Visita a Gadisa

O pasado 14 de xaneiro, o alumnado do segundo curso do ciclo medio de “Xestión Administrativa” e 1º e 2º curso do ciclo superior de “Administración e Finanzas” visitamos a sede da empresa GADISA situada en Betanzos (A Coruña); actividade organizada desde a Aula de Emprendemento do noso instituto. 

Trala viaxe de hora e media desde Burela, chegamos ao noso destino, onde fomos recibidos pola responsable de marketing de GADISA, quen nos conduciu a unha sala de reunións na cal nos explicou todo o referente á empresa. 

Así, soubemos que GADISA é unha sociedade anónima cuxa actividade principal é a distribución ao por maior e en supermercados. Con capital 100 % nacional, está composta por sete liñas de negocio. Ademais é líder de distribución no noroeste de España por facturación e chega ao consumidor a través dunha rede de 479 establecementos de venta de produtos frescos e envasados das mellores marcas. 

A continuación, visitamos o almacén onde nos explicaron que para GADISA a calidade dos produtos é primordial, por iso, o seu sistema loxístico está deseñado para garantir que os produtos frescos cheguen ao consumidor diariamente conservando a mesma calidade da orixe. Contan con dous centros loxísticos, dúas plataformas loxísticas de compra e distribución de pescado, un centro de redistribución de pescado e máis de 230 vehículos propios para servir a calquera cliente alí onde estea: núcleos urbanos, zonas rurais, comedores, comercios, etc. Así mesmo, dispoñen dun sistema de xestión por radiofrecuencia, o cal permite un óptimo aproveitamento dos recursos. 

Unha vez rematada a visita a GADISA, fomos ata A Coruña para xantar no centro comercial Marineda City e, posteriormente, regresamos a Burela, tras unha xornada moi proveitosa, na cal adquirimos moitos coñecementos. 

Podedes acceder a máis imaxes AQUÍ.

Alumnado do 2º curso do ciclo medio de “Xestión Administrativa”.

Visita ao Parlamento de Galicia e á catedral de Santiago de Compostela

O martes 17 de decembro o alumnado de Formación Profesional de Servizos Administrativos do IES Perdouro realizamos una saída cultural e educativa a Santiago de Compostela. Os estudantes que fomos á excursión saímos de Burela ás 8:30 no autobús acompañados dos profesores do departamento de Administración: Yolanda, Patricia, María, Javier e Denís. Chegamos á Intermodal de Santiago de Compostela ás 11:15 e fixemos unha breve parada para ir ao aseo e despexarnos da viaxe, que foi bastante longa. 

A primeira visita foi ao Parlamento, sobre as 12:00, onde fomos testemuñas dun grupo de persoas manifestándose no exterior. Alén diso, alí vimos a Xosé Ramón Gómez Besteiro, Secretario Xeral do PSOE. En primeiro lugar pasamos un control e logo accedemos por unhas escaleiras; na parte superior estaba agardando por nós un guía para comezar a visita. 

O primeiro que nos ensinou foi a sala dos Reis, onde se fan a maioría dos actos, como por exemplo os actos de xura de cargo e outras moitas reunións; nesta sala había fotografías dos reis actuais e dos anteriores, así como imaxes dos antigos presidentes do Parlamento. 

Saímos desta sala e fomos á entrada principal ver as obras de arte que conservan alí e a continuación deixáronnos ver un anaco da sesión. Tivemos a oportunidade de asistir a un pleno sobre orzamentos que dera comezo unhas horas antes e escoitamos falar a Ana Pontón (BNG) e logo a Paula Prado (PP). Despois diso xa saímos para que nos dese tempo a ver todo e non alongar moito a visita. Fomos á biblioteca na que había máis de 5000 libros dos cales uns 2000 eran libros sobre dereito. 

Cando saímos da biblioteca seguimos coa visita, leváronnos a unha sala grande e puxéronnos un vídeo informativo sobre o funcionamento do Parlamento e a súa composición. Unha vez rematado o vídeo explicativo entrou na sala Alfonso Villares, Conselleiro do Mar, que veu visitarnos xa que el nos seus tempos mozos estudou no instituto veciño ao noso, no IES Monte Castelo. Despois diso, demos por rematada a visita ao Parlamento e regresamos ao autobús. 

A parte lúdica foi cando nos diriximos ó centro comercial As Cancelas sobre as 14:00 h da tarde, onde nos deixaron tempo libre para xantar, pasear ou mercar o que quixésemos. Polas 15:30 xa estabamos todos subindo no bus para dirixirnos á Catedral de Santiago. 

Ao chegar entramos polo Palacio de Xelmírez e alí dividímonos en dous grupos dunhas 20 persoas, cada grupo cunha guía e uns mp3 para escoitar mellor. Subimos as escaleiras que nos levaban ás terrazas e gozamos das vistas desde arriba ata que empezou a chover e tivemos que marchar. Desde alí seguimos coa visita sen nos importar ternos mollado. Vimos o altar maior, demos unha aperta ao apóstolo Santiago e visitamos tamén a capela do Horto dos Olivos, onde os estudantes adoitan ir rezar antes dos exames. Despois diso emprendemos a viaxe de volta a Burela. 

Foi unha excursión entretida e non notamos nada de negatividade en todo o día, iso fixo que fose unha saída moi amena e tranquila. O alumnado en xeral, polo que nos dixeron, tivemos un bo comportamento e participamos en todo con moito interese. En conclusión, foi unha excursión tranquila pero divertida, na que todos o pasamos ben e aprendemos moito. Pasamos moi bo día! 

Podedes ver algunha das imaxes da viaxe AQUÍ.

Karen da Costa Pérez e Lara Baltar Fernández  - 1º CB Servizos Administrativos

Visita ao Salón Internacional XANTAR (Ourenses) e á empresa Jim Sports (Palas de Rei)

O pasado 24 de outubro, o alumnado dos segundos cursos do ciclo básico de “Servizos Administrativos”, ciclo medio de “Xestión Administrativa” e ciclo superior de “Administración e Finanzas” emprendemos unha viaxe educativa para visitar o Salón Internacional de Turismo Gastronómico XANTAR en Ourense.

