23.12.18

Panxoliñas de Nadal

O alumnado de 1° e 2° de ESO de Relixión recuperou unha tradición oral relacionada co Nadal e fixo uns murais ben bonitos e orixinais para lembrarnos dúas panxoliñas tan especial nestas datas navideñas.
- Imos a Belén
- Esta noite é noite boa cantaremos ao recén panxoliñas aninovo e pandeiradas tamén...

Aquí tedes o resultado.


21.12.18

Entrega de premios do Concurso de Postais de Nadal 2018

Acto de entrega de premios do Concurso de Postais de Nadal convocado polo Equipo de Dinamización e a Biblioteca en colaboración co departamento de Plástica.

Esta mañá o director felicitou os gañadores do certame e entregoulles un diploma así como un pequeno premio en metálico. Estivo acompañado por Miruca Parga, coordinadora do EDLG, e por Teresa Rodríguez, profe de debuxo.
  • Roi González Quelle acadou o 1° premio. O seu debuxo representará a felicitación oficial do centro.
  • Izán Domínguez Soto ten o 2° premio.
Parabéns !!!


19.12.18

O Nadal xa chegou ao IES Perdouro!

Esta bonita época do ano, que tanto esperan os máis pequerrechos da casa como os maiores, está á volta da esquina. Como non podía ser doutra maneira, as alumnas e alumnos do IES Perdouro puxémonos mans á obra. Dende varios departamentos xurdiron diferentes ideas e houbo varias aportacións. Decoramos o noso instituto polos corredores, ventás, portas, aulas...

Na entrada, atópase a nosa grande árbore de Nadal, mostra do traballo en equipo do Departamento de Tecnoloxía. O alumnado de 4º de ESO de Tecnoloxía compuxo 5 triángulos rectángulos recheos de tuberías de PVC de diferentes tamaños. O alumnado de 2° e 3° de ESO axudou a cortar e pintar as tuberías de branco e os máis pequenos, os de 1° ESO, aportaron os seus adornos: uns pequenos anxos, pompóns e agasallos para encher as tuberías. O Departamanto de Mecanizado fixo a armazón para unir os paneis e a estrela. Para a súa iluminación contouse coa axuda do Departamento de Electrónica.

Por outro lado, o alumnado de 4° de ESO tamén elaborou unha figura de Papá Noel para colocar un "photo-call" na entrada do centro, debuxado e pintado por eles, coa axuda de tres rapaces de diferentes cursos: David, Cristina e Lucía.

Xa para rematar, o Departamento de Francés ambientou a entrada cunha cheminea de cartón reciclado.

O broche final púxoo o alumnado do CM de Instalacións en Telecomunicacións quen programou un letreiro luminoso para desexar unhas felices festas.

Agora, con todo xa rematado e decorado, grazas a un gran traballo en equipo, só nos queda gozar destas pequenas vacacións.

Bo Nadal! 

Accede a reportaxe fotográfica aquí.


Alejandra Alonso Fernández 
4º ESO

Debate en 1º de CS Administración e Finanzas

O pasado 27 de novembro, o alumnado do 1º curso do Ciclo Superior de Administración e Finanzas foi o protagonista dun debate organizado polos docentes dos módulos “Xestión da documentación xurídica e empresarial” e “Comunicación e atención ao cliente”.
O tema a debater foi a xestación subrogada, elixido pola maioría do alumnado cunha semana de antelación para dispoñer do tempo necesario para a súa preparación. Os docentes, coa axuda dunha alumna, exerceron de moderadores e o resto do alumnado posicionouse en dous grupos a favor e en contra dos “ventres de aluguer”.
Esta práctica resulta fundamental xa que entre as principais situacións de comunicación presencial no entorno laboral, e na vida en xeral, se atopan o debate e o diálogo. Ademais, cando se trata de dilemas sociais, estes deberían resolverse mediante procesos de elección social participativa.
A pesar diso, o debate cidadán limítase ao ámbito privado, aflorando a través das redes sociais se é que se dispoñen delas. En definitiva, a opinión da cidadanía poucas veces é tida en conta, a pesar da existencia de ferramentas para iso.
O conflito forma parte da vida e é un motor de progreso, pero en determinadas condicións pode conducir á violencia. Para mellorar a convivencia educativa e prever a violencia, é preciso traballar a resolución de conflitos desde un punto de vista construtivo, é dicir, pensando, dialogando, debatendo e negociando.

María García Jartín, profesora

18.12.18

Mensaxe de apoio a Sabela

O alumnado de 1º de ESO xunto coa súa profesora de Galego apoian a Sabela de OT por visibilizar o noso idioma e por mostrar tanto cariño e respecto ás nosas letras e nosa terra. Desde Burela, Forza Sabela! Tris-tras.

Que xa ven!!


17.12.18

Obradoiro de linguaxe publicitaria


Desde a Escola Galega de Consumo, viñeron a pasado 20 de novembro ao centro a falarnos sobre publicidade e ensináronnos que a linguaxe publicitaria agocha moitos segredos:

-As liñas da publicidade (1º segredo): As liñas rectas non teñen o mesmo significado ca as curvas. Os anuncios que máis se fixan nisto son os dos coches.

-As cores da publicidade (2º segredo): A cor rosa e o malva fan referencia a mulleres inocentes e en plena xuventude, que aínda non teñen claro o seu futuro. Pola contra, a cor dourada é para mulleres xa adultas que teñen claro o seu propósito na vida.

