Bo Nadal e Feliz 2025!

Presentación dos Taboleiros de Nadal 2024

Aquí tedes todos os taboleiros participantes no concurso deste ano. Parabéns a quen traballou neles. O traballo en equipo dá os seus froitos. 

Moitas grazas por decorar as aulas e o centro coas vosas creacións. 

A árbore de Nadal de 2024

Esta é a nosa árbore de Nadal de 2024. 

Como cada ano é un proxecto colaborativo no que participaron moitos departamentos: Tecnoloxía, Matemáticas, Relixión, Plástica, Electrónica, Instalación e Mantemento... e case cada persoa que pasou pola entrada do edificio central cando se estaba colocando e quixo botar unha man. 

Con el chegou ao Perdouro o espírito de Nadal...

Fallo dos concursos de Postais de Nadal e Taboleiros de Nadal

Comnicamos a decisión dos xurados dos concursos de Nadal: 

As gañadoras do certame de Postais de Nadal son: 

• 1º premio: Nahomi Yazmín Olaya Ríos - 3º ESO B

• 2º premio: Alejandra Rodríguez Pernas - 3º ESO A

• 3º premio: Uxía García Quevedo - 3º ESO B

E os grupos gañadores de Taboleiros de Nadal son: 

• 1º premio: 2º ESO B

• 2º premio: 1º Bacharelato A

• 3º premio: 1º Bacharelato B

Recibiredes o premio o venres 20 de decembro na vosa aula. 

Moitos parabéns polo voso traballo!

Lectura e familias: En que traballarei no futuro?

O mércores 18 de decembro ás 18:00h retomaremos as charlas formativas coas familias. 

Nesta ocasión, Rodrigo Muíño Otero, profesor da USC e membro da Academia de Ciencias Veterinarias de Galicia, virá falarnos sobre as posibilidades de cara ao futuro profesional do noso alumnado. 

Este docente traballa dentro do programa A Ponte da Universidade de Santiago de Compostela, que ten como obxectivo dar a coñecer os estudos de Grao e achegar información sobre o contexto investigador, social, cultural e espacial da USC.

É necesario confirmar a asistencia e é unha charla aberta a todos os públicos polo que, nesta ocasión, pode asistir tamén o alumnado. 

Hoxe, 9 de decembro de 2024, recibimos a exposición Cantámola en galego do concello de Pontevedra. Nos seus paneis repásanse os mellores intérpretes e cancións en galego do século XXI. 

Esta exposición axudaranos co proxecto no que estamos inmersos. O alumnado de Ciclo BásicO e de 3º e 4º ESO escollerá unhas 50 cancións que representarán os gustos do noso centro. 

O IES Perdouro participa nun proxecto que ten como contido "cancións que son poemas ou poemas que son cancións". Ás veces esquecemos que as cancións son un subxénero lírico, son poesía. 

O noso centro colabora con outros 13 institutos de Galicia e tamén do Bierzo (León) para elaborar unha escolma das 25 mellores cancións do século XXI. Esta selección será publicada en forma de libro cando o proxecto remate. . 

Convidámosvos a visitar a exposición "Cantámola en galego", que está situada na biblioteca e na entrada do edificio 1. 

Aquí tedes o enlace ao PDF onde podedes consultar tamén a información cos carteis expostos. 

Grupo gañador de Aulas Limpas en outubro: 1º ESO A - Aula 111

No mes de outubro a aula máis limpa e ordenada foi a 111, a correspondente a 1º ESO A. 

Moitos parabéns! Seguide así! En breve comunicarémosvos o día que recibiredes o premio polo voso bo traballo. 

Parabéns aos grupos que tamén teñen a súa aula limpa e ordenada e para aqueles que o están intentando, recordade o que puntúa: 

- Ademais de ter o chan, o mobiliario e o encerado limpo, subir as cadeiras e apagar as luces, o ordenador e o encerado dixital, 

- Deixade unha ventá ventilando e as ventás dos extremos pechadas e as súas persianas baixadas.

- Fixádevos en ter caixas para recoller as pilas e o material escolar. 

- Decorade o taboleiro con traballos en A4 e A3 ou maiores. 

- Clasificade ben o lixo nas papeleiras. 

O xurado pasa todos os días do mes. Tédeo en conta!

Obradoiro: luz, cor e ciencia

 

VI Ciberliga da garda civil

O luns 25 de novembro o alumnado de 4º de ESO asistiu a unha charla sobre ciberseguridade na que Ramón Peña, un garda civil especializado nesta área, explicou o traballo dos “hackers” no ámbito informático falando da creación dos virus e a protección dos datos persoais. Máis en concreto, afondou na protección dos datos, ofrecendo técnicas para buscar información sobre empresas e persoas de maneira máis eficaz. Tamén compartiu con nós trucos para mellorar as buscas en Google. 