Tras máis de dúas horas e media de viaxe, chegamos ao recinto feiral Expourense onde se situaba a que é a única feira internacional de turismo gastronómico, cunha traxectoria de 25 anos, de aí a importancia que tivo para nós esta visita. 

Unha vez alí, ensináronnos moitos proxectos tecnolóxicos e tipos de innovacións que se fan hoxe en día coa comida. Un exemplo foi a demostración de Begoña Vázquez, propietaria do restaurante Regueiro da Cova, a cal empregou rodaballo, castañas e algas. Algúns de nós tivemos a oportunidade de probar esa comida, que a verdade estaba boísima. 

Finalizada a visita ao salón gastronómico, dirixímonos ás termas de auga natural de Ourense, onde puidemos relaxar o corpo e a mente, algo que nos fixo xenial despois dunha mañá tan intensa. 

Ao día seguinte, o venres 25 de outubro, partimos ben cedo cara a Palas de Rei onde visitamos a empresa JIM SPORTS, dedicada á importación, exportación e venda de material deportivo das súas principais marcas, así como ao deseño e á creación de terceiras. 

Alí recibiunos unha traballadora chamada Jesica, quen nos explicou como o dono puxera en marcha, hai vinte anos, esta empresa, a cal foi pouco a pouco crecendo ata chegar a internacionalizarse e contar incluso cunha franquía na República Dominicana cara a onde exporta os seus produtos. 

Gustounos moito ver a área de administración xa que é moi probable que cos nosos estudos poidamos, nun futuro, traballar nun espazo similar. Tamén nos resultou moi interesante a zona de loxística e ver como se almacenan os paquetes e como saen en grandes grúas. Finalmente, estivemos no departamento de deseño, onde nos amosaron como imprimen as camisetas de deporte nunha tea especial para asegurar a súa durabilidade. 

Comprobamos que en JIM SPORTS é fundamental o capital humano, ao que lle prestan moita atención, xa que teñen un ximnasio nas propias instalacións, algo bastante innovador dentro dunha empresa. Ambas visitas nos gustaron moito, polo que queremos dar as grazas aos nosos profesores Patricia e Jesús por acompañarnos nesta viaxe e permitirnos vivir esta experiencia que será inesquecible para todos nós. 

Podedes acceder ás fotos AQUÍ. 

Elisabeth Mendes Rubal - 2º Ciclo Medio de Xestión Administrativa

Visita á granxa A Peruyeira e a estaleiros Gondán

O xoves 30 de marzo, os alumnos e alumnas de 4º ESO fomos de visita á granxa A Peruyeira, en Castropol. Trátase dunha granxa de vacas de leite, que se basea nun sistema que copiaron de Irlanda. Comentáronnos que, se unha vaca ten un defecto, o sistema indícalles con que touro a teñen que inseminar para mellorar esas eivas nas futuras crías (por exemplo, as patas). 

Ademais, explicáronnos algúns datos sobre a granxa, como que moxen as vacas dúas veces ao día e teñen unha produción anual de 2.400.000 litros de leite. Tamén contan con 116 hectáreas de terreo para que as vacas poidan pastar e colaboran con Central Lechera Asturiana, da que foron socios fundadores. 

Despois, fomos ver como muxían as vacas e fomos á corte, onde nos deixaron acariñar as vacas e os tenreiros. Así mesmo, explicáronnos que a algunhas póñenlles un aro con picos no nariz para que non lles vaian aos tetos a outras vacas, o que dana a calidade do leite. Tamén nos comentaron que hoxe en día os xatos son moi baratos (sobre 40 euros cada un) polo que a súa crianza non sae rendible, xa que o penso é moi caro. 

Para rematar esta visita, leváronnos á antiga granxa, que agora está restaurada e utilízase para celebrar a botadura dos barcos, xa que os donos da granxa tamén están á fronte dos estaleiros Gondán. Logo, deixáronnos comer a merenda de media mañá alí antes de ir ver os estaleiros. 

Podes ver as fotos AQUÍ.

Zoe Arias Lamelas - 4º ESO B1 

 

Ao chegar ao estaleiro, antes de comezar a visita, mandáronnos poñer uns cascos, unhas lentes e uns chalecos reflectores para acatar as medidas de seguridade da empresa. Cando empezamos o traxecto, presentáronnos a César, o noso guía, quen nos fixo unha introdución ao mundo da construción naval e unha explicación breve das funcións dun barco (fábrica, lugar de traballo, vivenda e medio de transporte). Ademais disto, contounos unha serie de curiosidades sobre os barcos que fabricaban. Algunhas destas son que un barco pode chegar a pesar ao redor de 2.800 toneladas, levar 120 persoas a bordo ou que se fabrican nun tempo aproximado de dous anos e que se tiñan que poñer a proba un mes para estar seguros do seu correcto funcionamento. 

Tamén nos comentou que, dende hai dez anos, son expertos na creación de barcos híbridos e que en dous anos o estaleiro ía cumprir un século dende a súa apertura, polo que se foi adaptando ás novas necesidades co paso do tempo. Despois disto, o guía expúxonos como era a construción dun barco e que eles a realizaban por bloques, ademais de comentarnos que a planificación e a coordinación eran esenciais para a fabricación deste. 

Para finalizar, ensinounos os almacéns de pintura, as naves de chorreo e pintura, os guindastres (moi importantes para mover os bloques), o cableado necesario para o barco e o barco que estaba en fabricación no porto. 

Todo o visto anteriormente, foinos tamén explicado cunha ampla presentación de diapositivas por un dos comerciais da empresa, Luis Mourelle, que é ex-alumno do IES Perdouro e estudou Enxeñería Aeronáutica e tamén idiomas, o que o converteu nunha persoa idónea para traballar no estaleiro e vender barcos por diferentes lugares do mundo. En conclusión, foi unha viaxe moi interesante coa que aprendemos moito sobre este mundo e sen dúbida repetiriamos.

Podes ver as fotos AQUÍ.

