28.2.13

Alumnas escribindo para Novas de Novos

Dúas alumnas gañadoras do concurso de Banda Deseñada do IES Perdouro en anteriores edicións publicaron un artigo de opinión no suplemento Novas de Novos do xornal La Voz de Galicia.

Tania Díaz Vázquez – 1º Bach.

Desde moi pequeniña comezou o meu afán polo debuxo, quizais herdado de miña nai. Recordo perfectamente como ela me ensinaba os seus debuxos durante longos días de inverno e como eu me sentía fascinada por eles.
Sen embargo, a miña afección polo cómic chegou uns anos máis tarde. Un día de verán, na praia, comecei a garabatear nun caderno. Debuxei todas e cada unha das cousas que vía ao meu arredor, apuntei o que parolaban as persoas que estaban preto e así foi como surxiu a miña primeira banda deseñada.
Despois desta fixen outra, outra e outras máis. A maioría dos meus amigos dicíanme que non se me daba nada mal e que debía continuar. Así o fixen: apunteime a algún obradoiro e na edición de 2009 presenteime ao certame organizado polo instituto dentro do programa dos Encontros de Banda Deseñada da Mariña. A xenerosa resolución do xurado estimuloume moito a seguir.

 






Inés Pardo Parra – 3º ESO

Sei que se a xente acostuma a dicir que as ideas non caen do ceo, que o Espírito Santo non vén en forma de pomba e che dá unha idea; mais a min foi exactamente iso o que me ocorreu.
Recordo estar na clase, a nosa profesora de lingua castelá comezou a explicarnos o que tiñamos que facer: unha historia en forma de cómic. Podía non ter diálogos, podía ser en branco e negro, en cor... e, de súpeto, xa tiña todo claro. Escoitaba as queixas dos meus compañeiros: "Eu non sei que facer!", "Eu non sei como facelo!" "Eu non sei debuxar ben!". Ben, esa última pode que fose eu.
Púxenme á tarefa rapidamente e comecei facendo o guión. A historia xa a tiña clara na cabeza: un home tentando facer de superheroe no mundo real, no que sendo unha persoa "normal" non hai moito onde exercer ese traballo. Xa tiña claro que debía facer unha historia divertida, unha situación cómica; porque en cuestión de debuxo non ía destacar o máis mínimo. Ensineille o guión á mestra e recordo que se rira. Non fora moito, mais eu vira o atisbo dun sorriso. Iso deume ánimos para seguir adiante, e, en pouco tempo, xa tiña rematado o exercicio.
Pasou o tempo. Cando eu xa me tiña olvidado do asunto do cómic, un día chegou Juani á nosa clase e comunicou que eu gañara o segundo premio. Ao principio quedei algo confusa, case nin me acordaba do que falaban!


25.2.13

Concurso de Robótica 2013

cartazAlumnado de 4º de ESO -titorados por Javier Villaverde, o seu profesor de tecnoloxía- e do Ciclo Medio de Instalacións de Telecomunicacións -titorados pola súa profesora Marga López- participaron na Coruña o día 25 de febreiro no V Concurso Galego de Robótica A Maxia da Robótica, organizado pola Institución Galega da Ciencia  (IGACIENCIA), en colaboración coa Fundación Barrié.
 
Con esta actividade preténdese achegar aos nosos alumnos e alumnas o campo da robótica e aproveitar a súa "maxia" para promover a cultura científica na nosa sociedade galega.

O obxectivo deste obradoiro "A maxia da robótica" é participar en grupo na montaxe e programación dun robot móbil cun kit de LEGO, de maneira sinxela e divertida en tan só unha hora. A fase de preparación previa dura tamén outra hora e nela apréndense a linguaxe da robótica e o manexo dos robots.

A competición dura cinco días, do luns 25 de febreiro ao venres 1 de marzo, e nela participan equipos de toda Galicia, preto de 1.000 alumnos e 58 profesores de 29 centros.
Que gañen os mellores! A competición está servida!

Para a semana, o xurado dictaminará os equipos gañadores. Paciencia.