-A música (3º segredo): Hai varios tipos. Poden ser:
  • JINGLE: Creouse para empregar o nome do produto e para que a canción se faga pegadiza.
  • MÚSICA ORIXINAL: Componse unha melodía que é símbolo dunha marca.
  • MÚSICA TRADICIONAL: Utilízase música que é moi coñecida.
  • ADAPTACIÓN MUSICAL: Emprégase unha canción que todos coñecemos e modifícase a letra para que se nos veña o produto á cabeza.
  • MÚSICA DE CINE: Fannos pensar que estamos espectando.
  • MÚSICA DE PERSOAS OU GRUPOS COÑECIDOS: Emprégase para publicitar o produto e, asemade, o grupo ou cantante.
-O texto (4º segredo): Cuxo obxectivo é que te acordes da frase para poder recordar o produto que se pretende vender. Esa frase chámase slogan, poden ser:
  • Afirmacións positivas
  • Atemporais
  • Recordables
  • Curtos e simples
  • Orixinais
  • Inclúen un beneficio/característica clave.
Comprobamos que son moitos os aspectos cos que poden influír nas nosas decisións para que compremos.

Laura Ares Rodríguez
4º ESO

13.12.18

Visita a cafés Candelas e Quescrem

O día 14 de novembro os alumnos/as de 4º da ESO de Tecnoloxía e Física achegámonos a Lugo para visitar a fábrica de Cafés Candelas e unha das factorías de Quescrem.

Chegamos a Cafés Candelas sobre as 11:00h, entramos por unha porta anexa e dirixímonos, con batas e gorros, á zona de almacenaxe dos grans, onde nos contaron que eran o produtor número 1 de café en España e que comezaban a exportar a Europa e Norteamérica. Nesa parte da visita foi tamén onde nos dixeron que existían dúas variedades de café diferentes e que os países produtores se situaban nas rexións intertropicais de África, Asia e Suramérica. Despois seguimos o proceso de forneado, embalaxe e distribución.

Ao acabar esta visita dirixímonos a un polígono industrial, un pouco máis afastado, onde se situaba Quescrem.

Esta empresa nace a partir dun proxecto de investigación universitaria e, por esa mesma razón, os seus traballadores teñen unha media de idade moi baixa, só 35 anos. Aquí leváronnos ata as oficinas, onde nos mostraron un vídeo sobre a empresa e os seus produtos, para despois baixar ata a cadea de produción e embalaxe; a mágoa da visita a esta empresa foi que estaban en período de limpeza e non tivemos a oportunidade de ver as máquinas en funcionamento.

Accede ao albúm de fotos aquí.
ANDRÉS PARDO PARRA
4º ESO

Viaxe á Coruña

Saímos de Burela ás 9:10 e, despois dun longo traxecto, chegamos ás 11:20 á nosa primeira parada: o Acuario Finisterre.

Xa alí, recibiunos unha agradable monitora que nos dirixiu a unha das salas máis populares do acuario: a sala Maremagnum; o primeiro que fixemos alí foi escoitar unha explicación sobre os distintos tipos de peixes (peixes óseos, cartilaxinosos…) e os distintos tipos de peles (sen escamas e con escamas, destes dous tipos ofrecéronnos unha mostra para sentir o seu tacto rugoso). Tamén nos explicaron os diferentes tipos de respiración nos peixes, as súas formas de reprodución e as formas dos ovos dos tiburóns, dos cales nos proporcionaron moita información.

Despois de toda esta explicación pasamos á visita libre, na que puidemos ver, individualmente ou en grupo, as distintas salas e exposicións, as cales eran moi divertidas e interactivas.

Logo de gozar desta visita, dirixímonos no autobús a un lugar onde comer. Despois da comida, fomos á Fundación Barrié na que uns monitores nos deron a benvida.

Alí iamos facer unha actividade de Robótica, pero antes de todo déronnos unha pequena noción sobre o que eran os robots e que función desenvolverían no futuro. Coa explicación dada, pasamos á práctica: os monitores entregáronnos unha tableta e un robot (M-bot) cos que iamos desenvolver aquela actividade. Despois disto pasamos a facer diferentes circuítos ou programas para ir colléndolle o gusto á cousa. Ao final, con todos os programas realizados, cada grupo tiña que desenvolver un programa para que o robot loitase contra os demais robots dos outros grupos, o cal foi moi divertido e emocionante. Cando rematou o obradoiro, todos, con educación, lles aplaudimos aos monitores e estes felicitaron os profesores polo noso bo comportamento.

Todos felices volvemos ao autobús e percorremos o camiño de volta a Burela, a onde chegamos cara ás 20:20.

Para min esta foi unha viaxe moi entretida e didáctica, na cal aprendemos moitas cousas. Estou moi satisfeito de ter ido.

Accede ao albúm de fotos aquí.
Manuel González
3º ESO B

Aula aberta á tecnociencia

O venres 30 de novembro o alumnado de 4º ESO viaxou ata Vigo; máis concretamente, fomos ata a súa Universidade.

Ás oito da mañá xa estabamos todos listos para emprender a viaxe. Chegamos arredor das 11:30 e recibíronnos cun agasallo na Escola de Enxeñaría de Minas e Enerxía, onde se poden cursar diferentes graos e másters relacionados con esta enxeñaría. Despois de darnos o agasallo, o profesor, co cal teriamos a primeira charla, levounos ata un laboratorio desta parte da Universidade.