Laura Paleo Ramos - 4º ESO B1

Visitas empresariais de 2º CS Administración e Finanzas

O 5 e 6 de outubro o alumnado de 2º CS de Administración e Finanzas visitou a empresa Jim Sports situada en Palas de Rei e adicada a comercialización de produtos deportivos e a creación de instalacións deportivas e a feira internacional de produtos de mar conxelados (CONXEMAR). As súas reflexións sobre o visto e aprendido foron estas: 

“Como conclusión diría que todos levamos unha gran aprendizaxe nesta saída educativa. Puidemos ver como se xestiona realmente unha empresa e como se divide o traballo para que todo se leve a cabo. Nosoutros tiñamos unha pequena idea, pero ningún supoñía a magnitude de importancia que ten cada traballador en cada proceso, polo que as visitas resultaron un enriquecemento para as nosas mentes en canto aos estudos que estamos realizando. Deste xeito, visualizamos o porqué de cada cousa que estudamos”. (Lorena Regil) 

“A experiencia de coñecer a empresa Jim Sports agradoume porque aprendemos cal era a súa historia, o seu funcionamento, como estaban repartida as distintas zonas de traballo, como era a parte informática, administrativa e, sobre todo, a parte de loxistica. que era un gran almacén. Puidemos chegar a ver como facían o “picking” con dous sistemas. Un baseábase nun sistema tradicional e outro no automatizado, o cal era máis para producos un pouco máis pesados como futbolíns ou pesas”. (Pablo García)

“O primeiro que chama a atención ao chegar a Conxemar é a gran cantidade de xente de todo o mundo e tamén a gran seguridade que hai. Despois de entrar ao recinto, fomos visitando un gran número de postos. Moitos deixábannos probar os produtos que producía a súa empresa, ao mesmo tempo que che ían dando información e folletos publicitarios. Un dos que máis me chamou a atención foi un de Italia que ofrecía unha especie de fabada que en realidade eran mexillóns”. (Álvaro Álvarez) 

“O que máis me gustou de Jim Sports é que son moitas empresas agrupadas nunha e todas, ou case todas, son xestionadas dende unha única oficina. En Conxemar o que máis me chamou a atención foron as decoracións dos “stands” das empresas expositoras, un lugar idóneo para que as compañías que expoñen dean a coñecer as súas marcas e os seus produtos. Nunca antes estivera nunha exposición tan grande e tan importante. Ali vimos moitos prototipos de maquinaria, experimentamos moitos sabores diferentes e vimos xente facendo negocios”. (Flavio Varela)

“Persoalmente, creo que a mellor parte da visita a Jim Sports foi a parte do almacén e loxística, porque puiden ver de maneira moi gráfica as clases teóricas que demos sobre a xestión, vendas, compras, forma de almacenar… e outras moitas que demos sobre a xestión loxística. En Conxemar puidemos ver a importancia dos idiomas na actualidade, debido a que una empresa actualmente fai moitos negocios a nivel global, pero para min o más importante foi que puiden inspirarme, seleccionar ideas e observar diferentes aspectos importantes para o meu traballo de proxecto integrado, como por exemplo, como enfocalo a nivel comercial para chamar máis a atención e cousas similares”. (Wissal Aazzaoui)

Podes acceder ao álbum AQUÍ.

Viaxe a Palas de Rei e Vigo de 2º CM de Xestión Administrativa

O 5 e 6 de outubro o alumnado de 2º CM Xestión Administrativa visitou a empresa Jim Sports situada en Palas de Rei e adicada á comercialización de produtos deportivos e a creación de instalacións deportivas e á feira internacional de produtos de mar conxelados (CONXEMAR). As súas reflexións sobre o visto e aprendido foron estas: 

“Esta experiencia gustoume moito, vin empresas de diferentes culturas, descubrín lugares e comidas de distintas partes do mundo polo que foi moi gratificante”. (Alba Barreira Rodríguez) 

“Conxemar para min foi una inspiración, ver executivos reunidos na realidade e non nunha película e encontrarte con persoas que che explicaban o que facían con esa paixón e ganas. Tamén me gustou a experiencia de probar comida e coñecer un rincón doutros países ou simplemente pasar dunha esquina a outra e estar nun país dintisto. É unha experiencia que lle recomendaría a todo mundo. Ademais, que aumenta a túa creatividade. Podes coller ideas para o futuro”. (Eunice Sanches Monteiro - Eli) 

“Jim Sports gustoume un montón. Encantoume entrar e poder ver como estaba a xente traballando nos seus postos, notábase que os traballadores estaban contentos de estar alí. Impresionoume moito que parte do material deportivo que coñecía era deles e nunca oíra falar de Jim Sports. Tamén que a todos lles gustaba facer deporte e que contaban cun ximnasio propio que podían usar en calquera momento. Respecto a Conxemar, tamén me gustou moito. Non me imaxinaba que todo era tan “profesional”. Os stands eran alucinantes. Chamoume moito a atención que todos eran superdiferentes e que cada un tiña a súa idea e a súa forma de facer publicidade. Descubrín novos produtos e sabores, non só da nosa terra, senón de diferentes culturas. Probei cousas que nunca antes probaría e resulta que me gustaban como o salmón afumado, o té marroquí, espaguetes de pescado…” (Adriana Polo González) 

“Todos os stands que alí había estaban moi ben montados e decorados tanto que estes parecían ser negocios que tiñan a súa tenda establecida nese mesmo edificio. Á parte de haber postos de empresas de España, había moitísimos que viñan de fóra, tanto de Europa como doutros continentes polo que tivemos a oportunidade de ver diferentes culturas e como o mostraban nos seus stands polo que ofrecía cada un. Unha cousa que me sorprendeu moito foi que non había música en ningún momento e que coa cantidade de xente que alí estabamos non había un ruído excesivo”. (Damaris Popovici)

Podedes acceder ao álbum de imaxes AQUÍ. 

Viaxe a Palas de Rei e Vigo de 2º de CB de Servizos Administrativos

O mércores pasado fomos a unha excursión a Vigo xunto cos de CS de Administración e finanzas e CM de Xestión administrativa, pero antes de ir para Vigo fomos a Palas de Rei (Lugo) a Jim Sport, unha empresa de deportes que venden accesorios, roupa, complementos etc., todo relacionado co deporte. 

