Andaina polo bo trato ás persoas maiores

O venres 14 de xuño o alumnado de 1º ESO participou nunha andaina organizada pola Cruz Vermella co obxectivo de convivir durante unhas horas con persoas maiores. Esta actividade pretende fomentar o bo trato a este colectivo e a maior maneira é coñecelo compartindo con eles unhas horas de paseo, xogos e mesmo de comida. 

Ás 11:30h comezou a andaina que percorreu parte do paseo marítimo de Burela, tempo no que o alumnado puido ir conversando cos seus correspondentes maiores. A partir das 13:00h comezaron os xogos, a música e, finalmente, o picoteo. 

Foi unha actividade divertida e enriquecedora na que a comprensión e a solidariedade entre xoves e maiores estivo moi presente. 

Podedes acceder a máis imaxes AQUÍ. 

No noso programa de radio Proxecto Neo emitido o 20/06/2024, tamén adiantamos nos primeiros minutos a crónica feita polo alumnado e profesorado grazas o seu profesor Fernando Losada.

Premios para o IES Perdouro de traballos por proxectos e de convivencia e benestar emocional

Esta semana recibimos as noticias de que o labor do IES Perdouro foi premiado no IX Concurso de Traballos por Proxectos e no I Premio ConVivimos, ambos convocados pola Dirección Xeral de Ordenación e Innovación Educativa.

No contexto do PLAN LIA de Bibliotecas Escolares (Lectura, Información e Aprendizaxe) convocouse o IX Concurso de Traballos por Proxectos 2022-23 baixo a coordinación (ou coa participación) da biblioteca escolar. A finalidade do proxecto, de carácter interdisciplinario, foi a elaboración dun invernadoiro para o centro. Realizouse dun modo DIY (Do It Yourself – Faino ti mesmo), para que o proceso fora exportable e cadaquén puidese construílo na súa casa. Instalóuselle tamén a infraestrutura necesaria (sensores de temperatura, humidade etc) para realizar unha plantación de vexetais totalmente ecolóxica, aprendendo sobre os mesmos no relativo á data de plantación, coidados, recolección, usos e incluso análise da súa forma. Para todo isto empregouse un sistema de traballo que combina a busca e tratamento da información, o método científico e a aprendizaxe baseada en proxectos, de xeito que o alumnado, ao ir superando os distintos obxectivos do currículo, observaba unha finalidade no seu proceso de ensino-aprendizaxe, traballando distintos temas transversais e adquirindo as correspondentes competencias curriculares. Este proxecto, que comezou coa idea de construír un invernadoiro, foise desenvolvendo de xeito que se acadaron moitos outros fins, por iso recibiu o nome de: Construímos unha estrutura xeodésica e plantamos un fractal? - Construímos un invernadoiro e plantamos unha coliflor?”

O proxecto comezou analizando as necesidades de crear un espazo para o cultivo de vexetais durante o período escolar no centro educativo, de xeito que se puidera levar a idea a outras persoas que quixeran facer o mesmo (DIY) e seleccionar cultivos para distintos fins. Neste proxecto o estudo das estruturas xeodésicas e dos tipos de cultivo foron o medio para acadar o fin. Tralo estudo das estruturas xeodésicas, comezouse a elaboración dun proxecto técnico que supoñía: deseñar e realizar o cálculo da estrutura xeodésica, deseñar a disposición das macetas/mesas de cultivo, elaborar os detectores de temperatura interior e os detectores de humidade para controlar o regado das plantas. Investigouse sobre os cultivos que se ían realizar, completando o traballo coa información facilitada polas familias, empregáronse as formas da natureza (coliflor, brócoli, col romanescu e suculentas) para estudar os fractais e utilizáronse as plantas aromáticas (lavanda, menta etc) para elaborar distintos tipos de xabón. Finalmente, procedeuse á difusión do proxecto e á realización de agasallos cos cultivos conseguidos e produtos elaborados.

A contía que recibiu o centro foi de 2000 € como se pode comprobar na resolución que fai pública a relación de centros premiados. 