Durante a charla tamén destacou os aspectos clave nos que o alumnado se debía centrar para superar o concurso no que ían participar a continuación, competindo contra institutos de toda Galicia. Os equipos con mellor puntuación irán á fase nacional a Aranxuez. 

Ao finalizar a charla, o alumnado tivo unha hora para resolver os retos propostos no devandito concurso.

Podedes acceder ás imaxes AQUÍ.

Hugo Domínguez e Aleixo Fernández - 4º ESO A

Actividades 25N 2024

Este curso conmemoramos o Día da Eliminación da violencia de xénero contra a muller con varias actividades: 

O alumnado de 2º ESO e 2º de Ciclo Básico de Servizos Administrativos asistirá á representación da obra "Os soños de Adelina", que tratará sobre os efectos que a violencia de xénero ten sobre a saúde mental das mulleres. 

Os grupos de 1º de Ciclos Básicos e 1º de Ciclos Medios recibirán formación por parte de Héctor Méndez, psicólogo e garda civil da Comandancia de Lugo que imparte charlas do Plan Director por toda a provincia. 

Os dous grupos de 1º de Bacharelato viaxarán a Santiago de Compostela, ata a Cidade da Cultura, para asistir a un acto no que se entrevistarán con mulleres vítimas de violencia de xénero. 

O Equipo de Igualdade colocará a súa exposición de carteis na que traballou especialmente Nahuel Huamán Pérez, alumno de 2º do CM de Peiteado e Cosmética Capilar.

Estes son os carteis elaborados en 1º ESO para parar a violencia de xénero: 

Nas titorías colaborastes propoñendo situacións con enunciados breves que exemplifican os chanzos que simbolicamente se van subindo cando a violencia de xénero graduamente vai aumentando. Estas ideas servirán para colocar nas escaleiras do edificio 2 uns vinilos que se están elaborando no Polo Creativo. Coas vosas aportacións Leticia, profe de Física e Química e colaboradora no Equipo de Biblioteca, editou este vídeo: 

Coa axuda da Intelixencia Artificial, Carlota Pérez Coldeira creou esta canción que ten como tema o empoderamento das mulleres. 

Á parte das actividades anteriores, que terán lugar este luns, o último mércores deste mes, teremos un programa especial de Proxecto Neo dedicado á eliminación da violencia de xénero. 

Concurso Taboleiros de Nadal 2024-25

Convócase unha nova edición do concurso Taboleiros de Nadal. 

Cada grupo poderá decorar o taboleiro da súa aula de referencia baixo a coordinación da súa titora ou titor.

Poderán participar ESO, Bacharelato e Ciclos formativos. 

A titora ou titor de cada grupo debe entregar a ficha de inscrición que se enviou ao correo en Vicedirección ou Secretaría. 

As normas son as seguintes: 

1. Decorade o taboleiro da aula. Valorarase a orixinalidade, a estética e tamén a sostibilidade. Polo tanto, facede uso de materiais naturais ou reciclados. 

2. Cada grupo decorará o taboleiro da súa aula de titoría. 

3. En canto a materiais, PROHÍBESE a cinta de pegar de dobre cara, o pegamento e a silicona directamente encima do material do que está feito o taboleiro, xa que este debe quedar intacto cando se retire a decoración de Nadal. 

4. A decoración que se valorará para este concurso é só a do taboleiro. Non se pode poñer nada fóra del.

5. O luns 16 de decembro a última hora da mañá o taboleiro debe estar rematado.

Que o espírito do Nadal entre nas aulas!

Visita ao Salón Internacional XANTAR (Ourenses) e á empresa Jim Sports (Palas de Rei)

O pasado 24 de outubro, o alumnado dos segundos cursos do ciclo básico de “Servizos Administrativos”, ciclo medio de “Xestión Administrativa” e ciclo superior de “Administración e Finanzas” emprendemos unha viaxe educativa para visitar o Salón Internacional de Turismo Gastronómico XANTAR en Ourense.

Tras máis de dúas horas e media de viaxe, chegamos ao recinto feiral Expourense onde se situaba a que é a única feira internacional de turismo gastronómico, cunha traxectoria de 25 anos, de aí a importancia que tivo para nós esta visita. 

Unha vez alí, ensináronnos moitos proxectos tecnolóxicos e tipos de innovacións que se fan hoxe en día coa comida. Un exemplo foi a demostración de Begoña Vázquez, propietaria do restaurante Regueiro da Cova, a cal empregou rodaballo, castañas e algas. Algúns de nós tivemos a oportunidade de probar esa comida, que a verdade estaba boísima. 

Finalizada a visita ao salón gastronómico, dirixímonos ás termas de auga natural de Ourense, onde puidemos relaxar o corpo e a mente, algo que nos fixo xenial despois dunha mañá tan intensa. 

Ao día seguinte, o venres 25 de outubro, partimos ben cedo cara a Palas de Rei onde visitamos a empresa JIM SPORTS, dedicada á importación, exportación e venda de material deportivo das súas principais marcas, así como ao deseño e á creación de terceiras. 

