Bo Nadal!

 

Felices Festas!

 

Chegaron os premios para as Portas de Nadal!

 Por fin coñecemos quen gañou os premios Portas de Nadal da edición 2021!

• 1º premio para 1º ESO A, polo volume da árbore, polos desexos compartidos en cada bóla e polos agasallos en tres dimensións.

• 2º premio para 4º ESO A, pola súa orixinalidade, pola concordancia entre as dúas portas da aula e pola súa singular caixa de correo. 

• 3º premio para 1º BAC A, pola limpeza da súa obra, polo emprego de distintas texturas e polo coidado nos detalles dos diferentes elementos decorativos. 

Para o xurado resultou moi difícil escoller as portas gañadoras, polo que resolveu conceder dous accésits: 

• A 2º ESO PMAR, pola realización dun gran traballo, aínda sendo o grupo menos numeroso, e polo emprego de elementos decorativos de orixe natural. 

• A 2º FPBásica de Fabricación e Montaxe, por utilizar a reciclaxe para a decoración da súa porta e polo esforzo realizado para serrar os compoñentes que empregaron. 

Moitos parabéns!!

**

Podedes ver as portas participantes nesta edición AQUÍ. 

Din que a unión fai a forza e tamén... se cadra... a árbore de Nadal!

Un curso máis, distintos departamentos do IES Perdouro uníronse para fabricar unha fermosa árbore de Nadal. 

Aplicando os seus coñecementos de trigonometría, artes plásticas, proporción aúrea, soldadura, origami e kusudama, o alumnado de: 

• FP Básica de Fabricación e Montaxe, 
• 2º ESO de Relixión,  
• 3º ESO de Matemáticas, 
• 4º ESO de EPeV, 
• 4º ESO de Tecnoloxía, 
• CM de Mecanizado e 
• CM Instalacións de Telecomunicación

elaboraron a árbore que se pode contemplar na entrada do centro.

Podedes ver máis imaxes da árbore de Nadal e dos autores destes magnífico traballo AQUÍ. 

Entrega de premios do concurso Portas de Nadal

O martes 21 entregaranse os premios ás portas mellor decoradas para este Nadal 2021-22. 

Durante esa mañá, visitaranse as aulas dos grupos gañadores para entregarlles o premio. 

Moita sorte para todos! Están quedando preciosas! 

A horta escolar do IES Perdouro

No departamento de Bioloxía e Xeoloxía do IES Perdouro tratamos de aproximar os nosos alumnos ao medio máis próximo. Neste caso levámolo a cabo a través dunha horta escolar. 

O obxectivo é que o alumnado cultive verduras e hortalizas fomentando así a alimentación saudable e o coidado do medio ambiente. Este trimestre os alumnos de 1º da ESO comezaron coa preparación do horto. Primeiramente, escolleron a zona máis adecuada do centro para a súa localización, baseándose na incidencia da radiación solar, humidade e características do solo. A continuación, planificaron a distribución do solo para organizar os distintos tipos de cultivos. As plantas que sementamos neste trimestre son aromáticas como a menta ou a herba luísa. Foron escollidas xa que atraen a numerosos insectos que favorecen o desenvolvemento do solo (vermes, cempés, xoaniñas, avispas, etc). Ademais, tamén estamos plantando verduras de temporada como son os repolos. 

No segundo trimestre continuaremos coa preparación dos sementeiros de leitugas, tomates ou pementos, que se plantarán xa no terceiro trimestre. 

O proxecto acaba de comezar, seguiremos informando!

M.ª José Fernández Vázquez - profesora do Dpto. de Bioloxía e Xeoloxía

O acuario tropical do IES Perdouro

Na charla sobre o acuario impartida para 3º ESO A, B e PMAR, dentro das actividades do Departamento de Bioloxía e Xeoloxía, falouse sobre as especies de plantas e os coidados básicos para o seu mantemento. As plantas que hai son: 

Cyptocorine affinis 

Hygrophila difformis 

Alternanthera rosaefolia 

Hydrocotyle leucocephala 

Echinodorus, anubia barteri 

Tamén expliquei qué especies de peixes hai, das que o máis salientable é que se trata de peixes ovovivíparos (os ovos desenvólvense no ventre da nai) e peixes vivíparos (o embrión xéstase no interior da femia e nacen directamente). Estes peixes viven aproximadamente a 25º C e xa tiveron varios alevíns. As especies que hai no acuario son: 

Guppys e Platys (ovovivíparos) 

Corydoras aeneus bronce e albinas (vivíparos)

Ademais falei dos distintos dispositivos de medición das condicións do acuario: medidor de pH, fosfatos, nitratos etc. 

Durante todo o curso, continuaremos observando o desenvolvemento dos peixes e das plantas do acuario e aprendendo sobre as súas condicións de vida. 

María Isabel Hategan - 3º ESO B

Estudo dos réptiles: o dragón barbudo

O xoves 16 de decembro, a alumna de 3º ESO B María Isabel Hategan Lefter deu unha charla aos compañeiros sobre o dragón barbudo, aproveitando que un exemplar foi cedido durante un día ao noso instituto. Este réptil escamoso, da especie Pogona vitticeps, vive nos desertos e semidesertos de Australia, polo que é diurno, pode trepar árbores e aliméntase de vexetais, froitos e insectos. É territorial (non se poden xuntar dous machos e unha femia no mesmo espazo, porque se enfrontarían un ao outro). Cando se sente ameazado ou asustado, abre a boca e a súa barba pode volverse de cor negra.

Os rapaces tiveron ocasión de tocalo e mesmo de telo nos seus brazos xa que é inofensivo. 

Podedes ver máis imaxes desta actividade AQUÍ. 

Fabiana Monteiro Pereira - 3º PMAR

Encontro con Javier Miranda de Terras de Miranda

O pasado 3 de novembro, recibimos no noso centro a Javier Miranda, representante e propietario de “Hortícolas Javier Miranda”, de Riotorto. Veunos falar do seu proxecto empresarial: como foron os inicios do seu negocio, que produtos cultiva e comercializa, como vai rotando os cultivos para evitar a sobreexplotación do solo, o emprego de químicos, dificultades que atopa no seu día a día… Sorprendeunos o novo que é e o ben que fala! Sen dúbida, foi unha actividade moi interesante e que nos conecta co mundo “real” do rural, ademáis de servirnos para profundar no que demos nas clases de Sociais sobre o sector primario.

Fabiana Monteiro Pereira  e Kassandra Soria Febrero, 3º ESO PMAR

Videoconferencia de Igaciencia – Novembro: mes da ciencia en galego "O que aprendemos da pandemia"

O 16 de novembro a doutora e neurocientífica Sonia Villapol falounos sobre o tema da pandemia e un pouco da súa vida fóra de Galicia.

