Canción "Nadal en Galiza" do alumnado de Intelixencia Artificial

O alumnado de 4º ESO compuxo cancións de Nadal coa axuda da Intelixencia Artificial. Unha delas é "Nadal en Galiza", composición musical que acompañaron dunha coreografía para crear este videoclip co que nos felicitan estas festas. 

Felices festas!

Fallo do concurso Taboleiros de Nadal 2025-26

Aquí tedes os taboleiros participantes no concurso deste ano. 

Recordade que se valoraban a orixinalidade, a estética e a sustentabilidade a partes iguais. Despois de que o xurado puntuou os tres apartados, presentámosvos aquí, en primeiro lugar, os taboleiros dos grupos gañadores, seguidos dos restantes. 

Os premios entregaranse o venres 19 de decembro. 

Lamentablemente, algúns taboleiros foron descualificados por non aterse ás bases ou ás normas establecidas para o concurso. Aínda así todos están recollidos nesta presentación.

Moitos parabéns polo voso traballo en equipo!

A árbore de Nadal do curso 25-26

Este curso a nosa árbore foi construída para manterse en equilibrio grazas a un conxunto de esferas adornadas e colocadas unha sobre outra. 

É o resultado unha vez máis da aprendizaxe colaborativa. Para iso participaron os departamentos de Plástica, Relixión, Tecnoloxía, Administrativo e Fabricación Aditiva. A maior parte da decoración foise elaborando coa colaboración dos titores que traballaron cos seus grupos na aula.

Mercadiño de Nadal o xoves 18 e o venres 19 de decembro

Anímate e traer algún donativo para poder adquirir adornos de Nadal elaborados por alumnado do centro. Cada un deles custará de 1 a 3 euros. 

Poderás compralos nos recreos do xoves 18 e do venres 19 e na última hora do venres. 

A contía recadada será doada á Cruz Vermella. 

Comezan os torneos de xadrez, damas e crebacabezas de San Xoán Bosco

O mércores 17 de decembro comezan os torneos de San Xoán Bosco.

Infórmate de cando compites no taboleiro de anuncios da saída do edificio 1. 

Mención de honra para o IES Perdouro no III Premio ConVivimos

O IES Perdouro recibiu a mención de honra no III Premio ConVivimos, correspondente ao curso 2024-25. 

O primeiro premio foi para o IES de Cacheiras, o segundo para o IES de Poio e o terceiro para o IES de Cotobade. 

O noso proxecto chámase #EmociónsNoPerdouro e engloba a todo o centro a través dunha serie de actividades que teñen como obxectivo mellorar a convivencia e o benestar emocional da comunidade educativa. Algunhas das actuacións son a Semana do Benestar Emocional e a Convivencia, o Perdouroscopio, as titorías con atención ás emocións, etc. 

As actividades realizadas o curso pasado tentan desenvolver as competencias básicas establecidas segundo o modelo do GROP (Grupo de investigación en Orientación Psicopedagóxica), un grupo interunivesitario de investigación recoñecido pola Generalitat de Cataluña e integrado por profesionais como Rafael Bisquerra. As capacidades traballadas co alumnado foron: conciencia, regulación e autonomía emocionais, competencia social e habilidades de vida e benestar. 

Parabéns a todas as persoas que traballades diariamente para conseguir que a convivencia no IES Perdouro sexa cordial e respectuosa.

Podes acceder á noticia do xornal AQUÍ. 

6 de decembro: Día da Constitución

Achegámonos a unhas datas moi importantes para a nosa historia recente: o 6 de decembro, Día da Constitución Española. Ademais dela, en Galicia temos outro marco lexislativo, o Estatuto de Autonomía de Galicia, que marca o comezo do autogoberno da nosa comunidade. 

Estes días convídannos a lembrar a importancia de convivir nun marco común de dereitos, liberdade e respecto, e tamén a valorar a identidade e a capacidade de decisión que temos como galegos e galegas dentro de España. 

Para celebrar estas datas, preparamos unha actividade interactiva en liña onde poderás poñer a proba os teus coñecementos sobre a Constitución e o Estatuto. Participa no Quizizz! accedendo ao seguinte enlace: 👉 Pincha aquí 

A actividade estará dispoñible só por un tempo limitado e os dez primeiros serán mostrados mais adiante como gañadores, así que non perdas a oportunidade de xogar, aprender e competir cos teus compañeiros e compañeiras. Anímate a participar e a coñecer un pouco máis sobre as normas que definen quen somos e como nos organizamos como sociedade! 

Se queres descubrir mais información sobre a Constitución Española e o Estatuto de Autonomía podes visitar as seguintes páxinas oficiais: 

Máis información sobre a Constitución Española 

Máis información sobre o Estatuto de Autonomía de Galiza

Proxecto competencial - 4º ESO

3 de decembro: Día Internacional das Persoas con Discapacidade

O Día Internacional das Persoas con Discapacidade celébrase o 3 de decembro dende 1992, cando foi declarado así pola Asemblea da Organización das Nacións Unidas. O motivo de que se empezase a celebrar este día foi para promover os dereitos e o benestar das persoas que teñan algunha discapacidade; para así poder visualizar e aumentar a conciencia popular acerca das dificultades que teñen este grupo de persoas no seu día a día para desenvolverse como o fan o resto. 

A idea desta conmemoración partiu de que no ano 1976 a Asemblea Xeral da ONU decidiu poñer o ano 1981 como ano das persoas con discapacidade, levando a cabo así, durante este ano, múltiples actos para dar visibilidade aos problemas que teñen estas persoas. Logo de que acabara este ano a Asemblea Xeral decidiu volver actuar para dar visibilidade a estas persoas: a Década das Persoas con Discapacidade (1983-1992).

Ao acabar esta década de innumerables actividades foi cando se propuxo poñer un día ao ano para honrar a loita e o traballo destas persoas. Vemos así como cada ano hai conmemoracións de todo tipo, as cales adoitan incluír a gobernos, organizacións non gobernamentais, institucións educativas e ao sector privado.