Alí recibiunos unha traballadora chamada Jesica, quen nos explicou como o dono puxera en marcha, hai vinte anos, esta empresa, a cal foi pouco a pouco crecendo ata chegar a internacionalizarse e contar incluso cunha franquía na República Dominicana cara a onde exporta os seus produtos. 

Gustounos moito ver a área de administración xa que é moi probable que cos nosos estudos poidamos, nun futuro, traballar nun espazo similar. Tamén nos resultou moi interesante a zona de loxística e ver como se almacenan os paquetes e como saen en grandes grúas. Finalmente, estivemos no departamento de deseño, onde nos amosaron como imprimen as camisetas de deporte nunha tea especial para asegurar a súa durabilidade. 

Comprobamos que en JIM SPORTS é fundamental o capital humano, ao que lle prestan moita atención, xa que teñen un ximnasio nas propias instalacións, algo bastante innovador dentro dunha empresa. Ambas visitas nos gustaron moito, polo que queremos dar as grazas aos nosos profesores Patricia e Jesús por acompañarnos nesta viaxe e permitirnos vivir esta experiencia que será inesquecible para todos nós. 

Podedes acceder ás fotos AQUÍ. 

Elisabeth Mendes Rubal - 2º Ciclo Medio de Xestión Administrativa

Entrega de premios do concurso de catrinas e de audiorrelatos do Samaín

Lembrade que o luns 18 de novembro entréganse os premios de catrinas e tamén os de audiorrelatos de medo creados con motivo do Samaín e emitidos en Proxecto Neo: https://proxectoneo.blogspot.com/.../proxecto-neo-435... 

Podedes escoitalos no programa do minuto 7:20 ao 10:30. 

No concurso de catrinas, as votacións foron tan igualadas que houbo empate no segundo posto polo que se entregarán tres accésits. 

Parabéns pola súa creatividade aos gañadores e gañadoras de ambos concursos!

Apúntate ao obradoiro de decoración de Nadal con arxila!

Os mércores 20 e 27 de novembro e 4 de decembro no recreo e na aula de Plástica, a 402, poderedes participar nun obradoiro de decoración de Nadal para elaborar adornos con arxila.

Só hai 20 prazas. Anótate na folla de inscrición colocada na columna da entrada do edificio 1 antes do venres 15 de novembro. 

Andrea, a profesora de Educación Plástica será a encargada de impartilo. Ela informarate se tes calquera dúbida. 

O alumnado de 1º ESO non pode anotarse neste obradoiro porque xa vai elaborar os adornos na propia hora de Plástica. 

Novembro: mes da ciencia en galego

Durante novembro, celebramos o Mes da ciencia en galego. Xa inscribimos o centro para poder conectarnos ás videoconferencias de Igaciencia que terán lugar os martes 12, 19 e 26 de novembro ás 12:00h. Esta é a información de cada unha das videoconferencias deste ano, que versarán sobre Astronomía. 

O profesorado interesado ten a continuación os enlaces para as videoconferencias co seu alumnado: 

Augusto Pérez Alberti: https://youtube.com/live/QV7L_HNgJ5s?feature=share
Begoña Vila Costas: https://youtube.com/live/pdfUg_A4mjU?feature=share
Ana María Ulla: https://youtube.com/live/-MfDKA1T_S4?feature=share

Se queredes participar realizando algunha pregunta, tedes tamén a continuación o enlace para subscribirvos á canle de Youtube de Igaciencia. Se non vos subscribides, non poderedes facer preguntas. Ademais, debe subscribirse un docente que transmita as preguntas do alumnado, non o alumnado. O profesorado é quen debe controlar o chat, non deixar ao alumnado escribir nel. 

Subscríbete á canle de Igaciencia

A duración de cada conferencia estímase entre 1h mínimo e 1:30 h máximo, dependendo do número de preguntas que fagan os asistentes a través do chat. Polo tanto, se tedes a clase das 12:00h ou estades interesados nalgunha das videoconferencias completas, avisádeme e así podemos falar co profesorado da hora seguinte para intercambiar as clases ou pedirlle se o alumnado pode participar na videoconferencia na súa hora de clase. 

Todas as relatoras e relatores son moi interesantes. Aquí tedes información sobre eles e sobre a temática da súa correspondente videoconferencia: 

Augusto Pérez Alberti, Catedrático de Xeografía Física Ad Honorem (USC). Investigador independente. Día 12 de novembro ás  12h.

Título: "O cambiante planeta Terra" Resumo: Escoitando ou lendo os medios de comunicación dá a impresión de que o clima comezou a mudar vai uns anos. Semella que as temperaturas, precipitacións ou os ventos sempre foron os mesmos; que vivíamos nun escenario estático e eterno no que nunca mudaba nada; que cada día chovía uns mm ou non; que a temperatura non pasaba dunha cifra exacta nin que, a consecuencia diso, os ríos e o mar sempre tiñan o mesmo nivel.

