Comeza o concurso Aulas Limpas 26-27

Xa coñecedes Aulas Limpas, un concurso que ten como obxectivo que manteñades as vosas aulas limpas e ordenadas. 

Se o voso grupo é o mellor do mes, recibiredes como premio a comida e a bebida dun recreo para todos os participantes e, se sodes a clase que sume máis puntuación ao final de curso, conseguiredes unha saída lúdica para todos vós. 

Nomeade encargados na aula para mantelo todo limpo e en orde. O xurado revisará as aulas e iredes coñecendo a vosa puntuación mensual. 

Aquí tedes a rúbrica para que prestedes atención a todo o que o xurado vai ter en conta. 

Premio Aulas limpas: visita ás illas Cíes para o grupo gañador

O martes 30 de xuño o grupo de 3º ESO A visitou as illas Cíes como premio por gañar o concurso Aulas limpas, que se desenvolve durante todo o curso. 

A súa iniciativa de propoñer esta viaxe a un espazo protexido, como é un Parque Nacional, pareceunos moi axeitada e iniciamos os preparativos para a visita. Para entrar nas illas cómpre ter unha autorización da Xunta de Galicia, a cal é nomitativa, polo que teñen que constar, a nivel individual, os datos de cada persoa que quere ir ás Cíes. Sen estes permisos nin sequera se poden comprar os billetes do barco que realiza o transporte de viaxeiros. 

Chegar ao porto de Vigo leva 3 horas desde Burela. Cando chegamos alí, o tempo era espléndido, aínda que na Mariña, e en gran parte do traxecto, estivo nubrado. 

O percorrido no barco dura uns 45 minutos e, malia que non o parecía, ía vento e o catamarán movíase bastante sobre as ondas, xusto antes de chegar á illa. Desembarcamos e comezamos a nosa ruta guiados por Daniel Irimia, profesor de Bioloxía e Xeoloxía. O camiño iníciase na illa Norte ou de Monteagudo, que é a onde chega o barco de pasaxeiros e de aí partimos, pasando polo espigón, a lagoa e a praia para dirixirnos ao faro, xa na illa do Medio ou do Faro. Chegamos ata o Faro da Porta, pero como a mediodía as temperaturas xa eran moi altas, decidimos volver cara á praia de Rodas, tamén debido a que a marea xa estaba subindo e despois podía ser difícil atravesar o espigón e bordear a lagoa. 

Daniel foinos explicando datos sobre a fauna e flora da illa. Desde o barco vimos golfiños e xa na illa observamos peixes besta ("ballesta"), badeixas, muxes...; distintos tipos de algas, plantas e aves. É incrible o atrevidas que son as gaivotas nas Cíes. Mentres estabamos na praia, foron capaces de abrir a cremalleira dalgunha mochila e sacar unha friameira con comida do seu interior. Ademais, atrevéronse con algunha prenda de roupa e algunha toalla. Está prohibido darlles de comer. Do contrario, collen aínda máis confianza e xa non as quitas de riba. Pero todo isto, ao final, fíxonos rir e foron anécdotas que levamos para contar. 

Chegou o momento da viaxe de volta, despois de coñecer un espazo protexido e dunha agradable tarde de praia. Embarcamos rumbo a Vigo, onde nos esperaba o noso querido condutor, José Luis, para coller o autobús. Aínda quedaban varias horas para chegar a Burela.

Desde a organización de Aulas limpas, estamos moi satisfeitos da constancia que demostrastes vós e todos os grupos que estiveron tamén a moi bo nivel para manter as aulas máis limpas e ordenadas. O instituto é, durante bastantes horas ao día, o lugar no que traballades e convivides e vós sodes quen o podedes facer un espazo agradable. A orde e a limpeza tamén axudan ao benestar. 

Moitos parabéns!

Podedes acceder a máis imaxes AQUÍ.

Miruca Parga Valiña - Vicedirectora

Mellor grupo do mes de novembro en Aulas Limpas: 2º Bacharelato B

Parabéns para 2º Bacharelato B por ser a mellor aula do mes de novembro! 