A prol da Ciencia Galega e do Galego na Ciencia

23.2.13

Charla sobre violencia de xénero

O alumnado de 2º de ESO recibíu na biblioteca o día 20 de febreiro unha charla sobre Violencia de Xénero impartida pola Xefa da Unidade de Violencia de Xénero da Subdelegación do Goberno. Esta actividade, que forma parte do Plan Director para a Convivencia e a Mellora da Seguridade Escolar, ten como obxectivo informar e sensibilizar o noso alumnado contra a violencia de xénero e estereotipos sexistas para destacar a importancia da educación en valores e coñecer os modos de prevenilos e denuncialos.
Loitemos entre todos para erradicar a violencia de xénero.

Uso responsable de Internet e das redes sociais

Dentro do Plan Director para a Convivencia e a Mellora da Seguridade Escolar, Ramón Peña, formador da Garda Civil de Lugo, informou e asesorou o noso alumnado de 1º de ESO no manexo e uso responsable de internet en diferentes dispositivos informáticos como poden ser os ordenadores, teléfonos ou tablets nunha charla impartida o pasado martes, día 19 de febreiro.

O axente Peña explicoulles a necesidade de implantar na súa rutina diaria en Internet unha serie de consellos para protexer a súa persoa e intimidade e evitar a comisión de delictos. Incidíu en que é necesario educar no intercambio e usos propios e alleos de imaxes íntimas e persoais. Fixo tamén fincapé no perigo de facilitar datos persoais e íntimos a descoñecidos e na necesidade de que comenten cos seus pais, titores ou profesores calquera contido estrano e/ou ameazante que detecten en Internet.

Acercándonos á astronomía

Alfonso Piñeiro impartiu unha charla sobre astros do noso sistema solar ao alumnado de 1º de ESO o pasado mércores 20 de febreiro na biblioteca.

22.2.13

Obradoiro de Comunicación coa sociolingüista Bernie O'Rourke

O alumnado de 4º de ESO e 1º de Bacharelato foi partícipe duns obradoiros de comunicación en linguas inglesa e galega a cargo da sociolingüista Bernie O'Rourke os días 21 e 22 de febreiro respectivamente. Toni Galdo, profesor de lingua inglesa,  moderou un candente debate sobre as similitudes entre o gaélico e o galego. O alumnado puido coñecer de primeria man a realidade sociolingüística de Irlanda asi como debater sobre as políticas lingüísticas de Galicia e Irlanda. Bernie suscitou dúbidas ao respecto en ambos países e compartiu co noso alumnado puntos de vista sobre a convivencia lingüística en Galicia. 

21.2.13

Día da lingua materna

"Hoxe é o dia de lingua materna e tambén o dia da lingua bengalí. Con 230 millóns de hablantes, somos o sexto idioma máis falado do mundo.
Era o 21 de febreiro de 1952 cando morreron alumnos da Universidade de Dhaka en Dhaka (Bangladesh) defendendo a lingua bengalí contra a imposición do urdu (Pakistan). Esa loita pola defensa de lingua materna considérase como primeira gerra de nacionalismo lingüístico e por iso a UNESCO decidiu esa data como dia de lingua materna en 1999.
Orgulloso de ser bengalí e pola miña lingua materna.
Saúdos a todos os meus amigos desde Edimburgo. Feliz día de lingua materna.
Viva o galego e viva o bengalí." 
Anik Nandi

Comentario sacado de Facebook , grupo Proxecto Neo


Proxecto Neo nº 44 coa sociolingüista irlandesa Bernie O'Rourke

Bernie O'Rourke protagonizou o programa radiofónico de hoxe. Estudou tradución en Dublín e continuou facendo sociolingüística. Viaxou a Galicia hai dez anos como lectora na Facultade de Filoloxía Inglesa da Coruña. Tivo a oportunidade de traballar ou coñecer varios sociolingüistas galegos: Celso Alvaréz Cáccamo, Fernando Ramallo, e Olga Castro. De volta de Galicia doutorouse en Dublín.

Sendo neofalante en gaélico, estivo comentando as similitudes entre o gaélico e o galego. Expresouse con total fluidez en galego. Fermosísimo!

 Para escoitar o programa e coñecer de primeira man a realidade irlandesa preme aquí.

Neofalante en gaélico e neofalante en galego!!!