Pois non, o clima mudou sempre e seguirá a mudar. Máis alá do que pensen uns ou outros, o clima é cambio, mudanza. Outra cousa é que o impacto humano, moito mais recente que o Planeta Terra, adquirira nos derradeiros séculos un papel fundamental nas mudanzas climáticas; esa é outra historia.

Mais, a cantidade de auga que hai no planeta non mudou; nin temos unha billa pola que entra auga e unha tubaxe pola que saia. Non. A cantidade de auga existente sempre é a mesma: o que muda é o seu estado. Unha vez está convertida en xeo, e os glaciares dominan o planeta; outra en auga líquida e sube o nivel do mar.

Ao longo da charla voume centrar en falar das mudanzas das que temos constancia ao longo do tempo xeolóxico; no Cenozoico, Cuaternario e no Holoceno e das pegadas que se poden ollar hoxe en día en Galicia.

Begoña Vila Costas, Dra en Astrofísica, Enxeñeira Xefe de Sistemas no centro da NASA GSFC, segundo o Faro de Vigo "A muller que ilumina o Universo" Título “O Universo e a exploración espacial”.  Día 19 de novembro ás 12 h.

Un breve resumo: A observación do Universo avanzou moito desde as primeiras observacións co telescopio de Galileo Galilei. Agora sabemos doutras galaxias, outras estrelas e outros planetas arredor delas pero aínda temos un montón que non sabemos: como se formaron as primeiras galaxias e estrelas e como evolucionaron para formar aquela na que vivimos?; como se formou un planeta como o noso e pode haber outro con auga e vida?; que pode ser a materia escura e a enerxía escura? Os novos telescopios espaciais como o James Webb, o Nancy Grace Roman e o Telescopio de Mundos Habitables e outros que exploran o noso Sistema solar buscan os datos que nos poden axudar a atopar as respostas.

Begoña é a James Webb Space Telescope Fine Guidance Sensor Systems Lead e a Nancy Grace Roman Space Telescope Systems Engineer

 Ana María Ulla Miguel, catedrática de Astrofísica da UVigo, Dia 26 de Novembro ás 12h. "Non hai estrelas sen noite escura"

Resumo: O ceo é a nosa ventá ao universo, e a todo o coñecemento que da súa observación pódese derivar. De día, o Sol permítenos facer astronomía diúrna, e de noite as estrelas, galaxias, planetas e restantes corpos celestes achégannos aos confíns do universo mesmo. Nesta charla repasaremos algúns avances recentes en astronomía e astrofísica, no contexto adverso que a contaminación luminosa supón, tanto para a observación astronómica como para a saúde e o medio ambiente.

Participamos na IVª edición do concurso "Ciberseguridade no cole!"

O pasado 15 de outubro os grupos de 1º e 2º da ESO participamos nunha actividade, a cuarta edición do concurso“ Ciberseguridade no cole”.

Dende o punto de vista da nosa clase, 2º ESO B, foi unha actividade amena e educativa, que nos fixo pasar un tempo divertido traballando en equipo. No concurso participaron máis de 150 institutos e colexios de diferentes localidades. Esta actividade consistía en facer un kahoot entre toda a clase, e nel había preguntas como: Que deberías facer se alguén che pide o teu enderezo? 

A nosa clase quedou no posto 81, aínda que unha das clases de 1º quedou no 19, facendo así un gran traballo. 

En xeral, pasámolo ben e aprendemos moito. 

Podedes acceder ás imaxes AQUÍ.

Iago Balseiro Parga - 2º ESO B

Día da Saúde Mental 2024

O alumnado de 3º ESO de Educación en Valores Cívicos e Éticos preparou un vídeo para conmemorar o Día da Saúde Mental, que se celebra o 10 de outubro. Coa axuda da súa profesora Lara Oliveros dannos algúns consellos para coidar o noso benestar emocional. 

Celebrando o Día das escritoras - Escritoras francófonas presentes en BiblioPerdouro

Para celebrar o día das escritoras, as alumnas de 1º de Bacharelato de Francés puxéronse a investigar a ver cantas escritoras francófonas están presentes e accesibles na nosa biblioteca de BiblioPerdouro. Resultado: 16 mulleres.

Aquí deixamos a recollida gráfica cunha pequena sinopse das autoras así como das súas obras presentes na biblioteca. Pica na ligazón para acceder ao noso fondo de préstamo.

Escritoras francófonas presentes en BiblioPerdouro

No Samaín cóntanos un relato de terror

Cóntanos un relato de terror de 1 minuto e poderás gañar un premio. 

Envía o teu audio en formato MP3 a traballosmaruxia@gmail.com ata o luns 28 de outubro. Indica no correo o teu nome e apelidos e o curso ao que pertences. 

O concurso está aberto a todo o alumnado do centro. 