Para máis información, podedes consultar estas páxinas web: 

-Páxina da ONU dando información deste día. 

-Declaración da FEMP acerca dunha sociedade inclusiva e accesible.

Tamén podedes escoitar as recomendacións de Breogán e Manuel para que nos poñamos no lugar das persoas con discapacidade. Escoitade o seu podcast:

Breogán Fernández e Manuel Baño - 4º ESO A

Encontro literario con Antía Yáñez

O luns 24 de novembro visitou o IES Perdouro a escritora galega Antía Yáñez para falarnos sobre as personaxes femininas das súas obras, que describiu como feministas tamén. 

Ao comezo da charla falounos da súa infancia, dos libros que a conduciron a ser hoxe en día o tipo de escritora que é. Lembraba libros coma os de Mortadelo e Filemón e moitos outros onde o papel das nenas sempre era secundario. Na saga dos “Cinco”, as dúas personaxes femininas eran moi distintas: Ana nunca quería facer nada e era moi medosa, mentres que Georgina era a que lideraba o grupo, pero ela considerábase un neno e queixábase constantemente de que as “cousas de nenas” eran delicadas. Inspirouse nesta colección para escribir o seu primeiro libro, O misterio de Portomarín, cambiando un personaxe masculino por un feminino. 

Ela defendeu que as mulleres deben ter máis visibilidade (tanto escritoras como personaxes) e dábanlle moita rabia os estereotipos femininos, sobre todo nas novelas da súa época. Tan só sendo adolescente deuse conta das innumerables ideas erróneas acerca das mulleres e de como eran tratadas coma obxectos. Nas novelas de amor que leu máis adiante (Cincuenta sombras de Grey, Culpa mía, After…) observou que sempre se repetía o mesmo padrón: unha muller inocente da cal se namora un home rico e mullereiro que cambia repentinamente por ela. 

Outras obras que escribiu Antía Yáñez son: Be water, Senlleiras (primeiro libro que escribiu para xente adulta, onde as protagonistas son unha escusa para falar da violencia machista), Plan de rescate (onde trata de mostrar a inclusión non forzada, sen afondar na discapacidade senón na aventura) e O clan das Barbies. 

Por último, recalcou a pouca visibilidade que a muller ten como escritora. Puxo como exemplo a J. K. Rowling, que usa ese pseudónimo para que non a confundisen polo seu nome de mulller e así conseguir máis lectores masculinos. Isto tristemente segue a pasar na actualidade: aínda que o 60% das autoras son mulleres, só as len menos dun 20 % dos homes mentres que cos autores varóns non pasa o mesmo.

Podedes ver máis imaxes AQUÍ. 

Miranda Pernas Basanta - 1º Bacharelato A

Calendario de advento de recomendacións lectoras

Comeza o mes de decembro e con el iniciamos as recomendacións lectoras para esta época do ano. 

O grupo de Biblioteca e o Equipo de Dinamización da Lingua galega preparou unha escolma e Ángela Alonso, profesora de Xeografía e Historia, deulle forma de calendario de advento. Nel tedes unha recomendación para cada día deste mes. Asemade, indícase a signatura para que, de xeito doado, sexa posible atopar as obras que se aconsellan nos andeis da biblioteca.   

Mellor aula do mes de outubro: 1º de Bacharelato A

Parabéns para 1º Bacharelato A por ser a mellor aula do mes de outubro! 

Todo estaba limpo e ordenado. Ademais de contar con recipientes para a recollida de material escolar e pilas. 

Moito ánimo para o resto de grupos: 3º ESO A e 3º PDC son os seguintes con 121 puntos e tamén destacou a aula de 1º ESO A con 120.

Actos 25N: Lectura de manifesto e mural

Ás 10:55h, os grupos que non teñan exame dirixiranse ao patio para asistir á lectura do manifesto do 25N. Este curso o alumnado de 1º de Bacharelato fará especial fincapé na eliminación da violencia contra a muller na contorna dixital. 

Colocaremos o manifesto no mural elaborado polo alumnado da ESO e 2º ESO formará un NON para visibilizar a nosa firmeza á hora de acabar coa violencia de xénero. 

Día Mundial da Infancia: Pleno da infancia e da mocidade no Concello de Burela

Para conmemorar este día, o alumnado de Proxecto Competencial de 4º ESO preparou un texto para explicarnos os motivos da celebración desta data e o grupo de Oratorio deste mesmo curso preparou un kit de supervivencia para defender os dereitos das nenas e dos nenos na contorna dixital. Con este traballo participou hoxe no Pleno da infancia e da mocidade que tivo lugar no Salón de Plenos do Concello de Burela hoxe mesmo. 

Día Mundial da Infancia - 4º ESO Proxecto Competencial: 

O 20 de novembro celébrase cada ano, dende o 1955, o Día Mundial da Infancia. Este día foi proclamado pola Asamblea Xeral das Nacións Unidas co obxectivo de promover o benestar infantil e fomentar a fraternidade entre os nenos de todas as nacións. 

Celébrase este día en conmemoración de dous feitos importantes na protección dos dereitos infantís: a adopción da Declaración dos Dereitos do Neno e a aprobación da Convención sobre os Dereitos do Neno.

Aínda que se fala moito dos dereitos dos nenos, hoxe en día moitos deles seguen sen ser respectados en todo o mundo. Hai países onde os nenos viven rodeados de guerra, fame ou medo, e outros onde non poden ir á escola nin recibir atención médica cando a precisan. En lugares como Gaza, Sudán, Congo ou Haití, millóns de nenos tiveron que fuxir das súas casas por culpa da violencia. Moitos viven en campos de refuxiados, sen comida suficiente nin un lugar seguro onde durmir. Outros foron recrutados por grupos armados ou convertidos en vítimas de explotación e abusos. 

Tamén hai nenos que traballan desde moi pequenos porque as súas familias non teñen recursos, máis de cento trinta millóns de nenos seguen obrigados a traballar no mundo. 

