reliño-bot quedou en segundo lugar (premio Correcamiños de Prata).

Despois de recibir os premios e de facer unhas fotos de grupo, fomos comer ao centro comercial Odeón e logo regresamos a Burela.

Podedes ver máis imaxes AQUÍ.

Antía Rodríguez Mon - 4º de ESO B

Actividades do departamento de Imaxe Persoal na Semana do Benestar 2025

O alumnado de primeiro curso do ciclo de Peiteado e cosmética capilar participou coas seguintes actividades na Semana do Benestar aportando os seus coñecementos ao alumnado visitante: 

Por unha banda os asistentes que nos visitaron sometéronse a exame capilar con medios diagnósticos como a microcámara, un dispositivo que mostra a grande escala a anatomía e fisioloxía do coiro cabeludo e o cabelo. A análise con este aparello é a fase previa a calquera procedemento técnico nun salón de peiteado no que en primeiro lugar se poden observar posibles alteracións do coiro cabeludo e do cabelo para logo seleccionar os cosméticos axeitados ao estado que presenta o modelo que se analiza co fin de aplicar e aconsellar os tratamentos cosmetolóxicos que mellor se adapten a cada caso en particular. Logo xa se poderán realizar as tarefas de peiteado con maior seguridade e control.

Posteriormente, os convidados aos nosos talleres de Imaxe persoal puideron experimentar técnicas de estética de mans e pés concienciándoos de manter unha boa saúde dos mesmos. Para iso, incorporáronse técnicas de hixiene e coidados de mans e pés realizando diferentes tratamentos a base de parafina, cosmético que confire unha hidratacion profunda á pel. Apoiados dunha presentación proxectada sobre os coidados de mans e pés e cunha correcta alimentación conseguiuse que os visitantes saíran aprendidos para o autocoidado. A través dun xogo interactivo de preguntas e respostas, os usuarios adquiriron conceptos de xeito divertido. 

Tamén percorreron o taller de hixiene capilar e peiteado, onde aprenderon a técnica do correcto lavado do coiro cabeludo e cabelo. Para aprender isto o noso alumnado do ciclo de Peiteado explicou de xeito interactivo a forma máis sinxela e correcta de realizar esta práctica de hixiene e acondicionamento capilar instruíndo na elección da cosmética axeitada para que os asistentes, no seu domicilio, poidan levar adiante unha intervención axeitada no seu cabelo e lucir limpo e acondicionado.

Logo disto, percorreron o taller de estilismo no que o alumnado visitante aprendeu a recoñecer a súa xeometría facial determinando o tipo de rostro que posúen co fin de aplicar un correcto deseño e depilación de cellas que potencia a súa expresividade e beleza. Para conseguilo, o alumnado do ciclo de Peiteado explicou de maneira breve e sinxela os diferentes tipos de rostro a través dunha proxección para logo pasar a realizar un diagnóstico personalizado a cada un dos asistentes explicándolles a maneira correcta de «depilar » de xeito mecánico (con pinzas) as súas propias cellas tendo en conta a xeometría máis axeitada. 

E para enriquecer esta actividade colaborativa, desde o departamento de Imaxe persoal impartiuse un taller de colorimetría aplicada á imaxe persoal co obxectivo de que os asistentes recoñezan as cores que mellor resaltan as súas calidades físicas: pel, ollos e cabelo, equilibrando e proporcionando as liñas de expresión e gañando en beleza. 

Tamén aprenderon as emocións que transmiten as cores a través da roupa, do cabelo e da maquillaxe. Explicouse a importancia de poder conxugar a beleza coa capacidade de comunicar emocións a través das cores que vestimos e contribuír a fidelizar a representación da propia individualidade conseguindo mostrar realmente quen somos en equilibrio co que queremos que os demais perciban de nós. En definitiva, que a nosa imaxe persoal vaia en liña coa nosa percepción. 

 «A imaxe persoal é sinónimo de comunicación»

Podedes acceder ás imaxes AQUÍ.

Departamento de Imaxe persoal do IES Perdouro

Participación en FP Innova 2025

Do 25 ata o 28 de marzo catro alumnos de 2º de Servizos Administrativos (Abraham, Christian, Elvis e Fabio) e dúas alumnas de 1º de CB de Servizos Administrativos (Esther e Idaira) fomos acompañados das nosas titoras (Patricia e Yolanda) a FP Innova a presentar a nosa empresa de peites chamada Peinouro Cosmética. Nesta feira de innovación explicamos e axudamos ás persoas a empaquetar os seus peites. Os produtos foron deseñados polo Departamento de Imaxe Persoal; a trituración dos plásticos cos que estaban feitos polos departamentos de Mecatrónica, Mecanizado e Fabricación aditiva; da comercialización encargámonos nós (Administración) e a decoración do noso posto na exposición foi obra dos departamentos de Electrónica e Fabricación aditiva. 