20.2.13

Obradoiro de comunicación "Modelo Burela"

A convidada da presente edición é a sociolingüista irlandesa Bernadette O’Rourke

Bernadette O’Rourke, profesora do Departamento de Linguas e Estudos Interculturais da Heriot-Watt University de Edimburgo, estará entre os días 20 (mércores) e 22 (venres) do presente mes de febreiro en Burela para coñecer de xeito directo o Modelo de Planificación Lingüística aplicado na localidade. Aproveitando a súa visita, o Instituto Perdouro convidouna a participar nunha nova edición dos Obradoiros de Comunicación “Modelo Burela”, actividade que botou a andar en marzo de 2010 coa colaboración do profesor hindú Anik Nandi. 

Desenvolvemento da actividade

Esta actividade de comunicación ten como obxectivo o fomento da fluidez comunicativa nos idiomas inglés e galego. Bernie O’ Rourke (con aprendizaxe inicial de inglés e neofalante en galego) e Héctor Canto (galegofalante inicial e neofalante de inglés) aproximarán aínda máis as culturas galega e irlandesa, xa relacionadas entre si desde tempo inmemorial.

As primeiras actividades destas xornadas celebraranse na tarde do mércores. Ás 5 da tarde, a profesora O’ Rourke participará en directo no programa radiofónico escolar Proxecto Neo, emitido por Radio Burela todos os mércores entre as 5 e as 6 da tarde. Seguidamente, comezará a realizar un traballo de campo consistente en diversas entrevistas coas que pretende obter un diagnóstico do panorama cultural de Burela. 

Tanto nas xornadas do xoves como do venres, a profesora convidada participará en actividades didácticas con alumnado de ESO e Bacharelato (en horarios aínda en elaboración) e continuará cos traballos da súa investigación. 

A profesora convidada

Pouco despois do cambio entre séculos chegou á Coruña para traballar na Universidade como lectora de Lingua Inglesa. Do seu contacto coa realidade cultural galega, surxiu o tema da súa tese de doutoramento: a comparación da situación sociolingüística de galego e gaélico. Posteriormente iniciou outras investigacións en colaboración coa Universidade de Vigo e realizou o curso de Lingua e Cultura Galegas celebrado no CUVI en 2011. 

Outras referencias:

http://hw.academia.edu/BernadetteORourke


Artigo de opinión de Bernie O’Rourke

Chámome Bernie O'Rourke. Son irlandesa, mais levo varios anos vivindo en Edimburgo (Escocia), onde traballo na universidade de Heriot-Watt. Desde o ano 1998, cando fixen un lectorado na universidade da Coruña, levo moitos anos visitando Galicia.

Durante esa estancia comecei a interesarme pola realidade sociolingüística de Galicia e, sobre todo, polo uso do galego. En Irlanda tamén, como sabedes, temos outra lingua que é o gaélico irlandés da que hai cada vez menos falantes tradicionais, aínda que si vemos un aumento no número de neofalantes, isto é, a xente que non ten a lingua como lingua materna ou familiar senón que a aprendeu na escola.

O tema dos neofalantes é algo que me interesa moito. Levo varios anos taballando sobre o mesmo, sobre todo con colegas na universidade de Vigo. Actualmente estamos recollendo datos sobre persoas con estas características e o ano pasado pasei varios meses en Vigo entrevistando a neofalantes de diferentes idades que viven nesa cidade. As súas historias son moi diversas pero moi interesantes.

Durante o meu traballo de campo coñecín un rapaz de Burela, Héctor Canto, un enxeñeiro de telecomunicacións que me falou do Modelo Burela e das medidas inovadoras do proxecto para promover o uso da lingua entre toda a cidadanía, especialmente entre a xente chegada de fóra. Tamén coñecín outro investigador da India, Anik Nandi, que agora está facendo o seu doutoramento comigo en Edimburgo. Anik é un exemplo dun neofalante;  aprendeu o galego en Santiago e dende entón fálao con case todo o mundo.

O Modelo Burela demostra que a lingua galega é un ben común para todos e que hai xente de fóra que a ve como unha parte importante da súa identidade. Durante a miña visita á localidade, na próxima semana espero coñecer un pouco mellor a realidade sociolingüística deste lugar de referencia.

19.2.13

Día de Rosalía - 24 de febreiro

O 24 de febreiro está recollido oficialmente como Día de Rosalía de Castro pola Consellería de Cultura e Educación no seu Calendario do Libro e da Lectura.

