Felicitación de Nadal do alumnado de Literatura Universal

Moitos parabéns polo voso traballo e moitas grazas pola vosa orixinal felicitación! 

Entrega de premio Concurso Taboleiros de Nadal

María José, Andrea e Sandra foron entregar esta mañá uns detalliños aos premiados do concurso de Taboleiros de Nadal.

• - 1º Premio: 4º ESO PDC 
• - 2º premio: 1º ESO B e 2º Bacharelato B (empatados a puntos) 
• - 3º premio: 4º ESO B Moitos parabéns a todas as clases que participaron. 

Houbo moita calidade e creatividade. 

Accede ao álbum de fotos da entrega de premios AQUÍ.

Entrega de premios Certame Postal de Nadal

Hoxe fallamos o concurso de Postal de Nadal e entregamos os diplomas do certame.

O dpto. de Educación Plástica e Visual traballou co seu alumnado de 1º de ESO sobre como aproveitar un elemento da vida cotiá para a partir del facer unha creación artística.

 

As premiadas son :

• Eva Núñez Lago -> 1° premio
• Lucía Otero González -> 2° premio
• Antía Domínguez Piñeiroa -> 3° premio

O debuxo de Eva representará a tarxeta institucional do IES Perdouro.

 

Accede ao albúm de fotos da entrega de premios AQUÍ.

 

Parabéns ao alumnado de Andrea e Sandra pola súa creatividade.

 

 

Felices Festas!

 

Fallo do concurso Taboleiros de Nadal 2023

 Nesta edición do concurso Taboleiros de Nadal os grupos gañadores foron: 

- 1º Premio: 4º ESO PDC

- 2º premio: 1º ESO B e 2º Bacharelato B (empatados a puntos)

- 3º premio: 4º ESO B

O traballo en equipo dá os seus froitos. Todo o alumnado de cada grupo recibirá un pequeno agasallo e como equipo obteredes un diploma conmemorativo. Grazas por contaxiar as aulas de ambiente de Nadal. 

Moitos parabéns!

Grupo gañador de Aulas Limpas no mes de novembro: 4º ESO B

Este mes de novembro a aula máis limpa e ordenada foi a 204, a pertencente a 4º ESO B. Este grupo destacou por manter a súa aula recollida e por estar pendentes de ter o encerado limpo, o proxector e o ordenador apagados ao final das clases, por recoller o papel na papeleira azul e por ter o taboleiro moi ordenado. 

Recordade que continuamos participando no concurso Pilabot, polo tanto, todas as aulas deben ter unha caixa ou recipiente para recoller pilas e outro para a reciclaxe de instrumentos de escritura gastados, que xa non sirvan. 

Parabéns para a aula gañadora! E moito ánimo para o resto dos grupos. Sabedes que hai premios mensuais e un premio anual para a mellor aula. 

Xa temos árbore de Nadal 2023-24

Este curso a árbore vén chea de sorpresas: casiñas, ourizo cachos, renos e unha morea de orixinais adornos. 

Con ela, o IES Perdouro deséxavos un feliz Nadal!

Amplíase o prazo para a elaboración dos taboleiros de Nadal

Obradoiro: A ciencia dentro dunha pompa de xabón

O xoves 30 de novembro de 2023, a quinta hora da mañá, o alumnado de 3º da ESO A do IES Perdouro de Burela, foi á biblioteca para encontrarse con Marga, quen máis tarde lles explicou moitas curiosidades sobre as pompas de xabón. 

A actividade comezou cunha breve explicación sobre que é o xabón e de que está formado, e máis tarde falaron sobre como se facían as pompas e tamén sobre a tensión superficial. Tras a explicación leváronse a cabo varios experimentos. 

• O primeiro experimento consistiu na fuxida de materiais que flotan na auga ó estar en contacto co xabón: 

◦ Para isto puxéronse tres escarvadentes nunha cunca de auga formando un triángulo e tamén había que mollar un dedo en xabón; ó tocar o centro do triángulo co dedo enxabonado, os escarvadentes fuxían do xabón desfacendo así a forma xeométrica. 

◦ O mesmo pasou á hora de botar pementa na cunca de auga. Ao tocar o líquido co dedo cheo de xabón, a pementa que estaba situada ó redor dese punto fuxía e, neste caso, afundíase debido ó pouco peso. 

Tras o experimento, chegamos á conclusión de que isto era producido porque o xabón desfacía a tensión superficial que había na auga. Esta é producida pola atracción de moléculas de H2O entre si e provoca que algúns materiais estean na súa superficie sen afundirse (como o exemplo da pementa) e que outros materiais ao formar formas xeométricas, sexan atraídos cara ao seu propio centro impedindo a súa separación (como os escarvadentes). 

• O segundo experimento consistiu en meter dúas láminas ou placas cadradas unidas entre si con parafusos nun recipiente con xabón. Os parafusos facían formas xeométricas visualmente, como cadrados, triángulos... Entón, cando as láminas saían do caldeiro con xabón podíase apreciar como se facían figuras que tocaban sempre nos parafusos. Estas figuras representaban a área mínima das dúas láminas xuntas. Isto podía explicar que as películas de xabón sempre intentaban facer a súa área mínima para que ao formarse, a enerxía que necesitan fose mínima. Por exemplo, as pompas de xabón sempre son redondas debido a que esa é a forma que representa a súa área mínima sempre coa mesma cantidade de aire. 