Para cambiar isto, o importante é reivindicar que todos os nenos teñen dereito a vivir con dignidade, a ser escoitados e a ter un futuro. Á parte das organizacións internacionais que defenden estes dereitos, as familias, escolas e os propios nenos debemos defender estes dereitos para ter un mundo máis igualitario onde a infancia goce destes dereitos. 

Para máis información podedes entrar nestes enlaces: 

https://www.unicef.es/causas/derechos-ninos

https://www.ohchr.org/es/instruments-mechanisms/instruments/convention-rights-child 

Nerea Fernández Larrea e Julia Rubio Geada - 4º ESO A

Pleno da Infancia e da Mocidade - 4º ESO Oratoria: 

Con esta ferramenta dirixida á xente nova para a prevención de riscos en Internet, o alumnado de 4º ESO de Oratoria súmase á celebración do Día Mundial da Infancia 

Ofrecer consellos para que a mocidade poida aproveitar as posibilidades de Internet dunha maneira segura e responsable. Este é o obxectivo do Kit de supervivencia dixital que o alumnado de Oratoria do IES Perdouro presentou hoxe no pleno infantil e da mocidade do Concello de Burela. 

Coincidindo co Día Mundial da Infancia, que se celebra o 20 de novembro, os alumnos de 4º ESO Asier Álvarez Maseda, Samuel Quiroga Díaz, Álvaro Veiga Rego e Sara Villarquide Fraga levaron a este pleno extraordinario dez consellos para axudar a reducir os riscos aos que se enfronta a xente nova no ámbito dixital. Para iso, expuxeron casos relacionados con diferentes problemáticas, como o ciberacoso, o sexting, o grooming, as apostas en liña ou a adicción aos videoxogos, e propuxeron medidas para evitalas. 

No pleno tamén participaron alumnas e alumnos do IES Monte Castelo e dos CEIP Virxe do Carme e Vista Alegre de Burela que, ademais de recordar os dereitos dos nenos e das nenas no mundo dixital, solicitaron o compromiso das persoas adultas e de institucións e entidades para darlles cumprimento. 

Podedes acceder a máis imaxes AQUÍ.

Lectura e familias: Cara ao futuro profesional

Saída micolóxica ás Lobeiras

O pasado 21 de outubro, o alumnado de 1º de Bacharelato A realizou unha viaxe ás Lobeiras para efectuar un percorrido micolóxico e así poder coñecer máis sobre os fungos da nosa zona. 

Ao chegar ao noso destino, a nosa guía, Cristina, amablemente comezou unha explicación sobre estes seres vivos, achegándonos información como as súas características (teñen quitina, poden ter varias formas de vida, son heterótrofos...), os tipos (zigomicetos, ascomicetos e basidiomicetos -estes últimos son os máis característicos na natureza, xa que son os coñecidos cogomelos), as partes (hifas, micelio, as basidioesporas...) e máis datos interesantes. Ademais de explicarnos o básico, ensinounos diversos tipos que recollera (como a Russula nigricans, Amanita citrina...) e que veriamos durante a nosa saída, xa que é importante saber distinguilos para non sufrir ningunha intoxicación. Algúns son tóxicos ou velenosos e polo seu aspecto pódense parecer a outros que comemos nesta época do ano. 

A continuación, comezamos a camiñar polo monte para intentar visualizar algunha especie pola nosa conta, mentres gozabamos dun tranquilo paseo. Atopamos os coñecidos “Peidos de Lobo” (Lycoperdon perlatum) e algún tipo máis. Despois, tivemos que eliminar unha zona do noso itinerario xa que non estaba o suficientemente húmido para ver os cogomelos que buscabamos; non obstante, deixáronnos máis tempo para buscar máis fungos libremente. Como estabamos tan ilusionados, atopamos máis tipos coma a Laccaria Laccata (que solta látex se se corta) ou o Paxillus involutus, un fungo tóxico; tamén vimos unha ra. 

Finalmente, o noso tempo esgotouse e tivemos que volver ao instituto dando por finalizada esta divertida saída. O tempo pasou voando! 

Podes acceder ás imaxes AQUÍ.

Laura Eijo Docampo - 1º Bacharelato A

San Xoán Bosco - Aberto o prazo para anotarse

Atención!

Queda aberto o prazo de inscrición para participar nos campionatos de San Xoán Bosco nas modalidades:

-  individual de Damas, Rubik e Xadrez e 

-  por parellas de crebacabezas.

Tes ata o 20 de novembro para anotarte na biblioteca.

Non perdas a oportunidade de demostrar o teu talento e pasalo ben!

Xogaremos nos recreos a partir de decembro. Atento/a ao calendario das eliminatorias.

Anímate e participa!

Visita ao 8º Campionato Galego de FP - Galicia Skills 2025

Este ano, o alumnado de Formación Profesional (en adiante, FP) do IES Perdouro tivemos a oportunidade de visitar o 8º Campionato Galego de Formación Profesional – GaliciaSkills 2025, que se celebrou nun pavillón do recinto da Feira Internacional de Galicia ABANCA, en Silleda (Pontevedra). A visita tivo lugar o pasado 29 de outubro. No noso caso, era a segunda vez que estiveramos nun evento con tanta xente nova demostrando o seu saber facer, xa que a primeira vez fora en FP Innnova. 

O denominado “Galicia Skills” é un concurso cheo de esmero e entusiasmo que fai que os visitantes adquiramos moitas ideas do que poder estudar e traballar nun futuro. O pavillón estaba dividido en diversas zonas onde o estudantado de FP competía amosando as súas habilidades. Nada máis entrar, había que atravesar un túnel que nos daba a benvida. A entrada foi moi emocionante, pero ver toda a variedade de ciclos formativos que había dentro alucinounos. Estaban as especialidades de Carpintería, Ebanistería, Soldadura, Fontanería e Calefacción, Instalacións Eléctricas, Control Industrial, Fresado, Refrixeración e Aire Acondicionado, Tecnoloxía de Vehículos Pesados, Pintura de Automóbil e Preparación de Carrocería. Nesa parte todo soaba a metal e máquinas e cheiraba a madeira recentemente cortada; ese olor é tan marabilloso… 

Logo fomos á zona máis creativa (Xardinería Paisaxista, Viveirismo, Escaparatismo...). A quen non lle gusta que lle regalen un ramo de flores? Na zona de floraría podíanse ver de todo tipo e de todas as cores. Aquilo parecía un mundo cheo de alegría, un paraíso onde os soños eran espectaculares e o olor das flores parte dos seus cumpridos. 