Rosalía naceu en Santiago de Compostela o 24 de febreiro de 1837 e morreu en Padrón o 15 de xullo de 1885 á idade de 48 anos.

Nos seus primeiros anos vivíu nas vilas rurais de Ortoño e Padrón.A Rosalía, na escola, gustábanlle moito o debuxo, a música e recitar. 

Con 19 anos trasládase a Madrid e alí casou cun xornalista galego chamado Manuel Martínez Murguía. Con el tivo seis fillos. 

Viviu en moitos lugares debido á profesión do seu marido: Madrid, Lugo, Simancas, a Coruña, Santiago, Lestrobe, Estremadura, Alacant…

Rosalía de Castro foi poetisa e novelista en lingua galega e castelá. Foi a escritora máis importante do Rexurdimento da literatura galega no século XIX. Foi a autora de "Cantares galegos" (1863),  un dos primeiros libros enteiramente escrito en galego da Idade Contemporánea. O 17 de maio, Día das Letras Galegas, celébrase por ser a data de edición da súa obra Cantares galegos.

Foi bautizada cos nomes de María Rosalía Rita. Filla de nai solteira. Adicou a súa vida á literatura. Morreu de cancro moi nova, aos corenta e oito anos, na súa casa de Padrón, que hoxe é un museo que se pode visitar.

Maila que pediu que os seus restos descansaran no seu cantado cimeterio de Adina, o seu corpo foi trasladado ao Panteón de Galegos Ilustres no Convento de Santo Domingo de Bonaval (Santiago de Compostela), onde actualmente se atopa.

Este ano celebramos o 150 aniversario da publicación de "Cantares galegos".

Información sacada do CEIP Nosa Sra. de Xuvencos, e se queres saber máis preme aquí.

Máis recursos sobre Rosalía aquí.

18.2.13

Acto de inauguración "Cinco anos de Banda Deseñada na Mariña"

Hoxe, estamos aquí reunidos para inaugurar unha exposición sen precedentes en Burela, o mesmo aquí na Mariña se mo permitides. 

No IES Perdouro traballouse durante estes últimos 5 anos a chamada sétima arte, a banda deseñada, facendo especial fincapé en aproximar unha cultura xa non tan vanguardista ao noso alumnado, outra forma de ler e de entender o mundo que nos rodea.

A nosa biblioteca empezou a dinamizar uns Encontros que comezaron no ano 2008 e que teñen dous obxectivos básicos: por un lado, a posta en coñecemento do apaixoante mundo do cómic e, por outro, dinamizar a vida da Biblioteca, xa que o cómic é un bo recurso para fomentar a lectura entre o máis novos. 

Creamos unha nova sección na biblioteca. Adquirimos obras maestras para os fondos da nosa Comiteca, que posibilitou a consulta e unha lectura de calidade, e o que espertou o interese no noso alumnado.

Xa levamos 5 anos celebrando durante 3 meses os Encontros de BD na Mariña organizando OBRADOIROS de guión, de iniciación á BD, de caracterización de personaxes de cómic, de bonecos… e, tamén, EXPOSICIÓNS. Por exemplo, citar que xa teñen pasado en anos anteriores por estes Encontros artistas da categoría de Miguelanxo Prado, Manel Cráneo, Carlos Portela, Kiko da Silva ou David Rubín, entre outros.

Durante estes tres meses, o Instituto transfórmase: as aulas, as paredes, as ventás… todo serve de soporte para os debuxos dos rapaces que decoran todo o centro coas súas personaxes preferidas.

Hoxe veremos nesta exposición unha mostra que recolle os traballos premiados destes últimos catro anos do Concurso de creación de Banda Deseñada asi como, unha recompilación de entre tantas actividades levadas a cabo nos Encontros de Banda Deseñada en torno ao mundo desta sétima arte.

A partir do 19 de febreiro e ata o 21 de marzo de 2013, estará aberta esta exposición "Cinco anos de BD na Mariña" ao público na Casa da Cultura de Burela de 9h00 a 13h30 e de 17h00 a 20h00.

Ademais quixemos chegar ao noso alumnado mediante a ferramentas da web 3.0, e dicir das redes sociais. Os encontros deron a luz en 2009 a un blogue que recompila estes 5 anos de actividades frenéticas. Os Encontros contan tamén cunha revista propia chamada “Banda Desexada” onde aparecen os cómics dos primeiros e segundos premios, entrevistas… Non esquezamos a nosa ativa participación nas redes Facebook, Tuenti, e Twitter para difundir todo canto se faga nos Encontros.

