Felices Festas Burela

Viaxe a Londres de 4º ESO

Dende o 5 de maio ata o 10 dese mesmo mes todo o grupo de 4º ESO estivemos de viaxe en Londres, Reino Unido. Foi unha viaxe xenial! 

O 5 de maio atopámonos todos na estación de autobuses de Burela ás 6:30 da mañá, para saír cara ao aeroporto de A Coruña, onde colleriamos o primeiro voo ás 10:20 para Gatwick airport, onde aterramos ás 11, hora inglesa. 

En Gatwick recolleunos un autobús que nos levou ata o noso hotel en Londres; tivemos un traxecto dunhas 2 horas onde aprendemos moitas cousas que o guía que nos acompañaba ía compartindo con nós a medida que viaxabamos cara ao centro. Rímonos moito durante o traxecto! A tarde transcorreu tranquila, aínda que estabamos moi cansos por mor da viaxe; fomos a sitios como China Town, Piccadilly Circus, Covent Garden... onde desfrutamos de múltiples actuacións a pé de rúa, probamos cousas novas e visitamos moitos lugares, pero sobretodo rimos un montón. 

O día 6 espertamos e baixamos a almorzar, probando o verdadeiro British breakfast. O tempo non acompañou moito pola chuvia, pero partimos cara á City enfundados cos nosos chuvasqueiros e, aínda así, puidemos desfrutar do día; ata fixemos un concurso entre dous grupos para comprobar cantas persoas nos conseguiamos meter nunha cabina de teléfono e pasámolo moi ben. Visitamos tamén o Tate Modern entre outros lugares, e desfrutamos dunhas vistas preciosas da cidade, sen olvidarnos do Globe Theatre, Tower Bridge ou a Torre de Londres. 

O día 7 comezamos percorrendo os Kensington Gardens, a Albertopolis e visitando o Science Museum, onde aprendemos sobre a evolución, o espazo, etc... Visitamos tamén o Natural History Museum e experimentamos o que era un terremoto. Foi unha experiencia moi estraña e curiosa. Máis tarde dirixímonos a Harrod’s, uns grandes almacéns de luxo, onde algúns afortunados coñeceron ao xogador de fútbol Luís Díaz. Rematamos o día en Hyde Park, onde xogamos e rimos moito, desfrutando do tempo xuntos! 

O día 8 fomos visitar o Big Ben, a ver o cambio de garda (alí tivemos a sorte de ver ao Rei!). No Big Ben sacamos un par de fotos de recordo. Para xantar fomos a un parque onde había outra excursión de nenos pequenos e acabamos facendo ximnasia rítmica e flexións; foi moi divertido! Fixemos unha viaxe en barco pero estabamos tan cansos que incluso algúns adormeceron. Finalizamos no London Eye, onde sacamos fotos, rimos e ata algúns puideron presenciar unha pedida de man en vivo e en directo! 

O día 9 comezámolo no British Museum, aprendendo sobre historia, para despois dirixirnos cara a Candem Town, onde “flipamos” coa variedade de tendas que había e co ambiente do barrio. Mercamos algunhas cousas e desfrutamos do bo tempo que nos estaba a acompañar. Pasámonos tamén por un pequeno outeiro con vistas de toda a cidade e, ao baixar, atopámonos cunha furgoneta de xeados, como nas películas! 

O día 10 acompañábanos a triteza xa que volveriamos á casa; pola mañá os máis afeccionados ao fútbol puideron desfrutar do Stranford Bridge, o estadio do Chelsea FC. Máis tarde dirixímonos cara ao aeroporto onde collemos o noso voo a Santiago de Compostela; foi un voo tranquilo e con moitos recordos novos! Ao aterrar subimos ao autobús, viaxe na que fomos durmindo, cantando, etc... 

Foi unha viaxe xenial! Cómpre dar as grazas ao profesorado por confiar en nós dende o minuto un e por permitirnos vivir unha semana tan marabillosa, mellor de non ser polo TESCO! E non olvidedes ter coidado cos pickpockets, ou debería dicir bigpockets? 

 

Accede ao álbum de fotos aquí.

 

Lara Sixto Guisasola 4º ESO A

Despedida de 2º de Bacharelato 2024

Chegou o día tan desexado para o alumnado de 2º de Bacharelato, a data da súa graduación.