Se es máis de “poñerte as botas”, que mellor que ver concursar ao alumnado dos ciclos de Panadaría coas súas incribles obras mestras de pan. E os de cociña? Ai!, os de cociña, xa nos gustaría a todo o público que estabamos alí poder comer os manxares tan exquisitos que estaban facendo…. 

Idaira Fernández Fernández e Yanira López Basanta - 2º curso do CB de Servizos Administrativos

Outro momento especial foi ao chegar ao stand de Instalacións Eléctricas, onde estaba competindo un alumno do noso centro, Izan Domínguez Soto, que cursara o curso do mesmo nome e que dito sexa de paso, tamén foi un dos grandes motivos polos que se levou a cabo a saída didáctica. O ambiente, pese a ser unha competición, era moi san, e puidemos apreciar que é unha experiencia moi boa e enriquecedora; aínda que tamén moi demandada, xa que el traballaba moitas horas seguidas con poucos descansos para comer. Dende aquí felicitámolo por todo o traballo que fixo e por representar ao noso instituto neste campionato rexional.

No regreso a Burela, o ambiente no autobús era algo máis tranquilo. Moitos iamos cansos, pero tamén satisfeitos por todo o que aprenderamos. Esta saída permitiunos ver que o que estudamos ten unha aplicación real e que existen máis oportunidades profesionais das que pensamos. Aínda que, se tivésemos que mellorar algo, sería o tempo para poder estar alí. Como Silleda queda algo lonxe da nosa vila, é difícil botar moito tempo, pero quizais se podería valorar a opción de ir algo máis cedo. Para finalizar, nós, o alumnado de Administración e Finanzas, propoñemos que se midan as nosas “skills” a través do programa “Mecanet”, onde poderiamos competir con outros institutos ou centros por ver quen escribe máis rápido e máis correcto o mesmo texto nun límite de tempo. Ou tamén, poderiamos participar na categoría de “Demostracións”, simplemente traballando no noso stand e resolvendo dúbidas da xente que estea interesada no noso ciclo. É algo positivo que teñamos tamén representación neste campionato, como o resto de familias profesionais, para darnos a coñecer. 

Agradecemos ter vivido esta experiencia e agardamos outras igual de proveitosas!

Podedes acceder ao álbum de fotos AQUÍ.

Lucía López López e Raúl Fernández Barrera - 1º CS Administración e Finanzas

KTORCE-18: Obradoiro para previr condutas infractoras

O pasado luns 6 de outubro, o alumnado de 1º e 2º curso do Ciclo Básico de Servizos Administrativos participamos nun obradoiro de prevención de condutas infractoras denominado “Ktorce-18”. Este programa naceu no curso 2012-2013 froito da colaboración entre a Fundación Barrié e a Asociación ARELA, co obxectivo de achegar a lei do menor á comunidade educativa e previr condutas de risco na adolescencia. Ao longo destes anos participaron máis de 45000 persoas (alumnado, profesorado e familias) en preto de 1100 obradoiros, cun alto nivel de satisfacción. 

No noso caso, durante dúas sesións, grazas a Carlos, técnico da mencionada asociación, puidemos reflexionar sobre a responsabilidade penal a partir dos catorce anos e coñecer as consecuencias xurídicas de delitos frecuentes na adolescencia. Así mesmo, tamén soubemos que o programa se chama “Ktorce-18” porque a lei do menor afecta á mocidade entre os catorce e os dezaoito anos. 

Algunhas das principais condutas infractoras en España son: 

• Roubo ou furto por problemas económicos, influencia do grupo, etc. 
• Vandalismo (graffitis, danos á propiedade...) por rebeldía, aburrimento, busca de identidade... 
• Agresións ou pelexas debidas á impulsividade, conflitos persoais... 
• Acoso escolar ou ciberacoso, cuxas causas poden deberse a un uso indebido das redes sociais, falta de empatía, vinganza... 
• Consumo ou tráfico de drogas, entre outras. 

A todas nosoutras, e cremos que ao alumnado en xeral, nos pareceu unha charla moi interesante e necesaria xa que se trata dunha lei descoñecida cuxo incumprimento pode carrexar consecuencias penais graves. 

Podedes acceder a máis imaxes AQUÍ.

 Ainara Couto, Lucía Franco, Ainhoa López, Yanira López, Esther Pérez e Valeria Vizoso - 2º curso do CB de Servizos Administrativos

Concursos da A. C. Os Matos en colaboración coa Fundación Expomar

Este curso 25-26 convócase a XIX edición dos concursos de relatos curtos e poemas e a XVII edición do concurso de imaxes da A. C. Os Matos. Como novidade, este ano a convocatoria faise pública en colaboración coa Fundación Expomar, que propón esta mesma inicativa, e convídanos a liberar a nosa creatividade pensando arredor do mar nun certame que leva por nome "Tinta de lura".

Haberá premios moi interesantes e os gañadores presentarán as súas obras nun congreso infantil e xuvenil que se celebrará en Burela antes de final de curso. 

Fíxate nas bases do concurso e PARTICIPA! 

II Concurso de audiorrelatos do Samaín

Desde o EDLG, convocamos o II Concurso de audiorrelatos de medo con motivo do Samaín. 

Nesta ocasión, podes basear a túa creatividade nas dúas fichas que axuntamos a continuación e que che dan ideas de lugares, tempos e personaxes que poden formar parte do teu audiorrelato. 

Fíxate nos requisitos e no prazo, que remata o 24 de outubro. 