Alí explicáronnos un pouco como se creou esa empresa, como se organizan, como se facían os debuxos e logos de calquera empresa ou club deportivo que quería facer camisolas do seu equipo ou sobre os clubs que están comezando, como facían para obter material e que materiais se lles podía facilitar e cales non. Basicamente, informáronnos de como funciona a empresa. Explicáronnolo todo moi ben e detalladamente. Eu sinceramente podo dicir que o entendín todo e recomendo moito que vaian outros cursos a visitar esa empresa. Tamén nos ensinaron os proveedores que ten Jim Sport e que lle facilitaba cada empresa e para que. 

Despois de visitar Jim Sport, fomos comer a Santiago de Compostela ao centro comercial As Cancelas. Do centro comercial non teño moito que falar porque todos algunha vez fomos e xa sabemos o que se fai alí. 

Despois fomos ao hotel, en Santiago. Unha vez chegamos déronnos as tarxetas de cada habitación e fomos cada grupo para a súa habitación. Deixamos as mochilas ou maletas e fomos para abaixo a falar do que iamos facer ese día. Os maiores de idade puideron ir sós dar unha volta por Santiago, pero nós, que eramos menores, tiñamos que ir coas titoras. Ao final pasámolo moi ben coas titoras e fomos a moitos lugares e camiñamos moito, iso si. Un dos lugares que a min máis me gustou foi a Casa do Cabido, porque sempre a praza das Praterías está chea de xente pero cando chegou a covid non saía a xente e as rúas quedaron completamente baleiras. Só había paxaros e pouco máis. Entón decidiron sacar fotos en branco e negro e poñelas por toda a casa por dentro e eran unhas fotos moi bonitas da praza. Fomos a moitos sitios pero non me dá para contarvos todo que se non, non acabo hoxe. Despois volvemos ao hotel e xantamos. 

 Ao día seguinte ás 09:00 da mañá saímos cara a Vigo e fomos deixar aos que eran maiores de idade a Conxemar, a unha exposición internacional de produtos relacionados co mar. E a nós, como eramos menores e esa exposición era para maiores, leváronnos ao Museo do Mar de Galicia en Vigo. Ensináronnos o esqueleto dun cachalote femia, que o tiñan colgado no teito. O cachalote femia morreu porque estaba embarazada e algo non saíu ben e saíu a costa e morreu ela mais o seu fillo. Despois ensináronnos os primeiros traxes de buzo e como funcionaban. Tamén vimos o primeiro submarino e vimos uns castros que estaban alí e un esqueleto humano que encontraron dentro dun dos castros. Leváronnos ao acuario e tiñan dous tiburóns pequenos e unha centola moi grande. Todos os peixes que tiñan eran da Ría de Vigo. Despois fomos comer a outro centro comercial en Vigo e unha vez xantamos viñemos rumbo a Burela. 

Foi unha excursión moi divertida e interesante, seria moi bo que se repetira con outros alumnos e que se fixesen mais excursión parecidas. 

Podedes acceder ao álbum de fotos AQUÍ. 

Carla Lavinia Martins Sanyang – 2º CB Servizos administrativos

Xornadas técnicas de soldadura robotizada no IES Perdouro

Durante o 5 e o 6 de xullo desenvólvense no taller de Mecanizado do IES Perdouro, as Xornadas Técnicas de soldadura robotizada con Road Show de Binzel. 

A petición da empresa Ángel Vizoso S.L., Binzel presenta no IES Perdouro un robot de soldadura con visión artificial capaz de detectar as pezas que ten que soldar, corrixir a traxectoria se hai algún erro, limpar o cabezal para que o cordón de soldadura quede uniforme etc. O operario non ten máis que introducir no programa unha serie de parámentros e o robot fai o resto. 

Á parte disto, conta con aspiración, o que protexe a saúde do soldador e das persoas que poidan estar ao seu redor, algo que será obrigatorio en breve en calquera posto de traballo no que se precise soldar. 

Contan tamén con robots imantados que permiten soldar amplas superficies en barcos ou instalacións nas que teñan que traballar en paredes verticais. 

As empresas ou persoas interesadas poden inscribirse no seguinte enlace da páxina https://angelvizoso.com/. 

O horario das xornadas é de 9:00 a 19:00h durante o martes 5 e o mércores 6 de xullo. 

Visita formativa do alumnado de Administración

O pasado 19 de novembro, os alumnos do Ciclo Medio de Xestión Administrativa e Ciclo Superior de Administración e Finanzas, saímos pola mañá cara a Narón. Iamos visitar a sede central de Pull and Bear. 

Cando chegamos, explicáronnos que alí se distribuía toda a roupa de muller para todo o mundo! O mesmo proceso da de home, faise desde a central de Madrid, pero que eles tamén recibían as devolucións, fosen de home ou de muller. Unha das partes que máis nos gustou foi ver como se organizaban e transportaban os paquetes mediante cintas transportadoras e como detectaban os posibles fallos que podían ter as caixas. Unha empregada explicounos o funcionamento dun robot que acababan de instalar e levounos a unha zona de almacén onde tiñan unha especie de guindastres que gardaban as caixas en estanterías enormes a unha velocidade incrible.
A mesma empregada explicounos como a empresa estaba concienciada coa reciclaxe e a Responsabilidade Social Corporativa.
Despois de ver o almacén, visitamos as oficinas centrais. Vimos toda a parte administrativa, modelos con roupa das futuras campañas, as salas de reunión que utilizan cos seus provedores... Visitamos tamén as áreas de descanso dos traballadores así como unha réplica da tenda de Pull and Bear a tamaño real, onde colocan os produtos de xeito adecuado para que despois en todas as tendas da cadea teñan a mesma imaxe corporativa.
Ao finalizar a visita, e despois de dedicarnos máis de dúas horas do seu tempo, fixéronnos un  obsequio que trouxemos encantados con nós.