Por outra parte, co fin de recoñecer o esforzo realizado polos centros educativos na mellora da convivencia e do benestar emocional, convococouse o I Premio ConVivimos 2023 de convivencia e benestar emocional, para recoñecer aquelas actuacións e proxectos de carácter individual e/ou colectivas que implicaran un alto grao de compromiso coa mellora da citada convivencia escolar e benestar emocional. Para esta convocatoria presentouse un proxecto de todas as actividades relacionadas coa educación emocional que se realizaron no centro durante o ano pasado. Nestas actividades participou alumnado de todo o centro (ESO, BACH, FP) e colaboraron diferentes departamentos grazas á formación recibida no PFPP e á coordinación das profesoras Yolanda Fernández e Montserrat Seco, esta última a través do Programa de Educación Responsable. O alumnado recibiu sesións de Educación Emocional, realizou un estudo sobre emocións no IES Perdouro, construíu unha estrutura suspendida, redactou relatos e poemas, o Coro das Emocións interpretou varias cancións etc.

Ao IES Perdouro outorgóuselle polo proxecto #EmociónsNoPerdouro un áccesit, quedando no 4º posto dos 50 centros da comunidade autónoma que se presentaron nesta primeira convocatoria como consta na relación de premiados. 

O Perdouroscopio

Este curso contamos no centro cun equipo de investigación. Chámase Perdouroscopio. 

O Perdouroscopio nace coa idea de proporcionar á comunidade educativa unha nova ferramenta de apoio e investigación no propio centro. Queremos estudar detalladamente a aparición ou as consecuencias de posibles diferenzas e obstáculos que impidan a convivencia no noso contorno e por iso vos animamos a suxerir a intervención do noso equipo nos casos en que a consideredes necesaria. 

Cres que debemos actuar? Podemos axudarche? 

Queremos acompañar e axudar a solucionar pequenos problemas centrándonos na investigación como primeiro paso para atopar solucións. Somos o apoio que necesitabas. Non dubides en contactar con nós no buzón da entrada principal. 

Ti suxires, nós investigamos!

Visita do alumnado de 6º de EP do CEIP Virxe do Carme

O mércores 15 de xuño visitounos o alumnado de 6º de EP do CEIP Virxe do Carme. Foi recibido na biblioteca pola directora, Mª José Pardiñas, e polo xefe de estudos, Toni Galdo. Tiveron oportunidade de ver as instalacións do centro e de pasar por Tecnocienciarte, feira de tecnoloxía, ciencia e arte, que se celebrou estes días no IES Perdouro. Alí puideron conversar co alumnado da ESO e de Ciclos Formativos que lles explicaron os proxectos nos que estiveron traballando neste curso. 

Esperamos que lles gustara o centro e que desfrutaran moito da visita!

Podedes ver máis fotos AQUÍ. 

Visita do alumnado de 6º do CEIP Virxe do Carme

Esta mañá tivemos a visita do noso futuro alumnado. Recibimos os alumnos e alumnas de 6º de primaria do CEIP Virxe do Carme. Foron acollidos polo equipo directivo: o director, Santiago Pérez, a vicedirectora, Dolores Otero,  a xefa de estudos, Ma José Pardiñas e o secretario, José Díaz. Tiñámoslle unha sorpresa: o vídeo promocional do centro gravado poucos días antes por Sabela Blanco. Visitaron as instalacións do centro e pasaron o recreo cos seus futuros compañeiros.

Pica aquí para visualizar o albúm de fotos.