Contounos cousas moi interesantes como a existencia das “Fake News”, noticias que provocan moita desinformación. Acompañou isto cunha mensaxe da OMS (Organización Mundial da Saúde): “Non só loitamos cunha pandemia senón cunha infodemia, debido á abundancia de noticias”.

Segundo a neurocientífica, o virus tróuxonos tanto cousas positivas como negativas. Durante este periodo, a ciencia, coa axuda da nanotecnoloxía, xogou un papel moi importante na creación das vacinas e a xente comezou a preocuparse máis pola súa hixiene e saúde. Lamentablemente, isto non reduce as consecuencias negativas que nos deixou a covid-19. As perdas dos nosos seres queridos e non poder ter contacto cos amigos e familiares foron os feitos que máis nos afectaron. Sonia Villapol díxonos que as persoas máis prexudicadas mentalmente foron os adolescentes, ata tal punto que aumentaron o número mozos con depresión e ansiedade. Se conseguimos coidarnos e manter a nosa saúde mental e física, poderiamos cambiar esta situación. Moita xente nos axuda a afrontar este problema e nos dá consellos como Sonia Villapol. Temos que seguir adiante despois de todo.

A charla pareceume moi necesaria e con moita información sobre o que está acontecendo ao noso redor. Penso que deberiamos recibir algunha outra sobre esta temática.

Lidiana de Pina Sanches – 4º ESO B

Obradoiro de escritura con Artemisa Semedo

OBRADOIRO DE ESCRITURA CREATIVA
A importancia de relerse e reescribirse
 

Os días 23 e 24 de novembro o alumnado de 1º de Bacharelato tivemos un obradoiro sobre escritura creativa impartido por Artemisa Semedo, que foi alumna do noso Centro.

Co título de “A importancia de relerse e reescribirse”, durante dúas sesións de dúas horas cada unha, desenvolvemos unha serie de actividades relacionadas coa creación de textos e a sensibilización contra a violencia machista.

Nun primeiro momento fixemos un xogo a modo de presentación, para romper o xeo e sentirnos máis cómodos á hora de expresar as nosas ideas; tivemos que elaborar unha frase co noso nome e unha cousa coa que nos identificásemos.

Outras actividades que fixemos foron cadeas de palabras seguindo as ditas polos compañeiros e compañeiras, escoller cores asociadas a unha persoa e escribirlle un texto agradecéndolle algo ou a chamada “caixa de palabras” (elixir unha palabra, pensar cinco relacionadas con ela e redactar un texto).

Na segunda sesión xa tivemos que pensar algo máis e ser máis creativos á hora de escribir as nosas historias ou poemas. A partir dunha frase que nos deu Artemisa, nós tivemos que elaborar un texto. Despois ensinounos un graffiti de Bansky dunha nena cun globo e a partir desta imaxe tivemos que escribir unha historia imaxinaria ou algunha lembranza da infancia.

Para rematar, centrámonos no tema do 25N, na violencia machista, e tivemos que expresar nun texto qué lugar do noso corpo sentiamos máis tensionado, negado ou agredido e que outras sensacións nos pode chegar a producir o patriarcado presente na nosa sociedade. Esta actividade era difícil xa que non todas as persoas querían compartir a súa opinión cos demais, pero houbo algún compañeiro e compañeira que se ofreceu a contar a súa historia.

Neste obradoiro compartimos a nosa imaxinación, as nosas vivencias e as nosas emocións, algo que, ao mellor, na nosa casa non fariamos.

Accede a reportaxe fotográfica AQUÍ.

Iria López e Yago Martínez, 1º Bacharelato

Entrega de premios Certame Postal de Nadal

Esta mañá Miruca Parga, Vicedirectora, e Ruth Adrio, xefa do departamento de Educación Plástica e Visual, entregaron os diplomas e premios aos gañadores do certame especial Postal de Nadal.

• Alexandre García Pousa de 3º ESO A acadou o 1° premio polo seu detallismo e limpeza escapando da imaxe clásica de Nadal. O seu debuxo representará a postal institucional do centro.
• Shiva Eliska Alinda Nurhakim de 3º ESO B obtivo o 2° premio polo minucioso traballo do fondo e a transformación dunha estampa de Nadal clásica en anime.
• Uxía Oroza Combarro de 1º ESO B recibiu o 3° premio pola súa atrevida composición, con collage e diferentes técnicas, rescatando a figura tradicional do apalpador.

Parabéns a estes 3 grandes debuxantes que ten o Perdouro!!

 

Fallo concurso de debuxo Especial Postal de Nadal 2021

Reunido o xurado, danse a coñecer os gañadores do certame de debuxo especial Postal de Nadal. 

O venres día 17 farase entrega dos diplomas e premios na bilioteca por parte do departamento de Educación Plástica Visual e Vicedirección.

• Alexandre García Pousa de 3º ESO A acadou o 1° premio polo seu detallismo e limpeza escapando da imaxe clásica de Nadal.
• Shiva Eliska Alinda Nurhakim de 3º ESO B obtivo o 2° premio polo minucioso traballo do fondo e a transformación dunha estampa de Nadal clásica en anime
  
• Uxía Oroza Combarro de 1º ESO B recibiu o 3° premio pola súa atrevida composición, con collage e diferentes técnicas, rescatando a figura tradicional do apalpador.
  

Charla violencia machista nas relacións de parella na mocidade

As alumnas e alumnos do Ciclo Medio de Peiteado e Cosmética Capilar asistimos o 22 de novembro a unha charla sobre a violencia machista nas relacións de parella na mocidade. Resultou ser unha xornada interesante e chea de dúbidas resoltas pola persoa que dirixiu a actividade, unha traballadora do Centro de Recuperación Integral de Mulleres que sofren violencia de xénero de Santiago de Compostela. Ela veu ao IES Perdouro grazas ao Plan Proxecta “Por 365 días de respecto e igualdade”, que no noso centro está coordinado pola profesora Carmen Sampedro.

Aprendemos a diferenciar a palabra "sexo" de "sexualidade". En moitas ocasións, as persoas temos prexuízos á hora de falar sobre elas ou mesmo non coñecemos cal é a diferenza. Despois disto, sen esperalo, comezamos un coloquio con diferentes opinións e isto fíxonos chegar a varias conclusións que debemos ter en conta.... Nós, os rapaces e rapazas de agora, somos o presente da sociedade, pero tamén o seu futuro. E como ben di un refrán moi coñecido: "Cada un recolle o que sementa”. Podemos sementar sinceridade, harmonía, respecto, amor, é dicir, non prexulgar. Pero tamén é posible sementar hipocrisía, discordancia, odio... Como futuro da sociedade, que queremos recoller?