O martes, día 14 de maio, celebramos a cea de despedida. Reunímonos 51 alumnos e profesores para celebrar o final dunha etapa bonita a pesar do paso dunha pandemia mundial.

Moitos parabéns a Ana, Ester e Ramón por levar matrícula de honra con 10. Mais tamén queremos felicitar a Paula López Martínez, Nerea, Paula Rodil, Ivana, Manuela e Lucía por sacar unha media superior a 9.

Moita sorte a todxs na ABAU e/ou outros destinos!

Promoción 2018-2024: Luna, Juanma, Pablo Balseiro, Melanie, Abril, Mario, Jorge, David, Raúl, Simón, Imanol, Daniel, Paula Fraga, Carmen, Nerea, Ana, Sabela, Roi, Noa Gudín., Yorel, Paula L. Calvo, Paula L. Martínez, Ivana, Diego, Noa Martínez, Saray, Pablo Méndez, Pablo Míguez, Iago, Jorge Neira, Mateo, David José, Celia, Mara, Jaime, Gabriela, Félix, Lucía, Laura, Ramón, Pablo Rivas, Ester, Paula Rodil, Lola, Marta, Marina, Andrés, Manuela, Andrea, Denisa, Silveria.

Podedes acceder a máis imaxes AQUÍ. 

Carteis Letras galegas 2024: Luísa Villalta

O alumnado de 4º ESO de Proxecto competencial elaborou este curso a exposición de carteis das Letras galegas, dedicadas a Luísa Villalta. 

Podedes encontrar máis información sobre Luísa Villalta no Portal da Lingua. Alí podedes acceder a outras exposicións de carteis sobre a autora. 

Encontro literario con María Reimóndez

O martes 14 de maio María Reimóndez conversará co alumnado de 2º de ESO sobre a obra Furia.

II Día da literatura caboverdiana

Imos celebrar o IIº Día da literatura caboverdiana coa lectura continuada de "Siriaco e Mister Charles" de Joaquim Arena, novela galardoada co premio Oceanos. 

 

O martes 21 e mércores 22 de maio de 18:00 a 19:00h haberá sesións de animación á lectura da obra. 

 

O martes 11 de xuño terá lugar a lectura continuada na biblioteca do IES Perdouro .

Encontro e Ruta literaria con Lois Pérez

O xoves 09 de maio teremos a Lois Pérez na biblioteca para conversar co alumnado de 1º de ESO sobre a obra A Tribo do mar. 

Logo fará unha pequena ruta ata o pavillón Vista Alegre con alumnado de 4º ESO PDC e co alumnado do club de lectura do IES Monte Castelo.

Pílulas formativas do alumnado de Xeoloxía e Ciencias Ambientais de 2º de Bacharelato

O alumnado de Xeoloxía e Ciencias Ambientais de 2º de Bacharelato leva preparando nas últimas semanas breves pílulas formativas para explicarnoss de maneira doada algúns dos conceptos que estudan na aula. 

Con estes experimentos e exposicións gráficas entenderemos moito mellor a Xeoloxía e as Ciencias Ambientais. Grazas polo voso labor de divulgación.

Aquí están os últimos vídeos que prepararon para explicarnos a densidade, a presión e a illa de calor: 

Exposición Especial BD para a Microrrede

A Microrrede de Bibliotecas Escolares Plambe da Mariña rende este ano unha especial homenaxe a Francisco Ibañez. A exposición conxunta que se celebrará en Viveiro do 7 ao 10  de maio leva por título 13 rúa da Microrrede, coincidindo coa edición nº 13 da exposición.

No IES Perdouro, quixemos plasmar nunha viñeta os protagonistas da familia Trapisonda de Ibañez. Para iso, inspirámonos no traballo da artista galega de banda deseñada, Bea Lena, recén galardoada no Festival de BD de Angoulème coa súa obra Corpo de Cristo. Ela borda os seus debuxos en formato téxtil.

Un grupo de alumnado de 4º ESO confeccionou empregando a técnica das arpilleiras (cosendo a man e a máquina, bordando e pasando o ferro) os elementos que ían compoñer a viñeta de 95x75cm. Os retais foron doados por Arranxos a quen agradecemos moito a súa xenerosidade. En definitiva, fixemos un traballo cooperativo de custo cero. 

Tamén participamos cunha viñeta nunha tira cómica colaborativa, Supermariña e Martiño, entre os 20 centros que forman a Microrrede. O resultado final desta aventura poderá verse na exposición da Sala de Multiusos do Concello do Viveiro ou AQUÍ..