Intercambio Radio Escolar A Voz da Mata - Proxecto Neo

O pasado 28 de abril un autobús con procedencia do Rosal chegou ao Porto de Burela. Nel viñan trece alumnos e alumnas do CPI Manuel Suárez Marquier acompañados de dúas profes: Loli, coordinadora da radio escolar, e Bea, responsable da biblioteca. A chegada produciuse sobre as 21.00h e aí os estábamos esperando uns cantos anfitrións do IES Perdouro.
Logo de volver a vérmonos e falar un anaquiño, os alumnos/as do Rosal foron para o hostal en que se aloxaban. Ao día seguinte, ás 9.00h, chegaron ao IES Perdouro, onde foron recibidos por Karina, Santiago, e tres alumnos de 4°ESO (Sergio, Cristian e Alejandra), que nos encargamos de facerlles unha presentación do centro, de Burela e da contorna.
Ao longo da mañá foron visitar o conxunto histórico de Sargadelos, a nova fábrica e, máis tarde, foron recibidos no concello polo alcalde, Alfredo Llano. A mediodía tivemos unha visita sorpresa: Marica Campo veu de visita a Burela e aproveitou para nos saudar e nós para facernos unha foto con ela.
Á hora da comida, os participantes de ambos os dous institutos subimos á zona recreativa do Monte Castelo. Comemos e disfrutamos dunha xornada de xogos tradicionais. De novo na vila, fixemos unha xincana polo centro urbano e tivemos tempo de lecer.
Despois dunha cea conxunta, chegou o momento da festa. Gaiteiros do Rosal e do Perdouro, acompañados dun tamborileiro, amenizaron a festa con música tradicional e baile galego. A despedida fíxose sobre a unha da madrugada, porque os estudantes do Rosal debían erguerse cedo para visitaren a Praia das Catedrais e  Mondoñedo.
Logo destas visitas, puxeron marcha para o Rosal. Esperamos que o pasaran moi ben e que non tardemos en vernos de novo!

Accede a completa reportaxe fotográfica aquí.

Ler aquí o artigo publicado no blogue da da biblioteca A quinta dos Libros sobre a viaxe do grupo da Voz da Mata.

Alejandra Alonso 4° ESO

#FantasticasExperiencias
#RadioEscolar
#Convivencia
#MasaCoral
#ProxectoNeo
#RadioBurela.
#AVozDaMata

Visita dos alumnos de 6º do Virxe do Carme

Esta mañá tivemos a visita do noso futuro alumnado. Recibimos os alumnos e alumnas de 6º de primaria do CEIP Virxe do Carme. Foron acollidos polo director, Santiago Pérez, pola vicedirectora, Dolores Otero, e pola orientadora. Visitaron as instalacións do centro e pasaron o recreo cos seus futuros compañeiros.

Pica aquí para visualizar o albúm de fotos.

Visita dos alumnos de 6º do Virxe do Carme

Hoxe recibimos a visita dos alumnos e alumnas de 6º de primaria do CEIP Virxe do Carme. Foron acollidos polo director, Santiago Pérez, pola xefa de estudos, Mª José Andión e pola orientadora, Loly Chas. Visitaron as instalacións do centro e pasaron o recreo cos seus futuros compañeiros.

Pica aquí para visualizar o albúm de fotos. 

Visita dos alumnos de 6º do Virxe do Carme

Hoxe recibimos a visita dos alumnos e alumnas de 6º de primaria do CEIP Virxe do Carme. Foron acollidos polo director, Santiago Pérez, pola xefa de estudos, Mª José Andión e pola orientadora, María Permuy. Visitaron as instalacións do centro e pasaron o recreo cos seus futuros compañeiros.

V Xornadas de asesoría de imaxe, hixiene e estética persoal

Por quinto ano consecutivo o Departamento de Imaxe Persoal do IES Perdouro de Burela acolleu nas súas instalacións aos usuarios da Fundación "Eu Son". Ao longo dos dous días destas xornadas de convivencia, os alumnos e alumnas do ciclo medio de Peiteado e cosmética capilar realizáronlles diferentes prácticas de afeitados, arranxos de barbas, cortes de cabelo, hixienes e coloracións capilares, cambios de forma no cabelo e tratamentos estéticos de mans. Ademais os usuarios da Fundación Eu Son tamén aprenderon de forma fácil e divertida a proceder ao arranxo da súa imaxe.

Unha grande experiencia para todos, en especial para un futuro máis empático e tolerante do alumnado no sector profesional.

