Visita á Domus e a NOSOPLAS

O 21 de febreiro, o alumnado de 1° de Bacharelato realizou unha viaxe á cidade da Coruña para participar en dúas actividades educativas. 

 Pola mañá, visitaron a DOMUS onde, ademais de percorrer o seu marabilloso museo científico, participaron nun obradoiro de PCR ambientado nun crime. Nesta actividade tiveron a oportunidade de aprender a manipular todos os aparellos necesarios para facer unha proba da chamada “reacción en cadea da polimerasa”, contrastando así distintos ADN reais para poder atopar o que sería o chamado “culpable” do crime, debido á súa compatibilidade xenética co ADN atopado na “escena do crime”. 

Tras esta primeira experiencia, o alumnado tivo tempo para xantar no centro comercial Marineda City. 

Despois da visita de pola mañá á Domus, fomos á fábrica “Nosoplas SL”, no polígono industrial de Bergondo. Alí explicáronnos os procesos polos cales se transforma plástico usado en botellas (plástico en anacos pequenos > pellets > pezas preformadas > botellas). Despois desta explicación teórica fomos ver as máquinas funcionando. Mais era necesario dividirnos en dous grupos, cada un cun ou varios traballadores da fábrica, para que puidesen explicarnos o funcionamento desta. Pese ao seu esforzo, foi difícil entender as explicacións debido ao moito ruído que había na planta. 

Unha vez remataron as explicacións sobre as máquinas, fomos ao laboratorio de calidade da fábrica, no que unha traballadora nos mostrou os distintos pasos que tiñan que levar a cabo para asegurarse do bo estado dos materiais e da súa composición. Para isto, usaban varias máquinas, das que nos explicou o funcionamento dunha maneira sinxela. 

Ao rematar as explicacións dirixímonos de novo á sala de reunións da empresa, momento no que nos regalaron a cada persoa unha bolsa que contiña un bolígrafo, unha mostra dos preformados de plástico que fabrican (que contiña pellets de plástico reciclado) e un folleto informativo.

Finalizadas estas dúas enriquecedoras actividades, regresamos a Burela arredor das 21:00, despois dun longo día de aprendizaxe e diversión. 

Podedes acceder a máis imaxes AQUÍ.

Alba Fernández Quelle, Natividad Pedreira Vizoso e Xoel Casas Rodríguez - 1º Bacharelato A