Na primeira charla, “Física Recreativa”, explicáronnos algúns conceptos de Física, como a lonxitude de onda, e tamén o funcionamento do ollo con respecto ás cores, facendo un inciso nas cores primarias (vermella, verde e azul) e a súas complementarias (cian, maxenta e amarela); cando unha cor primaria desaparece, dá lugar á súa complementaria e mediante diversos experimentos, dos cales puidemos formar parte, este profesor foi quen de explicarnos as cores que se producían nunha pompa de xabón.

Para a segunda charla, “Topografía con realidade aumentada”, viñeron tres profesores: un deles fíxonos unha pequena presentación en PowerPoint das diferentes ramas que tocaban e os outros dous fixeron unha pequena explicación do seu traballo. Para finalizar esta charla, puidemos experimentar cunha caixa de area, a cal tiña uns sensores para mostrar curvas de nivel e diferentes cores para saber se unha superficie estaba elevada ou non.

Na última charla, “A febre dos materiais”, un profesor desta Universidade puxo ao noso alcance diferentes materiais, os cales puidemos tocar e preguntar  polo seu uso ou a súa composición. Fixo fincapé nalgúns deles: unha estrutura con forma de panal de abella, usada nos avións; diferentes fibras, como a de carbono; diferentes tipos de plásticos e a súa nomenclatura, destacando o policarbonato e o metacrilato, dous materiais moi transparentes pero cunha diferenza notable: o último deles é máis fráxil ca o primeiro; explicounos diferentes métodos de soldadura, destacando a de fricción (as pezas únense pola calor producida por este proceso). 

Para darlle fin a esta charla, o profesor fixo dous experimentos: no primeiro, fixo unha escuma, a que se usa para o recubrimento dos teitos, mesturando dous produtos e o segundo consistiu en conseguir cobre a partir da súa mena (el fíxoo poñendo en contacto unha lámina de ferro con ácido).

Arredor das tres saímos da Universidade e dirixímonos á Laxe, un centro comercial preto do porto de Vigo; alí comemos e deixáronnos tempo libre. Ás cinco xa estabamos todos na entrada do centro comercial e, aproveitando que Vigo destaca polo seu decorado de Nadal, fomos dar un paseo pola Gran Vía vendo o acendido das luces desta época. Ás seis e media puxemos rumbo a Burela.

Accede a reportaxe fotográfica aquí. 
Salma Yáñez Rego
4º ESO A

Viaxe a Asturias

Os alumnos de 3º da ESO do IES Perdouro fixemos o día 21 de novembro unha viaxe a Asturias para ver pola mañá a Central Leiteira Asturiana e pola tarde visitar o Museo da Minaría en Avilés.

Sobre as 10:00 horas chegamos a Granda, onde se atopa a Central Leiteira. Alí, uns guías recibíronnos para ensinarnos a fábrica. Entramos nunha sala onde nos puxeron unha bata e un gorro e guiáronnos pola factoría; o primeiro que nos ensinaron foi a descarga do leite (2.000.000 litros) procedente das granxas. Este leite pasa despois a uns tanques de hixenización e esterilización, alí extráese a manteiga e o resto pasa á uperización, para envasar o leite en distintos envases e saír pola parte de atrás da fábrica con destino aos comercios españois.

Sobre as 16:00 horas chegamos a Avilés para ver o Museo da Minaría de Asturias. O primeiro que fixemos foi descender nun ascensor ata unhas galerías, fomos camiñando por elas e vimos carbón nas paredes e unhas vías por onde van os vagóns; estaba todo moi escuro. Baixamos por unha rampa e leváronnos nun pequeno tren, despois ascendimos ao museo. Alí vimos ferramentas e imaxes da historia dos mineiros.

Chegamos a Burela ás 20:30 horas.

Accede ao albúm de fotos aquí.
Luis López Ramos
3º ESOA

Planetario móbil

O día 30 de outubro, os alumnos/as de 4º ESO acudimos a unha actividade realizada a quinta hora da mañá. Esta actividade consistiu en visitar un planetario móbil, que nos trouxo Íñigo De La Quadra Salcedo, un dos fillos de Miguel de la Quadra Salcedo.

Chegamos á aula de música e xa nos deu as instrucións para poder realizar a actividade con normalidade. Cinco minutos despois entramos na cúpula: comezamos cunha imaxe xeral do Universo e a medida que iamos avanzando viamos a Terra e o Sistema Solar dende diferentes puntos de vista; ata puidemos observar o lado oculto da Lúa.

Pasamos un momento divertido aprendendo sobre o Universo, foi incríbel.

Accede ás fotos aquí.
Sergio Alonso
4º ESO

11.12.18

O Camiño de Santiago: do Cebreiro a Samos

    O martes 23 de outubro o alumnado de 3º da ESO fixemos unha viaxe na que visitamos diversos e interesantes lugares guiados polo profesor Antón Niñe.


    Primeiro fomos ao Mosteiro de Samos, ocupado actualmente por oito monxes.
 
  Trátase dunha abadía que foi fundada no século VI por San Martiño de Dumio. Foi moi importante durante a Idade Media. Chegou a posuír máis de duascentas vilas e cincocentos lugares.

    Xa en época máis recente, no ano 1951, sufriu un incendio debido a que un rapaz acendeu unha candea e, ao prender no licor que alí se fabricaba, comezou a arder.

    O claustro de maior tamaño denomínase claustro do Padre Feixóo, na honra dun monxe do século XVIII, personaxe moi importante da época. Cada lado deste claustro mide 54 m de longo, polo que é o maior de España. Tamén vimos o claustro das Nereidas, de estilo gótico, que é máis pequeno ca o anterior. Entre os dous claustros encontrábanse a mordomía e a botica, lugar onde se gardaban os medicamentos.