Javier Rouco, Xefe do Dpto de Imaxe Persoal

Obradoiros Ciclos de vida adolescente do programa "Quérote+"

Dentro do Plan Proxecta no mes de xaneiro o alumnado de 3º da ESO, ca colaboración do QUÉROTE +,  participou en tres obradoiros do programa “CICLOS DE VIDA ADOLESCENTE” na modalidade COÑECENDONOS. Estes obradoiros desenvolvéronse en seis sesións de clase onde se traballaron aspectos relacionados coa convivencia, valor de diversidade, a imaxe corporal e a autoestima, a afectividade e a sexualidade.

A actividade tratou sobre a Convivencia en xeral entorno aos seguintes obxectivos: fomentar o uso do diálogo como alternativa a outras respostas menos construtivas ante os conflitos como a agresión, a violencia ou a sumisión, fomentar a potenciación de contextos cooperativos nas relacións persoais, potenciar o desenvolvemento de actitudes de asertividade e empatía, nos procesos de interacción persoal, fomentar as relacións de apoio entre os iguais e distinguir entre as distintas técnicas de mediación nun conflito.

Os contidos versaron sobre as seguintes temáticas: as habilidades sociais, a comunicación, a resolución de conflitos, a empatía e a asertividade dos rapaces/as para fomentar relacións sociais satisfactorias libres da posible presión exercida polo grupo de iguais e de discriminación ante a toma de decisión individual ante imposicións sociais existentes. E a confianza nun mesmo/a, rompendo cos estereotipos que os medios de comunicación e a publicidade poden exercer sobre os/as rapaces/as e que pode levar nalgúns casos a realizar condutas irresponsables ou perxudiciais coa única finalidade de ser aceptados polo grupo de iguais. A autoestima é importante porque o feito de sentirnos ben con nós mesmos pode influír sobre a nosa forma de actuar, nas nosas relacións persoais, e en xeral, no desfrute que teñamos da nosa vida. Tamén se abordou a reflexión sobre opinións, crenzas e sentimentos de cada persoa en relación aos modelos que ás veces veñen impostos desde a sociedade ou entorno en si, a potenciación das cualidades de cada un/unha, sendo conscientes das limitacións que poidamos ter, a forma en que cada un/unha se sinte con un mesmo/a repercute sobre a percepción de si mesmo/a e a calidade das relacións co resto; e por último tratouse a dicotomía modelos únicos vs diversidade.

Convivium

O día 12 de xuño , os alumnos de Latín de 4º de ESO ofreceron un convivium con comidas típicas da cociña grega e romana cociñadas por eles mesmos. As receitas tomáronas do blog “ De re coquinaria”, inspirado na obra do autor romano Apicio.
Aproximadamente ás 10 da mañá trasladámonos a unha clase do instituto onde colocamos todos os pratos preparados coas súas respectivas receitas. Había de todo, desde panis nauticus (pan), melopepo (melón cunha salsa de viño de pasas ) e diferentes  dulcia romana  (milfollas recheos de froitos secos )
A decoración realizámola nas clases con cartóns e pinturas. Fixemos algúns miliarios, que colocamos polo instituto para sinalizar o lugar do convivium. As alumnas de 1º de bacharelato de Latín axudárnos a rematar todo o traballo a tempo e realizaro, ademáis, un vídeo con música típica graga para amenizar a comida.
Pasámolo moi ben e todos comimos moito. Algúns profesores tamén se achegaron á clase para probar as nosas receitas.
Grazas pola boa acollida y grazas ás alumnas de 1º de Bac. pola súa axuda 

Marta Porto, 4º ESO B

Visita dos alumnos de 6º do Virxe do Carme

Hoxe recibimos a visita dos alumnos e alumnas de 6º de primaria do CEIP Virxe do Carme. Foron acollidos na biblioteca do centro polo director, Santiago Pérez, e polo xefe de estudos, Fausto López. Visitaron as instalacións do centro e pasaron o recreo cos seus futuros compañeiros.