Podes acompañar a lectura do relato de efectos sonoros que acrecenten o ambiente de medo.

Comezan os campionatos de San Xoán Bosco

Comezamos o campionato de fútbol-sala e baloncesto de San Xoán Bosco e en poucas semanas iniciaranse tamén os de xadrez, damas, crebacabezas e cubo de Rubik. 

Para saber cando vos toca competir, consultade o taboleiro da entrada do edificio 1, e esperade ás 11:00h na porta para ir ata o pavillón. 

O resto de competicións terán lugar na biblioteca. Pronto avisaremos. Estade atentos. 

Comeza o concurso Aulas Limpas 25-26!

Durante o mes de setembro, o profesorado titor estívovos explicando o funcionamento do concurso Aulas Limpas. 

Comezamos no mes de outubro a pasar polas aulas, o que quere dicir que nos grupos da ESO, Bacharelato e Ciclos Básicos, o alumnado debe ter en conta unha serie de medidas para manter a súa aula limpa e ordenada.

Achegamos a rúbrica que utiliza o xurado do concurso, polo que é recomendable tela á vista no taboleiro da aula e repartir entre o alumnado as tarefas de vixilancia para que todos os puntos da rúbrica se cumpran. 

As ventás e persianas dos extremos da clase deben quedar cerradas e as do medio, abertas, para ventilar antes de proceder á limpeza da aula. É importante tamén subir as cadeiras enriba das mesas para facilitar o labor das limpadoras. Se na última hora de clase o grupo que queda é pequeno, o alumnado anterior debe deixar subidas as súas cadeiras. 

Cada un de nós debe poñer o seu gran de area para que se manteña a limpeza e a orde nas aulas. 

Consultade a rúbrica do concurso para ver qué puntos debedes ter en conta.

Semana europea da mobilidade: aprendemos sobre seguridade viaria con profesionais da DXT

O alumnado de 3º da ESO participamos o pasado 19 de setembro nunha interesante xornada de educación viaria, na que recibimos a visita do director provincial da Dirección Xeral de Tráfico (DXT) en Lugo, Alberto Rodríguez, e do garda civil de tráfico de Burela José Manuel Carballeira. Ademais, José Ramón, garda civil de tráfico de Lugo, e unha compañeira da Dirección Xeral de Tráfico da capital da provincia propuxéronnos unha actividade lúdica na biblioteca. 

Esta, que era unha escape room, serviunos para reflexionar sobre os perigos na estrada e a importancia de tomar decisións responsables cando viaxamos en coche. Dividímonos en grupos e cada equipo asumía un rol diferente: bombeiros, policías, servizos sanitarios etc. Concretamente, a actividade estaba baseada nun accidente de tráfico provocado polo consumo excesivo de alcohol e cada equipo dispuña dunha hora para superar as distintas probas relacionadas co sinistro e intentar “salvar” a situación. Foi unha proposta moi divertida e dinámica, que serviu para concienciarnos sobre a facilidade coa que se pode producir un accidente nas estradas. 

Máis tarde, asistimos a unha breve charla impartida por José Manuel Carballeira, garda civil de tráfico de Burela, e polo actual director da DXT en Lugo, Alberto Rodríguez, na que nos explicaron as seis principais causas de accidente: a velocidade, o consumo de alcohol e drogas, o uso do teléfono móbil, a falta de experiencia, o cansazo e a ausencia do cinto de seguridade. 

Precisamente, para exemplificar como estas condutas poden desembocar en traxedias, os axentes amosaron diversas imaxes de sinitros reais provocados por estes factores. Ademais, explicaron en primeira persoa a súa experiencia no tráxico accidente acontecido en Xove en 2023, no que perderon a vida catro mozos de Ribadeo, e no que o garda civil da Compañía de Burela participou nas intervencións realizadas no lugar do sinistro. 

Ademais, un dos aspectos máis interesantes da xornada foi a posibilidade de probar unhas lentes que simulan a visión dunha persoa afectada polo cansazo, as drogas ou a alcolemia, o que nos permitiu experimentar, de forma segura, os perigos que implica conducir nestas condicións. 

Podedes acceder a máis fotos AQUÍ.

Alejandro Pernas Martínez – 3º ESO B

Presentación de Curso de Especialización en Fabricación Aditiva

O alumnado do Curso de Especialización en Fabricación Aditiva terá a presentación o xoves 2 de outubro ás 16:00h. 

As clases comezarán ao día seguinte en horario normal. 
 

O IES Perdouro participou no II Congreso de educación inclusiva

O martes 23 de setembro celebrouse en Santiago de Compostela o II Congreso de educación inclusiva. 

Neste evento estiveron convidados expertos internacionais e nacionais que disertaron sobre a educación para a totalidade da poboación, a atención ás altas capacidades, as características dun docente que fomenta a inclusión, a atención a alumnado con TDAH, a abordaxe dos trastornos de conduta etc. 

A primeira hora da tarde tivo lugar a participación de catro centros educativos galegos convidados polas súas boas prácticas en inclusión, entre eles o IES Perdouro, que estivo acompañado do IES Carlos Casares de Viana do Bolo e os CEIP Leirado de Salvaterra de Miño e Graxal de Cambre.

A gravación de practicamente todo o congreso pode consultarse neste enlace e a participación do IES Perdouro vai desde as 6h 33' ata as 6h 53'. Na súa intervención, Miruca Parga, a vicedirectora, explicou as especiais características multiculturais de Burela e a estrutura organizativa do centro para lograr atender o mellor posible a diversidade. Tamén reclamou máis recursos humanos para poder ocuparse de todas as necesidades do alumnado que recibe o centro cada curso. 

Podedes acceder algunha nota de prensa e a máis imaxes AQUÍ. 

Recibimos a Hugo Gorgojo despois da Olimpíada de Xeoloxía en China

O martes 2 de setembro de 2025 recibimos ao noso recente campión olímpico, Hugo Gorgojo Basanta, que gañou 3 medallas na Fase Mundial da Olimpíada de Xeoloxía (IESO): prata en "International Field Team Investigation" e bronce en "Earth Science Project Category" e en "Individual Test Category". 