    Despois vimos a portada románica, que era a entrada da igrexa que había no mosteiro. Ten gravada unha cruz de soga, que non ten nin principio nin fin, coma o universo. Tamén ten arcos oxivais.

    Máis tarde, fixámonos na porta da biblioteca, concretamente nunha inscrición, que foi o que máis me chamou a atención. A frase, escrita en latín, di: “Un mosteiro sen biblioteca é coma un castelo sen armamento”.

    A continuación, subimos para ver onde se encontraban os dormitorios. Cada un tiña o nome dun personaxe da igrexa. Vimos a porta da que fora a cela onde se hospedou o escritor galego Ramón Cabanillas, que estivo no cuarto chamado “San Petrvs Ap.”

    Minutos despois, baixamos para ver a igrexa, que tamén fai de parroquia de Samos. Pero, antes encontrámonos cunha gran sancristía, que ten unha cúpula enorme e no centro unha mesa do século XVIII. Xa na igrexa, vimos o fermoso rosetón, que hai que mirar de dentro cara a fóra para saber o que nel está representado. Impresionounos moito a decoración deste lugar xa que estaba moi relacionada coa natureza.

    Despois, dirixímonos á Capela do Ciprés ou de San Salvador, que foi construída entre os séculos IX e X. Ten un arco de ferradura de arte mozárabe e un arco de medio punto na entrada.

    Máis tarde, fomos ao Cebreiro; alí estabamos a mil cen metros sobre o nivel do mar. Descubrimos que Elías Valiña Sampedro, que foi párroco na igrexa de Santa María do Cebreiro, foi quen pintou as frechas amarelas desde os Pireneos ata Santiago de Compostela.

    Despois, visitamos o albergue. Alí explicáronnos que había dous tipos de persoas que facían o Camiño de Santiago: os peregrinos e os camiñantes. Se queremos aloxarnos nel temos que levar os utensilios de cociña, xa que alí non hai. O albergue conta con catro grandes dormitorios que, en total, teñen cento catro camas.


    A continuación fixemos un pequeno percorrido do Camiño de Santiago e puidemos ver un punto quilométrico que indica os quilómetros que quedan para chegar a Compostela.

    Despois fomos merendar ás Termas e posteriormente collemos o autobús de volta a Burela.

    Accede a completa reportaxe fotográfica aquí.

María Valcárcel
3º ESO A

Carreira Solidaria para acabar coa leucemia infantil

Algúns alumnos e alumnas de 1º de Bacharelato xuntámonos por unha boa causa: acabar coa leucemia infantil grazas á investigación. Unímonos ao proxecto “La Vuelta al Cole” da fundación “Uno entre cien mil”. Esta iniciativa consiste en que o alumnado corra aportando un euro solidario que será investido nunha bolsa de investigación.

Todo empezou cando Benxa, o noso profesor de Educación Física, nos dixo que tiña pensado unha actividade para subir nota. Todo aquel que estivese interesado tiña que ir ao día seguinte á biblioteca durante o recreo. Alí explicounos en que consistía, as tarefas que tiñamos que facer etc. Ese mesmo día abrimos un novo grupo de WhatsApp para repartirnos o traballo e ir comentando todos os pasos que iamos dando cada un de nós.

O primeiro foi buscar o máximo número de patrocinadores posibles; ao cabo dunha semana xa tiñamos máis de mil euros recadados só de empresas da zona. Ademais, fixemos rifas para sortear unha caixa de peixe que nos doaron. O noso profesor quedou impresionado con todos os cartos que fomos capaces de xuntar.
Deseñamos o percorrido da carreira: unhas voltas no parque que está preto do instituto. Despois de saber exactamento todos os patrocinadores e o percorrido, fixemos o cartel e encargámonos de repartilo por todos os establecementos de Burela. Tamén difundimos información en todos os cursos do instituto e intentamos que aportaran o seu euro para a causa. Fixéronnos unha entrevista para El Progreso, publicaron unha noticia en La Voz de Galicia e falamos en Radio Burela para anunciar a carreira.
Como resultado de todo este laborioso traballo, acadamos arredor de dous mil cincocentos euros para doalos á fundación.
Cando todo estivo preparado para o gran día, os nervios estaban a flor de pel: sairía ben...?, dariamos organizado a tantos nenos e nenas…?
Despois de que todo pasou e botando unha ollada atrás, decatámonos de que vivimos unha preciosa experiencia que nos fixo sentir mellores persoas.

Accede ao albúm de fotos aquí.

Laura Pernas Pérez
1ª BACH-A

Memoria histórica

O mércores 17 de outubro os alumnos de 1º e 2º de BAC tivemos unha charla adicada en gran parte a experiencias sufridas durante a guerra civil española e que levaba por título  "Negación, testemuño e literatura. A guerrilla que nunca nos contaron". Este acto foi presentado polo profesor do centro Bernardo Penabade.

A charla comezou coa presentación do libro A raíña das velutinas, escrito por Lionel Rexes, e no cal aparece Xulio Rodríguez, un dos personaxes da obra que tamén estaba alí presente e que nos comentou que non pode concibir a ninguén que non aproveite a riqueza potencial da lectura. Tamén estaban presentes Fernanda, neta do guerrilleiro coñecido como o “Gardarríos”, fusilado cando ela tiña dous anos, e a filla de Kiko que explicou como foron algunhas experiencias fascistas vividas en Francia.