Anímate a participar!

Comezan os torneos de San Xoán Bosco 2024-25

Este martes 8 de outubro comezan os torneos de San Xoán Bosco. Esta primeira semana enfrontaranse os equipos de fútbol-sala de 1º da ESO. A semana que vén tocaralle ao baloncesto. 

Estade atentos ao panel da entrada do edificio principal para saber cando vos toca xogar. Moita sorte a todos os equipos e que gañe o mellor!

Visita ao IDIS

O venres 27 de setembro, o alumnado de 1ª de Bacharelato das materias de Anatomía Aplicada, Cultura Científica e Bioloxía viaxamos a Santiago de Compostela para adentrarnos no día a día do Instituto de Investigación Sanitaria de Santiago. 

Dividímonos en varios grupos e organizamos a mañá en dúas partes. Así, cada equipo podería realizar dúas das prácticas relacionadas coa investigación que nos ofrecían. Aprendemos sobre o proteoma e a impresión 3D aplicada á saúde. Tivemos ocasión de ver peixes cebra nas súas primeiras etapas de crecemento, nas cales non senten dor nin estrés. Deste xeito, pódese traballar con estes pequenos organimos para avanzar no campo da oncoloxía. 

En diferentes actividades practicamos o uso de micropipetas e o traballo con volumes. Os expertos explicáronnos como de pequenas eran as magnitudes que manexan acotío e observamos medidas de ata nanolitros. 

Na actividade relacionada coa cardioloxía, aprendemos sobre a importancia de levar unha dieta equilibrada ao observar exemplos de corazóns afectados pola mala alimentación e diferentes biopsias líquidas. 

O IDIS é un centro interdisciplinar onde colaboran dende biotecnólogos e biólogos ata informáticos e fisioterapeutas. Traballan día a día investigando para conseguir aplicar as súas conclusións ao ámbito da saúde, de aí o seu carácter translacional. Así, puidemos aproveitar os consellos e o exemplo de expertos para enfocarnos mellor no noso futuro. Desfrutamos e aprendemos moito nesta saída e, sobre todo, tivemos a oportunidade de adentrarnos no mundo científico do xeito máis entretido, ademais de tomar conciencia da importancia que ten o traballo dos investigadores nas nosas vidas. 

Podedes acceder a máis imaxes AQUÍ. 

Carla Paz Trelles - 1º Bacharelato A

Empeza Aulas Limpas 2024-25!

Durante o mes de setembro os titores expuxéronvos as normas de Aulas Limpas. 

En outubro comeza o concurso. Mantede a orde e a limpeza, decorade e ordenade o taboleiro, coidade a aula. 

Como sabedes, hai premios para a mellor aula de cada mes e un premio final para a Aula Magnífica. 

Consultade a rúbrica para ter a aula perfecta cando pasen os xuíces a valorar o voso traballo. 

Inauguramos a nosa Dixit Aula: Espazo de tecnoloxía aplicada na FP

A nosa Dixit Aula xa está preparada para comezar a funcionar. Trátase dun espazo amplo e moderno, completamente adaptado ás necesidades do noso alumnado coa reforma que se levou a cabo. 

O estudantado dos Ciclos de Mecanizado, Instalacións de Comunicacións, Mecatrónica Industrial e Fabricación Aditiva xa poden beneficiarse de todos os recursos cos que conta a aula: impresora 3D, analizador de vibracións, cámara termográfica, sistema de guías holográficas, programa de simulación virtual, escáner 3D e PCs de altas prestacións. 

O horario da aula está organizado de xeito que se poida extraer o máximo rendemento dos seus recursos para todas as familias profesionais que imparten clase neste espazo de tecnoloxía aplicada.

O rendemento á hora de alcanzar as competencias que se deben desenvolver nestes ciclos será moito máis alto ao contar agora con todos estes recursos a disposición do alumnado. 

Presentación de CUALE de lingua portuguesa do curso 2024-25

 

Matricúlate no CUALE de Lingua portuguesa

Recorda matricularte. A lingua portuguesa comparte raíz coa galega. Será moi fácil para ti aprender portugués. E se vés dun país de fala portuguesa, podes aproveitar para certificar o teu nivel de lingua. Serache moi útil ter o B1 ou B2 dunha lingua estranxeira para o teu desenvolvemento persoal e profesional. 

Que é o programa CUALE?

Programa de cursos para a formación complementaria en linguas estranxeiras do alumnado como preparación para as probas de certificación dos niveis das ensinanzas especializadas de idiomas. 

En que consiste? 

Proporciona formación complementaria de linguas estranxeiras, tanto a alumnado como a profesorado, seguindo os niveis do Marco Común Europeo de Referencia para as Linguas. Lévase a cabo dentro do propio centro, fóra do horario lectivo xeral. Este programa está implantado en educación secundaria e en ciclos formativos. Incrementa a competencia en idiomas do alumnado e facilita que se presente á certificación na EE.OO.II. dentro das probas libres. 