• Por último, como terceiro experimento, Marga permitiunos observar como diferentes figuras 3D (feitas por ela mesma manualmente con arames de cobre) formaban no seu interior pompas de xabón ao metelas no recipiente indicado anteriormente. As diferentes figuras sempre tiñan unhas liñas de xabón que unían os vértices das figuras coa pompa que se formaba no medio; estas liñas sempre formaban ángulos de 120º coa pompa. Marga tamén nos explicou que un dedo seco pode romper unha pompa ou unha película de xabón. Pero un dedo mollado en xabón non pode romper a pompa ou película e permítenos atravesala completamente. Sobre isto comentounos que se tes unha figura semiaberta pechada cunha corda que se pode manipular, o dedo mollado en xabón, pode aumentar o tamaño da película tirando da corda. Aínda así, hai que facer un pouco de forza para manipulala, porque como xa expliquei anteriormente, a pompa sempre fai forza cara ao seu interior para manter sempre a superficie mínima.

Foi un obradoiro moi interesante e entretido!

Podedes acceder ás imaxe AQUÍ. 

Xosé Riveira Alonso - 3º ESO A

Obradoiro de pompas de xabón - Día da ciencia en galego

Co gallo do mes da ciencia en galego, organizamos na biblioteca un obradoiro ideado pola profesora Marga L. Periago sobre Pompas e burbullas de xabón. Este obradoiro foi destinado ao alumnado de 3º ESO o pasado 30 de novembro e o día seguinte, no recreo, o alumnado puido facer pompas e burbullas no  patio cos artefactos que fabricou Marga.

Marga falou da tensión superficial das pompas, dos remuíños de cor, do efecto Marangoni (física), de superficie mínima e distancia mínima, de ángulos de 120º (xeometría) e de dúas persoas fundamentais como foron Agnes Pockels (Venecia, 1863) e Joseph Plateau (Bélxica, 1801).

Se queredes saber máis en detalle, haberá que esperar pola crónica que farán o alumnado.

Mentres tanto, podedes vizualizar o albúm de fotos AQUÍ.

Campionatos San Xoán Bosco 2024

Durante os recreos celebraremos na biblioteca as eliminatorias dos campionatos de San Xoán Bosco das modalidades de xadrez, os luns; damas, os mércores e cubo de Rubik, os venres. 

Prestade atención ao taboleiro de anuncios coas datas das eliminatorias!

 Aquí deixamos un álbum de fotos que iremos actualizando.

25 de novembro, "Onde máis doe"

O venres 24 de novembro, participamos nos actos programados pola Concellería de Igualdade e o CIM do Concello de Burela co gallo da conmemoración do 25 de novembro, Día Internacional para a Eliminación da Violencia de Xénero. Asistiu o alumnado de 4º de ESO. 

Primeiro, a concelleira de Igualdade, Sandra Fernández, recibiu o alumnado presente no Auditorio e presentou o documental ‘Onde máis doe’ sobre a violencia vicaria dirixido por Manane Rodríguez (2022). A proxección presentouse nun formato impactante que narra unha historia real de ameazas dun pai que mata o seu fillo de 11 anos a golpes de pa para castigar e facer sufrir a nai eternamente. 

Xa na Praza do Concello, deuse paso á lectura do manifesto institucional contra a violencia de xénero e a inauguración do Xardín da Memoria, actividade realizada co alumnado dos institutos de Burela. No noso caso, o alumnado de 2º de ESO, redactou unhas tarxetas cos nomes de vítimas de violencia de xénero, traballo que os fixo pensar e que os sensibilizou pola dureza e inxustiza dos feitos.

O alumnado achegouse ata a mesa informativa onde recolleu folletos, chapas, pulseiras e bolsas conmemorativas. 

É necesario combater e sensibilizar día a día para acabar con  TODAS AS VIOLENCIAS.

Accede á reportaxe AQUÍ.

A ciencia dentro dunha pompa de xabón

O xoves 30 de novembro o alumnado de 3º ESO asistirá a un obradoiro preparado por Marga L. Periago no que empregarán líquido xabonoso con fins científicos. Veredes como sairán pompas de diferentes formas e tamaños. 

Mais non só o alumnado de 3º ESO poderá desfrutar da elaboración de pompas. O venres 1 de decembro no recreo quen queira probar a crear burbullas con xabón que se achegue a Marga no patio. 

Concurso Taboleiros de Nadal 23-24

Convócase unha nova edición do concurso Taboleiros de Nadal. Cada grupo poderá decorar o taboleiro da súa aula de referencia baixo a coordinación da súa titora ou titor. 

Poderán participar ESO, Bacharelato e Ciclos formativos. 

A titora ou titor de cada grupo debe entregar a ficha de inscrición que se enviou ao correo en Vicedirección ou Secretaría. 

As normas son as seguintes: 

1. Decorade o taboleiro da aula tendo en conta a orixinalidade, a estética e tamén a sostibilidade, facendo uso de materiais reciclados. 

2. Cada grupo decorará o taboleiro da súa aula de titoría. 

3. En canto a materiais, PROHÍBESE a cinta de pegar de dobre cara, o pegamento e a silicona directamente encima do material do que está feito o taboleiro, xa que este debe quedar intacto cando se retire a decoración de Nadal. 

4. A decoración que se valorará para este concurso é só a do taboleiro. 

5. O luns 15 de decembro a última hora da mañá o taboleiro debe estar rematado.

Aulas Limpas: a mellor aula do mes de outubro foi a de 4º PDC

Este mes de outubro a aula máis limpa e ordenada foi a 101, a pertencente a 4º PDC. Este grupo xa destacou o curso pasado por manter a súa aula moi recollida, por estar sempre pendentes de recoller pilas e material escolar para reciclar e por ter sempre o seu taboleiro ben organizado e con traballos expostos. 