Por último, Kiko, un guerrilleiro que naceu no 1925, contounos experiencias persoais na guerra civil e deixounos algunha que outra frase curiosa como “os exiliados non escapaban da guerra, senón da morte”. El denomínase e descríbese como un gran rebelde e reivindica que a muller tivo un papel fundamental durante a guerra civil, algo que nunca foi recoñecido. Kiko estivo catro anos e dous meses como guerrilleiro antes de marchar cara a Francia; no ano 1947 foi condenado a morte pero conseguiu fuxir a París antes de que o atopasen. Esta viaxe non foi un traxecto fácil, viaxaban polas noites e ían armados por se había enfrontamentos.

Persoalmente pareceume unha charla moi interesante e inusual xa que poucas veces imos poder coñecer unha persoa que viviu experiencias na guerra civil en primeira persoa.
                                                                                                      
Yago Montenegro 
1º Bacharelato B

Charla Exparlamentarios - 3º ESO

O pasado xoves 25 de outubro tivo lugar un coloquio con exparlamentarios do Parlamento de Galicia.

O primeiro en contar a súa historia foi Ismael Rego, 26 anos deputado polo PSOE e tamén antigo portavoz do grupo parlamentario. A continuación, falounos Sergio López, que foi  3 anos deputado polo PP durante 2 lexislaturas e que actualmente traballa no sector privado en Burela, nunha empresa relacionada co peixe. Por último, falounos Alberte R. Feixoo, que estivo 16 anos como deputado do BNG e agora volveu á súa profesión de avogado.

Sergio López foi o que menos tempo estivo no Parlamento xa que substituíu a outra persoa. Despois de 3 anos deixouno para ir traballar a unha empresa privada. Contounos que cando  se incorporou ao Parlamento, como foi o último en chegar,  tivo que sentar na parte de atrás, xa que era novo nese mundo. Co paso do tempo foi adquirindo máis experiencia, pero no ano 2003 deixou o Parlamento para comezar a traballar no ámbito privado. Para el, foi a experiencia máis enriquecedora da súa vida. Segundo nos dixo el, no Parlamento discútense os temas que repercuten no noso día a día e, para el, iso é o máis bonito da política.

A continuación, Ismael Rego falounos sobre a institución parlamentaria. Segundo el, a política é moi importante para a cidadanía e o Parlamento é unha institución que está acadando cada día máis viveza. Tamén nos dixo que Galicia durante os últimos 45 anos sufriu un gran mellora grazas ao Parlamento galego.

Por último, interveu Alberte R. Feixoo. Contounos que para chegar a estar dando esta charla de política, tivo que pasar primeiro polo instituto e estudar coma nós; animounos a traballar duro para, no futuro, poder estar no seu lugar. Díxonos tamén que, na actualidade, a xente non lle dá moita importancia á política pero deberíase interesar máis por ela xa que grazas a todo o que se aproba no Parlamento podemos gozar de moitos servizos sociais, hospitais, colexios, etc.

Manuel Pumares
3º ESO  A

10.12.18

Exposición Postal de Nadal 1º ESO

Xa está exposta a mostra de Postais de Nadal nas escaleiras do pavillón central, resultado do traballo feito en clase de plástica. Unha delas será a tarxeta oficial do centro para felicitar as festas. 
 
Ver reportaxe fotográfica aquí. 

7.12.18

Día da Sida - mesa informativa no Perdouro

Co propósito de conmemorar o día mundial da loita contra a Sida, cabe concienciar ao alumnado da importancia que ten a prevención. Maite Lanza Méndez, traballadora da Unidade de drogodependencia de Burela, repartíu o pasado venres, día 30, preservativos e folletos informativos entre o alumnado co fin de conter a propagación do VIH.
Ademais no recreo do luns dous voluntarios de Cruz Vermella instalaron unha mesa informativa no hall.

5.12.18

Charla Prevención Riscos Laborais para FP

Campaña de sensibilización Riscos Laborais para Formación Profesional do Instituto Galego de Seguridade e Saúde Laboral.

O Instituto Galego de Seguridade e Saúde Laboral (ISSGA) puxo en marcha unha campaña de sensibilización que se denominou ‘Coa prevención de riscos no traballo a vida espérate’, coa que pretende concienciar e sensibilizar a toda a sociedade en xeral sobre a importancia da prevención laboral.

O alumado dos Ciclos Medios de Mecanizado e de Instalacións en telecomunicacións e o de Formación Profesional Básica asistiu hoxe á charla formativa onde a relatora insistíu na finalidade de conciencialos non só da necesidade de reducir os accidentes de traballo e as enfermidades profesionais, e amosar as vantaxes da prevención como instrumento de mellora das condicións de traballo.

Axenda Cultural

📌 AXENDA CULTURAL


Para esta fin de semana tedes todas estas opcións que nos recompilou o alumnado de 2° ESO PMAR! 

#HaiMoitoQueFacerPolaMarinha
#AxendaCulturalMarinha 

28.11.18

Axenda Cultural

📌 AXENDA CULTURAL


Para esta fin de semana tedes todas estas opcións que nos recompilou o alumnado de 2° ESO PMAR! 

#HaiMoitoQueFacerPolaMarinha
#AxendaCulturalMarinha 

23.11.18

Acto 25 N no Concello de Burela

Esta mañá o alumnado de 4º de ESO participou no acto 25 N Burela en Negro convocado polo Concello de Burela coa lectura duns textos curtos. Ademais, Laura Rodríguez López de 2º de ESO que acadou o 1º premio do certame convocado polo CIM na súa categoría, leu o seu relato. Tamén houbo música e palabras das autoridades.
Accede á reportaxe fotográfica aquí.