Pola tarde, fomos cara a Santiago de Compostela, para ver a sede central do Parlamento de Galicia. Alí, despois de pasar un control como nos aeroportos, recibiunos a persoa encargada do noso grupo e foinos ensinando todo o Parlamento por dentro. A través dun par de vídeos, puidemos ver a construción e deseño do Parlamento. Visitamos tamén a súa biblioteca e vimos a cantidade de obras de arte que dentro están albergadas. Puidemos asistir desde a tribuna de público a unha sesión no hemiciclo, onde se discutía unha proposta de lei sobre a violencia de xénero e incluso o presidente do Parlamento, D. Miguel Santalices Vieira, saudou os alumnos do IES Perdouro. Foi moi interesante de ver xa que cousas que a diario vemos na televisión, ese día puidemos velas en directo.
Foi un día completo e ambas as dúas visitas foron de interese para a nosa formación.

Alumnado dos ciclos de Administración.

Visita do alumnado de Administración à Torre de Núñez e Quescrem

O pasado 5 de febreiro, o alumnado do ciclo medio de Xestión Administrativa e os de 1º de ciclo superior de Administración e Finanzas visitaron dúas empresas galegas: Torre de Núñez e Quescrem.

Na primeira foron recibidos pola Técnica de Calidade, quen lles ensinou todo o proceso de produción e organización da compañía, a cal suma xa máis de 50 anos de antigüidade. Para iso, tiveron que poñer batas, gorros, calzas e, incluso, máscaras que tapaban o nariz e a boca, o que reflicte unha gran preocupación pola hixiene e por manter o produto libre de axentes externos prexudiciais.

No percorrido polas instalacións viron como se producen os lacóns e os chourizos dende o primeiro paso ata o último. O procedemento de afumado chamou moito a súa atención xa que se realiza con madeira de carballo, apostando así polo aproveitamento de especies autóctonas. Tamén é salientable a gran capacidade de almacenamento da fábrica, destacando unha sala de grandes dimensións con xamóns esperando para ser enviados ás grandes superficies distribuidoras ou directamente aos clientes finais que os adquirían alí mesmo. Así mesmo, destacan tamén as innovadoras máquinas que empregan e que, a pesares de seren obxectos que favorecen a industrialización da marca, manteñen a base artesanal do produto.

Durante a visita, comprobaron que o persoal ten a súa labor diferenciada, é dicir, que se trata dunha empresa que opta pola especialización, na que cada persoa que forma parte do seu organigrama é especialista no traballo que realiza.

Pola tarde visitaron Quescrem, unha empresa fundada en 2006 que a día de hoxe está presente en toda España e no estranxeiro, como por exemplo, en China. Foron recibidos polo Técnico de Recursos Humanos, quen lles comentou aspectos referidos á historia da marca, todo o que a caracteriza e a fai especial, a presenza no mercado e a forma de traballar da empresa, onde o persoal realiza unha xornada de oito horas diarias, das cales dúas horas poden repartir como eles prefiran. Dende o punto de vista organizacional, trátase dunha compañía innovadora, pois seguen un modelo aberto onde todo está conectado, de forma que poida existir unha comunicación continua e moi fluída. Así mesmo, tratase dun lugar moi eficiente dende o punto de vista enerxético, pois aproveitan a calor que desprenden as máquinas da fábrica para manter a temperatura das oficinas e do laboratorio. 

A visita á fábrica foi realizada polo encargado da planta de produción. Para a mesma, tamén tiveron que empregar indumentaria estéril. Ademais de ver os distintos procedementos de envasado, comprobaron como se almacenan e refrixeran as mercadorías xa listas para a venda e clasificadas segundo o lugar ao que van ser enviadas. O que máis chamou a atención do alumnado foi o feito de que a materia prima da que parten para fabricar o seu queixo é a mazada, tamén coñecida como soro de manteiga. Esta posúe menor índice de graxas e, ademais, contribúen a reducir o seu desperdicio pois, noutros tempos, non houbera tido utilidade algunha.

É salientable tamén como Quescrem participa na formación dos novos profesionais do sector culinario coa organización de concursos que premian as mellores receitas elaboradas con produtos da súa fabricación. 

En xeral, ambas visitas foron moi interesantes e nas dúas recibiron produtos como xamón, queixo natural en crema e a súa variedade ChocoBó. 

María González Fernández de 1º CS de Administración e Finanzas.

Visita a cafés Candelas e Quescrem

O día 14 de novembro os alumnos/as de 4º da ESO de Tecnoloxía e Física achegámonos a Lugo para visitar a fábrica de Cafés Candelas e unha das factorías de Quescrem.

Chegamos a Cafés Candelas sobre as 11:00h, entramos por unha porta anexa e dirixímonos, con batas e gorros, á zona de almacenaxe dos grans, onde nos contaron que eran o produtor número 1 de café en España e que comezaban a exportar a Europa e Norteamérica. Nesa parte da visita foi tamén onde nos dixeron que existían dúas variedades de café diferentes e que os países produtores se situaban nas rexións intertropicais de África, Asia e Suramérica. Despois seguimos o proceso de forneado, embalaxe e distribución.

Ao acabar esta visita dirixímonos a un polígono industrial, un pouco máis afastado, onde se situaba Quescrem.

Esta empresa nace a partir dun proxecto de investigación universitaria e, por esa mesma razón, os seus traballadores teñen unha media de idade moi baixa, só 35 anos. Aquí leváronnos ata as oficinas, onde nos mostraron un vídeo sobre a empresa e os seus produtos, para despois baixar ata a cadea de produción e embalaxe; a mágoa da visita a esta empresa foi que estaban en período de limpeza e non tivemos a oportunidade de ver as máquinas en funcionamento.

Accede ao albúm de fotos aquí.

ANDRÉS PARDO PARRA
4º ESO

Viaxe a Asturias

Os alumnos de 3º da ESO do IES Perdouro fixemos o día 21 de novembro unha viaxe a Asturias para ver pola mañá a Central Leiteira Asturiana e pola tarde visitar o Museo da Minaría en Avilés.