A quen vai dirixido? 

Alumnado de Bacharelato ou Ciclos Superiores ou quen teña acreditado un A2.

Presentacións de inicio do curso 2024-25

Benvidos ao curso académico 24-25!

Agardamos que descansásedes moito e que tivésedes un verán extraordinario. Agora toca comezar un novo curso. Estaremos agardándovos para facer as presentacións o mércores 11 e o xoves 12 de setembro. O profesorado titor acompañaravos á vosa aula de referencia. 

Os cursos que teñan a presentación o mércores 11 comezarán as clases o xoves 12 e os que teñan a presentación o xoves comezarán as clases o venres 13 de setembro. 

Vide con moitas ganas!

Bo verán e ata setembro!

Durante o mes de xullo o instituto estivo en funcionamento para tramitar matrículas, entrgar memorias, preparar o curso que vén... Agora toca descansar. 

Prestade atención á nosa páxina web porque nela publicarase nos primeiros días de setembro o calendario de presentacións. 

Esperámosvos en setembro! Desfrutade moito do verán!

Espazos de Tecnoloxía Aplicada na FP: A nosa Dixit Aula está en marcha

Xa van moi avanzadas as obras da nosa Dixit Aula. Este Espazo de Tecnoloxía Aplicada na Formación Profesional será un lugar ideal para que o alumnado do Ciclo Superior de Mecatrónica Industrial, do Curso de Especialización en Fabricación Aditiva, dos Ciclos Medios de Mecanizado e de Instalacións en Telecomunicacións desenvolva as súas competencias. 

Aínda temos que organizar o sitio axeitado para cada un dos recursos cos que queremos que conte a nosa Dixit Aula. Entre eles esperamos adquirir cámara termográfica, analizador de vibracións, sistema de guías holográficas, escáner 3D, PCs de altas prestacións etc. 

Mostrarémosvos o resultado final cando estea rematada. 

Actualizado o podcast das Saídas escolares IES Perdouro

Xa está actualizado o podcast das saídas escolares do IES Perdouro, que inclúe 4 audios orixinalmente emitidos no programa Proxecto Neo. 

Deixamos aquí a ligazón.

 

Actividades Quérote + 2023-24

Ao longo do presente curso 23/24, o IES Perdouro aplicou o programa Quérote + nas aulas de 3º ESO que se enmarca dentro dos Plans Proxecta. Froito diso, mostrámosvos unha parte do traballo realizado co noso alumnado que participou activamente realizando murais, en debates, así como o visionado de curtametraxes e un longo etcétera difícil de plasmar só a través de imaxes.

Revista Maruxía nº 30 - curso 2023-24

Despois da presentación da revista, mostramos algúns dos artigos que podedes ler no seu interior. A temática dos mesmos é moi variada: 

- crónicas de viaxes

- elaboración de chatbots con Intelixencia Artificial para a biblioteca, 

- carteis das Letras Galegas dedicados a Luísa Villalta

- celebración do Día da Enxeñería

- obradoiro de gominolas saudables

- premios para o alumnado

- encontros literarios

- obradoiro de banda deseñada

- Correlingua

- Taller de minerais

- xeorruta con Fran Canosa

- Conferencia dun neurobiólogo sobre o Alzhéimer e outras enfermidades neurodexenerativas

Animádevos a botar un vistazo ás súas páxinas. 

Tamén podedes acceder ao último número no apartado de revista escolar da nosa web. 

Acto de presentación da revista escolar da A. C. Os Matos - Maruxía nº 30

A asociación cultural Os Matos do IES Perdouro presentou o nº 30 da publicación Maruxía en colaboración co Equipo de Dinamización e coa Biblioteca.

Esta mañá, a biblioteca abriu as súas portas para recibir un evento moi esperado: a presentación da revista escolar Maruxía. A alumna de 4º ESO TIC, Iria Jacomé, foi a encargada de conducir o acto.

Durante a presentación, Alba F. Quelle e Alberto Núñez explicaron como o equipo traballou arreo para sacar adiante a número 30. Ambos destacaron a importancia do traballo en equipo e a colaboración constante para superar os retos que se presentaron ao longo do proceso de elaboración da revista.

A nova edición da Maruxía inclúe unha ampla mostra das actividades e traballos realizados polos reporteiros do Perdouro, reflectindo o talento e a creatividade dos estudantes. Ademais, recóllense os premios do XVII Concurso de Relato Curto e Poesía e do XV Concurso de Imaxe, convocados anualmente pola Asociación Cultural "Os Matos". Estes certames son unha plataforma importante para fomentar a creatividade e o talento artístico entre os alumnos.

A nova edición da Maruxía é un reflexo fiel do esforzo colectivo e da creatividade dos estudantes do Perdouro.