Rematamos a charla (a cal se nos fixo moi breve) cunha sensación moi positiva e con ganas de inculcar aos nosos compañeiros, familiares e coñecidos que entre todos podemos mellorar esta sociedade, intentando erradicar deste xeito a violencia de xénero.

Na mesma xornada, pero noutras sesións, tamén participaron nesta actividade os compañeiros dos Ciclos Medios de Mecanizado e Instalacións de Telecomunicacións.

Alumnado de Ciclo Medio de Peiteado e Cosmética Capilar

Feira "Comercio con sentido"

O venres 22 de outubro o alumnado de 2º e 3º PMAR e FP Básica de Fabricación e Montaxe e de Servizos Administrativos fomos ata a Praza da Mariña para visitar a feira “Comercio con sentido”.
Cando chegamos, leváronnos ata un mapa chamado “de Peters”, que era bastante grande e no mapa tiñan colocado o café, o azucre, o chocolate e o cacao, cada un na zona na que se produce. Alí informáronnos sobre cada produto. Por exemplo, que todos eles se cultivan nos países que están no hemisferio sur e despois se exportan a países do norte e alí véndense.
As persoas que viven nos países do sur e traballan nisto gañan poucos beneficios porque eles fan todo o traballo que leva cultivar estas plantas e despois mándano a outros países e os que saen gañando son os países do norte, porque eles poñen o prezo que queren.
Tamén nos dixeron que o mapa de Peters non era como o que tiñamos na clase, aínda que en realidade non é así, porque xusto na nosa aula hai un mapa de Peters. Este mapa é diferente doutros porque é diferente o tamaño dos países e os do hemisferio sur vense máis grandes.
Despois de explicarnos todo isto, separáronnos en tres grupos porque había tres postos na feira: un de azucre, un de cacao e outro de café e cada grupo tiña que ir pasando por cada un deles. Alí había unha persoa que nos explicaba como era o proceso de producir cada un dos cultivos.
No que se refire ao azucre, contaban con catro tipos, aínda que dous deles eran practicamente iguais. Explicáronnos que o azucre branco, o que habitualmente usamos, procede da remolacha e os outros dous veñen da cana de azucre. O azucre de cana, uns son máis clariños e outros máis escuros, porque pasan por diferentes procesos de elaboración. A panela é un tipo de azucre máis escuro. Tamén nos contaron que o azucre se produce en Brasil, India, China, Tailandia, Paquistán e México.
O cacao dixéronnos que se producía principalmente na Costa de Marfil. A súa planta é o cacaoteiro. Collen o seu froito cando está vermello como a cereixa. Despois de collelo, fan todo o proceso de sacarlle as sementes, secalas e moelas e despois disto queda a manteiga de cacao, a pasta de cacao etc. O 68 % da súa produción está en África, o 18 % en Asia e o 14 % en Oceanía.
En canto ao café, provén dunha planta chamada cafeeira. O froito ten que estar vermello para ser recollido e despois sácaselle a cáscara e déixase secar. Cando acaba o proceso de secado, tórrase ou móese se se quere vender moído. Ten máis calidade o natural e menos o torrado. Tórrase porque, ,ao facer o café, sae máis escuro se está torrado, pero é peor ca o natural. O café prodúcese sobre todo en Perú, Colombia e México.
Quen quixo tivo oportunidade de probar o chocolate e o café. Tamén o vendían como produtos de comercio xusto. Así, van máis beneficios para os produtores e non tanto para os intermediarios.
Ao final, volvemos ao mapa de Peters e reflexionamos sobre a importancia dos países do hemisferio sur na produción destes cultivos que tanto se consomen en todo o planeta. 

Accede ao albúm de fotos AQUÍ.

Elian Sanches Tavares e Leydi Belén Briyith Abanto Balvin – 2º ESO

Normas para o concurso "Portas de Nadal"

Se queres participar no concurso "Portas de Nadal", debes seguir estas normas:

1. Decora a porta tendo en conta a orixinalidade, a estética e a sostibilidade. 

2. Cada grupo decorará a porta da súa aula de titoría.

3. En canto a materiais, prohíbese a cinta de pegar de dobre cara, porque arrinca a pintura da porta. No canto diso, emprega cinta de papel (de carroceiro). 

4. A decoración que se valorará para este concurso é só a da porta. O resto terase en conta para o concurso "Aulas Limpas".

5. No resto da aula, só se pode poñer decoración de Nadal no taboleiro, para cumprir coa normativa COVID de limpeza. Polo tanto, non se pode colocar na aula a típica árbore de Nadal nin outro tipo de decoración. 

6. O luns 20 de decembro a última hora da mañá a porta debe estar rematada. 

O mes da Ciencia en Galego 2021 por Igaciencia

Videoconferencias promovidas por Igaciencia polo mes da ciencia en galego 2021

Enlaces á emisión en directo :

Senén Barro Ameneiro. Director do CiTIUS.  

• Poden pensar as máquinas?, Un problema xa tratado por Alan Turing desde o 1º día da IA https://youtu.be/kvjezStdSJM
  

Sonia Villapol Salgado desde Houston (Texas).

• O que aprendemos da pandemia  https://youtu.be/iQ-9szX1Zas
  

Maria Del Pilar Bermejo Barrera, Decana da Fac. de Quimica da USC

• Química e vida  https://youtu.be/h0josvyzteE
  

Luis Díaz Allegue, profesor da URJC

• A economía circular e a bioeconomía. Como as bacterias poden axudar a abandonar o modelo lineal actual de "tomar-facer-desperdiciar" para pasar a unha economía que sexa rexenerativa por deseño. https://www.youtube.com/watch?v=A5nZXDjCiCY
  

Concurso AULAS LIMPAS

Esta semana comeza o concurso Aulas Limpas. O obxectivo desta actividade é que cada grupo se responsabilice de ter a súa aula limpa e ordenada e, se é o caso de que nese mes haxa algunha celebración, que elabore unha decoración axeitada. 

Valorarase que o chan, as mesas e as cadeiras estean limpas; que os caixóns, os estantes e o taboleiro estean ordenados; que as mochilas non estean tiradas polo chan, que se apaguen as luces, os ordenadores e os proxectores na última hora de clase e que a decoración destaque pola súa orixinalidade e sentido da estética, se hai algunha conmemoración ou festividade. 

Cada mes haberá un premio para cada un dos membros do grupo que teña a aula mellor coidada e a final de curso recibirá o galardón á Aula Magnífica o grupo que máis se esforzara de decembro a xuño.