Podes ver a reportaxe de fotografía AQUÍ.   

Ademais, temos feitos uns xogos para medir os teus coñecementos en canto a personaxes de BD. Aceptas o reto? Adiante.

 XOGO 1 . Heroes e heroínas de BD

 

XOGO 2: Personaxe de BD francófonos

Taller de minerais

O pasado xoves catro de abril tivemos o pracer de recibir o renomeado xeólogo Fran Canosa no noso centro para que nos impartira unha agradable clase. Nela explicou, a fume de carozo e de xeito ameno e exemplificado, as propiedades dos minerais. Non era a primeira vez que se realizaba unha actividade con este xeólogo, quen destaca tanto polo ensino como por ser un bo divulgador e defensor do patrimonio xeolóxico. 

O taller foi impartido no laboratorio para o alumnado de primeiro da ESO e para o de Bioloxía de segundo de Bacharelato. Cabe destacar as capacidades pedagóxicas do xeólogo, pois explicaba dun xeito tal que os pequenos comprendían perfectamente propiedades mineralóxicas que sorprenderon ata aos máis maiores, profesorado incluído. 

Fran, despois de deixar ben clara a diferenza entre rocha e mineral, explicou o hábito, a dureza, a cor da raia o brillo... e as propiedades que máis chamaron a atención: a fluorescencia e a fosforescencia. Sempre de xeito interactivo e cunha peza a disposición para exemplificar cada unha das explicacións, porque o alumnado científico do centro quere convencerse a base de probas. 

Podedes acceder ás imaxes aquí.

 Gabriela Pedre Lastra - 2º Bacharelato A

I Semana do Benestar emocional e a Convivencia: charla sobre resiliencia

O luns 8 de abril veu ao instituto, co gallo da Semana do Benestar e a Convivencia, Raquel Marqués, unha muller de 35 anos con discapacidade visual. Xunto a ela viña tamén a súa cadela guía, Estela. Durante a charla, Raquel explicounos todas as dificultades que tivo que pasar para poder lograr facer o que ela quería. Durante a súa vida estudou dúas carreiras, Enfermería e Fisioterapia, e tivo diversos traballos como: dependenta, camareira en discotecas, azafata promocionando bebidas, nunha residencia de maiores... 

Actualmente Raquel ten parella e un fillo de dous anos, cos que vive en Foz. Ela aportounos unha ensinanza moi valiosa: que hai que esforzarse para conseguir o que queiras por moitas dificultades que che poña a vida por diante. Tamén nos dixo que a sociedade te valora pola discapacidade e non pola capacidade, algo sen dúbida moi inxusto para os que a sofren. Por sorte, para poder enfrontarse a todos os problemas da sociedade actual, sempre contou co apoio da súa familia e dos seus amigos. 

Podedes ver a foto aquí.

Aleixo Fernández Maseda – 3º ESO A

Rúa da Microrrede - Exposición da Microrrede de Bibliotecas Escolares da Mariña

O martes 7 de maio, ás 17h00 inaugúrase a exposición anual da Microrrede de Bibliotecas Escolares PLAMBE da Mariña á que pertencemos. 

As obras que aí se presentan brinda unha pequena homenaxe a Ibañez, humorista gráfico creador de Mortadelo e Filemón.

O cartel é obra da alumna de 2º de bach de Arte do IES Monte Castelo, Laura González Freire que agradecemos por brindarnos a portada que abre as portas ao noso traballo colaborativo. 

A exposición conta con 20 cadros e dun cómic artístico colaborativo, un por cada biblioteca da Microrrede, e poderá verse no salón multiusos do Concello de Viveiro de 18h a 20h do 7 ao 10 de maio de 2024.

Accede o programa AQUÍ.

Accede ao blog da MICRORREDE DAS BIBLIOTECAS ESCOLARES DA MARIÑA  para  saber máis.

Podes ver a reportaxe de fotografía da exposición AQUÍ.   