Foi a aula máis limpa e ordenada, seguida moi de preto por 2º Bacharelato A. En terceiro lugar, está a aula de 3º ESO A. 

No mes de novembro as puntuacións subiron con respecto a outubro, o cal quere dicir que a limpeza e a orde melloraron. Anímamosvos a seguir traballando. 

Mellor aula do mes de outubro: 1º de Bacharelato A

Parabéns para 1º Bacharelato A por ser a mellor aula do mes de outubro! 

Todo estaba limpo e ordenado. Ademais de contar con recipientes para a recollida de material escolar e pilas. 

Moito ánimo para o resto de grupos: 3º ESO A e 3º PDC son os seguintes con 121 puntos e tamén destacou a aula de 1º ESO A con 120.

Comeza o concurso Aulas Limpas 25-26!

Durante o mes de setembro, o profesorado titor estívovos explicando o funcionamento do concurso Aulas Limpas. 

Comezamos no mes de outubro a pasar polas aulas, o que quere dicir que nos grupos da ESO, Bacharelato e Ciclos Básicos, o alumnado debe ter en conta unha serie de medidas para manter a súa aula limpa e ordenada.

Achegamos a rúbrica que utiliza o xurado do concurso, polo que é recomendable tela á vista no taboleiro da aula e repartir entre o alumnado as tarefas de vixilancia para que todos os puntos da rúbrica se cumpran. 

As ventás e persianas dos extremos da clase deben quedar cerradas e as do medio, abertas, para ventilar antes de proceder á limpeza da aula. É importante tamén subir as cadeiras enriba das mesas para facilitar o labor das limpadoras. Se na última hora de clase o grupo que queda é pequeno, o alumnado anterior debe deixar subidas as súas cadeiras. 

Cada un de nós debe poñer o seu gran de area para que se manteña a limpeza e a orde nas aulas. 

Consultade a rúbrica do concurso para ver qué puntos debedes ter en conta.

Concurso Aulas Limpas: mellor aula do mes de decembro

No mes de decembro a aula máis limpa e ordenada foi de novo a 402. Todo estaba recollido e moi limpo e ordenado. O grupo de 4º ESO A leva dous meses consecutivos sendo a mellor aula, mais son varias as que pasan de 320 puntos se se suman as puntuacións do 1º trimestre, entre elas as aulas 101, 111, 113, 119, 201, 211, 215B, 401 e 402. 

Recordade que aínda queda curso por diante para remontar as puntuacións. Só tedes que poñer atención e deixar a vosa aula moi limpa e ordenada a última hora. Lembrade deixar as cadeiras subidas, as persianas e ventás na disposición correcta, colocade traballos de distinto tamaño no taboleiro e organizádeos correctamente. 

Prestade atención a que o último día do mes de febreiro é o festival de Entroido e tamén ten que quedar todo limpo e recollido. 

Moito ánimo a todos e os grupos e parabéns a 4º ESO A e á súa titora!

Moitas grazas ás nosas limpadoras Divina, Carmen e Ángeles,  por puntuar cada mes, e ao profesorado que revisou as aulas no primeiro trimestre: Javier Rouco, Miruca, Patricia Anaya, Karina, Fernando Lago e Andrea. 

Aulas Limpas: Mellor aula do mes de novembro

No mes de novembro a aula máis limpa e ordenada foi a 402. Todo estaba recollido e recolectan pilas e material escolar, ademais de ter o taboleiro moi completo e organizado. 

Tamén fixeron un bo traballo os grupos das aulas 

Grupo gañador de Aulas Limpas en outubro: 1º ESO A - Aula 111

No mes de outubro a aula máis limpa e ordenada foi a 111, a correspondente a 1º ESO A. 

Moitos parabéns! Seguide así! En breve comunicarémosvos o día que recibiredes o premio polo voso bo traballo. 