Na competición participaron máis de 170 persoas de máis de 30 países. Por parte de España, ían dous galegos, un salmantino e un estremeño (e todos eles tiveron medallas). O noso alumno falounos da súa experiencia e dos distintos lugares que visitou: Jining (a cidade da sede, onde as probas sucederon na Confucius High School), Nanwang, Qufu e Nishan Sacred Land, as montañas Shimen e Fénix (onde foi o exame práctico) e o Gran Canal de China, entre outros lugares. 

Para as probas prácticas, Hugo fixo equipo con representantes de Austria, Estonia, Australia, Malaisia e Paquistán. Hugo chegou á Fase Mundial despois de ser o 4º na Fase Nacional en Tremp (Lleida) e de sacar a mellor nota na sede de San Sadurniño (A Coruña), onde tamén formou parte dos premiados como o Mellor Grupo (xunto con David Baltar, Pablo Casas e Adrián Díaz). Nesa competición, o compañeiro Hugo Lorenzo gañou o Accésit de 4º ESO. 

Na foto, cos seus preparadores para as distintas fases da olimpíada: Charo Fernández e Fernando Losada. 

Fernando Losada Rodríguez - Profesor de Bioloxía e Xeoloxía

Presentacións do inicio de curso 25-26

Benvidos ao curso académico 25-26!

Agardamos que descansásedes moito e que tivésedes un verán extraordinario. Agora toca comezar un novo curso. Estaremos agardándovos para facer as presentacións o luns 8 e o martes 9 de setembro. O profesorado titor acompañaravos á vosa aula de referencia. 

Os cursos que teñan a presentación o luns 8 comezarán as clases o martes 9 e os que teñan a presentación o martes comezarán as clases o mércores 10 de setembro. 

Hugo Gorgojo gaña tres medallas na Olimpíada Internacional de Xeoloxía en China

Desde o 7 ao 17 de agosto, celebrouse na cidade chinesa de Jining a International Earth Science Olympiad, é dicir, a Olimpíada Internacional de Xeoloxía.

O noso alumno Hugo Gorgojo Basanta xa alcanzara o 1º posto na subsede galega de San Sadurniño na fase autonómica galega e foi 4º na fase nacional en Tremp (Lleida), así que viaxou a China con outros 3 representantes españois. 

Durante a fase internacional da olimpíada, algúns dos paraxes que visitaron foron o monte Fénix, a montaña Shimen, o lago Taibai en Jininng (o maior do norte de China), o xeoparque Yangshang etc. Nestes lugares de relevancia xeolóxica participaron en varias probas teóricas e prácticas nas que realizaron proxectos e traballo de campo. 

Hugo Gorgojo conseguiu os seguintes recoñecementos: 

• Bronce en "Earth Science Project Category" 
• Prata en "International Field Team Investigation" 
• Bronce en "Individual Test Category" 

Os outros 3 representantes españois, de Santiago de Compostela, Salamanca e Badaxoz, tamén obtiveron bos resultados na clasificación desta fase internacional da Olimpíada de Xeoloxía.

Comeza a Fase Mundial da Olimpíada de Xeoloxía!

O noso alumno de 2º Bach, Hugo Gorgojo Basanta, xa está en Jining para participar na Fase Mundial da 16ª Olimpíada de Xeoloxía. Xunto a el, viaxaron os outros tres representantes españois: o tamén galego Santiago Otero (do IES Rosalía de Castro de Santiago de Compostela), Fernando Juez (do IES Rodríguez Moñino de Badaxoz) e Samuel Martín (do IES Venancio Blanco de Salamanca). 

Esta competición para amosar os coñecementos das Ciencias da Terra leva organizándose desde 2007 e participan nela máis de 30 países. O IES Perdouro optou por levar en marzo a 8 alumnos á sede de San Sadurniño onde acadamos tres premios: o Accésit de 4º ESO, o Mellor Grupo e o 1º Clasificado (Hugo Gorgojo), que foi en maio á Fase Nacional en Tremp (Lleida). Os catro mellores clasificados viaxaron á China para participar na Fase Mundial desde o 7 ao 17 de agosto. 

Desde o Departamento de Bioloxía e Xeoloxía (os profesores Sol Galdo, Charo Fernández e Fernando Losada) e todo o equipo docente desexamos a todos os participantes unha moi boa experiencia e ao noso alumno Hugo Gorgojo, a mellor das sortes. 

Fernando Losada Rodríguez - Profesor de Bioloxía e Xeoloxía

Pechamos por vacacións

Pechamos por vacacións. 

Damos por rematado o curso 24-25. 

Podedes volver a contactar con nós o luns 1 de setembro, data na que se volverán a abrir as portas do IES Perdouro para realizar calquera trámite que necesitedes. 

O curso comezará o 8 de setembro. Estade pendentes a partir do 1 de setembro dos calendarios das presentacións. 

Que desfrutedes das vacacións!

Mulleres referentes galegas

Continuamos publicando proxectos que se desenvolveron ao longo do curso. 

O alumnado de 2º de Bacharelato de TIC elaborou este traballo programando con Scratch.

Aparece o nome de varias mulleres galegas, logo vaise debuxando progresivamente o seu rostro e, a continuación, ti tes que escribir de que muller se trata e pulsar intro. Con cada nome que acertes, conseguirás un punto. 

Adiviña quen é!

Oferta educativa de Formación Profesional

 

Neste vídeo móstrase a oferta educativa do IES Perdouro para Formación Profesional: Ciclos Básicos, Medios, Superiores e Cursos de Especialización. 

Vente á FP!

Educación emocional con María Navarrete

Nos últimos anos, María Navarrete Fa acompáñanos nunha semana na que o alumnado recibe varias sesións do que ela chama Ximnasia Emocional. 