Sobre as 10:00 horas chegamos a Granda, onde se atopa a Central Leiteira. Alí, uns guías recibíronnos para ensinarnos a fábrica. Entramos nunha sala onde nos puxeron unha bata e un gorro e guiáronnos pola factoría; o primeiro que nos ensinaron foi a descarga do leite (2.000.000 litros) procedente das granxas. Este leite pasa despois a uns tanques de hixenización e esterilización, alí extráese a manteiga e o resto pasa á uperización, para envasar o leite en distintos envases e saír pola parte de atrás da fábrica con destino aos comercios españois.

Sobre as 16:00 horas chegamos a Avilés para ver o Museo da Minaría de Asturias. O primeiro que fixemos foi descender nun ascensor ata unhas galerías, fomos camiñando por elas e vimos carbón nas paredes e unhas vías por onde van os vagóns; estaba todo moi escuro. Baixamos por unha rampa e leváronnos nun pequeno tren, despois ascendimos ao museo. Alí vimos ferramentas e imaxes da historia dos mineiros.

Chegamos a Burela ás 20:30 horas.

Accede ao albúm de fotos aquí.

Luis López Ramos

3º ESOA

Visita a Inditex

O pasado o venres 26 de xaneiro, alumnado do Ciclo Medio de Xestión Administrativa e do Ciclo Superior de Administración e Finanzas estivo  na sede central  de Inditex, en Arteixo.

Unha persoa encargada das relacións públicas da empresa atendeu o grupo de estudantes que estaba acompañado pola Xefa de Dpto e  a titora dun dos grupos. Aí tiveron a oportunidade de coñecer as actividades relativas ao deseño, fabricación,  loxística e distribución desta empresa punteira.  Explicoulles brevemente o funcionamento do grupo: as marcas, o modelo de negocio, a proxección internacional e do e-comercio.

Inditex es unha das maiores compañías de distribución de moda do mundo, con oito formatos comerciais (Zara, Pull & Bear, Massimo Dutti, Bershka, Stradivarius, Oysho, Zara Home y Uterqüe) e con 7.504 establecementos en 94 mercados dos cales 45 son mercados on-line. Traballan con 1.805 provedores e 6.959 fábricas en todo o mundo e ten contratado a 162.450 profesionais.

GOA foi a primeira marca de Amancio Ortega e abreu a primera fábrica en Sabón en 1977. De aí medrou esta multinacional que hoxe forma este xigante téxtil. A sede central do grupo en Arteixo agrupa Zara -incluido o negocio online- e Zara Home. Pull&Bear ten a súa sede en Narón e Massimo Dutti e Stradivarius están en Barcelona, con Bershka, Oysho e Uterqüe. En Arteixo hai máis de 4.000 traballadores de 140 nacionalidades diferentes. O inglés é a lingua oficial de comunicación da empresa.

A visita guiada iniciouse polas oficinas onde apostan por unha forma de traballo aberta. Hai tres secións: neno, cabaleiro e muller. Cada zona de traballo conta con deseñadores, comerciais para a compra aos provedores e con patronaxe. Levaron aos alumnos de IES Perdouro polos departamentos de creacción e confección, de fotografía, a área de venta on-line, de escaparatismo onde se crea o estilismo e imaxe dos escaparates das vindeiras temporadas. Logo os alumnos entraron nunha tenda piloto, a de Zara Home.
Continuou a visita pasando por un túnel que comunica a sede cunha das 11 fábricas de confección do grupo téxtil. Estas fábricas comunícanse a través de raíles manuaís e automáticos, 250 km en total, mediante códigos e lectores de códigos. Aí viron o centro de produción onde se realiza o corte, acabado e control de calidade dos artígos.
Finalmente rematou a visita no centro loxístico de distribución para todas as fábricas e tendas do grupo, uns 300.000 metros cadrados de instalacións. Contan con dous tipos de carruseles, uns que distribúen 10.000 unidades/hora e outros que teñen unha distribución aínda maior, 30.000 unidades/hora. A distribución faise de dúas maneiras. Se o transporte vai tardar menos de 30 horas en chegar ao seu destino, faise por camión, e senón por avión.

Como Inditex non ten transporte propio, subcontrata outras empresas. Dúas veces por semana, cada tenda do grupo Inditex recibe dous camións de mercancía.
Dende que a mercancía sale dos centros de distribución ata que chega á tenda, o tempo máximo que pasa son 50 horas. Normalmente sale o camión ata a plataforma do país donde vai levar a mercancía e unha vez aí, contratan camións máis pequenos que podan entrar nas cidades a deixar a mercancía.

Foi unha visita de grande interese para o alumnado do Ciclo de Administación onde puideron ver o funcionamento dunha das empresas máis importantes do mundo e a impresionante plataforma loxística que mellor funciona en España.

Artigo de interese: El interior de Zara: un viaje a la sede central de Inditex en Arteixo

MetalMadrid

Alumnos dos Ciclos Medios de Mecanizado e Instalacións en Telecomunicación están en Madrid na 10ª edición de MetalMadrid, feira centrada no sector industrial: Máquina ferramenta por arranque e deformación, mecanizado, robótica, metroloxía e control de calidade, automatización dos sistemas de produción, pezas, componentes e accesorios, soldadura e oxicorte, equipos eléctricos e electrónicos.

Visita formativa a Dielectro

Un grupo de 16 alumnos dos CF de Administración visitou a PLA -plataforma loxística de Arteixo- de Dielectro Industrial con máis de 100.000 referencias en material de instalacións eléctricas e climatización. Aí chegan as mercancías dos provedores europeos na súa maioría para a súa posterior distribución e reparto.

Foi a ocasión para o noso alumnado de coñecer de primeira man un sistema automatizado de almacenaxe pensado para minimizar o espacio utilizado e obter un máis alto nivel de eficiencia e produtividade na preparación de pedidos.

A plataforma, con máis de 15.000 m2 e operativa as 24 horas do día, conta con un sistema de loxística de última xeración, uno dos máis avanzados de Europa: dúas zonas automatizadas e unha zona de almacenamemto clásico con operarios. Son 10.000 m2 de almacén e, uns 3.000 m2 de espazo aberto son para a descarga de mercancías antes da súa colocación no almacén. 