Asistiron ao acto Mª José Pardiñas, directora do centro educativo; Karina Parga, Presidenta da A.C. Os Matos e Noé Vázquez, coordinador do EDLG. 

 

Felicitamos aos gañadores do concurso de portada de Maruxía: Djessica Tavares Pereira Barbosa (portada) e Álvaro Guisande Rego (traseira).

Accede á completa reportaxe fotográfica realizada polo compañeiro Fernando Losada, AQUÍ.

Maruxía nº30

 

Revista Maruxía en PDF aquí.

Patrullas informativas sobre reciclaxe e auditoría de residuos

O alumnado de Ciclo Básico de Servizos Administrativos percorreu as aulas, os talleres, os despachos e outras dependencias do centro para informar sobre a utilización das papeleiras e dos distintos colectores instalados no instituto para unha correcta reciclaxe. 

Despois dalgunhas roldas informativas, o mesmo alumnado levou a cabo unha auditoría dos residuos e informou a alumnado, profesorado e persoal non docente de se a reciclaxe fora realizada de xeito adecuado. 

Toda a comunidade educativa mellorou os seus coñecementos sobre a separación e a reciclaxe grazas a estas efectivas "patrullas informativas". 

Parabéns polo voso gran labor!

Actividades de Educación emocional por niveis educativos

Durante este curso leváronse a cabo distintas actividades de Educación emocional que foron propostas para cada curso das distintas etapas educativas. 

A continuación presentámosvos a planificación temporal no cadro. No enlace podedes acceder á explicación de cada actividade. 

 

Fallo do xurado Concursos OS MATOS

O xurado resolveu outorgarlles os premios aos traballos presentados polos seguintes alumnos baixo o lema "As viaxes":

XVII Concurso literario da As. Cultural Os Matos 

RELATO CURTO:

Categoría 1º e 2º ESO:

• 1º premio: Dani Borrajo Trelles (1º ESO A)
  
• 2º premio: Nicolás Amorín Vázquez (1º ESO A)
  

Categoría 3º e 4º ESO:

• 1º premio: Ana Lestao Ben (4ºESO A)

 Categoría Bacharelato e CF:

• 1º premio: Noa Gudín González (2º Bach.B)

POESÍA:

Categoría ESO:

• 1º premio: Ana Lestao Ben (4ºESO A)

XV Concurso de Imaxe da As. Cultural Os Matos

Categoría ESO:

• 1º premio: Ximena Riopedre Orosa (4ºESO A)
  

Concurso de Portadas da Revista Maruxía 

• Djessica Tavares Pereira Barbosa (4ºESO C) 
• Alvaro Guisande Rego (4ºESO A)

Fomos seleccionados para crear a nosa Dixit Aula

 

Maruxía nº 30 - Desvelamos as portadas gañadoras

Os alumnxs de 4º de ESO TIC capitaneados por Natalia Irimia e Natalia Aldegunde remataron estes días de compoñer o número 30 da revista MARUXÍA. Xa está na imprenta.

A biblioteca acollerá o acto de presentación de revista escolar así como a entrega de premios dos certames literarios e de imaxe da A.C. os Matos, o vindeiro venres 21 de xuño ás 11h30.

Desvelamos a portada e o dorso da revista deste ano.

Parabéns a :

- Djessica Tavares Pereira Barbosa, alumna de 4° ESO - portada

- Álvaro Guisande Rego, alumno de 4° ESO - dorso

Gañadores nun dos retos de InnovatechFP 2024

Hoxe, o equipo de alumnado formado por Alicia Cabarcos e Sonia González do Ciclo Medio de Peiteado e cosmética capilar e Raúl Fraga e Alberto Cabana, estudantes do CS de Mecatrónica industrial, acompañados da directora do IES Perdouro María José Pardiñas, de Fernando López, profesor de Mecatrónica, e de Javier Rouco, coordinador do proxecto INNOVATECHFP 23-24 e profesor de Imaxe persoal, viaxamos ao recinto Expourense para recibir o galardón do programa InnovatechFP 23-24 da Consellería de Educación, que nos outorgou o primeiro premio na final celebrada na mañá de hoxe martes 17 de xuño por ter presentado e defendido un proxecto que deu resposta ao reto empresarial que a marca L’Oréal España-Portugal presentou ante 170 centros educativos da FP de Galicia na localidade de Culleredo a finais do ano pasado. 