Parabéns aos grupos que tamén teñen a súa aula limpa e ordenada e para aqueles que o están intentando, recordade o que puntúa: 

- Ademais de ter o chan, o mobiliario e o encerado limpo, subir as cadeiras e apagar as luces, o ordenador e o encerado dixital, 

- Deixade unha ventá ventilando e as ventás dos extremos pechadas e as súas persianas baixadas.

- Fixádevos en ter caixas para recoller as pilas e o material escolar. 

- Decorade o taboleiro con traballos en A4 e A3 ou maiores. 

- Clasificade ben o lixo nas papeleiras. 

O xurado pasa todos os días do mes. Tédeo en conta!

Empeza Aulas Limpas 2024-25!

Durante o mes de setembro os titores expuxéronvos as normas de Aulas Limpas. 

En outubro comeza o concurso. Mantede a orde e a limpeza, decorade e ordenade o taboleiro, coidade a aula. 

Como sabedes, hai premios para a mellor aula de cada mes e un premio final para a Aula Magnífica. 

Consultade a rúbrica para ter a aula perfecta cando pasen os xuíces a valorar o voso traballo. 

Aulas Limpas do mes de marzo: a de 4º ESO B volve a ser a mellor aula

De novo a aula 204 volve a ser a máis limpa e ordenada. O mobiliario está sempre en orde e destaca a recollida de pilas e de material escolar. Ademais, o seu taboleiro está ben organizado e con traballos expostos de tamaño mural e A4. 

Séguea en puntos a aula 101, pertencente a 4º ESO PDC, e en 3º lugar está a aula 401, de 4 º ESO A, polo que felicitamos o alumnado de 4º ESO, que este mes ocupou os tres primeiros postos de Aulas Limpas. 

Parabéns e ánimo para o resto dos grupos, que aínda quedan un par de meses para ter a aula máis limpa e ordenada. 

Recordade: todas as aulas deben ter caixa ou recipiente para recoller pilas e material escolar. Lembrade tamén deixar as ventás e persianas dos extremos pechadas e as do medio, abertas. As limpadoras recórdannos que deixemos as mesas separadas das paredes para poder pasar limpando por ambos os lados de todas as mesas e que se revisan estas por debaixo para que ninguén pegue chicles. 

De novo 4º ESO B gaña o concurso mensual de Aulas Limpas

Por terceiro mes consecutivo 4º ESO B gañou o concurso mensual de Aulas Limpas. 

Neste mes de febreiro destacaron tamén a aula 101, de 4º PDC, e a 211, de 2º Bacharelato A. O grupo de 4º ESO PDC tivo o segundo posto durante estes tres meses e a súa aula é a que, polo momento, máis se achega á puntuación de 4º ESO B. 

As aulas que están en primeiro lugar destacan pola orde e a limpeza no chan, o taboleiro ordenado e a recollida de pilas e material escolar. Ademais, deixan sempre as luces, o ordenador e o proxector apagados. No único que terían que fixarse máis é en deixar as persianas e as ventás na colocación correcta: cunha ventá central aberta para ventilar e nos extremos as persianas baixadas e as ventás cerradas. 

Recordamos que non se poden pegar chicles debaixo das mesas porque iso tamén se revisa. 

Moitos parabéns ao grupo gañador e recomendamos constancia para o resto dos grupos. Quedan os resultados de catro meses de curso, de marzo a xuño. Aínda estades a tempo de gañar o concurso mensual Aulas Limpas e conseguir premio de cafetería no recreo para todo o grupo. 

AULAS LIMPAS e CONCURSO PILABOT

A mellor aula de decembro e xaneiro foi a 204. O alumnado de 4º ESO B destacou por manter a orde e a limpeza na clase. Tamén tivo especial coidado en apagar ordenador e proxector, ventilar, colocar as persianas na posición correcta e, sobre todo, recolleu material escolar gastado e pilas. 

Recordamos que estamos participando no concurso PILABOT e que temos de prazo ata o 25 DE MARZO para recoller o máximo número de pilas que poidamos. A partir dese día virán pesar e recoller os colectores de pilas. Por favor, TRAEDE TODAS AS QUE POIDADES CONSEGUIR. 