Para rematar, queremos agradecer a axuda que para estas actividades recibimos do Equipo de Normalización e Dinamización Lingüística do Instituto, da Asociación Os Matos, do Proxecto de Innovación Lingüística do noso centro, do IES Monte Castelo co deseño dos carteis dos Encontros; e tamén agradecer o apoio incondicional do Concello de Burela que sempre respaldou os Encontros, a Diputación de Lugo, e felicitar a colaboración de todo o profesorado e alumnado que participaron.

17.2.13

Rosalía de Castro no IES Perdouro

Exposición "Cinco anos de Banda Deseñada na Mariña"

A partir do 19 de febreiro e ata o 21 de marzo de 2013, estará aberta ao público na Casa da Cultura de Burela a exposición titulada “Cinco anos de Banda Deseñada”, mostra que recolle os traballos premiados destes últimos catro anos do Concurso de creación de Banda Deseñada asi como, unha recompilación das actividades levadas a cabo nos Encontros de Banda Deseñada en torno ao mundo desta sétima arte.

Esta mostra resulta de interese para a formación do alumnado. 

O horario de atención ao público é de 9:00 a 13:30 horas e de 17:00 a 20:00, de luns a venres.

15.2.13

Inauguración da exposición "Cinco anos de Banda Deseñada na Mariña"

O IES PERDOURO ten o pracer de convidalo/a á inauguración da Exposición CINCO ANOS DE BANDA DESEÑADA NA MARIÑA que terá lugar o vindeiro luns 18 de febreiro ás 19 h. na Sala de Arte da Casa da Cultura de Burela.

7.2.13

Gozando da neve en Fuentes de Invierno, Asturias

A pesar das inclemencias climáticas destes días, aí están pasando moito frío e loitando contra a xistra e a nevarada. 

Un grupo de 16 alumnos/as de 1º de Bacharelato acompañados pola súa profesora de Educación Física, Mª José, e polo seu profesor de Inglés, Toni, saíron o martes 5 de febreiro despois das clases para a estación de esquí Fuentes de Invierno en Asturias co fin de practicar in situ deportes de inverno.

O están a pasar moi moi moi ben e tamén xenial. (segundo comentan polo Twitter)

6.2.13

Navega con Rumbo

O alumnado de 3º e 4º de ESO recibiron unha charla divulgativa dentro do Proxecto Abalar sobre como navegar con seguridade pola rede. Lucía Fidalgo do Colexio Profesional de Enxeñeiros Informáticos de Galicia foi a encargada de ensinarlles aos escolares a navegar por Internet dun xeito útil e responsable. O programa ten como obxectivo formar ao alumnado nas boas prácticas no uso de internet, previndo o ciberacoso e a dependencia das novas tecnoloxías, e promovendo un uso responsable das redes sociais.

Ademais o alumnado ten a súa disposición unhas Guías de Boas Prácticas que se poden descargar en formato electrónico da web www.navegaconrumbo.es, e que ofrecen xogos e ligazóns de interese sobre a temática do programa.

Máis información sobre Internet Segura aquí e na OSI - Oficina de Seguridade do Internauta-.


4.2.13

"Camiño de Santiago" Samos - o Cebreiro

O día 4 de febreiro 41 alumnos e alumnas de 3º e 4º ESO viaxaron ata Samos e O Cebreiro para coñecer máis de preto algúns aspectos do Camiño Francés, co seu profesor de Relixión, Antón Niñe e coa súa profesora de lingua galega, Miruca Parga.


Pola mañá visitaron a Capela do Ciprés e o
Mosteiro de Samos. No percorrido polo interior do cenobio puideron ver os dous claustros, o grande, onde puideron contemplar a figura do P. Feijóo, e o pequeno (gótico) coa fonte das Nereidas; unha fachada románica e varias dependencias, antes de entrar na sancristía e na Igrexa. No interior do templo puideron admirar a beleza da igrexa, con importantes tallas de autores coñecidos, como Francisco de Moure.