22.11.18

Relatos Curtos contra a violencia de xénero

O alumnado de 2º de ESO participou no concurso convocado plo Concello de Burela contra a violencia de xénero. E aquí a escolma:

Feria internacional de máquinas, equipamentos e servizos para a industria.

Alumnos dos Ciclos Medios de Mecanizado están en Oporto Portugal na 17ª edición de EMAF 2018 Oporto: Feria internacional de máquinas, equipamentos e servizos para a industria. Presenta a vanguardia das solucións e tecnoloxías do futuro durante 4 días. EMAF e o maior evento en Portugal do sector industrial.

Acto conmemorativo do día contra a violencia de xénero

Esta mañá tivo lugar o Acto conmemorativo do día contra a violencia de xénero sumándonos á compaña de sensibilización En Negro Contra as Violencias.
O acto foi conducido por Carla Fra, alumna de 1º de Bach. Lembrou que o vindeiro 25 de novembro é o Día Internacional contra a Violencia de Xénero, unha data para denunciar a violencia que se exerce sobre as mullleres en todo o mundo e para reclamar políticas en todos os países para a súa erradicación. En nome dos seus compañeiros manifestou a súa repulsa contra calquera acto de violencia machista, que a día de hoxe, en pleno século XXI, aínda se produce na nosa sociedade.
Miguel Fernández foi o encargado de ler o seu Manifesto. Despois da lectura doutro texto feita por Raisa e Cristián de 1º de Bach, o alumnado de 3º de ESO cantou un rap "Non significa NON". Despois desta pausa musical, Álvaro Fernández e Alejandro Fernández de 2º de ESO, Manuel Paz e Iván Pernas de 1º de Bach. leron cada un os seus relatos que nos axudaron a reflexionar un pouco máis sobre este tema.
Para clausurar o acto o alumnado de 3º de ESO cantaron e bailaron a canción de Rozalén, La puerta violeta, todo un himno contra as agresións machistas. 
E finalmente pechouse o acto posando para unha foto con toda a comunidade educativa do centro e dicindo ben alto o Perdouro Respecta.
Contamos cunha pancarta co noso lema Perdouro Respecta feita en Plástica polo alumnado de 3º de ESO. Agradecemos a Laura Pernas a súa participación ao piano así como o dpto de Electrónica por encargarse da megafonía.  

Exposición Biblioteca : Día contra a violencia de xénero

Chegou o mes de novembro e con el a exposición de libros e cine temáticos sobre muller para conmemorar o día internacional contra a violencia de xénero. 


21.11.18

Anunciando o noso acto do 25 N

Alumnas de 2º de Bach foron esta mañá por todas as aulas para anunciar que mañá, xoves, día 22 de novembro temos programado no recreo un acto  conmemorativo do 25 N. Elas trataron de sensiblizar os seus compañeiros na necesidade de respaldar esta importante mobilización.
Accede ás fotografías aquí.

Axenda Cultural

📌 AXENDA CULTURAL

Para esta fin de semana tedes todas estas opcións que nos recompilou o alumnado de 2° ESO PMAR! 

#HaiMoitoQueFacerPolaMarinha
#AxendaCulturalMarinha 

20.11.18

Perdouro Respecta

Acto conmemorativo do día contra a violencia de xénero no IES Perdouro. Sumámonos á compaña de sensibilización En Negro Contra as Violencias.

Será o xoves 22 ás 11h. no recreo. Abrirase o acto coa lectura duns textos redactados por un grupo de alumnos/as. A continuación alumnos/as de 3º ESO van versionar un rap "Non significa NON". Tamén cantarán unha canción de Rozalén, La puerta violeta, todo un himno contra as agresións machistas. Se te animas, podes unirte a cantar o retrouso con nós. Para clausurar o acto faremos unha foto de grupo coa máxima participación da comunidade educativa do centro. A cor negra será a protagonista.

Vémonos o 22 ás 11h vestid@s de negro.

#BurelaEnNegro#PerdouroEnNegro#ContraAsViolencias

16.11.18

Axenda Cultural

📌 AXENDA CULTURAL

Para esta fin de semana tedes todas estas opcións que nos recompilou o alumnado de 2° ESO PMAR! 

#HaiMoitoQueFacerPolaMarinha
#AxendaCulturalMarinha 

12.11.18

Mes da ciencia en galego - Obradoiro

Con motivo do mes da ciencia en galego, o EDLG contou coa axuda dun equipo interdisciplinar de profesoras  (Física, Bioloxía e Ciencias Sociais). O proxecto deste ano ía destinado ao alumnado de 2º de ESO, 3º PMAR e 4º de ESO Aplicadas e consistiría nun obradoiro de resolución de fenómenos relacionados coa flotabilidade. A finalidade desta actividade que se desenvolveu no laboratorio de Bioloxía é fomentar nas rapazas e rapaces o desenrolo de habilidades cognitivas, pensamento crítico, concentración, aprendizaxe continuo e creatividade.
En resumiadas contas, pasáronno moi moi ben!  E moitos parabéns a Maribel pola introdución histórica a Arquímedes, e a Ana e Virginia polas dinámicas dos experimentos. Grazas.
Accede ao noso albúm de fotografías aquí.