O día 25 collemos as cousas, que tiñamos preparadas no instituto metidas en caixas, e todos xuntos axudamos a colocalas no autobús. Despois de aproximadamente dúas horas e media de viaxe e con certo cansazo, chegamos a Santiago a deixar as maletas no hotel EXE e colocar todo o necesario para o día seguinte en FP Innova, na Cidade da Cultura. 

Unha vez tivemos xa todo preparado e ben colocado, fomos satisfacer as nosas ganas de comer a un bar/restaurante preto do noso hotel, chamado Larada SCO. No que quedaba de tarde e noite fomos visitar a fermosa cidade de Santiago de Compostela e fomos aprendendo cousas, como por exemplo, das estatuas das Marías, as dúas irmás máis famosas de Santiago que foran violadas e os seus irmáns foran todos asasinados. Elas eran moi coñecidas por pasear todos os días polo parque onde se atopan as esculturas. 

Por fin chegou a noite para poder cear polo centro da cidade. Desgraciadamente non ceamos moi ben e puidemos presenciar un problema administrativo. Ao día seguinte levantámonos cedo para poder almorzar no buffet do hotel, onde estivemos moi a gusto mentres nos preguntabamos se estabamos nerviosos. 

Xa en FP Innova, estivemos desde as 9:30 aproximadamente ata as 14:00 traballando en equipo e fomos tamén coñecendo un pouco os proxectos das demais persoas da FP de toda Galicia. Comemos no buffet do restaurante da Cidade da Cultura, onde vimos a Alfonso Rueda rodeado de cámaras e alí coñecemos a un grupo do Politécnico de Lugo. 

Despois da comida e deixándolles ás profesoras poder comer, a partir das 16:00h volvemos todos a poñernos mans á obra. Despois dun día un pouco esgotador e de moitas emocións e deixando ao lado as pequenas timideces, puidemos cear e descansar nas Cancelas, o coñecido centro comercial de Santiago.

Ao día seguinte volvemos á rutina, xa que tivemos que seguir traballando e coñecendo xente de toda Galicia. Aproveitamos tamén o noso tempo libre saíndo de dous en dous a ver a feira. A miña compañeira e eu iamos investigar que era o que podiamos facer ou probar de cada posto, podendo levar para o final do día moitas cousas novas para o hotel. Unha vez pasada a longa mañá e tarde, chegou a noite e fomos cear no mesmo bar/restaurante do primeiro día. 

O venres, cansos e tristes porque xa era o noso último día alí, aproveitamos a mañá e parte da tarde volvendo a visitar os postos e coñecendo os talleres con entrada para poder levar cousas de recordo. Ese día puidemos comer no buffet coas nosas titoras por primeira vez. Eu penso que foi o día no que mellor comida houbo. Tempo despois, ao xa acabar de comer, tivemos que recoller todo con maior autoestima e seguridade ca o primeiro día e cunha tristeza moi grande polo noso regreso á casa. Despedímonos das persoas coas que convivimos durante eses días e regresamos á casa cun sorriso moi grande no rostro, recordando os nosos inesquecibles momentos xuntos. 

Nunca olvidarei eses días, nos que todo era despreocupacións, sorrisos, amizades e confianza. Dou as grazas aos meus compañeiros deses días polos momentos de risas e que me deron confianza desde o primeiro día e tamén damos as grazas ás nosas titoras, porque sen elas, e sobre todo sen Patricia, esta experiencia non podería ser posible.

Podedes ver máis imaxes AQUÍ. 

Idaira Fernández Fernández - 1º CB Servizos Administrativos

Día do Libro 2025

O 23 de abril celébrase o Día do Libro e o alumnado de 4º ESO C quixo mostrarnos qué libros lles gustaron ao longo do seu itinerario lector. 

Agardamos que a vós tamén vos gusten. 

Entrega de premios Torneos San Xoán Bosco 2025

O pasado 11 de abril a nosa Asociación Cultural Os Matos fixo entrega dos premios dos Torneos de San Xoán Bosco.

 

Moitos parabéns aos campións e subcampións.

Aproveitamos para felicitar ao departamento de Fabricación aditiva polo deseño e impresión dos magníficos trofeos!