Comeza a coidar a túa aula!!

A violencia párase con igualdade e respecto

O venres 26 de novembro continuamos xogando e buscando palabras que nos afasten de condutas violentas. Esta vez foi a quenda de 1º ESO A e B, 2º ESO B e PMAR, 3º ESO A e B e dos autores deste xogo, o alumnado de 1º ESO de Reforzo de Lingua galega, que estiveron coordinados pola súa profesora Rosa Febrero. 

Obradoiro de regueifa

O día 22 de novembro na hora de titoría tivemos un obradoiro de regueifa dirixido por Cristian Gómez, un compañeiro do Perdouro, estudante  de Electrónica que participa no Modelo Burela e que tamén é técnico e locutor de radio en Proxecto Neo.

Cristian explicounos que son as regueifas, como se fan, que versos teñen que rimar, os significados da palabra ( aparte dun canto tamén pode ser un baile ou un pan de voda). Despois fixemos as nosas propias regueifas, unha delas a partir do noso nome.

Gustounos moito esta actividade porque nos deu a coñecer unha nova forma de entreter coa linguaxe, da que non tiñamos coñecemento. Cristian explicounos todo dunha maneira divertida e fácil de comprender.

Tamén tivemos outras persoas na aula, xa que viñeron uns cámaras para gravar e sacar fotos para un documental.

Foi unha actividade entretida e recomendamos que se realice noutros cursos. 

Accede á reportaxe de fotografías aquí.

Uxía Oroza Combarro, Brais Vila Salgueiro, Iker Trillo Souto e Antón Míguez Rubiños. 1º ESO B

Pasa da violencia aprendendo emocións positivas

O xoves 25 xogamos ao rosco "Pasadaviolencia" buscando palabras relacionadas co respecto e a igualdade que nos afasten de calquera tipo de violencia. 

Os gañadores de cada grupo foron: 

Asier Oroza Parga (2º ESO A)

Carla Paz Trelles (2º ESO C)

Marina Rubal Ponsa (4º ESO B1)

Parabéns!

Anímate a xogar con nós!

 

Pasa da violencia - un rosco de pasapalabra 25N

Convidámoste a xogar!!

A ver se es quen de adiviñar as 22 definicións para erradicar a violencia. 

Primeiro, identifícate en Clique aquí para se identificar  para acceder como convidado/a.

Escribe o seguinte como nome de usuario: 

Curso, Letra, 1ª letra do 1º apelido, 1ª letra do 2º apelid2 , 1ª letra do nome    

    por exemplo "2ALLC" se estás en 2º ESO A e te chamas Carlos López López

Rosco do 25 N - Pasa da violencia!

Para erradicar a violencia de xénero, as nosas compañeiras de Pedagoxía Terapéutica e Audición e Linguaxe elaboraron un rosco con 22 definicións que nos axudarán a afastarnos de calquera tipo de conduta violenta.
O xoves 25 e o venres 26 estará colocado na entrada do edificio 1. Animámosvos a que levedes o voso alumnado a facer unha foto a carón do panel deste xogo que ten como lema "Pasa da violencia!"

 

 

As fotos enviádeas ao correo da vicedirectora para poder subilas ao blog. 

Convidámosvos a xogar en formato dixital. Indicádelle ao voso alumnado que prema no seguinte enlace para ver quen é o primeiro en adiviñar as 22 palabras do rosco:
 

http://perdourando.blogspot.com/2021/11/pasa-da-violencia-un-rosco-de.html

Cada un dos grupos da ESO xa ten profe asignado para que realicen o xogo. 

Moitas grazas pola vosa colaboración.

Vídeo 25 N: Por 365 días de respecto e igualdade

Con este vídeo queremos contribuír á concienciación para a eliminación da violencia de xénero.
Coa coordinación de Carmen Sampedro e dentro do marco do Plan Proxecta, o noso obxectivo é conseguir 365 días de respecto e igualdade.
Grazas a todas e a todos por deseñar estas coreografías. Encantounos bailar ao son da música de Sés. Esperamos que a vós tamén vos guste! Animádevos!

Inventos galegos

Xogamos?

Serás quen de coñecer quen é o inventor/a? Atrévete co cuestionario que fixeron os alumnos de 2º ESO ITI.

 Xogamos?

Serás quen de coñecer quen é o inventor? Atrávete co cuestionario

 

 

Concurso de tarxeta de Nadal

 

Mes da ciencia en Galego : Obradoiro "Luz, cor e ciencia"

 Os pasados xoves e venres 18 e 19 de novembro, o alumnado de 3º ESO do IES Perdouro participamos nun obradoiro chamado “Luz, Cor e Ciencia”, para celebrar o mes da Ciencia en galego no noso centro. Esta actividade estaba organizada polos departamentos de Instalación de Telecomunicacións e o Departamento de Educación Plástica e Visual. Foron as profesoras Marga López Periago e Ruth Adrio Monterroso as que nos impartiron este luminoso e colorido obradoiro. 

Comezamos repasando os conceptos básicos sobre as cores pigmento (maxenta, cian e amarelo) e as cores luz (vermello, verde e azul), a dispersión da luz branca cun prisma de cristal feito por Isaac Newton, a percepción das cores e as súas mesturas. E para continuar fixemos unha serie de experiencias prácticas: 

• Experiencia 1: Observación dos píxeles (RGB) da pantalla do ordenador cun microscopio e a cuatricromía (CMYK) nun libro e nun xornal. 

• Experiencia 2: Creación de diferentes cores, cunha tira de neopíxeles de 144 leds (1 metro) controlada por un programa chamado Arduino. Os valores RGB van de 0 a 255 variando estes números obtemos unha cor diferente. 

• Experiencia 3: Dispersión da luz branca cun CD. 

• Experiencia 4: Descubrimos a cor das sombras. Cando proxectamos unha sombra cun foco de cor vermella e verde ou azul por separado a súa cor é negra e se proxectamos os tres focos ao mesmo tempo as sombras son das cores das luces e a súa mestura dá o negro. Tamén estivemos analizando a cor dunha bolsa vermella. Baixo un foco azul non podiamos ver a súa cor real pola ausencia da cor vermella na luz proxectada. 

• Experiencia 5: Con luces led das cores RGB e diferentes formas de cartolinas estivemos xogando coas mesturas das cores e as sombras en grupos de tres. 

• Última experiencia: Cunha tira de neopíxeles introducida nun bote con pelotas de pimpón que axudaban a amplificar a cor e controlada por unha app dun móbil puidemos manipular o tempo, o parpadeo e as cores producindo diferentes efectos. Este foi un obradoiro do máis entretido e aos que nos gustan os videoxogos e os ordenadores puidemos comprender un montón de conceptos. Como broche final sacamos unhas fotos do grupo de clase moi divertidas para o recordo. 