De todos os xeitos o grupo de 4º PDC está seguido moi de preto por 2º Bac!

Recordade que continuamos participando no concurso Pilabot, polo tanto, todas as aulas deben ter unha caixa ou recipiente para recoller pilas e outro para a reciclaxe de instrumentos de escritura gastados, que xa non sirvan. 

Parabéns para a aula gañadora! E moito ánimo para o resto dos grupos. Sabedes que hai premios mensuais e un premio anual para a mellor aula. 

Estaremos na Xornada de Bibliotecas escolares de Galicia 2023

Estamos convidadas a expoñer a nosa experiencia en canto a Traballos por proxecto na Xornada de Bibliotecas Escolares de Galicia (Sábado 18 de novembro)..

O noso proxecto Construbot, Comeza a partida! foi merecedor do premio ao mellor proxecto realizado con metodoloxía científica no VIII CONCURSO DE TRABALLOS POR PROXECTOS convocado por Bibliotecas Escolares de Galicia. 

O noso proxecto desenvolveuse no curso 21/22 co alumnado de 4º ESO. Aquí deixamos unha pequena presentación.

Concurso Día Mundial da loita contra a SIDA

Participa no concurso que anualmente convoca o Concello de Burela co gallo do Día Mundial da loita contra a SIDA. 

Crea a túa obra en tamaño A4 debuxando ou con outras técnicas dixitais e envíaa ou entrégaa ata o mércores 22 de novembro no propio instituto ou na Unidade de Drogodependencias de Burela. 

Se o teu deseño é o gañador, publícarano no calendario anual do Día da Sida e recibirás material de librería ou papelería por valor de 60 €. 

Anímate!

Mira as bases AQUÍ. 

Novembro: mes da ciencia en galego

 

Un equipo do IES Perdouro competirá na fase final da V Ciberliga da Garda Civil en Aranxuez

O alumnado de 4º de ESO participou o pasado día 10 de outubro na fase clasificatoria da V CIBERLIGA da Garda Civil, na modalidade Preamateur. 

Participaron un total de 850 equipos, formados por catro estudantes cada un, procedentes das comunidades de Galicia, Castela a Mancha e Madrid, entre os que se incluían os 7 equipos do IES Perdouro. Resolta a fase previa, clasificáronse 30 equipos para a fase final e entre eles está o formado polos nosos alumnos Álvaro Guisande, Danilson da Costa, David Baltar e Pablo Casas (equipo Los Invencibles) aos que lles damos os merecidos parabéns. Tamén felicitamos a todos os demais alumnos e alumnas do noso instituto que participaron, polo entusiasmo e a seriedade con que o fixeron, de maneira que a actividade resultou moi enriquecedora. 

A fase final será presencial, nas instalacións da Academia de Oficiais e do Centro Universitario da Garda Civil en Aranxuez (Madrid) o día 15 de novembro. Nesta fase, ademais do ciber-reto final, terán lugar divertidas actividades formativas. O alumnado tamén terá a oportunidade de compartir a experiencia con outras categorías como a Amateur (universitarios) ou a Profesional, na que participarán corpos policiais de varios países (por exemplo, o FBI). 

A Ciberliga é unha competición organizada en colaboración entre a Garda Civil e a Consellería de Educación, co obxectivo de concienciar ao alumnado en materia de ciberseguridade desde un enfoque real e práctico, mediante a posta en marcha dun proceso de gamificación, onde os participantes aprenden ciberseguridade xogando de maneira práctica e divertida. 

Máis información: 

Convocatoria do programa educativo “V CiberLiga 2023 modalidade preamateur": https://www.edu.xunta.gal/portal/node/40933 

MasterlabsCTF, sitio web para o acceso aos retos: https://ligagc.com/ 

Sitio web da V National Cyber League da Garda Civil: https://www.nationalcyberleague.es/

Canle de YouTube da National Cyber League GC: https://www.youtube.com/playlist?list=PL3N5rMPe7UIgDnnoEenK5p78ryF8Qg9fa 

Podedes acceder a máis imaxes AQUÍ. 

Encontro con Lucía Ferro, autora de "En Brandán"

Lucía Ferro estará na biblioteca do IES Perdouro, mañá venres, día 3 de novembro para falar de "En Brandán", a súa segunda novela.

O alumnado do club de lectura terá a oportunidade de intercambiar coa escritora palabras sobre o proceso de creación literaria así como aspectos desta novela policiaca.

 

Lucía Fernández Rodríguez, veciña de Barreiros, tamén escribe en galego e en inglés intervencións curtas publicadas na rede.  

Entrevista no xornal El Progreso 10/09/2023

Lectura e familias: Ana Ojea achegounos ao colectivo LGBTQIA+

Ana Ojea Alonso é profesora lesbiana visible de Cultura Audiovisual en Bacharelato de Artes e responsable de Diversidade Sexual, de Identidade de Xénero e Familiar e Titora LGBTIQA+ no IES Politécnico de Vigo. Tamén é cofundadora, coordinadora e socia promotora da Rede Educativa de Apoio LGBTIQ+ de Galicia. Ademais traballa como formadora de profesorado en diversidade sexual, de Identidade de Xénero e Familiar a través dos CFR/CAFI, colaboradora en diversas publicacións e na creación de recursos didácticos sobre diversidade sexual.