8.11.18

Mes da ciencia en Galego


O alumnado de 2º de ESO, 3º PMAR e 4º de ESO Aplicadas será o que teña que resolver uns cantos enigmas. Para iso temos preparados uns experimentos no laboratorio para intentar comprender o concepto de flotabilidade.
Deixámosvos unha pista: Arquímides.

Visita á unha granxa de corais

O pasado luns 5 de novembro, os alumnos e alumnas de 1º de ESO, xunto con algúns mestres, fomos de excursión a Viveiro dentro da campaña de educación ambiental MARES DE CULTURA OS NENOS E O MAR, promovida polo Grupo de Acción Local do Sector Pesqueiro (GALP) A Mariña-Ortegal.

A primeira parada foi no barrio de Magazos, onde o grupo de alumnos foi acollido nunha casa indiana para descubrir no seu vestíbulo un magnífico acuario de arrecife asi como unha granxa de cultivo de corais ubicada nun bungalow. Reef Water é o nome desta empresa pioneira dedicada ao cultivo, á reprodución e a distribución destes delicados animais mariños. Aí soubemos máis da acuarofilia mariña

Eramos moitos, así que nos dividimos en dous grupos. O primeiro grupo foi ver un acuario moi grande xunto cunha guía chamada Vanesa Rodríguez. Explicounos diversas aspectos sobre os corais e os peixes que habitaban nese ecosistema. Cando acabou a explicación fomos con outra guía, Ana, ver outros 20 acuarios máis. Tamén nos contou curiosidades diferentes que para todos nós eran descoñecidas. Logo, deunos un tempo para observar de preto todos os seres vivos que habitaban cos corais en cada acuario, entre eles: estrelas de mar, peixes paiaso, cogombros de mar.

Mentres nós faciamos todo isto, no centro sociocultural de Magazos un biólogo chamado Carlos Gil deulle ao grupo dous unha charla sobre a contaminación que hai no mar e no océano, explicou qué son os corais, qué lles fai falta para poder vivir… e ata lles puxo uns cuantos vídeos para poder entendelo ben. Cando ambos grupos acabamos, reunímonos para tomar a comida de media mañá. De seguido, cada grupo fixo o que fixera antes o outro. Aprendemos moitas curiosidades novas e moi interesantes!!

Por desgraza, como todas as excursións, nalgún momento tiña que acabar. Volvémonos reunir todos e fomos para o autobús. Cando chegamos ao instituto descansamos e lemos os folletos informativos que nos deran á saída. Foi unha excursión da que aprendemos moito e á que nos gustaría volver, só que sen chuvia, claro, puxémonos pingando.

Accede ao álbum de fotos aquí.

Laura González, 1º ESO B

Novembro: mes da Ciencia en Galego

Este ano a celebración da Ciencia en Galego céntrase na cultura científica e na cultura galega como patrimonio cultural europeo.
cartazElíxese Arquímedes como científico europeo pola súa indiscutible importancia para a cultura científica,  tal como dá conta o feito de que a súa imaxe foi a elixida para figurar na medalla Fields, a medalla internacional para descubrimentos sobresaíntes en matemáticas
Arquímedes brinda múltiples posibilidades; pódese falar de espellos ustorios, da panca para “mover o mundo”, da coroa de ouro trucada, de Pi, da área e o volume da esfera a partir da do cilindro, do parafuso de arquímedes, do palimpesto, etc.
No relativo á cultura galega destacou ao Mestre Mateo pola  arquitectura e escultura, especialmente na catedral de Santiago, no pórtico da Gloria, Santa Tegra, O dolmen de Dombate, os petróglifos, os labirintos, pero hai un cento máis... Desde  logo a arquitectura tamén é unha ciencia aínda que tamén sexa unha arte.
Tedes información adicional sobre o Pórtico e Arquímedes en cienciaengalego.org, por exemplo en http://www.cienciaengalego.org/node/444

Axenda Cultural

📌 AXENDA CULTURAL

Para esta fin de semana tedes todas estas opcións que nos recompilou o alumnado de 2° ESO PMAR! 

#HaiMoitoQueFacerPolaMarinha
#AxendaCulturalMarinha 

2.11.18

Samaín na biblioteca

O alumnado de 2º ESO PMAR preparou coa axuda da súa profesora Eva Fernández unhas lecturas dramatizadas para o día de Samaín. Escolleron dous relatos terroríficos recollidos do folclore norteamericano por Alvin Schwartz. O relato titulado "Ruidos" foi gravado coa axuda da profesora Marga López para distorcionar a voz de Rafa e engadir música tenebrosa e efectos especiais  terroríficos. O outro relato foi lido por Andrea en directo e titulábase "A cousa". En ambas dúas representacións os alumnos fixeron de actores dramatizando a lectura dos textos. O público que se achegou ata a biblioteca durante o recreo do pasado mércores 31 de outubro pasou moito moito medo. Mergullado na total escuridade, o público foi sorprendido por un monstruo que lle saltou encima o que ocasionou a histeria total. 
Podemos felicitar este primeiro traballo destes alumnos esperando que volvan outro día a sorprendernos na biblioteca. Parabéns Andrea, Bruna, Érica, Isaura e Rafael!


Accede aquí as fotografías.



Proxecto Neo

L’image contient peut-être : 10 personnes, personnes souriantes, personnes assises et intérieur Non deixes de escoitar o noso programa semanal radiado por Radio Burela.
Os mércores de 5 a 6 da tarde emitimos en directo.
Tamén podes escoitarnos cando e onde queiras na radio á carta.