Se queredes ver máis imaxes, podedes acceder ao álbum AQUÍ. 

Iago Ramos García – 3º ESO A   

Conmemoración do Día das Escritoras

O alumnado de 2º de Bacharelato de Literatura Galega do século XX e da actualidade, xunto coa súa profesora Neves Cando, preparou estas fermosas lecturas para celebrar o Día das Escritoras. 

Para acceder aos textos lidos, preme na seguinte selección realizada por Bibliotecas Escolares. 

Moitas grazas!

Protocolo de bo trato á infancia

O venres 1 de outubro representantes dos Servizos Sociais do Concello e do Centro de Saúde de Burela viñéronnos explicar como ter unha boa comunicación cos demais.

O alumnado de 1º ESO recibimos a Noelia, Minda, Conchi e Cristina que desenvolven o seu labor como educadoras ou traballadoras sociais. Elas demostráronnos que nas nosas conversacións cos demais ás veces somos agresivos ou, todo o contrario, pasivos.

Cando unha persoa é pasiva, tende a ignorar o que lle din. Non contesta, co que tampouco busca solución se hai un problema.

Cando alguén é agresivo, contesta mal, insulta, fai xestos hostís ou ameazantes ou mesmo pega.

O mellor é comportarse de xeito asertivo: dicir o que pensamos e como nos sentimos sen humillar o outro. Trátase de dialogar, respectar e poñernos no lugar da outra persoa, é dicir, ter empatía.

Vimos algúns vídeos para que acertaramos como era a comunicaciobran entre os personaxes e, despois, algúns voluntarios da clase fixeron unha pequena actuación para que analizásemos un pouco como sería unha comunicación pasiva, agresiva ou asertiva.

Esta actividade forma parte dun programa que o Concello de Burela levará a cabo durante todo o curso traballando con nenos e rapaces dos colexios e os institutos da vila para fomentar o bo trato á infancia.

Accede ao albúm de fotos aquí.

Nadia Patricia Fonseca Lopes – 1º ESO B

Receita saudables, unha publicación do alumnado de 2º ESO 19-20

Receitas saudables, un traballo feito durante o confinamento polo alumnado de 2º ESO. 

Esta mañá fíxose entrega da publicación ao alumnado implicado polo seu profesor de Educación física, Benxa Soto. 

A publicación conta con 39 receitas repartidas en varias seccións: verduras, arroces, carnes, peixes e mariscos, menús vexetarianos, cociña internacional e sobremesa. 

En cada receita clasifícanse os ingredientes empregados en 3 grandes tipos seguindo o modelo de “My Real Food” de Carlos Ríos, quen divide de forma sinxela os alimentos en 3 grupos: comida real, bos procesados e ultraprocesados.
Como se trata de receitas saudables, neste libro predominan os alimentos reais e os bos procesados, mentres que os ultraprocesados serán reducidos na medida do posible.

Esperamos que este libro vos sexa útil e que contribúa a unha alimentación saudable, completa, variada, equilibrada e saborosa. 

Agradecemos a colaboración da alumna Laura  González Freire na ilustración da portada.

Receitas Saudables

Acto de presentación da revista Maruxía nº 27

A asociación cultural Os Matos do IES Perdouro presentou o nº 27 da publicación Maruxía en colaboración co Equipo de Dinamización e coa Biblioteca.

 

Celia, Sofía, Antón e Álvaro, alumnado de 4º de ESO TIC, conduciron o acto e encargáronse de explicar como tiveron que traballar en equipo para poder sacar a diante unha nova edición da revista escolar. Maquetaron en Scribus e Canva as crónicas do alumnado e editaron as fotografías con GIMP. Distribuiron os artigos en varias seccións. Un ano máis, os principais responsables da elaboración dos contidos da revista foron alumnos de ESO, de bacharelato e docentes do centro. Ditribuiron os artigos en varias seccións. Tamén inclue códigos QR que fai dela unha revista máis interactiva para acceder aos traballos audiovisuais feitos neste ano académico.

27 anos despois, a revista escolar dos Matos segue recollendo unha mostra das actividades e traballos realizados no centro durante un ano escolar diferente sen ningunha saída por culpa da pandemia.

Asistiron ao acto Santiago Pérez Docobo, director do centro educativo; Benjamín Coto, Presidente da A.C. Os Matos, Antón Niñe, presidente de honra e Natalia Irimia, coordinadora do EDLG.

 

Natalia Irimia felicitou ás gañadoras do concurso de portada Maruxía: Ana Lestao Ben de 1º ESO (portada) e Lin Vizoso López de 4º ESO (contraportada)

 

Accede á reportaxe  AQUÍ.

 

Maruxía nº27

Entrega de Premios Concursos OS MATOS

O martes 22 de xuño,  entregáronse os premios do XIV Concurso de relato curto e do XII Concurso de imaxe convocados anualmente pola Asociación Cultural "Os Matos" cuxo lema foi “Haberá vida noutro planeta?”. Benjamín Soto, presidente da A.C. "Os Matos", felicitou aos premiados desta décimocuarta edición do certame. Antón Niñe, presidente de honra da asociación, Santiago Pérez, director, Natalia Irimia, coordinadora do EDLG entregaron os diplomas e uns agasallos. As obras gañadoras pódense ler no número da revista escolar “Maruxía” deste curso.

Parabéns rapaces!!!!!!Accede o noso albún fotográfico AQUÍ.

Oferta Educativa do IES Perdouro

 

Acto de presentación da revista Maruxía 27 e entrega de premios

Despedida 2º Bach 2021

Orla 2º Bach 2021

Mellores expedientes ABAU

Esta fotografía pon punto e final á andaina no IES Perdouro dunha marabillosa promoción de alumnas e alumnos que pasaron polas aulas, e tamén polos nosos corazóns, deixando unha pegada chea de ledicia, emocións e satisfacción polo traballo ben feito.

A maioría destes rapaces e rapazas chegou hai seis anos ao noso centro coa cariña de susto e incertidume que supón iniciar unha nova etapa de estudos nun lugar totalmente novo. Porén, deseguida, gañaron o noso corazón coa súa alegría, a súa implicación en todas as actividades e a súa calidade como persoas.

E foi pasando o tempo... E chegaron novas caras en 4º da ESO... E pasou o tempo... En 1º de Bacharelato houbo novas incorporacións... E ese grupiño que chegara ao principio enriqueceuse aínda máis: o compañeirismo, o “bo rollo” que sempre houbo entre elas e eles, é un sinal de identidade desta xeración.