1. EEI SAN ROQUE (Viveiro)
2. CEP LOIS TOBÍO (Viveiro)
3. CEIP de CELEIRO (Celeiro-Viveiro)
4. CEIP Plurilingüe de COVAS (Covas-Viveiro)
5. CEIP Plurilingüe SANTA RITA (Galdo-Viveiro)
6. CEIP O VICEDO
7. CEIP Plurilingüe PEDRO CASELLES ROLLÁN (Xove)
8. CEIP PENÍNSULA DA PAZ (San Cibrao)
9. CEIP de CERVO (Cervo)
10. CEIP Fondo Nois (Foz)
11. CEIP Plurilngue SANTA MARÍA DO VALADOURO (Valadouro)
12. CEIP Plurilingüe VISTA ALEGRE (Burela)
13. CEIP GREGORIO SANZ (Ribadeo)
14. IES MARÍA SARMIENTO (Viveiro)
15. IES VILAR PONTE (Viveiro)
16. IES ILLA DE SARÓN (Xove)
17. IES MONTE CASTELO (Burela)
18. IES PERDOURO (Burela)
19. IES ALFOZ-VALADOURO
20. EOI Luz Pozo (Viveiro)

Limpeza da praia de Portelo

O martes pasado, era un día tristón con vento do Nordés, deses días que adoita haber no inverno en Burela. Como os de aquí xa estamos acostumados, pola tarde había unha actividade organizada polo instituto na praia; o plan invitaba a pasar frío. Con este panorama non apetecía saír, e menos á praia, pero ámbalas dúas xa tomaramos a decisión. 

Chegamos un chisco tarde. Había un intre que comezara a explicación. Temos tantas actividades que é case imposible cadrar as horas. Sentamos xuntas na clase, entón xa tiñamos acordado pola mañá o de quedar na praia, polo que nos foi imposible volvernos atrás. A actividade era de recollida e limpeza de refugallo. Supuxemos que se trataba de que nos sensibilicemos e nos decatemos do que pasa co medio ambiente. É unha magoa ver como moito do material de refugallo abandonado ou vertido acaba no mar. E témonos que dar conta de que o mar, como din os vellos, cospe outra vez todo para as praias e os cantís. No caso dos plásticos é peor, as ondas e o vento convértenos en cachiños diminutos que se chaman microplásticos e estes rematan na barriga dos peixes e ao final tamén na nosa. 

Voltando á saída, estivemos con Charo, a profe de Bioloxía, e o seu cadeliño “Rayo”. Recollemos durante aproximadamente corenta minutos todo tipo de lixo, clasificámolo en: plásticos, cabichas e produtos de hixiene. As cabichas, explicáronnos que eran moi prexudiciais para o medio ambiente. Por un lado, tardan en degradarse e, por outro, serven de alimento aos peixes que despois consumimos. 

Tamén nos fixemos conscientes de que temos que ter coidado co que tiramos polo wc ou polos sumidoiros. Debe ser por iso que en Burela hai moitos pintados con polbos e peixes para que pensemos neles. Todo acaba no mar, e puidémolo comprobar recollendo compresas, tampóns, plásticos varios... 

En xeral, podemos concluír, polo tanto, que foi unha saída positiva tanto polo que aprendemos como polo divertida que resultou a xuntanza. Pasámolo moi ben as dúas rindo e xogando cos dous canciños que tamén participaron. 

Sempre temos que pensar que cada un de nós ten o poder de cambiar as cousas cada día.

Accede ás fotografías aquí.

Carme Alonso e Karen da Costa – 3º ESO A

Aulas Limpas do mes de marzo: a de 4º ESO B volve a ser a mellor aula

De novo a aula 204 volve a ser a máis limpa e ordenada. O mobiliario está sempre en orde e destaca a recollida de pilas e de material escolar. Ademais, o seu taboleiro está ben organizado e con traballos expostos de tamaño mural e A4. 

Séguea en puntos a aula 101, pertencente a 4º ESO PDC, e en 3º lugar está a aula 401, de 4 º ESO A, polo que felicitamos o alumnado de 4º ESO, que este mes ocupou os tres primeiros postos de Aulas Limpas. 

Parabéns e ánimo para o resto dos grupos, que aínda quedan un par de meses para ter a aula máis limpa e ordenada. 

Recordade: todas as aulas deben ter caixa ou recipiente para recoller pilas e material escolar. Lembrade tamén deixar as ventás e persianas dos extremos pechadas e as do medio, abertas. As limpadoras recórdannos que deixemos as mesas separadas das paredes para poder pasar limpando por ambos os lados de todas as mesas e que se revisan estas por debaixo para que ninguén pegue chicles.