 

Accede ao albúm de fotos AQUÍ. 

Entrega de premios Torneos San Xoán Bosco 2025

Damos a coñecer os campións e subcampións dos Torneos San Xoán Bosco celebrados nos recreos de decembro a abril na biblioteca e no pavillón grazas á supervisión dos profesores Miguel Rodríguez Fernández e Emérito Fernández Cabaleiro.

Damas: 

• Campión: Miguel Niñe Andión - 1º ESO A
• Subcampión: Dylan Alberto Farroñán Palacios - 1º ESO A

Xadrez: 

• Campión: Xoel Casas Rodríguez- 1º Bacharelato A
• Subcampión: Nicolás Cayón Meitín - 2º Bacharelato B

Crebacabezas: 

• Campioas: Maite Candia Barreira e Julia Martínez Casas - 4º ESO A
• Subcampións: Sara Rodil Lamas e Sergio Gómez Couto - 4º ESO A

Fútbol: 

• Campión: 3º ESO A
• Subcampión: 2º Bacharelato A

Baloncesto: 

• Campión: 3º ESO B
• Subcampión: CFGM Instalacións de Telecomunicacións

Moitos parabéns aos gañadores e felicitamos a todos os participantes por facer do deporte un dos vosos mellores pasatempos durante os recreos activos do centro.

Hugo Gorgojo Basanta irá á fase internacional da Olimpíada de Xeoloxía

Hugo Gorgojo Basanta participou o 12 de febreiro con outros compañeiros do IES Perdouro na fase autonómica da Olimpíada de Xeoloxía, que se celebrou en San Sadurniño. Os resultados obtidos levárono á fase nacional, que tivo lugar en Tremp e no Geoparc Orígens (Lleida) este sábado día 6 de abril. Na Olimpíada Española de Xeoloxía houbo 98 participantes. Consistiu no exame teórico individual e nunha proba práctica realizada en equipos de catro membros. 

Ademais do anterior, a xornada incluíu visitas ao Centre d'Interpretació de Sòls dels Pirineus, ao Mirador de Claret, ao Estany de Basturs e ao xacemento de pegadas de dinosauro de Orcau. 

Hugo conseguiu pasar á fase internacional desta competición académica e viaxará a Ji'ning en China, do 7 ao 17 de agosto acompañados doutros tres estudantes das provincias da Coruña, Badaxoz e Salamanca, que conformarán o equipo español. 

Moitos parabéns, Hugo! E moita sorte para esta experiencia, que seguro que será inesquecible. 

II Semana do Benestar emocional e a Convivencia

Este ano a Semana do Benestar Emocional e da Convivencia tivo lugar do 24 ao 28 de marzo. Durante eses días, no IES Perdouro leváronse a cabo diversos tipos de actividades. O noso grupo de 1º de ciclo básico de Servizos Administrativos participou en tres delas. 

A primeira actividade tivo lugar o mércores 26 de marzo e consistiu nun taller de baile que impartiu unha rapaza de Foz chamada Pili. Na pista do instituto, xunto ao alumnado de 3º e da ESO organizámonos en filas e comezamos a bailar ao ritmo de diferentes cancións, todas elas moi pegadizas. A medida que avanzaba a clase faciamos bailes máis emocionantes, divertidos, entretidos e con moita actividade física. 

Ese mesmo día acudimos a un taller de asesoría de imaxe persoal impartido polo alumnado do ciclo medio de Peiteado e Cosmética Capilar. Como na nosa clase somos un total de catorce persoas, dividímonos en dous grupos. 

No meu caso, en primeiro lugar, estudáronme o pelo a través dunha cámara para saber se o tiña graxo, con moita ou pouca densidade, como tiña as puntas, etc. A continuación, fixéronnos un tratamento nas mans con parafina para hidratarnos a pel; mentres tanto, fixemos un kahoot para comprobar o que aprenderamos. 

A segunda parte do taller consistiu en ver a forma da nosa cara, os seus trazos, proporcións, etc. Para finalizar ensináronnos un vídeo para ver como lavar o pelo correctamente e preguntáronnos se o coidabamos, se botabamos produtos, etc. 

A terceira e última actividade foi un taller de meditación dirixido por Hugo, un profesor que imparte clases en Viveiro e Burela. Comezamos a clase facendo estiramentos durante trinta minutos e, cara ao final, deitámonos no chan para relaxarnos cos sons que facía el mediante instrumentos como maracas, cuncos tibetanos e algún outro. 