Teñen un mini-load, (80m. de largo x 16m. de ancho x 12m. de alto), un almacén automático con  estructura de columna doble e tres carousels para o desprazamento das mercancías en cargas lixeiras.
O mini-load recolle e deposita as cargas individuais en caixas de almacenamento dentro dos estantes. Hai unhas 16.500 caixas de 80x60x20 cm. onde se almacenan artigos de tamaño mediano. Os robots-carousel optimizan o espazo e poñen as caixas que máis saen adiante e as que menos atrás.  

Teñen outros catro almacéns verticais de dúas columnas para pezas de pequena dimensión con uns 10.000 artigos. A propia máquina indícalle ao operario onde ten de coller a peza do pedido e fai un inventario contínuo.

No campo da loxística, a preparación de pedidos é o proceso de recollida de material extraendo unidades ou conxuntos empaquetados dunha unidade de empaquetado superior que conten máis unidades que as extraídas. En xeral, o proceso no que se recolle material abrindo unha unidade de empaquetado feito por operarios totalmente automático, rápido e seguro con produtividade elevada.

Na estación de saída, tres operarios a dous tornos recollen das caixas os artigos do pedido, esto é o que chaman o proceso de separación. Fan ata 4.000 liñas de separación ao día.

Dixéronnos que as máquinas fan o 70% do proceso.

Unha visita de moito proveito onde fumos moi moi ben recibidos e onde nos contestaron moi amablemente a todas as nosas preguntas.

Accede ás fotografías no noso albúm.

Dielectro 201

Ruta xeolóxica por Burela

O alumnado de 1º e 2º de Bach. participou no programa de divulgación xeolóxica "Descubrindo as rochas que pisas". O pasado venres 11 de novembro, o xeólogo, Francisco Canosa, guiou o grupo de estudantes por dúas rutas que permiten coñecer a xeoloxía da costa: a primeira que sae do porto e finaliza no Perdouro, e a outra que vai dende o porto de Burela ata a praia da Marosa. 

Recollemos do seu blogue Rutas xeolóxicas de Galicia as caraterísticas de ambas rutas.

A nivel xeolóxico falar de Burela é falar dunha das xoias da xeoloxía galega, de feito conta cun “geosite”, é dicir, un lugar de interese xeolóxico a nivel internacional. Isto débese principalmente a que na contorna de Burela atopamos unha ampla variedade de rochas (cuarcitas, granitos, pegmatitas e conglomerados) e estruturas xeolóxicas (pregues e fallas), que nalgúns casos son moi singulares e excepcionais. Para descubrir todos estes tesouros xeolóxicos propóñense dúas xeorutas, unha polas inmediacións do porto e a outra polo paseo marítimo da Marosa. Estas rutas xeolóxicas polo concello de Burela permitirán aos visitantes ver todo con ollos de xeólogo, e iso supón facer unha viaxe no tempo de moitos millóns de anos, e é que en Burela as rochas teñen moitas historias que contar. Descúbreas con nós!!!

XEORUTA BURELA - O PERDOURO

Esta xeoruta permite descubrir o conxunto de pregues mellor conservado de toda Galicia, unhas estruturas xeolóxicas de máis de 300 millóns de anos de antigüidade, así como os fermosos arcos naturais do Castrelo, que contrastan coas materiais da chamada rasa cantábrica, superficie achairada que comeza en Burela e que se estende por boa parte do Cantábrico.

Duración: 3 h. Distancia: 3 km. Dificultade: Baixa

XEORUTA BURELA - A MAROSA

Nesta xeoruta as rochas graníticas son sen dúbida algunha as protagonistas, un percorrido litoral que permitirá descubrir a orixe das formas tan caprichosas que adquiren estas rochas co paso dos anos. Do mesmo xeito observaranse as pegmatitas, unhas rochas que en ocasións son portadoras de minerais semipreciosos e que mostran un aspecto moi chamativo.

Duración: 3 h. Distancia: 6 km. Dificultade: Baixa

Recollemos a seguinte información descriptiva das rutas do xornal El Progreso

Ao comezo da ruta, o xeólogo, Francisco Canosa, explicoulles aos estudantes que o obxectivo da ruta é facer entender "a linguaxe das rochas, que teñen moitas cousas que contarnos". 

DATOS. Durante a visita vanse achegando diversos datos xeolóxicos. O primeiro dato que nos sinalan é que a idade da Terra é de 4.600 millóns de anos, e que as rochas máis antigas que podemos atopar agora están en Canadá.

Centrando os datos en Burela, Canosa explica que "a historia xeolóxica de Burela empeza fai 500 millóns de anos. E o que hoxe coñecemos por Burela, as súas orixes estarían no Polo sur". Na seguinte parte da ruta, Canosa indica que "fai 350 millóns de anos en Burela poderiamos atopar montañas que terían a altura do Himalaya". Con todo, sinala que "cando se formaron os Alpes, a zona xeolóxica onde se atopa Galicia, rexuveneceuse e quedouse coa altura que ten hoxe en día".

ROCHAS. Durante a ruta, tamén ensina a distinguir os tipos de minerais que forman as rochas. Se por exemplo, observamos unha cor avermellada, estariamos a ver granito; se a cor é máis grisáceo, sería cuarzo; se vemos rochas con trazos brancos, apreciariamos moscovitas, e se son negros, biotipas. Nesta parte da visita, tamén aprenden que a costa de Burela presenta minerais de valor económico. Trátase das pegmatitas.

Estes minerais, que se poden ter varias cores, caracterízanse polo seu gran tamaño e son moi valorados no ámbito da xoiería. Hai outros minerais, coñecidos como aplitas, que son moi numerosos na costa, pero polo seu menor tamaño teñen menos valor económico.