O martes 31 de outubro acompañounos no IES Perdouro dentro do programa Lectura e familias e informou sobre a lexislación que ampara ao colectivo LGBTQIA+, sobre a diversidade que engloba o colectivo, sobre os prexuízos que teñen que sufrir e sobre o acompañamento do que debería gozar desde a nenez e a adolescencia calquera que se inclúa entre as persoas non heterosexuais ou non cisxénero. 

Recomendou ademais algunhas lecturas como os libros de Lucas Platero, Noemi Parra, Camino Baró etc. En BiblioPerdouro podedes atopar moitas obras interesantes sobre esta temática. Botade un vistazo aquí ou buscade a pegatina do arco da vella. 

Podedes acceder a máis imaxes do encontro con Ana Ojea AQUÍ. 

Concurso de catrinas de 1º ESO

Nesta época de Samaín, coñecemos tamén tradicións doutras culturas. En México celébrase o Día de Mortos e, para iso, o alumnado de 1º ESO elaborou catrinas, caveiras decoradas, que expuxeron no 1º andar do edificio 1. O profesorado e o persoal non docente escollerá as tres mellores, que recibirán un premio. Moita sorte e parabéns polos vosos traballos!

Coñece a túa vila: ruta por Burela

Tal e como fixeron as promocións anteriores, no inicio do novo curso o alumnado de 1º ESO do IES Perdouro saímos a coñecer a nosa vila: Burela. 

A organización do centro decidiu que fósemos andando con seis profesores e profesoras: Fernando Losada, Sol Galdo, Fernando Lago, Miguel Rodríguez, Begoña Abad e Carmen Sampedro. 

Ás 8:30 reunímonos, dividíronnos en 2 grupos e saímos do recinto escolar ás 8:45. Nada máis baixar pasamos moi preto do Hospital da Mariña, moi importante para os cidadáns desta comarca. Seguimos a ruta e atopamos outro edificio importante: o Cuartel da Garda Civil. Aproveitando as vistas do alto de Burela, explicáronnos que "o faro non é faro" senón que é unha baliza. Tamén puidemos ver unhas plantas de menta, medicinais, que axudan a calmar a dor das ortigas. 

Dirixímonos á parte vella de Burela: a Vila do Medio. Alí vimos un cruceiro, unha cruz que axuda á orientación, unha casa tradicional galega e un hórreo, sobre o que nos deron información. Aprendemos que son estruturas típicas galegas fundamentais para gardar o millo e outros cereais. 

Entre o máis antigo que ten a nosa vila está a igrexa da Vila do Medio, unha impresionante construción do século X. Os nosos guías mostráronnos as famosas pinturas que contén o seu interior, as 3 campás e ofrecéronnos moitos máis datos que nos deixaron abraiados. Aproveitamos para facer unha foto de grupo nese fermoso monumento. 

Moi preto desa zona atópase un lugar idóneo para ver diferentes tipos de plantas típicas da vila tanto autóctonas como invasoras: alí puidemos ollar un groso castiñeiro centenario, xigantes eucaliptos, un muíño de auga e un río que fai que haxa musgo, fentos e acacias. Os salgueiros, toxos e a herba da pampa (planta invasora) encontrámolos aos poucos metros. 

Deixamos a zona vella de Burela e camiñamos en dirección á Marosa. Alí puidemos escoitar unha curiosa explicación da erosión da auga, que fai que as rochas polo impacto do mar se vaian convertendo nunha peculiar “tableta de chocolate”. 

De regreso vimos a "uña-de-gato" (outra planta invasora) e as Tetas da Vinculeira, emblema da riqueza arqueolóxica da Mariña. Para rematar a nosa andaina, vimos o antigo castro habitado polos galaicos onde se atopou o Torques de Burela tan famoso da nosa vila. Obviamente, non puidemos evitar estar uns intres parados desfrutando das vistas que nos ofrece Cabo Burela. 

Case sen darnos conta, xa era hora de voltar para o instituto e dar por terminada a xornada educativa.

Pódese acceder ás imaxes AQUÍ.

Gabriel Marrube Mendaña - 1º ESO A

Conferencia do neurobiólogo Carlos Spuch sobre o Alzheimer e outras demencias

Na xornada do martes 17 de outubro o alumnado de 1º de Bacharelato e CM de Peiteado e Cosmética Capilar acudimos a unha charla sobre o alzhéimer, unha enfermidade que afecta actualmente en España ao redor de 70.000 persoas. Esta actividade foi organizada pola Fundación Barrié e por AFAN Burela. 

O neurobiólogo Carlos Spuch explicounos cales son as causas da enfermidade, os datos máis relevantes sobre ela e como podemos axudar ás persoas que a sofren. 

O alzhéimer non afecta a todo o cerebro, senón só a unha pequena parte, a correspondente á fala, toma de decisións, comportamento e pensamento, entre outras. Pola contra, non afecta nin á memoria musical nin ás emocións, polo que a musicoterapia é unha das formas de atrasar a aparición desta enfermidade; tamén axuda a isto algunha das medicinas descubertas e o adestramento do cerebro. Sabemos tamén que a memoria non se perde, senón que fallan os lóbulos sinápticos, é dicir, as redes que conectan as neuronas entre si. 

Unha das preguntas máis frecuentes sobre este mal é: o alzhéimer é xenético? A resposta é non: é unha enfermidade que se dá a causa do noso ambiente aínda que, raramente, tamén pode ser xenética. 

En conclusión, para axudar ás persoas afectadas, deberiamos escoitar e interpretar o que nos queren dicir. Outra opción sería falarlles e poñelas en contexto da situación na que se atopan, para que poidan así expresar as súas emocións. 