 

E cando estabamos en 1º de Bacharelato, cando xa todas e todos nos sentiamos parte deste grupo excepcional... chegou o COVID e tivemos que pecharnos nas casas e aprender a relacionarnos e traballar a través da frialdade dunha “realidade virtual” que substituíu a calor do día a día na aula e os vosos sorrisos por unha imaxe a través dunha cámara.

Coa máscara posta comezamos 2º de Bacharelato, un curso marcado pola incertidume, o estrés pola ABAU e unha serie de novas palabras que invadiron a nosa vida: pandemia, coronavirus, pcr, corentena, confinamento...

Mais, detrás desa máscara que tivemos que empregar acotío, eu seguín vendo os vosos ollos cargados de ilusións, de entusiasmo e de todas esas emocións que o resto da faciana non podía transmitir.
Sodes, todas e todos vós, unha marabillosa promoción de moi boas persoas, que é o máis importante que se pode ser na vida, e estamos moi orgullosos e orgullosas de vós.

Eu, persoalmente, fun a vosa profesora ao longo de catro, tres e dous anos, ademais da vosa titora neste último curso, e podo dicirvos que sempre estaredes no meu corazón.

Non vos dicimos adeus porque queremos que voltedes polo IES Perdouro para compartir con nós a vosa andaina pola vida. Isto é un “ata sempre”...

Moitos bicos: ALEJANDRA, SERGIO, EGOITZ, LAURA, KATY, TONY, AARÓN, CHISTIAN, ADRIÁN, ROBERTO, CECILIA, ANTÍA, FLORENCIA, ÁLEX, RAÚL, HELENA, ÁLVARO, ANDRÉS, ALEJANDRO, YAIZA, LUIS, DANIEL, NOAH, JORGE, VÍCTOR, LUCAS, PAULA e SALMA.

Neves Cando, Titora 2º BAC, Curso 2020-21

Orgulho no Perdouro - reparto de correas

Onte, no marco das actividades do mes do Orgulho no Perdouro, Alba Monteagudo coordinadora do proxecto 365 días en igualdade e respecto, repartiu as correas cos lemas gañadores do certame Orgulho no Perdouro.

Accede ao albúm de fotos da entrega  aquí.

Rubén	Laura	Yorel
Nerea	Iria	Orgulho

17 de maio, Día Internacional contra a Homofobia, a Transfobia e a Bifobia

Para continuar co fomento da igualdade, no IES Perdouro quixemos conmemorar o Día Internacional contra a Homofobia, a Transfobia e a Bifobia. Para iso, elaboramos uns carteis, que colocamos nos diferentes pavillóns do instituto e, ademais, pedímoslles aos alumnos/as da ESO que redactasen uns lemas nos que expresasen o seu rexeitamento contra calquera actitude discriminatoria cara os colectivos de persoas homosexuais, transexuais e bisexuais. 

Os lemas gañadores foron os seguintes: 

• Que ninguén che impida querer! De Rubén Díaz Fraga (1º A ESO). 
• Respéctame tal e como son. De Laura Alonso Fernández (2º B ESO). 
• Sé como/quen desexes ser. De Yorel Ladra Ballesteros (3º D ESO). 
• Somos libres de ser e amar a quen queiramos. De Nerea Francos Cornide (3º C ESO). 
• Unha relación baséase no amor, non no xénero. De Iria López Casas (4º B ESO). 

Finalmente, os lemas foron impresos nunhas correas para as chaves, que serán repartidas mañá a todo o alumnado da ESO.

Recompilando os 21 días en galego e máis....

Este curso recibimos un reto: o dos 21 Días co galego e máis. Así foi como formamos parte desta estupenda iniciativa xunto a outro nove centros de Galicia e como nos convertimos en factoría de produción audiovisual con propostas diversas para achegarnos ao galego e á súa cultura.

Na seguinte presentación recollemos algúns dos traballos realizados:

Resolvendo problemas en matemáticas - 1º ESO

Sesión de resolución de problemas: estimulación do pensamento lóxico-matemático

Todas as semanas, os venres, os alumnos e alumnas de 1º de ESO facemos unha sesión de resolución de problemas na clase de matemáticas.
Nestas sesións intentamos resolver distintos tipos de problemas. Estes son diferentes dos que adoitamos facer na clase, pois conseguir a resposta correcta non sempre depende de saber resolver operacións, senón de que a maioría destes problemas necesitan dun razoamento lóxico previo para a súa resolución.
Para estas sesións estamos agrupados de dous en dous. As parellas son elixidas ao azar e isto, a pesar de que non sempre nos toque a compañía desexada, fai que nos adaptemos a traballar con compañeiros diferentes, e non sempre cos mesmos.
Aprender a traballar en equipo é moi importante e é algo que conseguimos colaborando nestas sesións. Ademais, outro beneficio da aprendizaxe en equipo é que moitas veces descobres como ven e entenden as cousas outras persoas e as solucións que atopan para os problemas propostos.
En conclusión, nestas sesións estamos aprendendo moito: conceptos de xeometría, simetría, visión espacial e ata nocións aínda máis abstractas.
Ademais, estas horas de clase axudáronme a ver as matemáticas dun xeito distinto e creo que eu non fun a única que descubriu esta nova perspectiva.

Accede a algunhas fotografías aquí.

Ana Lestao Ben - 1º ESO A

EduEmociona con María Navarrete

Cal é a diferenza entre emoción e sentimento? Unha emoción é unha reacción espontánea que non podemos controlar nin elixir e que ocorre en calquera momento; mentres que os sentimentos son as interpretacións a partir destas e o seu desenvolvemento, influenciados polos nosos pensamentos: decidímolos nós e poden perdurar no tempo.

O venres 28 de maio, o alumnado de 4º ESO traballamos distintos conceptos sentimentais e emocionais a través de dinámicas de “ximnasia emocional” organizadas por María Navarrete, neuroeducadora e animadora socioemocional catalá.

Para comezar, fixemos un xogo de intercambio de lugar co fin de presentarnos e mesturarnos entre nós e despois un microteatro de posibles emocións.

Seguimos cunha dinámica na que tiñamos que aguantar as miradas durante uns minutos e en silencio. Para iso, dividimos a clase nun círculo interior e noutro exterior, mirando os do medio cara aos de fóra e viceversa; cando pasaba o tempo, cambiabamos de persoa e, xa nas últimas roldas, engadimos unha conversa na que os membros da parella se alternaban para dicir frases que empezaran por “gustaríame ...” ou “sei que podo…”.