Outras actividades levadas a cabo foron charlas sobre resiliencia ou sobre as emocións na publicidade; talleres de maxia impartidos polo profesor Alfredo Llano; talleres de malabares e obradoiros de regueifas. 

Na miña opinión, todas as actividades foron moi interesantes, pero a min a que máis me gustou foi o taller de meditación xa que me relaxou moito e me fixo descubrir algo que eu non sabía que me podía axudar tanto como é o ioga. Aínda así, volvería repetir calquera das tres actividades. 

Agardo que para o curso que vén volvan celebrar esta semana e recomendo a todo o alumnado que participe nas actividades xa que me parece moi divertido poder facelo dentro do instituto. 

Podedes acceder a máis imaxes AQUÍ. 

Ainhoa López Franco - 1º CB Servizos Administrativos

Visita a Correos do CB de Servizos Administrativos

O 18 de marzo o alumnado de 1º de Ciclo Básico de Servizos Administrativos visitamos a oficina de correos de Burela. 

Chegamos sobre as 10:30 da mañá e alí recibiunos o director, Manuel. Antes de entrar explicounos un pouco como funcionaba todo. Despois entramos e quedamos na entrada vendo os apartados de correos, unha especie de pequenos departamentos para recibir correspondencia polas que as empresas e algún que outros particulares pagan uns 80€ o ano. Ti pagas esa cantidade de diñeiro e tes unha desas caixas do correo ao teu nome, é dicir, a xente pode ir alí e depositar as cartas para ti nese “buzón” que se encontra, como xa dixen, na entrada da oficina de correos. 

Logo de estar alí un anaco facendo algunhas preguntas e escoitando todo o que nos contaba, entramos na zona de admisión ou oficina de atención ao cliente. Alí Toni, unha das traballadoras, contounos un pouco o que se podía facer en Correos xa que podes desde enviar cartas e paquetes ata realizar trámites da DXT, comprar libros, facer devolucións, rascas da once... Tamén nos falou sobre as cartas certificadas e os avisos de chegada. Alí nos explicou un pouco de todo, sempre con boa cara e de forma moi amena. 

Despois entramos na zona de tramitación, un almacén onde se deixan os paquetes que non se chegan a entregar na casa e onde se gardan os que se envían cando alguén fai un pedido por internet e marca Correos como punto de entrega. Tamén falamos sobre os burofax e a súa fiabilidade, xa que un burofax, cando o escribes, entrégase co texto tal cal foi escrito, sen ningún erro. 

Ao rematar alí accedemos á ultima zona da visita, a zona de reparto ou zona de distribución. Alí recibiunos Teresa, unha rapaza que fora un anaco antes facer reparto a Cervo. Explicounos que había dous tipos de repartidores, os de rural e os de urbano. Ela era de rural e explicounos como eran as rutas e como estaban distribuídas. Tamén nos dixo que as cartas antes de ser entregadas ao domicilio tiñan que ser enviadas a Santiago, por iso unha carta tarda case o mesmo en chegar a Madrid que en chegar a Xove. Ensinounos tamén onde veñen os paquetes nos camións, veñen nuns “carriños” chamados “xaulas”. 

Mostrounos despois un aparello chamado PDA. Era un lector de código de barras que utilizan para confirmar a entrega dun pedido, para recoller a firma do cliente ou mesmo para facer chamadas. Tamén nos explicou a diferenza entre cartas normalizadas e non normalizadas. As cartas normalizadas son as que teñen tamaño estándar, as de toda a vida, e as non normalizadas son as que teñen tamaños inusuais.

Para finalizar fixemos unha rolda de preguntas totalmente improvisada. Ela contounos moitas cousas e nos preguntamos moitas cousas tamén. Falamos sobre os estudos necesarios, sobre os vehículos utilizados (coche, moto, a pé...), sobre as prácticas... 

Xa ao rematar, algúns alumnos agardamos fóra xa que a nosa titora aproveitou a visita para realizar uns trámites e, mentres estabamos fora comendo algo, chegou un repartidor e estivemos falando con el. Explicounos de que zona viña, por que ía na moto e moitas cousas máis. 

Foi unha visita moi amena e entretida. Dende o principio fomos recibidos con moi boa cara, con educación e respecto. O mesmo recibiron eles pola nosa parte. Produciuse algún que outro percance pero nada importante que non nos permitira continuar coa visita. Foi moi interesante e totalmente recomendable.

Días despois, para continuar aprendendo sobre a correspondencia, na biblioteca realizamos un taller de ensobrado. 

Podedes ver máis imaxes AQUÍ.

Karen da Costa Pérez - 1º CB Servizos Administrativos