Para rematar a charla, Carlos Spuch nomeou tamén diferentes persoas que padecían esta enfermidade ou algún outro tipo de demencia, como Carmen Sevilla, unha actriz española, e unha veciña da localidade de Burela, a cal estivo presente no acto. 

Pódese acceder a máis imaxes da actividade AQUÍ.

 Laura Alonso Fernández - 1º BACB

Charlas formativas abertas para as familias: Atención á Diversidade Afectivo-Sexual e de Xénero

Retomamos as conferencias de Escola de familia. A primeira das charlas programadas para este curso no marco do Programa Lectura e Familias será impartida pola profesora Ana Ojea Alonso. Falarase de educar en igualdade, da identidade de xénero, de educación afectivo-sexual e educación emocional na atención á diversidade.

Curriculum de Ana Ojea: Profesora lesbiana visible de Cultura Audiovisual en Bacharelato de Artes. Responsable de Diversidade Sexual, de Identidade de Xénero e Familiar e Titora LGBTIQA+ no IES Politécnico de Vigo.
Cofundadora, coordinadora e socia promotora da Rede Educativa de Apoio LGBTIQ+ de Galicia.
Formadora de profesorado en diversidade sexual, de Identidade de Xénero e Familiar a través dos CFR/CAFI, colaboradora en diversas publicacións e na creación de recursos didácticos sobre diversidade sexual.

Non faltedes á cita, previa confirmación de asistencia chamando ao 982 87 01 02.

Vémonos na biblioteca.

Martes 31/10/2023 ás 18h30.

Xa comezou Proxecto Neo!

A semana pasada comezou Proxecto Neo. Como cada mércores de curso escolar durante 13 anos, o equipo de radio do IES Perdouro realizou distintas entrevistas. 

Na emisión inicial desta tempada por fin puidemos estrear as instalacións de radio dos Polos Creativos. Os locutores deste primeiro programa do curso, que xa é o 393 desde o comezo de Proxecto Neo, foron Yanira, Hugo, Sara, Germán, Vanesa e Bernardo. A fotógrafa oficial é Lucía Rivas e no control técnico estivo Karina Parga, que contou coa axuda de Moustapha Sarr. 

Estas foron as persoas entrevistadas: 

- Anxo Rivas, locutor de Radio Foz 

- Miruca Parga, vicedirectora do IES Perdouro 

- Félix Pardo, profesor de Electrónica, do IES Perdouro 

- Ineida Moreno, alumna do CUALE de lingua portuguesa 

- Pepe Peinó, profesor e escritor 

- e María José Pardiñas, directora do centro. 

Proxecto Neo emítese en CUAC FM na Coruña, Radio Filispim en Ferrol, Xente de Teo en Compostela, Radio Piratona en Vigo e, este ano, como novidade, estará tamén na frecuencia de Radio Foz e Radio Valadouro.

Esta semana, novo programa, escoitádeo con atención!

Recordos e bos desexos para Ana

O pasado venres 30 de setembro tivo lugar a xubilación da profesora Ana Vázquez. Tras 32 anos como docente de Física e Química no noso instituto, rematamos xunto a ela esta etapa cun evento preparado por alumnado e profesorado.

Escribíronse mensaxes de bos desexos e recordos en pequenas tarxetas durante toda a semana, con palabras de rapaces e rapazas de diferentes grupos. O profesorado tamén realizou esta actividade e coordinou a sorpresa para Ana. 

Sobre as 13:00h reuniuse boa parte do instituto no edificio principal e cando entrou Ana, todas as mensaxes estaban expostas nun taboleiro. Ademais da entrega dun ramo de flores entre aplausos, o alumnado introduciu todas as mensaxes dentro dun gran tarro de cristal para que levara de recordo. 

Ana Vázquez, emocionada e envolta nun cálido ambiente de apertas e sorrisos, recibiu o recipiente con tantas cores como recordos leva do IES Perdouro. 

Con esta marmelada de emocións, desexámoslle con moito agarimo a mellor sorte para esta nova etapa.

Podedes acceder ás fotos AQUÍ.

Carla Paz Trelles - 4º ESO A

O Perdouroscopio

Este curso contamos no centro cun equipo de investigación. Chámase Perdouroscopio. 

O Perdouroscopio nace coa idea de proporcionar á comunidade educativa unha nova ferramenta de apoio e investigación no propio centro. Queremos estudar detalladamente a aparición ou as consecuencias de posibles diferenzas e obstáculos que impidan a convivencia no noso contorno e por iso vos animamos a suxerir a intervención do noso equipo nos casos en que a consideredes necesaria. 

Cres que debemos actuar? Podemos axudarche? 

Queremos acompañar e axudar a solucionar pequenos problemas centrándonos na investigación como primeiro paso para atopar solucións. Somos o apoio que necesitabas. Non dubides en contactar con nós no buzón da entrada principal. 

Ti suxires, nós investigamos!

Viaxe a JimSport e Conxemar do cliclo superior de Administración e Finanzas

Os alumnos do ciclo superior de Administración e Finanzas fomos de excursión os días 4-5 de outubro. O primeiro día fomos a Jim Sports, o maior distribuidor de material deportivo do territorio nacional. Alí, unha técnica explicounos con todo detalle a que se dedica a empresa, as subcontratas, e todos os procesos. Podo dicir que o que máis nos chamou a atención a todos foi a historia de como se creou a empresa e ata onde chegou así como todos os plans que teñen de futuro. Tras a presentación fixemos un percorrido polas instalacións, dende a parte administrativa, pasando polo almacén e a loxística, o ximnasio e os talleres de creación de produtos que eles venden. 