IV Xornadas de asesoría de imaxe, hixiene e estética persoal

Os días 24, 25 e 26 de Marzo celebráronse, un ano máis, as xornadas de convivencia cos usuarios da fundación “Eu Son” de Burela coa colaboración das alumnas do C.M. de Perrucaría do IES Perdouro. 

Os usuarios/as do Centro Ocupacional e Centro de día da Fundación Eu Son asistiron e participaron no obradoiro de Asesoría de imaxe, hixiene e estética persoal. Nestas xornadas déronse pautas e consellos par manter e coidar a imaxe persoal no día a día. Foron días moi intensos no que se fixeron moitas actividades (afeitados, manicuras, masaxes, peiteados, cortes, etc) nas que os usuarios participaron nos traballos adoptando o papel de modelos e tamén o papel de profesionais, ninguén quedou sen traballar!!

Esperamos que pronto volva a ser o ano que ven e telos aquí outra vez con nós. Grazas pola vosa visita.

Mariser San Lorenzo. Xefa do Departamento de Imaxe Persoal do IES Perdouro.

Visita dos alumnos de 6º do Virxe do Carme

Hoxe recibimos a visita dos alumnos e alumnas de 6º de primaria do CEIP Virxe do Carme. Foron acollidos polo director, Santiago Pérez, e polo xefe de estudos, Fasuto López. Visitaron as instalacións do centro e pasaron o recreo cos seus futuros compañeiros.

III Xornadas de asesoría de imaxe, hixiene e estética persoal

Os días 18, 19 e 20 de Marzo celebráronse, un ano máis, as xornadas de convivencia cos usuarios da fundación “Eu Son” de Burela coa colaboración das alumnas do C.M. de Perrucaría do IES Perdouro.
Durante estes tres días traballamos codo con codo para mellorar a sua estética, e sobre todo, e quizais o máis importante, reforzar os lazos que nos unen desde fai tres anos.

As alumnas realizaron traballos de corte de cabelo, manicuras, depilacións faciais, cor, masaxes, limpezas de cutis, peiteados...

Eles, pola súa parte, colaboraron en todo momento para axudar a realizar peiteados e recollidos, e practicar técnicas de maquillaxe de unllas....

A última sesión adicámola a mostrarlles as técnicas de barbeado. Para iso, cada un deles trouxo o seu propio material. Quizais foi o momento mais divertido. Todos o fixeron baixo a supervisión dunha alumna do 1º ano.

Penso que estas xornadas son moi positivas, xa que, por unha parte sirven como práctica ás alumnas - sobre todo no módulo de “Peiteado e Estilismo Masculino” - e por outro lado saímos un pouco da rutina dos nosos clientes habituais.

O grupo que nos visitou estaba integrado por 26 persoas das cales 11 viñan nun primeiro turno de 10h a 11h45, e 15 persoas no turno de 12h a 13h45.

Tan só, polo cariño que nos ofrecen, a ilusión coa que reciben os nosos coidados e o agradecidos que se mostran con nos, xa merece a pena seguir con este proxecto.

Quero agradecer aos monitores da Fundación “Eu Son” a sua axuda, ás miñas compañeiras de Departamento e sobre todo ao alumnado do Ciclo o esforzo destes tres días. Grazas tamén á Dirección do IES por facer posible este proxecto.

E, como din os nosos amigos, cando se despiden..... “Vémonos o ano que ven” 

Begoña Rodríguez Muñiz. Xefa do Departamento de Imaxe Persoal do IES Perdouro

Xornadas de convivencia cos usuarios da Fundación Eu Son de Burela

Ao longo desta semana recibimos a visita da Fundación "Eu Son" para a protección de persoas con discapacidade intelectual de Burela. Foron un total de 31 rapazas e rapaces os que puideron realizar diversas tarefas de imaxe persoal dende hixiene capilar, peiteados ata manicura, todo iso baixo a supervisión das alumnas e alumnos de 2º do Ciclo Medio de Perrucaría.

Begoña Rodríguez, xefa do Departamento de Imaxe e coordinadora das xornadas, sinala que disfrutaron moito con estas tarefas e agarda poder contar con repetir a experiencia un ano máis.