Proxecto Neo

1.11.18

Paixón por Sorolla e portos naturais asturiáns

O pasado día 26 de outubro, todo o alumnado de 2º ESO, coas profesoras dos departamentos de Xeografía e Historia (Maribel), Relixión (Begoña) e Plástica (Teresa), fomos pasar o día a Asturias para visitar algúns portos pesqueiros e o Centro Niemeyer. 
Pola mañá fomos a Cudillero (unha pequena vila turística e pesqueira na que as casas, de colores, están situadas de forma descendente cara ao centro da localidade). Alí, realizamos unha actividade en grupos, fotografando sitios importantes desta poboación e explorando o lugar. Tomamos o almorzo e fomos directamente ao Centro Niemeyer, en Avilés, para facer unha visita guiada pola exposición de Joaquín Sorolla e traballar no obradoiro pintando un dos seus cadros máis importantes “Corriendo por la playa”.
Comemos no centro e, pola tarde, fomos a Puerto de Vega (outra localidade turística e pesqueira chea de fermosas rúas que antigamente tivo un porto no que atracaban os seus barcos baleeiros). Alí repetimos a actividade feita pola mañá. Despois diso, voltamos cara a Burela facendo xogos no autobús e divertíndonos todos xuntos, profesoras, alumnas e alumnos.

Accede a reportaxe fotográfica aquí.

Crónica de Laura Rodríguez López, 2º ESO A

Avistamento de aves en Estaca de Bares - 4º ESO

Os alumnos/as de 4º ESO saímos o día 15 de outubro ás 8:30 do instituto rumbo a Estaca de Bares e coa esperanza de pasar unha mañá entretida. A actividade enmárcase dentro da campaña “Mares de Cultura, os Nenos e o Mar” promovido polo GALP A Mariña Ortegal.

Chegamos a Estaca de Bares e fomos recibidos por unha guía que nos ensinou o faro. Puidemos observalo e preguntarlle curiosidades sobre el. Soubemos que tiña dúas lámpadas pero que só funcionaba unha delas (a outra é de recambio), explicounos que alcanzaba os 50 quilómetros aproximadamente e que emitía dous tipos de escintileos, os cales lles permitían aos barcos identificar a zona en que se atopaban. Antigamente, o faro tamén o empregaban os primeiros avións que existiron e era manual xa que había que tirar dunhas cordas para que xirara o faro arredor da lámpada.

Despois fomos á Punta de Estaca de Bares acompañados por un biólogo, que nos explicou que nos atopabamos no punto máis ao norte da Península Ibérica. Dende alí, puidemos observar as aves mediante un telescopio. Ninguén sabía o porqué daquela cantidade tan grande de aves pero o noso guía aclarounos todas as dúbidas cando dixo que nos atopabamos na mellor época do ano porque as condicións meteorolóxicas eran idóneas para a migración das aves de Oceanía e Asia cara a terras americanas. Isto explica que puideramos ver pasar 100 aves por minuto aproximadamente, sen parar, excepto cando se agrupaban e se somerxían na auga coma mísiles en busca de comida.

Por último, fomos a un pequeno embarcadoiro na Ría de Ortigueira onde puidemos merendar o noso bocadillo gozando dunhas vistas bucólicas da ría sobrevoada polas aves.

Accede aquí á reportaxe fotogrófica.

Crónica de Jorge Quelle - 4º ESO

Obradoiro de Reanimación Cardiopulmonar

O día 16 de outubro recibimos a noticia de que, en lugar de asistir ás últimas dúas clases da mañá, iriamos a un obradoiro na Praza do Concello.
Era o Día Europeo da Reanimación Cardiopulmonar e o Concello de Burela, xunto co 061, organizaron un obradoiro de RCP.
Alí, tras unha presentación de profesionais médicos e o testemuño dalgunhas vítimas, empezamos coa práctica.
A nosa especialista-monitora explicounos como se podía recoñecer cando se produce unha parada cardiopulmonar e, obviamente, como tratala mentres que os servizos de emerxencia están en camiño. Facendo distintas quendas, acabamos (un pouco cansos) por salvarlle a vida a un boneco (algún grupo tamén puido practicar cun desfibrilador portátil) e rematamos vendo parte do interior dun vehículo de rescate.

Accede á reportaxe fotográfica aquí.

Crónica de Daniel Piqueras Valle - 4º ESO

Obradoiro de kaiak e surf do programa Mares de Cultura

O martes 9 de outubro, ás 8:30, fomos a unha saída en autobús ata Foz para facer kaiak e surf na ría de Foz e na praia da Rapadoira, dentro do programa "Mares de Cultura". Ao chegar alí, recibíronnos uns monitores de Maremasma que nos dividiron en dous grupos para facer as actividades e logo repartíronnos uns traxes de neopreno.

Despois diso, baixamos ata a praia, e alí déronnos as táboas, os kayak e as palas, e antes de comezar a usar o material, déronnos unha breve charla de como funcionaba todo aquilo. Seguidamente, cada grupo comezou a actividade que lle correspondía e ao cabo dun tempo cambiamos. 
Ao rematar as actividades, démonos unha ducha,  devolvemos o material e limpamos as táboas de surf; deixamos os nosos neoprenos, vestímonos e os profesores déronnos un tempo para comer a nosa merenda e ir dar unha volta. Ás 13:30 volvemos ao autobús para retornar ao instituto. Foi unha viaxe moi divertida.

Accede aquí ás fotos.

Crónica de Dámaris Carballo Dorado - 2º ESO B
Related Posts Plugin for WordPress, Blogger...