O segundo día, tras hospedarnos en Pontevedra, fomos a Vigo a Conxemar. Trátase dunha feira Española de Maioristas, Importadores, Exportadores e Transformadores de Produtos de Pesca e Acuicultura. Esta feira tiña 5 partes: exposición dos produtos conxelados, maquinaria, packaging, estans de exportación mundial e unha zona onde cociñaban o produto e o daban a probar ao público. 

Foi unha experiencia inesquecible que repetiríamos con moitas ganas e da cal aprendemos cousas novas.

Para ver as fotos da viaxe prema aquí.

Concurso Aulas Limpas 2023-24

Comezamos no mes de outubro co concurso Aulas Limpas, o que quere dicir que nos grupos da ESO e Bacharelato o alumnado debe ter en conta unha serie de medidas para manter a súa aula limpa e ordenada.

Achegamos a rúbrica que utiliza o xurado do concurso polo que é recomendable repartir entre o alumnado as tarefas de vixilancia para que todos os puntos da rúbrica se cumpran. 

As ventás e persianas dos extremos da clase deben quedar cerradas e as do medio, abertas, para ventilar antes de proceder á limpeza da aula. É importante tamén subir as cadeiras enriba das mesas para facilitar o labor das limpadoras. Se na última hora de clase o grupo que queda é pequeno, o alumnado anterior debe deixar subidas as súas cadeiras. 

Cada un de nós debe poñer o seu gran de area para que se manteña a limpeza e a orde nas aulas. 

Consultade a rúbrica do concurso para ver qué puntos debedes ter en conta.

Charla STOP accidentes

O martes 19 de setembro veunos dar información unha das responsables da asociación STOP Accidentes de Galicia, que axudan ás vítimas de tráfico, traballan en prevención fomentando a mobilidade sustentable, saudable e segura. 

Empezou presentándose e explicando a que se dedicaba a asociación. Despois falounos do perigoso que é ir rápido no coche porque podemos provocar accidentes ou mortes a nós mesmos e a outras persoas. Tamén nos contou que sempre debemos coller un taxi ou outro medio de transporte antes de ir cun amigo que acaba de sacar o carnet ou que vai ebrio. Tampouco debemos estragar unha vida por unha noite na que estás cos teus amigos consumindo alcohol ou outras substancias e decides coller o coche para volver á casa. 

Por último, comentounos que sempre hai que ir co cinturón posto porque se vas con máis xente e tes un accidente podes chocar contra os teus amigos ou saír despedido por algún lado. 

Para ver mais fotos preme AQUÍ. 

Avril Hermida e Uxía Del Ángel de 4º ESO B e PDC

Tenis de mesa nos recreos

O profesor de Educación Física, Emérito, e o alumnado de 4º da ESO están a organizar nos recreos os partidos de tenis de mesa, unha actividade dentro do obxectivo de PATIOS ACTIVOS, na cal se dispón de 4 mesas, 8 pas e 6 pelotas que se van intercambiando cando se estragan ou rompen. Para que participe todo o mundo o alumnado xoga a 3-5 puntos con diferenza de 2 puntos e quen perda cédelle o posto a outra persoa para que poida xogar.

Esta actividade sempre está moi concorrida, por desgraza só por rapaces.

RAPAZAS, ANIMÁDEVOS!

Podedes acceder a outras imaxes AQUÍ. 

Hugo Sanjurjo e Borja Cortegaza - 4º ESO A

Melloramos a nosa ciberseguridade participando na V Ciberliga da Garda Civil

O alumnado de 4º de ESO participará na V CIBERLIGA da Garda Civil, na modalidade preameateur, que se desenvolverá no primeiro trimestre deste curso 2023-24. 

A Ciberliga é unha competición organizada en colaboración entre a Garda Civil e a Consellería de Educación, co obxectivo de concienciar ao alumnado en materia de ciberseguridade desde un enfoque real e práctico, mediante a a posta en marcha dun proceso de gamificación, onde os participantes terán a oportunidade de aprender ciberseguridade xogando de maneira práctica e divertida. 

O alumnado organizarase en equipos de catro membros que afrontarán un divertido reto onde poderán demostrar as súas habilidades. A participación na V CIBERLIGA modalidade preameateur, organizarase do seguinte modo: 

A) Fase clasificatoria, a desenvolver on-line en dúas sesións. A primeira delas será unha sesión formativa que terá lugar o martes día 10 de outubro, de 11:45h a 13:45h, e consistirá nunha conferencia sobre o uso seguro e responsable das novas tecnoloxías que se impartirá en liña desde Santiago de Compostela para todos os centros participantes (Link: https://www.youtube.com/watch?v=9xzvd7xzI5E). Esta conferencia tamén estará dispoñible na plataforma MasterLabsCTF (https://ligagc.com/ ) de xeito permanente para que todo o estudantado poida visionala cando o desexe. 

Posteriormente, haberá unha segunda sesión práctica que consistirá no desenvolvemento dun ciber-reto. Os 5 mellores equipos clasificados (20 participantes aproximadamente) accederán á fase final. 

B) Fase final. A celebrar de maneira presencial (se non fose posible celebraríase de forma on-line), nas instalacións da Academia de Oficiais e do Centro Universitario da Garda Civil en Aranxuez (Madrid), entre os días 14 ao 16 de novembro. Nesta fase, a parte do ciber-reto final, terán lugar divertidas actividades formativas. 