Do 16 ao 19 de xuño, as alumnas e alumnos de 2º e 3º ESO, 1º CB de Fabricación e Montaxe e 1º CM de Mecanizado desfrutaron dun total de catro sesións con María nas que se tratou de mellorar a autoestima e de profundar na personalidade e nas intelixencias de cada un para aumentar a percepción do benestar emocional. 

Podedes ver as imaxes AQUÍ.

Resumo da IV Feira TecnoCienciArte

 

Neste vídeo repásanse as participacións deste curso na Feira TecnoCienciArte. Un gran traballo obra de todos!

Neste enlace tedes todos os proxectos que interviñeron na mostra. 

E máis imaxes da xornada AQUÍ. 

Proxecto Neo.14 Curso 24-25

Foi un curso de consolidación e apertura, no que mantivemos viva a radio escolar como espazo de aprendizaxe, encontro e servizo á comunidade.

Despois da continuidade garantida grazas á colaboración de Radio Foz e á implicación dos docentes envolvidos no equipo de radio, mantivemos unha programación estable desde outubro ata xuño, con máis de trinta programas divulgados nas emisoras asociadas e nas redes do IES Perdouro.

Neste curso, incorporáronse novas voces como Javier Mogo, Nádia Cabral, Érica Gomes, Belanice Costa e Helena Paredes, entre outras. Con eles e elas reforzamos o compromiso coa diversidade lingüística, incluíndo sotaques do galego e do portugués, e dando acubillo a testemuños chegados de Cabo Verde, Colombia ou Brasil.

Cómpre salientar tamén dúas colaboracións regulares que enriqueceron a estrutura do programa: por unha banda, a profesora de Lingua Castelá Sonia Rey, que dinamizou dúas seccións xa imprescindíbeis —A noticia do día e Horrografía (mensual)—; e por outra, o profesor de Bioloxía Fernando Losada, que achegou as súas didácticas Pílulas das ciencias, conectando o saber científico coa realidade cotiá do alumnado. Mensualmente programamos un Especial Radio Saúde Burela, actividade que forma parte da Estratexia de Promoción da Saúde e Prevención do Sistema Nacional de Saúde, unha iniciativa dentro do Plan Estratéxico de Saúde Nacional.

Proxecto Neo mantivo o seu vínculo co territorio. Falamos do mar con Pepe do Caxoto e Balbino Trelles; de iniciativas empresariais baseadas no compromiso coa nosa terra e co ambiente, como Mel do Trevo ou Terras de Miranda; da cultura con artistas como Cristina Castro, Ugia Pedreira, Xosé Constenla e Lupe Blanco; e da literatura coa colaboración de Antonio Reigosa, Raquel Miragaia, Paco Rivas e Manuel Rivero. Ademais, recibimos a visita de Manuel Núñez Singala grazas ao programa Lectura Infinita.

As colaboracións chegaron tamén doutros centros: de Vila de Cruces, de Xinzo de Limia, de Catarroja (Valencia) e mesmo do arquipélago caboverdiano, grazas á colaboración do director da Escola do Salineiro, Josefino Quedi Barbosa.

Participamos en actividades como Expomar, o intercambio con Francia e a excursión a Portugal. Conectamos así a radio escolar co mundo, mantendo como fío condutor a palabra dos estudantes.

Neste ano, Proxecto Neo foi, unha vez máis, escola de comunicación bidireccional, ponte entre xeracións e motor de cohesión social.

Vanesa Vilaverde Lamas, coordinadora de Proxecto Neo

Rematamos a 14ª edición de Proxecto Neo cun xantar de confraternidade entre os integrantes de Masa Coral Modelo Burela. 

Aquí están as fotos da entrega de diplomas aos reporteiros/as de Proxecto Neo 24-25.

Equipo docente Proxecto Neo 24-25 coa nosa fotógrafa Lucía Rivas

Vídeo promocional Fabricación Aditiva IES Perdouro 24-25

Oferta educativa 25-26

 

Acto de presentación da revista escolar da A. C. Os Matos - Maruxía nº 31

A asociación cultural Os Matos do IES Perdouro presentou o nº 31 da publicación Maruxía en colaboración co Equipo de Dinamización, coa Biblioteca e coa APA do IES Perdouro.

Esta mañá, a biblioteca do centro acolleu un evento moi especial: a presentación do número 31 da revista escolar Maruxía. O acto estivo conducido por Hugo Lorenzo, alumno de 4º de ESO TIC, quen guiou con soltura e entusiasmo a sesión.

Durante a presentación, Maeve Díaz e Noa Burgos compartiron con todos os asistentes a experiencia do equipo na preparación desta nova edición, salientando o valor do traballo conxunto e da colaboración continua para superar os diferentes retos que xurdiron ao longo do proceso.

Como nestes últimos anos, foi o alumnado de 4° ESO quen maquetou a revista escolar e varias decenas de estudantes e profes de calquera das ensinanzas que se imparten no IES Perdouro redactaron os textos que ocupan as súas páxinas. Ademais, a revista inclúe os relatos e poemas premiados no XVIII Concurso de Relato Curto e Poesía, así como as imaxes galardoadas no XVI Concurso de Imaxe, certames organizados cada ano pola Asociación Cultural Os Matos.

Antes de rematar o acto, o profesor de TIC, Cristovo Balseiro, tomou a palabra para compartir a experiencia que supuxo para el e o seu equipo de alumnado enfrontarse ao reto de aprender a manexar un novo programa de maquetación, o Scribus, que non resulta precisamente sinxelo.

Para rematar, Xema Sanjurjo, coordinadora do EDLG e Karina Parga, presidenta da Asociación Cultural fixeron entrega dos premios aos gañadores destes certames, que cada ano fomentan a expresión literaria e artística no centro. 

Aproveitamos o acto para facer entrega do diploma de participación ao equipo formado por Sara Villarquide, Breogán Fernández e Hugo Fernández, alumnos de 3º ESO, que representou ao IES Perdouro na fase territorial do concurso radiofónico ODS Onda – O Futuro é Teu. Os estudantes de ESO de catro centros galegos protagonizaron a primeira edición dun concurso que pretende transformar a educación en materia de sustentabilidade nunha experiencia interactiva, divertida e emocionante aproveitando o alcance e a influencia da radio local en todo o Estado. Este concurso realizouse simultaneamente en Galicia, Andalucía, Catalunya e na comunidade autónoma de Madrid.