Parabéns para o grupo gañador e moito ánimo para os restantes. Se cada membro da comunidade educativa colabora en non tirar lixo e ordenar, o centro será un lugar máis agradable para todos. Aínda estades a tempo de conseguir o premio final!

Grupo gañador de Aulas Limpas no mes de novembro: 4º ESO B

Este mes de novembro a aula máis limpa e ordenada foi a 204, a pertencente a 4º ESO B. Este grupo destacou por manter a súa aula recollida e por estar pendentes de ter o encerado limpo, o proxector e o ordenador apagados ao final das clases, por recoller o papel na papeleira azul e por ter o taboleiro moi ordenado. 

Recordade que continuamos participando no concurso Pilabot, polo tanto, todas as aulas deben ter unha caixa ou recipiente para recoller pilas e outro para a reciclaxe de instrumentos de escritura gastados, que xa non sirvan. 

Parabéns para a aula gañadora! E moito ánimo para o resto dos grupos. Sabedes que hai premios mensuais e un premio anual para a mellor aula. 

Aulas Limpas: a mellor aula do mes de outubro foi a de 4º PDC

Este mes de outubro a aula máis limpa e ordenada foi a 101, a pertencente a 4º PDC. Este grupo xa destacou o curso pasado por manter a súa aula moi recollida, por estar sempre pendentes de recoller pilas e material escolar para reciclar e por ter sempre o seu taboleiro ben organizado e con traballos expostos. 

De todos os xeitos o grupo de 4º PDC está seguido moi de preto por 2º Bac!

Recordade que continuamos participando no concurso Pilabot, polo tanto, todas as aulas deben ter unha caixa ou recipiente para recoller pilas e outro para a reciclaxe de instrumentos de escritura gastados, que xa non sirvan. 

Parabéns para a aula gañadora! E moito ánimo para o resto dos grupos. Sabedes que hai premios mensuais e un premio anual para a mellor aula. 

Concurso Aulas Limpas 2023-24

Comezamos no mes de outubro co concurso Aulas Limpas, o que quere dicir que nos grupos da ESO e Bacharelato o alumnado debe ter en conta unha serie de medidas para manter a súa aula limpa e ordenada.

Achegamos a rúbrica que utiliza o xurado do concurso polo que é recomendable repartir entre o alumnado as tarefas de vixilancia para que todos os puntos da rúbrica se cumpran. 

As ventás e persianas dos extremos da clase deben quedar cerradas e as do medio, abertas, para ventilar antes de proceder á limpeza da aula. É importante tamén subir as cadeiras enriba das mesas para facilitar o labor das limpadoras. Se na última hora de clase o grupo que queda é pequeno, o alumnado anterior debe deixar subidas as súas cadeiras. 

Cada un de nós debe poñer o seu gran de area para que se manteña a limpeza e a orde nas aulas. 

Consultade a rúbrica do concurso para ver qué puntos debedes ter en conta.

Premio Aulas Limpas: Maio-xuño e Aula Magnífica

Rematamos o curso co premio de Aulas Limpas para os mellores grupos de maio-xuño e para o máis constante durante todo o curso. 

Parabéns para o alumnado de 4º ESO A e 4º ESO B2, que foron os mellores grupos no mes de maio e xuño.

E moitos parabéns para os máis constantes á hora de manter limpa e ordenada a súa aula: o grupo de 3º PDC, que foi o mellor, e 2º ESO A, que tamén destacou pola limpeza e soubo conservar a orde na clase. O premio para as aulas magníficas é unha viaxe a Cerceda o próximo luns 26 de xuño.

Agardamos continuar o próximo curso e que cada ano o fagades mellor!

Aulas limpas: mes de abril

No mes de abril as aulas máis limpas e ordenadas foron a 101 e a 116, correspondentes a 3º ESO PDC e 2º ESO A. 

3º ESO PDC continúa liderando a táboa anual por ter sempre a aula perfecta. 