Máis información: Convocatoria do programa educativo “V CiberLiga 2023 modalidade preameateur": https://www.edu.xunta.gal/portal/node/40933 

MasterlabsCTF, sitio web para inscrición dos equipos e acceso aos retos (a inscrición só pode facela a persoa coordinadora do centro educativo): https://ligagc.com/ 

Acceso á conferencia desde el IES ROSALÍA DE CASTRO, Santiago de Compostela, o día 10 de outubro ás 11:45h: https://www.youtube.com/watch?v=9xzvd7xzI5E 

Sitio web da V National Cyber League da Garda Civil: https://www.nationalcyberleague.es/ 

Canle de YouTube da National Cyber League GC: https://www.youtube.com/playlist?list=PL3N5rMPe7UIgDnnoEenK5p78ryF8Qg9fa

Semana Europea da Mobilidade

O mércores día 20 de setembro o alumnado de 1º da ESO asistiu a unha charla de José Ramón López sobre Educación Vial. Este axente da garda civil de tráfico explicounos como temos que comportarnos como peóns, como condutores de bicicleta e como usuarios de patinete. 

Os peóns sempre teñen preferencia porque son os máis vulnerables. Sempre hai que cruzar polos pasos de peóns e mirar tres veces para os lados. Nunca se pode cruzar se non se ten visibilidade. 

Na bicicleta é obrigatorio o uso do casco se es menor de 16 anos. No caso de que non o leves, a sanción é de 200 € ou 100 € se o pagas pronto. Débense sinalizar as manobras co brazo. Debemos circular sempre moi pegados á dereita. Non se poden levar acompañantes na bicicleta a non ser que se trate de menores de sete anos e nun asento homologado. 

As bicicletas deben levar unha luz branca diante e unha vermella detrás cando non haxa visibilidade e o condutor debe levar un chaleco reflectante. Os usuarios de bicicleta teñen que dar 0,00 nos controis de alcoholemia e circular pola calzada. Se se soben á beirarrúa, convértense en peóns e teñen que ir baixados da bicicleta. 

O axente da garda civil tamén nos falou dos distintos tipos de patinetes aos que denominou Vehículos de Mobilidade Persoal. A súa velocidade máxima é 25 Km/h. Os que circulen a máis velocidade son ilegais sen permiso de condución de ciclomotores. Todos os patinetes eléctricos teñen unha placa lateral que indica a súa velocidade máxima. Nos vehículos de mobilidade persoal tamén é obrigatorio o casco e non poden saír das vías interurbanas. 

Isto foi o que aprendemos na Semana Europea da Mobilidade. 

Podedes acceder ás imaxes AQUÍ. 

Equipo de redacción: Reforzo 1º ESO AB e Aleixo Fernández Maseda - 3º ESO A

Comeza o campionato de fútbol e baloncesto de San Xoán Bosco

Presentación do libro "Unha familia de escultores: Xosé Rivas e fillos"

O luns 25 de setembro ás 18:30h tivo lugar a presentación do libro de Antón Niñe Unha familia de escultores, Xosé Rivas e fillos. Este evento foi ademais un acto aberto ao público e de carácter inaugural despois da remodelación da nosa biblioteca. Nela reuníronse docentes e ex-docentes do IES Perdouro, do IES Monte Castelo, integrantes do programa de radio Proxecto Neo e representantes das confrarías da Semana Santa de Viveiro.

Antón Niñe foi presentado pola directora, Mª José Pardiñas, que tamén introduciu as restantes acompañantes na mesa: Karina Parga, presidenta da A. C. Os Matos e profesora do IES Perdouro, e Maribel Crecente, ex-docente do noso centro e encargada de redactar o limiar da obra que se presentaba.  

Nas súas explicacións, o autor do libro expuxo os datos máis relevantes da vida e da obra de Xosé Rivas, orixinario de Riotorto, e dos seus fillos. Este prolífico escultor e a súa familia teñen repartidas as súas esculturas pola Mariña, por distintos lugares de Galicia, de España, por varios países de Hispanoamérica e mesmo algunha das súas imaxes se atopa en Filadelfia (EEUU). 

O ambiente da xuntanza foi moi familiar e, para finalizar, como Antón tiña por costume a principio de curso, agasallounos con bombóns. A continuación, asinou exemplares dos seus libros para os presentes. 

Foi un acto entrañable. 

Podedes acceder ao resto de imaxes AQUÍ. 

Presentación do libro de Antón Niñe "Unha familia de escultores: Xosé Rivas e fillos"

O luns 25 de setembro ás18:30h o ex-profesor do IES Perdouro Antón Niñe presentará no centro o seu libro Unha familia de escultores: Xosé Rivas e fillos. 

Nela repasa a historia deste grande artista e dos seus descendentes. Xosé Rivas era natural de Riotorto e de alí marchou para Santiago. No seu taller dedicouse a esculpir numerosas obras, fundamentalmente imaxes relixiosas, que están repartidas por distintos lugares de Galicia, de España e mesmo de América. 

O centro e a A. C. Os Matos, da que Antón é presidente de honrea, convídanvos a asistir. 

A presentación está aberta a todo o público.

Anótate para participar nos torneos de San Xoán Bosco

Imos comezar cos torneos de San Xoán Bosco nos recreos. 

O primeiro que tes que facer é ir á biblioteca co teu carné de socio se queres participar no de xadrez, damas ou cubo de Rubik. 