👉 Podes acceder á reportaxe fotográfica completa premendo AQUÍ.

📖 Consulta a revista Maruxía nº31 en formato PDF, dispoñible aquí.

Maruxía nº31

Fin de curso: boas vacacións!

Hoxe rematou o período lectivo do curso 24-25. Todo pasou voando. 

Enchestes o patio de conversas, risas e baile. Que alegría contaxiades!

Agora a descansar. Desfrutade do tempo libre para facer o que máis vos guste. O verán é fantástico para estar en contacto coa natureza, para ler, para coñecer xente nova, para compartir coa familia e cos amigos...

Nós estaremos aquí ata finais de xullo: aínda queda recoller as notas, solicitar os libros de texto e matricularse para o vindeiro curso. 

Iremos informando das datas. 

Podedes ver máis imaxes AQUÍ.

Maruxía nº 31

O alumnado de 4º de ESO TIC capitaneado por Cristovo Balseiro rematou estes días de compoñer o número 31 da revista MARUXÍA. Xa está na imprenta. 

A biblioteca acollerá o acto de presentación de revista escolar así como a entrega de premios dos certames literarios e de imaxe da A.C. os Matos, o vindeiro venres 20 de xuño ás 11h30. 

Viaxe de fin de curso por Portugal

O pasado martes 3 de xuño o alumnado de 1° de Bacharelato, xunto coas profesoras  de  portugués  e  francés,  saímos  cara  a  unha  viaxe  na  cal percorreriamos o país veciño. A nosa primeira visita de Portugal foi o Mosteiro do Bom Jesus, en Braga. Alí, puidemos desfrutar dos seus preciosos xardíns en harmonía coa arquitectura barroca. Ademais de baixar polas súas innumerables escaleiras, tivemos a oportunidade de remar en barca tras o xantar. A continuación, dirixímonos a Espinho, onde nos aloxariamos os seguintes días para visitar Porto. 

Pasamos todo o mércores na cidade de Porto, onde quedamos abraiados cos azulexos que recobren as fachadas da estación de San Bento e doutras moitas edificacións. Observamos a colorida paisaxe da Ribeira, xunto ao Douro, e no Mercado de Bolhão probamos doces típicos portugueses. Fixemos tamén un roteiro alternativo para coñecer a verdadeira esencia da cidade e do seu pobo; exploramos  a  física  do  son  na  Casa  da  Música  e  vimos  monumentos inconfundibles que nos mostraron a riqueza histórica da cidade.

O xoves despedímonos de Porto e de Espinho para dirixírmonos cara a Aveiro. A primeira hora, aprendemos sobre a industria tradicional que sustentou á súa poboación  durante  séculos,  as  salinas.  Logo,  paseamos  entre  as  coloridas edificacións tan características da arquitectura de Aveiro. Tamén, montamos en barcos moliceiros, dende os cales, grazas a un guía, aprendemos a historia da vila dende as canles que a atravesan.

Este mesmo día rematámolo xa en Lisboa, onde desfrutamos da gastronomía tradicional portuguesa preto da Praça do Comércio. Na mañá seguinte, subimos ao  miradoiro  da  Senhora  do  Monte  e  adentrámonos  polas  rúas  da  cidade. Desprazámonos en metro, mais tivemos a oportunidade de montar nos coloridos tranvías e de escapulirnos polas rúas en trotineta.Na praza do Carmo fixémonos conscientes da historia aínda latente no corazón da cidade; descubrimos o barrio de Alfama e aprendemos sobre as figuras literarias máis destacadas da cultura portuguesa tras visitar a Feira do Livro de Lisboa. Así, visitamos tamén o Castelo de São Jorge, unha fortaleza medieval situada no punto máis alto da cidade pola cal pasaron todas as civilizacións que poboaron Lisboa ao longo da historia. Dende  alí,  tivemos  unha  preciosa  panorámica  da  paisaxe  debuxada  pola diversidade botánica e harmonía arquitectónica de Lisboa xunto coas augas do Texo.

O sábado apuramos o último día de viaxe comezando polo museo Quake, acerca do gran terremoto que asolou Lisboa en 1755. Alí tivemos a oportunidade de sentir persoalmente a experiencia de tal fenómeno e así comprender mellor o sucedido  na  cidade  e  como  isto  mesmo  afectou  a  súa  configuración  na modernidade. Logo, vistamos Belém, xunto coa súa famosa Torre e o Mosteiro dos Jerónimos, onde se atopan os sepulcros do explorador Vasco da Gama e o gran poeta Fernando Pessoa. Logo, relaxámonos nunha longa tarde de praia antes de voltar ao centro de Lisboa para cear e recollernos ata partir deviaxe de volta na mañá seguinte.

Chegamos a Burela por volta das nove da noite, tras unha viaxe en bus con intervalos de recordos sobre a experiencia e moito, moito sono, o que nos mostra canto desfrutamos dela. Paramos tamén en Ponte da Lima a xantar e visitamos o seu mercado de antigüidades antes de despedírmonos finalmente da nosa última  gran  viaxe  como  curso  en  conxunto.  Desta  viaxe  quedámonos  con innumerables recordos construídos nun ambiente que combinou a convivencia e os  risos  coa  cultura,  facendo  dela  unha  experiencia  inolvidable para  todos. Finalmente, tan só queda dicir que ficamos muito gratas e gratos por termos a oportunidade  de  compartilhar  esta  experiência  com  as  profesoras  Vanesa  e Karina,  assim  comoJosé  Luis,  sem  os  quais  não  poderia-mos  terdesfrutado tanto da nossa viagem. 

Carla Paz Trelles, 1° BAC A

Accede AQUÍ ao albúm de fotos da viaxe.