2º ESO A é outro dos grupos que mellor está cumprindo cos requisitos de Aulas Limpas e que optan ao premio deste curso xunto a outros cursos da ESO. 

Recordade que debedes ter na aula recipientes para as pilas e material escolar xa acabado. 

É importante que separedes ben o papel limpo, que se depositará na papeleira azul de cada aula. O resto dos residuos bótanse na outra papeleira. 

Lembrade que as ventás e persianas dos extremos deben quedar cerradas e baixadas e a ventá central, aberta para ventilar.

En breve, saberemos quen foi o mellor grupo no mes de maio e tamén que grupos foron os dous mellores durante todo o curso. 

Seguide traballando! O esforzo ten premio!

Gañadores de Aulas Limpas do mes de xaneiro: 2º ESO A

No mes de xaneiro a aula máis limpa e ordenada foi a 116, a de 2º ESO A. 

Destacou polo mobiliario ordenado, a recollida selectiva de papel, os caixóns das mesas ordenados e a disposición correcta de persianas e ventás. 

Estivo seguida moi de preto pola aula 101, a de 3º ESO PDC, que sempre está moi ordenada e limpa tamén. Este grupo destacou sobre todo pola recollida de pilas e rotuladores, ademais de ter sempre o mobiliario moi ordenado e as cadeiras sempre subidas ao final da mañá. 

A terceira mellor aula foi a 208, a de 4º ESO B2, na que os responsables de ter a aula limpa e recollida cumpren ben co seu cometido. 

Moitos parabéns! Seguide así!

Animamos aos demais a ser os próximos gañadores. Se cada persoa do grupo se encarga de que todo estea limpo e ordenado a vosa aula pode ser a mellor do próximo mes. 

Grupo gañador de Aulas Limpas no mes de novembro

Volven as Aulas Limpas e esta vez para anunciarvos que o grupo gañador do mes de novembro foi 1º ESO C. A súa aula, a 112, foi a máis coidada e ordenada esta vez, seguida moi de preto pola 101, a de 3º ESO PDC, que xa foi a gañadora no mes de outubro. 

En terceiro lugar estivo a aula 116, ocupada por 2º ESO A, que tamén a mantivo limpa e recollida.

Recordámosvos o seguinte para mellorar as vosas puntuacións: 

- Debedes prestar atención a cal é a última hora en que a aula está ocupada e deixar xa as cadeiras subidas. 

- Recordade que as ventás do medio deben quedar abertas para ventilar e as dos extremos pechadas e coas persianas baixadas para facilitar o traballo de limpadoras e conserxes. 

- Lembrade apagar os ordenador do profesorado. 

- Separade o papel limpo para a papeleira azul. Non o botedes co resto do lixo. 

- Traede pilas e material de escritura xa gastado. 

- Puntúa que expoñades os vosos traballos no taboleiro da aula, xa sexan en tamaño A4 ou máis grandes. 

- Tede en conta que non se pode pegar nada fóra do taboleiro. Ao despegar o celo, arríncase a pintura das paredes. 

Deixámosvos tamén aquí a clasificación de outubro e anunciamos que este mes de decembro irá unido ao de xaneiro polo que o próximo grupo gañador farase público en febreiro. 

Volven as Aulas Limpas!

 

 En outubro comezamos de novo co concurso Aulas Limpas.

Cada grupo da ESO e de Bacharelato ten que encargarse de manter a súa aula limpa e ordenada. O profesorado titor nomeará encargados de vixiar os distintos aspectos que se revisarán na aula para conseguir o premio mensual e o grupo máis constante recibirá un premio especial a final de curso. 

Ao lado tedes a rúbrica. Fixádevos ben en todo o que se terá en conta para puntuar a limpeza e a orde na vosa aula

Sen previo aviso, profesorado, algún membro do equipo directivo e as limpadoras pasarán polas clases cada mes, normalmente despois de última hora, para comprobar que todo quede en orde. 

Ánimo e esperamos, cando menos, os mesmos resultados do curso pasado!!