Logo da primeira actividade, continuamos coa explicación do que sentiriamos nós en tres situacións distintas: axudar a alguén nun momento de apuro, celebrar o noso anivesario e que ninguén nos faga caso ou que nos expulsen de clase inxustamente. O obxectivo era falar, o maior tempo posible, das supostas emocións neses momentos, mentres que a túa parella escoitaba (con isto queríase demostrar a nosa imaxinación rápida e a forma na que expoñemos os feitos case sen ter tempo de pensar). Deste xeito descubrimos como funciona o cerebro ao expoñerse a un cambio emocinal: experimentamos a emoción, analizámola, pensamos nela e, xa por último, actuamos. Un proceso que só realizamos os seres humanos: sentir, pensar e actuar; o resto de seres vivos senten e actúan.

Despois de cada dinámica analizabamos as emocións experimentadas e, entre unha e outra, facíase unha pequena explicación teórica.

Finalizamos o obradoiro cunha serie de anécdotas que contou María sobre o seu traballo e sobre respostas e sucesos que lle chamaron a atención en charlas similares.

Nós quedamos con ganas de máis e imos ter a sorte de poder desfrutar dunha segunda sesión facendo máis activides que nos poidan servir para a convivencia na clase, para a nosa forma de pensar e para ter unha boa saúde emocional.

Accede a algunhas das fotografías feitas nas sesións de ESO.
   
Laura Rodríguez López e Nuria Ramos Cuba, 4º ESO B

Charla con Care Santos, a autora de Mentira

O alumnado de 4º da ESO e 2º PMAR tivemos un encontro en liña o día 25 de maio coa autora dun dos libros que puidemos ler na materia de Lingua Galega: Mentira de Care Santos.
A novela trata sobre un adolescente condenado por asasinato, pero tamén fala sobre a delincuencia xuvenil e plantexa algunhas preguntas como: por que alguén pode chegar a asasinar a outra persoa?.
Debido a que estudou Dereito, a autora do libro interesouse pola vida nos centros de menores e propúxose investigar sobre eles para coñecer as experiencias dos alí internos. Tras anos pensando nunha novela con esta temática, conseguiu entrar nun destes centros, coñecer as súas instalacións e vivir en primeira persoa a chegada de novos internos.
O libro baséase nas vidas e experiencias dos rapaces e rapazas que se ofreceron a contarllas. Care Santos díxonos que escoitou historias moi duras e que realmente acabou impactada por elas;  os nomes destas persoas  que falaron con ela non se incluíron na parte final de agradecementos xa que quería protexer a súa identidade e vida privada.
Para rematar a charla, houbo unha quenda de preguntas e respostas. Nós tiñamos anotadas unhas cantas cuestións: como empezou como escritora (díxonos que comezou aos oito anos pero en serio aos 14), en que idioma escribe inicialmente, como é a súa rutina para escribir e como fai para superar un bloqueo creativo, entre outras. A resposta que, quizais, máis nos chamou a atención foi a de por que o libro fala sobre ese tema: ela contounos que foi grazas a un amigo seu que era fiscal e que lle comentou unha historia dun rapaz que se autoinculpa dun crime, aínda que todo o mundo pensaba que mentía.
En resumo, foi unha charla moi entretida na que puidemos coñecer as ideas base deste libro e saber máis cousas sobre el e a súa autora.

Acceda ao albúm de fotos aquí.

Laura García Sánchez e Nicolas Sixto Guisasola, 4º ESO

Fallo do xurado Concursos OS MATOS

 O xurado resolveu outorgarlles os premios aos traballos presentados polos seguintes alumnos:

"XIV Concurso literario" da As. Cultural Os Matos - Tema "Haberá vida noutro planeta?"

RELATO CURTO

Categoría 1º e 2º ESO:

• 1º premio: Asier Oroza Parga (1º ESO)
• 2º premio: Carla Paz Trelles (1º ESO)
• 3º premio: Iria Jacomé Martínez (1º ESO)

 Categoría 3º e 4º ESO:

• 1º premio: Iria Calveche Barranco (3º ESO)
• 2º premio: Noemy Tavares Pereira Barbosa (4º ESO)
• 3º premio: Katerine Andrea Ortiz Cáceres (4º ESO)
• Accésit: Cristina Meitín Cayón (4º ESO) 

Categoría Bacharelato e Ciclos formativos:

• 1º premio: Beatriz Botelho Melo (1º Bach.)
  

"XII Concurso de Imaxe" da As. Cultural Os Matos - Tema "Haberá vida noutro planeta?"

Categoría 1º ESO:

• 1º premio: Ximena Riopedre Orosa
• 2º premio: Carla Paz Trelles
• 3º premio: Nicole Barreiro Souto

Categoría 3º ESO:

• 1º premio: Laura González Freire
• 2º premio: Nerea Francos Cornide
• 3º premio: Ramón Real González
  

Categoría 4º ESO:

• 1º premio: Lin Vizoso López
• 2º premio: Noemy Tavares Pereira Barbosa
• 3º premio: deserto

Conferencia-exposición Día das Letras Galegas 2020 Ricardo Carballo Calero

O pasado 13 de outubro, os alumnos e alumnas de 1º de Bacharelato B, asistimos a unha charla sobre o autor ao que se lle adicara o Día das Letras Galegas 2020: Ricardo Carballo Calero. 

O noso convidado, e polo tanto quen nos proporcionou a información necesaria sobre o tema, foi Xulio Xiz, un coñecido periodista, escritor e activista que xa tivemos o pracer de acoller no noso centro en numerosas ocasións. Contounos, con todo luxo de detalles, os aspectos máis impostantes da vida do célebre escritor galego, comezando polo seu ano e lugar de nacemento e rematando con algúns dos seus logros máis relevantes a nivel persoal.

Ricardo Carballo Calero naceu no centro urbano da cidade galega de Ferrol no ano 1910 e é recoñecido polo seu valor ao romper cos tópicos da época tales como que o galego era unha lingua rural empregada pola parte da poboación que posuía pouco poder adquisitivo. Foi, ademais, un gran defensor da lingua e a cultura da nación galega. Traballou en Lugo durante 15 anos, marcando a unha gran cantidade de rapaces que amosan aínda hoxe un gran cariño por el.

Seguindo coa historia da súa vida, de rapaz entrou no Seminario de Estudos Galegos e tivo unha formación académica moi completa e destacable. Pouco despois incorporaríase tamén á Real Academia Galega. Mais, non todo o que o rodeou tivo un carácter positivo, pois viuse na obriga de marchar para Madrid cando estalou a Guerra Civil e, despois do conflito bélico, pasaría dous meses no cárcere, o que fixo que non puidese coñecer a súa segunda filla cando naceu. Afortunadamente, a pesar desta mala experiencia, conseguiu saír adiante e voltar á súa terra natal.