Mentres, Miruca aproveitou para falar de Ramón Cabanillas quen pasou longas tempadas no mosteiro de Samos. Entre 1948 e 1951 escribiu un poemario que vería a luz uns anos despois, a finais da década dos cincuenta, Samos. Explicou a súa profesora o compromiso de Cabanillas coas Irmandades de Fala.

Ao longo da tarde visitaron o poboado do Cebreiro, con visita ao Albergue de peregrinos e ao Santuario. Neste lugar puideron escoitar as características do templo prerrománico e ver no seu interior a talla da Virxe románica (Santa María a Real), o Cáliz e a Patena do Santo Milagre, xunto ao Relicario doado polos Reis Católicos cando peregrinaron a Compostela, a tumba de D. Elías Valiña (gran impulsor do Camiño), etc.

A continuación percorreron a pé un tramo do Camiño co atractivo de contar coa neve caída dous días antes.


1.2.13

Séchu Sende: de escritor a mago?

Din que todo ten o seu remate, mais ás veces hai momentos que non desexamos que rematen nunca. Iso foi o que nos pasou un destes días pasados, porque tivemos a sorte de contar no noso instituto coa presenza dun auténtico mago. Mais non estou a falar dun mago de chisteira e coello, non. É un mago das palabras e dos soños, das linguas e dos sons.
 
Arredor das doce e vinte da mañá reunímonos na biblioteca os trinta estudantes de bacharelato xunto con alumnado doutros cursos. Logo das típicas leas para atopar o sitio adecuado, fíxose o silencio. Diante de nós atopábase un home normal, sen ningunha característica especial, unha desas persoas que vemos pola rúa e non nos chama en absoluto a atención. O home estaba de pé. Detrás del, a longa mesa tras a cal habitualmente se sentan os conferencistas; e na mesa, unha pequena boneca vestida con roupa árabe. O convidado premeu a man da boneca, que comezou a bailar ao son dunha música. Cando o silencio foi absoluto, premeu de novo no botón para silenciala. Tomou a palabra o noso profesor de Lingua e Literatura, que fixo unha brevísima presentación do seu amigo Séchu Sende.

Séchu Sende é natural de Padrón, mais viviu noutras localidades, entre elas Viveiro. Á Mariña trasladouse cando tiña trece anos e marchou cando finalizou tras superar a Selectividade no Instituto Vilar Ponte. Desde ben pequeno comezara a escribir relatos breves e poemas, mais di que foi no curso 1989-90 cando de verdade espertou o seu amor por escribir e facelo na que non era a súa lingua materna: o Galego. Cun dos seus primeiros poemas gañou o prestixioso premio Minerva. Despois conseguiu afianzarse e publicou diversos libros: Odiseas (que editou xunto con uns amigos) ou Made in Galiza, un referente para a literatura galega moderna. Na actualidade traballa como profesor, mais non deixa nunca de escribir.

Preguntado polos segredos da escrita, Séchu Sende comentounos que para el “o fundamental é ler moito e escoitar a todo o mundo que nos rodea. Fixarse e estar sempre atento ao que poida pasar, porque dunha anécdota, pode saír unha grande historia”.

Xa no final fomos partícipes dun momento único. Diversos estudantes fixeron a lectura pública de diferentes versións propias dun texto do Made in Galiza. Crioulo caboverdiano, Castelán, Inglés e Francés foron algúns dos idiomas en que se fixeron as adaptacións. Marabilloso final para unha charla tan agradable.

Quen non tivese nunca a oportunidade de escoitar falar este mago, non sabe o que perde. Mais quen o queira facer, debe ter cuidado. Mentres está diante do público, Séchu pode ler na mente da audiencia, como imitando un mago. Porque este escritor é un mago que nuns segundos trasládanos dunha conversa rutinaria a un percorrido polo Kurdistán. Un mago que en menos dunha hora pasa a ser un agradábel amigo ao que escoitar. Un mago que doa os beneficios do seu máis recente libro -Viagem ao Curdistám para apanhar estrelas- para establecer lazos educativos entre unha escola de Compostela e outra da terra curda. Un mago que transforma as palabras e os sons en imaxes dunha experiencia das que deixan pegada. Ese é Séchu Sende, o mago das letras.


Crónica de Sara Gil Cordido - 1º Bacharelato
Related Posts Plugin for WordPress, Blogger...