E se queres xogar ao fútbol ou ao baloncesto anótate na folla de inscrición que tes no taboleiro do túa aula. 

Podes participar en calquera dos xogos ou dos deportes porque se celebrarán en días diferentes. 

Presentación de CUALE o martes 19 de setembro ás 17:00h

O profesor Bernardo Penabade recibe o Premio Meendinho

O sábado 9 de setembro o profesor do IES Perdouro Bernardo Penabade recibiu o Prémio Meendinho en Vilar de Santos (Ourense) na súa décimo cuarta edición. A Fundaçom Meendinho outorga este galardón a persoas e entidades que destaquen no campo da dinamización cultural e lingüística tendo en conta a dimensión internacional da lingua galega.  

Este recoñecemento premia a constancia de Bernardo á hora de traballar nun ensino inclusivo a través do Modelo Burela, que cumpre xa 20 anos. Esta é unha intervención educativa destinada á transformación dos usos lingüísticos habituais tanto na comunidade escolar como no seu ambiente social máis inmediato. As primeiras actividades, ponte entre a escola e o conxunto da cidadanía, consistiron na recompilación e estudo de escritos do ámbito familiar (convites, recordatorios, lápidas…), das comunicacións comerciais e empresariais, da xestión de comunidades de vivendas e das actuacións xurídicas e notariais. A realización de xornadas de animación á lectura e a promoción do diálogo intercultural a través de intercambios educativos completouse coa posta en práctica dunha escola de comunicación a través da radio, coa emisión de dous programas semanais: Proxecto Neo e Grandes Vozes. 

Proxecto Neo é o noso programa de radio escolar. Nel trátase de incorporar á cultura galega a persoas que non tiveron a nosa como a súa primeira lingua. Desde o mes de xaneiro de 2012 dá a coñecer experiencias de neofalantes que poden servir de modelo para outras persoas que necesitan estímulo para iniciar ese proceso. Emítese en Radio Burela os mércores pola tarde, está realizado por alumnado do centro coa coordinación de Bernardo e a colaboración de profesorado do IES Perdouro. Está preto de chegar aos 400 programas.

No ámbito da atención á diversidade, o Modelo Burela traballa con alumnado en situación de fracaso escolar extremo e impulsa unha acción educativa en colaboración cos servizos sociais e asociacións culturais, deportivas e recreativas, como axentes de inclusión social.

Moitos parabéns, Bernardo!     

Pódese acceder a outras imaxe do acto AQUÍ. 

Presentacións de inicio de curso 2023-24

Xa estamos de volta!

As presentacións de inicio de curso son o luns 11 e o martes 12 de setembro. O lugar é a biblioteca do centro e desde alí o profesorado titor acompañaravos á vosa aula de referencia. 

Benvidos ao curso 2023-24 no IES Perdouro!

Festa de fin de curso

No IES Perdouro continuamos traballando en xullo. Descansaremos en agosto. 

AQUÍ tedes as imaxes do último día de curso, cando vós vos despedistes do instituto ata o curso que vén. 

O novo curso comezará o 11 de setembro. Prestade atención á páxina web a principios de setembro para saber cando tedes a vosa presentación. 

Desfrutade das vacacións! 

Nova cancela do IES Perdouro

Esta é a nova cancela do noso instituto! Feita no IES Perdouro. Grazas ao alumnado do Ciclo Superior de Mecatrónica Industrial e do Ciclo Medio de Instalacións de Telecomunicacións. 

Un gran traballo! Moitos parabéns! 

 

Recomendacións literarias en Proxecto Neo

Colgamos aquí as 44 recomendacións literarias que emitimos no programa Proxecto Neo, de Radio Burela. Son uns audios breves nos que cada persoa recomenda ler un libro e explica brevemente o motivo.

Entre os participantes hai persoal do noso instituto (docente e non docente), antigos compañeiros xubilados, profes e mestres doutros centros, unha representante do Consello escolar e ata un paleontólogo.

O verán é un bo momento para comezar un libro e, a verdade, opcións non faltan.

Fai deporte na contorna: Non tes escusa!

O alumnado de 1º de Bacharelato anímanos á práctica do deporte na contorna. 

Neste caso, Lola e Ramón infórmannos das posibilidades que temos en Burela. Aproveitando as instalacións e arredores da vila podemos practicar unha gran variedade de actividades deportivas. 

Anímate! Xa non tes escusa!

Fin de curso: obradoiro de batidos e petiscos saudables para 1º ESO

O mércores 21 de xuño o alumnado de 1º ESO participou nun obradoiro de batidos e petiscos saudables. 

Andrea e Rocío, responsables da Asociación Española contra o cáncer de Burela, viñeron ao IES Perdouro para informar sobre hábitos alimentarios saudables. O seu obxectivo é  que a rapazada deixe de comer bolos industriais e de tomar bebidas a base de ingredientes artificiais con aparencia de zumes naturais. 

Ensinaron ao alumnado de 1º ESO a elaborar batidos con froitos vermellos (amorodos, arandos, framboesas), iogur natural sen azucre e un pouco de leite. 

Os petiscos estaban elaborados con pan integral, queixo ou manteiga de cacahuete, sementes de liño dourado, froitos secos (améndoas, abelás, noces...) e froita fresca (amorodos e arandos). 

Practicamente acabáronse as existencias de comida e bebida e todo o alumnado tanto da ESO como de Bacharelato que pasou polo patio e presenciou o obradoiro estaba interesado en probar os batidos e os petiscos. Haberá que repetir a experiencia!

Podes acceder a máis fotos AQUÍ.