O reto emprazábanos a traballar en qué facer cos envases de plástico que se desbotan nos salóns de peiteado para transformalos en produtos duradeiros para ser usados nestes mesmos espazos. O equipo que lideramos desde o IES Perdouro de Burela tivemos claro desde o principio que deseñar uns prototipos que permitan triturar os envases cosméticos de plástico e fundilos para logo crear produtos novos, como é o caso de peites que se fabricaron dentro deste proceso con estes mesmos polímeros a través de inxectar o plástico fundido en moldes de fabricación mecánica e tamén a través da creación de filamento plástico para impresión 3D. Co fin de poder darlle vida aos prototipos, o mestre Fernando López e os seus alumnos Raúl e Alberto, crearon desde as aulas-taller de Mecatrónica o deseño e fabricación destes aparellos: unha trituradora e unha inxectora para envases cosméticos de plástico e un molde de fabricación mecánica que dará forma ao produto final: peites elaborados cos residuos plásticos dos envases cosméticos. Mentres se traballou na fabricación, presentamos a idea nunha primeira fase que foi seleccionada xunto con outras dúas grandes propostas presentadas por outros dous centros referentes na Formación Profesional de Galicia: o IES A Guía de Vigo e o CIFP Someso da Coruña. Os tres fomos seleccionados para pasar a unha segunda fase. Unha honra participar xunto con eles. 

Por fin inmerso na fase dúas, o noso alumnado defendeu o proxecto diante do xurado no Centro de Innovación e Emprendemento Eduardo Barreiro de Ourense o pasado xoves. Nesa ocasión, en 5 minutos o equipo de alumnado do Perdouro tivo que presentar os prototipos e o produto final, xustificar e convencer ao xurado e á Empresa L’Oréal da súa viabilidade técnica e económica tratando de explicar o impacto que tería no medio ambiente e no rural. 

Hoxe foi un gran día! O representante da empresa L’Oréal nomeou por fin o equipo gañador do seu reto no recinto feiral de Ourense: “O gañador do reto L’Oréal é o IES PERDOURO de Burela”. Logo de recoller o premio de 10.000 euros que se empregarán no desenvolvemento da idea e a posta en marcha do proxecto empresarial, vemos que queda un bo sabor de traballo en equipo e, por ende, unha porta aberta para seguir defendendo a nosa solución a un nivel máis potente, traballando coa colaboración do equipo técnico de produción da empresa L’Oréal, líder no sector da cosmética, que nos acompañará e asesorará no seguinte proceso: facer do noso proxecto unha realidade. 

Agradecidos estamos de poder traer este premio a Burela e de achegar nun futuro a nosa solución á sociedade, pero ademais hai algo que nos ilusiona especialmente ao equipo: A Formación Profesional no IES Perdouro está ao nivel que as empresas líderes nos demandan, polo que seguiremos traballando arreo para seguir ofrecendo e achegando unha formación punteira ao noso alumnado! 

Grazas a todos cantos fixeron posible a solución a este reto e, en especial, ao noso alumnado que tan ben o soubo defender. 

Podedes acceder a máis imaxes AQUÍ.

Javier Rouco Martínez - Xefe de departamento de IMAXE PERSOAL 

Coordinador do PROGRAMA INNOVATECHFP 23-24. IES PERDOURO BURELA

Andaina polo bo trato ás persoas maiores

O venres 14 de xuño o alumnado de 1º ESO participou nunha andaina organizada pola Cruz Vermella co obxectivo de convivir durante unhas horas con persoas maiores. Esta actividade pretende fomentar o bo trato a este colectivo e a maior maneira é coñecelo compartindo con eles unhas horas de paseo, xogos e mesmo de comida. 

Ás 11:30h comezou a andaina que percorreu parte do paseo marítimo de Burela, tempo no que o alumnado puido ir conversando cos seus correspondentes maiores. A partir das 13:00h comezaron os xogos, a música e, finalmente, o picoteo. 

Foi unha actividade divertida e enriquecedora na que a comprensión e a solidariedade entre xoves e maiores estivo moi presente. 

Podedes acceder a máis imaxes AQUÍ. 

No noso programa de radio Proxecto Neo emitido o 20/06/2024, tamén adiantamos nos primeiros minutos a crónica feita polo alumnado e profesorado grazas o seu profesor Fernando Losada.

Ximnasia emocional con María Navarrete Fa

Do luns 10 de xuño ata o xoves 13, María Navarrete Fa, experta en Educación e Xestión Emocional realizou dúas sesións de obradoiros de Ximnasia emocional co alumnado da ESO. 

A ximnasia emocional é un tipo de adestramento das competencias emocionais (consciencia, regulación e autonomía emocionais, competencias socioemocionais e habilidades para a vida e o benestar). Traballa temas como o crecemento persoal desde unha metodoloxía baseada na participación activa e con recursos como o xogo, a música, o teatro, a reflexión e o debate, a risa, a meditación, a atención plena...

Ela mesma afirma que na frase "Vale máis previr ca curar" entraría a ximnasia emocional, xa que o adestramento espértanos a consciencia emocional e dános ferramentas de regulación que fan que aumente progresivamente a autoestima e a sensación de estás ben e feliz. 

E isto é o que o alumnado da ESO experimentou: procurar ser consciente das súas emocións e coñecer ferramentas para autorregulalas co obxectivo de mellorar a súa autoestima, sentirse mellor e ser máis feliz. 

Podedes acceder a máis imaxes AQUÍ.