A última parte do percorrido, xa na Marosa, permítenos coñecer outro fenómeno xeolóxico. Trátase das fisuras producidas polo choque de fallas. Neste caso, as fisuras que se aprecian na zona, enchéronse con cuarzo, un material máis resistente á erosión, e que permite observar sobre as rochas liñas de cuarzo. Esta zona de Burela, sinala Francisco Canosa para asombro de moitos, "foi declarada en 1983 lugar de interese xeolóxico". 

 

O Perdouro. A ruta que vai de Burela ata O Perdouro permítenos coñecer tres tipos de rochas segundo a súa composición. Por unha banda falamos de rochas magmáticas, como o granito; rochas sedimentarias, producidas pola erosión de materiais e para rematar, rochas metamórficas, creadas pola fusión de diversos materiais.

Ao comezo da ruta dáselles xa unha información polo menos sorprendente, porque segundo Francisco Canosa, "a lousa e a cuarcita orixínanse por un proceso de metamorfose. Nas súas orixes a lousa foron lodos, e a cuarcita areas de praia". Seguindo o percorrido da ruta, as seguintes paradas permítenlles coñecer polo exterior das rochas a súa resistencia, porque as rochas poden ser dáctiles ou fráxiles, segundo se rompen pola calor ou polo tacto.

Centrándose nos pliegues das rochas, ensínanse novos conceptos das rochas segundo a forma que presenten estas. Así, vese que hai pliegues antiformes, que presentan a curvatura cara arriba; pliegues sinformes se a curvatura está para abaixo, e se se centran en saber a orde dos materiais que forman as rochas, para saber se son máis antigos ou novos, veriamos rochas anticlinais ou sinclinais.

Na última parte da ruta, pasando os arcos do Perdouro, vemos un novo proceso de substitución. Neste caso é o depósito de material que se produciu pola erosión dos materiais de zonas próximas, como os do Monte Castelo. Estes depósitos, cunha antigüidade dun millón de anos, producen unha estrutura xeolóxica distinta que favorece a presenza de arbustos.

Coa ruta apunto de finalizar, aprendemos a medir as rochas. Neste caso cun compás poderemos saber a desviación da rocha, e tamén é posible medir a inclinación das mesmas cun inclinómetro.

Visita do tecido empresarial de Lugo

O xoves 10 de novembro, o alumnado de 4º ESO viaxou ao polígono do Ceao en Lugo para facer varias visitas interesantes para coñecer de primeira man un completo proceso de produción.

Primeiro visitaron Cafés Candelas, unha empresa familiar con máis de 40 anos de experiencia no sector do café. Contáronlles que foron os irmáns Ramón e Manuel Alonso Alonso os que fundaron o tostador que hoxe dirixen os fillos Enrique y Ramón. Faláronlles do crecemento progresivo e sustentable da empresa, evolucionando de pequena empresa familiar a compañía con implantación internacional na distribución alimentaria e hostaleira. É unha compañía líder como torradora e fornecedora de café no sector da hostalaría. Viron os mecanismos de torrefacción e envado automático por cintas transportadoras. Ao finalizar a visita, o grupo recibiu unha bolsa con agasallos e produtos da marca de café.

A segunda visita foi xa na rotativa do xornal El  Progreso. Aí coñeceron a historia do xornal lider da provincia. Fundado en 1908 por Purificación de Cora e Más Villafuerte está hoxe nas mans dos herdeiros. Explicáronlle como se fai un xornal dende o momento en que se produce a noticia ata o xornal en formato papel. (traballo de redación, noticias, eleción da portada, nº de páxinas, fabricación, papel, tinta, cor, planchas de impresión, distribución,  etc...). Cada alumno foise co xornal do día asi como outros agasallos.

Xa pola tarde en Castro Riberas de Lea o alumnado xunto ás súas profesoras de Tecnoloxía e Física, coñeceron unha empresa innovadora e moi nova, Quescrem. Visitaron as instalacións da fábrica de queixo para coñecer a súa infraestructura industrial. Tras unha breve presentación da empresa, os escolares baixaron á planta para ver o desenrolo do proceso de fabricación. A continuación, realizaron un completo percorrido por toda a fábrica do almacén ata o laboratorio I+D. Para finalizar a visita, puideron probar produtos Quescrem, entre os que se atopaba o ChocoBó, dirixido precisamente ao público máis novo, Quescrem Algas e Quescrem Natural, entre outros. Entregáronlles tamén unha bolsa cunha tarrina do ChocoBó.

Unha xornada completísima e chea de agasallos máis non houbo tempo para sacar fotos de grupo!!!!

Aquí algunhas fotos da visita pola rotativa. 

Visita formativa en Navantia

Os alumnos do Ciclo Medio de Mecanizado e de FP Básica viaxaron ata Ferrol para visitar  Navantia, un estaleiro de construción naval militar.

Os alumnos puideron ver o funcionamentos dos tornos, fresadoras e outras maquinarias que empregan para mecanizar as grandes pezas que se necesitan para construír embarcacións. Logo, percorreron en autobús distintos diques de construción e reparación. Explicáronlles como se constrúe un barco por compartimentos, grandes cubos, que se dedican a cociña, a camarotes, a comedor, etc e que se van colocando na embarcación no dique de construción. Unha visita interesante e impresionante pola amplitude das súas instalacións.

Xornada de sensibilización ao autoemprego

Alumnos dos Ciclos Formativos do IES Perdouro participaron no pasado xoves 12 de novembro nunha xornada de sensibilización sobre autoemprego promovida pola Fundación Cel –Iniciativas por Lugo en colaboración coa Diputación Provincial. 

O obxectivo principal deste obradoiro foi o de  “facer ver que o traballo por conta propia é unha saída profesional máis á que poden optar os estudantes de FP ao acabar o periodo formativo, fomentando principalmente o espírito emprendedor entre a comunidade educativa e dando unha visión cercana e atractiva”. Transmitirlles que nesta aventura do emprendemento, non están sos, e que entidades como a Fundación Cel podrán apoiar a posta en marcha dun proxecto, así como ofrecer un espacio físico e asesoramento para a súa consolidación empresarial.

Por outra parte, o grupo de alumnos puideron visitar as instalacións da CEL e ver o funcionamento do viveiro de empresas, así como interactuar cos novos empresarios.