Operación Kilo de recollida de alimentos

O alumnado de 4º ESO de Iniciación á Actividade Empresarial e Emprendedora e de Economía do mesmo curso e de 1º de Bacharelato comezan o 13 de marzo unha campaña de recollida de alimentos para o Banco de Alimentos da Mariña. 

Este cartel é da autoría de Shiva Eliska Alinda Nurhakim de 4º ESO B e estes días veredes outros polo instituto tamén realizados por alumnado das materias citadas anteriormente para recordarvos que é necesaria a vosa colaboración. 

Durante os recreos poderedes entregarlles pasta, legumes, fariña, arroz, azucre, aceite, leite, conservas... A recollida rematará o 14 de abril.  

Ven ao mercadiño de Nadal e fai as túas compras!

Fai as túas compras no mercadiño de Nadal do recreo os seguintes días: 

- martes 13 

- mércores 14

- xoves 15

- luns 19

- martes 20

O grupo organizador, 4º ESO B2, entragará o importe da recadación á Cruz Vermella de Burela. 

Doa o que non uses os xoves no recreo

Os xoves 17 e 24 de novembro e 1 de decembro o alumnado de 4º B2 recollerá aquilo que non uses e que queiras doar: libros, xoguetes, bixutería (pulseiras, pendentes...), roupa ou outros obxectos. 

Desde a materia de Iniciación á Actividade Emprendedora e Empresarial, coa axuda da súa profesora Mª Inés Pérez González, do departamento de Economía, os rapaces están a organizar un mercadiño de Nadal.  

Os obxectos doados venderanse nos recreos xusto antes das vacacións de Nadal e o que se recade coas vendas doarase á Cruz Vermella. Polo tanto, trae algo que penses que alguén queira comprar. 

Doa e dálle unha segunda vida ao que non uses!

Premios de Edutec Emprende ás ideas innovadoras

Esta semana entregáronse os premios ás ideas innovadoras do proxecto Edutec Emprende do Departamento de Economía. 

O primeiro premio foi para Alejandro Fernández de 1º de Bacharelato pola súa idea "reloxo intelixente". Consistía nun espertador con sensores que se asegura de que realmente te levantas da cama. 

O segundo premio foi para Lin Vizoso de 1º de Bacharelato co seu "ximnasio futurista" con todo tipo de aparellos innovadores para realizar exercicio físico. 

E o terceiro premio foi para Iria Jacomé pola súa idea "carro calculador", que consistía nun cuarto pregable que se pode transportar e ao que se lle pode cambiar facilmente a decoración. 

Parabéns!! Que as vosas ideas vos fagan emprender un fermoso camiño!!

16 de abril: Día Mundial do Emprendemento

Dende as materias do Departamento de Economía, estivemos e estamos a traballar o emprendemento e o espirito emprendedor. Celebramos o día 16 de abril, como o Día Mundial do Emprendemento. Tamén estamos a participar nun concurso de ideas emprendedoras e a realizar unha liga de debate sobre materia de comercio local. 

O emprendemento é, sen dúbida, un dos puntos polos que traballar e loitar no mundo empresarial e laboral e, polo tanto, é aspecto e competencia clave en moitas materias do ensino secundario e de bacharelato. Un mundo en continuo cambio ao que temos que adaptarnos e no que o emprendemento e o autotraballo é, en moitas ocasións, unha opción a barallar e para a que temos que estar formados e preparados xa que abrangue tódolos mercados e áreas de coñecemento.

Departamento de Economía

Charlas sobre Servizos financeiros e Publicidade

O pasado venres 12 de xaneiro os alumnos/as de Economía de 4º de ESO e de 1º e 2º  Bacharelato participamos en dúas charlas sobre Servizos Financeiros e Publicidade respectivamente impartidas por representantes da Escola Galega de Consumo (EGC) no marco das actividades do proxecto Galicons-net .

Na charla sobre Servizos financeiros informáronnos sobre as contas bancarias, tarxetas de crédito e débito, préstamos, o fondo de garantía de depósitos e outros servizos e produtos financeiros e os riscos que poden supoñer os mesmos.

Despois na charla sobre Publicidade, faláronnos sobre os anuncios publicitarios que vemos día a día na vida cotiá, os tipos de anuncios que podemos presenciar e os dereitos que temos para denunciar calquera anuncio publicitario que non consideremos apropiado. Tamén nos comentaron os principios básicos que debe ter un anuncio para captar a atención do espectador dependendo do que se está tratando vender.

Ademais, facilitáronnos un teléfono de contacto para pedir información sobre calquera destes temas tratados.

O blog onde publicamos o traballo que están facendo os alumnos de 4º de ESO no proxecto Galicons servizos financeiros: Stop abusos bancarios e o seguinte: http://stopabusosbancarios.blogspot.com.es

Crónica do alumnado de Economía de 4º de ESO.

Encontro coas asociacións de comerciantes

O venres 15 de decembro de 2017 na Biblioteca do IES Perdouro os alumnos de Economía de 4º de ESO, 1º Bach., 2º Bach. e alumnos dos Ciclos formativos de Administración asistimos a unha charla impartida por Rubén Pinín, presidente da Asociación de Comerciantes Industriais e Autónomos de Burela (ACIA Burela) e do Centro Comercial Aberto (CCA) de Burela.
A Asociación de Comerciantes é unha entidade formada por varios comercios de Burela que entre eles se poñen de acordo para facer actividades e campañas conxuntas que beneficien o comercio e indirectamente a todo.
Foi fundada en outubro de 2011. Esta asociación dinámica organizou moitas actividades ata fai pouco. Actualmente debido a falta de relevo da dirección non está moi activa.
Na charla, Rubén informounos dos obxetivos e funcións que se levaban a cabo por esta asociación, así como das diferentes actividades, eventos e campañas  que se organizaron, como por exemplo a Festa Castrexa, os concertos de Entroido, os juernes de tapas...
Sen dúbida algunha, todas estas actividades benefician aos comerciantes pero tamén en boa medida a todo o Concello de Burela.

Explicounos tamén as formas de financiación e subvencións que reciben tanto a Asociación de Comerciantes como o Centro Comercial Aberto para facer posible todas actividades e campañas que levan a cabo.

O Centro Comercial Aberto pertence a Federación de Comercio A Mariña a través do que tamén recibe certas axudas sobre todo nas campañas e actividades máis importantes que realizan.

Crónica do alumnado de 1º de Bach. de Economía

Ligazóns:
Sitio web ACIA Burela: https://aciaburela.com
Facebook CCA Burela: https://www.facebook.com/ccaburela