Despois de 2 horas de bus chegamos á Domus, o primero que fixemos foi subir ao taller e poñer unha bata coa que nos sentimos como verdadeiros científicos. Despois unha muller moi amable e simpática (Margot) comezou a explicarnos os instrumentos que iamos utilizar. O que primero fixemos foi practicar coa pipeta e auga xa que tiñamos que utilizar cantidades moi pequenas e necesitabamos práctica.
Xa ben equipados, cos instrumentos ben identificados e coa práctica realizada puidemos dar comezo á actividade. A instrutora comezou a contarnos unha historia para entender de onde se podía extraer o ADN que se utiliza nas PCR. A continuación comezou a verdadera práctica, empezamos a mesturar o ADN cos cebadores, os nucleótidos e a encima Polimerasa. Cando terminamos de mesturalo todo metímolo na máquina da PCR na que se someten as mostras a unha gran temperatura que provoca que o ADN se multiplique.
Nese momento fixemos un descanso xa que o proceso de duplicación do ADN tarda aproximadamente 30 min e estivemos probando todas as actividades que proporciona a Domus.
E por último, realizamos o proceso da electroforese que separa os fragmentos de ADN por tamaño e permite observalos baixo una luz ultravioleta en forma de bandas no xel.
Canto a visita ao CETEEC, a primeira zona que visitamos foi o Túnel de Vento. Alí explicáronnos como se
utiliza esta instalación para estudar o comportamento do vento sobre
diferentes estruturas. O funcionamento é o seguinte: o aire é impulsado por
uns grandes ventiladores e percorre o interior do túnel a unha velocidade
controlada. Desta maneira, pódense colocar modelos de edificios, pontes ou
outras estruturas no seu interior e comprobar como lles afecta o vento. Así,
os investigadores poden estudar aspectos como a estabilidade dunha construción
ou a forza que exerce o aire sobre ela sen necesidade de poñer a proba
directamente unha estrutura real.
Despois leváronnos á Dársena de Portos e Costas, onde nos explicaron o seu
funcionamento mentres nós estabamos dentro da propia instalación. A dársena
estaba baleira de auga nese momento, pero no seu interior había unha gran
cantidade de rochas colocadas de maneira que simulaban unha praia ou unha zona
costeira. Esta instalación permite reproducir diferentes condicións do mar
para estudar como afectan ás zonas costeiras. Nela pódense simular os efectos
da marea, controlando o movemento da auga. Deste xeito, os investigadores
poden realizar ensaios de diques e instalacións portuarias fronte á acción das
ondas mariñas, comprobando como soportan a forza da auga e se o seu deseño é
adecuado. Isto permite detectar posibles problemas e estudar diferentes
solucións antes de construír estas estruturas na realidade. Aínda que durante
a nosa visita a dársena estaba sen auga, resultou interesante poder estar
dentro dela e observar o espazo preparado para realizar este tipo de
experimentos.
A seguinte instalación que visitamos foi o Laboratorio de Construción, unha
instalación que nos sorprendeu tanto polas súas grandes dimensións como pola
cantidade de maquinaria que alberga. Un dos detalles que máis nos chamou a
atención foron uns buratos no chan, que estaban cubertos por placas metálicas.
Estes buratos permiten colocar diferentes soportes e elementos de suxeición
para realizar ensaios. Ademais, hai buratos similares presentes nunha das
paredes, o que facilitaría a realización de probas en diferentes posicións.
Tamén nos ensinaron unha das máquinas máis importantes do laboratorio, a
prensa MTS. Esta utilízase para realizar ensaios sobre diferentes materiais e
estruturas, aplicándolles forza para comprobar como responden ante ela. Deste
xeito, pódese estudar canto peso ou forza é capaz de soportar un elemento
antes de que se deforme ou deixe de comportarse correctamente. Aínda que nos
explicaron o seu funcionamento, nese momento non puidemos ver unha
demostración da máquina en funcionamento. A pesar diso, foi interesante
coñecer as posibilidades que ofrece un equipo destas dimensións para
investigar e comprobar a resistencia dos materiais utilizados na
construción.
Por último, visitamos o Laboratorio de Hidráulica, onde nos ensinaron o Modelo
integral do ciclo urbano da auga da Coruña (MEDUSA) e a Plataforma Científica
para Ensaios de Escorrentía Urbana. Primeiro explicáronnos o funcionamento do
MEDUSA, un modelo que representa de maneira simplificada como se xestiona a
auga na cidade da Coruña. O sistema comeza coa auga procedente dunha zona de
captación, que pasa por un encoro e posteriormente por unha estación de
tratamento de auga potable. Despois, a auga distribúese mediante unha rede de
tubaxes cara a diferentes zonas da cidade. O modelo conta con numerosos
sensores que permiten controlar aspectos como o caudal e o consumo.
Finalmente, a auga chega ao sistema de depuración e pode volver circular polo
modelo. Deste xeito, os investigadores poden probar diferentes situacións e
comprobar como respondería a rede de abastecemento ante problemas como fugas
ou cambios na demanda de auga.
A continuación, vimos a Plataforma Científica para Ensaios de Escorrentía
Urbana, que representa unha pequena zona urbana formada por rúas e sumidoiros.
Esta instalación permite estudar o que sucede coa auga da choiva cando cae
sobre unha cidade. Para iso, conta cun sistema capaz de producir choiva
artificial con diferentes intensidades. A auga cae sobre a superficie,
desprázase polas rúas seguindo a súa pendente e acaba chegando aos sumidoiros,
polo que os investigadores poden observar como se comporta e como se evacúa.
Ademais, ofrecéronnos a oportunidade de experimentar en primeira persoa o
funcionamento deste sistema. Un pequeno grupo puido colocarse debaixo da
choiva artificial cun paraugas, mentres se realizaba a demostración. Foi unha
maneira curiosa e divertida de comprobar directamente como funciona a
instalación e de vivir parte do experimento desde dentro.
Con esta visita ao Laboratorio de Hidráulica rematamos o percorrido polo
CITEEC, despois de coñecer diferentes instalacións e comprobar como a
investigación permite estudar situacións que se producen na vida real antes de
aplicalas a gran escala.
Accede ao album de fotos
aquí
.png)
.png)
.png)