Ricardo Carballo Calero foi un gran escritor e lingüista, que defendeu incansablemente ao pobo galego, deixando un gran legado tras el.

Eva Blanco Ferreiro– 1º BAC B

As miradas de Isaac

Centenario de Isaac Díaz Pardo (1920-2020) - Exposición As miradas de Isaac

O día 16 de marzo tivemos unha videoconferencia a raíz dunha exposición sobre a vida de Isaac Díaz Pardo, xa que é unha figura moi importante en Galiza. Isaac Díaz Pardo foi un gran impulsor da fábrica de Sargadelos, entre outras. 

Ao comezo da videoconferencia a guía, Paula Toimil, contounos a vida da súa familia e a súa infancia. O seu pai chamábase Camilo, era de Ferrol. No ano 1920 trasladouse a Compostela, no mesmo ano naceu Isaac. Dende moi novo, Camilo introduciu ao seu fillo na realización de cartaces. O pai de Isaac traballaba nun taller onde elaboraba os seus carteis para as festas, propaganda… Un dos carteis que máis destacou foi un do ano 1933. Fixo un cartaz que xuntaba as dúas bandeiras (a republicana e a galega). Mais nese taller non só facía carteis senón que aí xorde o Partido Galeguista. Pola facilidade que tiñan ao ter o taller, fixeron moitos carteis apoiando esta ideoloxía, a do Partido Galegista. O pai de Isaac, Camilo, mais o seu fillo tiñan unha ideoloxía política deferente, segundo Isaac. El consideraba aos amigos de seu pai, a Ánxel Casal e ao mesmo Castelao, reaccionarios e el definíase como comunista. Defendendo a súa ideoloxia tamén realizou carteis.

Isaac elaboraba os pasquíns cun grupo de amigos da súa mesma ideoloxía política. A guía explicounos que tiñan que ir ao concello para que lles selasen os pasquíns e Ánxel Casal imprimíaos. Mais eles non o facían, ata que lles chamaron a atención por facer isto. Isaac comenta ao final do vídeo que a xente nova quere cambiar o mundo mais que non pensan o suficiente. Isaac aprendeu isto moi ben, el librouse da morte mais seu pai non tivo esa mesma sorte e Ánxel Casal tampouco. Detivéronos e Isaac pensaba que cando os soltaran da cadea serían libres, que non que os ían matar. Seu pai e Ánxel Casal morreron con poucos días de diferenza. Camilo, o pai de Isaac, foi paseado o día 14 de agosto e os seu amigo, o 19.

Este acontecemento tivo consecuencias na súa familia. Tras a morte do seu pai, a familia quedou marcada, xa que o seu pai era galeguista. Quitáronlles todo o que lles pertencía e viviron escondidos ata que a situación mellorou. Isaac foi enviado a casa dun tío seu á Coruña. Isaac colleu o autobús, o Castromil, para ir desde Santiago ata A Coruña, e o vehiculo tivo que deterse 6 veces polo camiño porque había mortos nas cunetas e na estrada e xente chorando e berrando. Estivo agochado, sen saír de casa de seu tío, na Praza de Pontevedra, 6 meses. Cando todo se calmou un pouco, decidiu irse para Madrid e estudar Belas Artes. Comezou a ir ao Museo do Prado, intentando imitar os cadros e vendéndollos á burguesía.

Máis tarde, Isaac introduciu nas súas obras a crítica da Guerra Civil. Nalgún dos seus cadros realiza unha homenaxe ao seu pai. É o caso do cadro titulado “Os afogados”. As súas obras tiñan unha temática de denuncia. Despois, na década dos 60, comezou a pintar dunha maneira expresionista. Isaac, nas súas obras quería denunciar a falta de liberdade. Isto acontece no cadro titulado “As miradas”. Trátase de miradas inquisitivas, preguntándose cando acabará a ditadura. 

Isaac estivera tamén en Londres e deu clase en Barcelona pero decide abandonar os pinceis e, tras varias exposicións, como non se sentía realizado pintando para a burguesía, trasládase a Galiza, a Sada, a casa da familia da súa muller Carmen Arias (Minina).

Isaac Diaz Pardo mantiña contacto con Luís Seoane. Entre eles escribíanse cartas dende Galiza a Arxentina. Isaac tamén tiña contacto con máis xente do exilio, xa que eles propuxéranlle a Isaac facer obras, cerámica, a nivel industrial en América. 

Tamén realizou unha banda deseñada en galego, baseándose nos carteis de cegos. Creou a súa propia banda deseñada, que consistía nunha critica da sociedade e tamén dos emigrantes enriquecidos. Parte deles provócanlle unha profunda decepción.

Isaac comeza a producir a nivel industrial ao adquirir a fabrica de Sargadelos. A principios do século XIX era unha fábrica de armas e despois empezou coa louza, mais non por moito tempo. Tras o peche da fabrica, pola morte do Marqués de Sargadelos, pasa practicamente un século pechada (1875-1970). Isaac compra a fabrica e renóvaa. A fábrica de Sargadelos dividese en dúas etapas: Sargadelos histórico (temática inglesa) é Sargadelos actual (historia de Galiza, con debuxos que destacan de Galiza). As dúas temáticas tiñas en común a mesma cor: o azul escuro ou azul cobalto.

Isaac tamén construíu unha escola de deseño co seu amigo Luís Seoane, unha editorial (Edicións do Castro, 1963) para recuperar así as novelas destruídas durante a ditadura e dar máis importancia aos exiliados e aos novos autores. Tamén puxeron en funcionamento un museo de arte contemporánea ao que lle puxeron o nome de Carlos Maside. No mesmo museo tamén realizaban talleres e tiñan unha carpa que expoñía as obras por toda Galiza.

As últimas palabras que oímos de Isaac Díaz Pardo no vídeo foron a frase na que el di que era “conservador libertario”. “Conservador” porque hai que conservar o que herdamos e “libertario” porque non sempre hai que seguir o ditado polas normas. Non se consideraba nin de esquerdas nin de dereitas. Explica que o problema no mundo é a ética. O que hai é que ter honestidade.

Tamén no final da exposición escoitamos unha reflexión sobre a tecnoloxía e a contaminación do noso mundo. Isaac pensaba que “estamos escarallando o planeta, que este é o século da basura”. 

Por outra parte, para el a cultura era tamén economía e, non só iso, senón que con ela se pode facer labor social. Sentíase “vivo” loitando contra os poderes establecidos. Morre aos 91 anos, en 2012. 

Para finalizar, realizamos unhas breves preguntas e así acabou a nosa videoconferencia. 

Accceda a algunhas fotos aquí.

Beatriz Botelho Melo – 1º BAC B