Un curso de radio cheo de voces, aprendizaxes e experiencias compartidas
Ao longo do curso 2025-2026, o programa de radio escolar consolidouse como un espazo de aprendizaxe, divulgación e encontro no que alumnado e profesorado tiveron a oportunidade de coñecer de primeira man a realidade que nos rodea a través de entrevistas, reportaxes e seccións elaboradas integramente polo alumnado.
Desde outubro ata xuño emitíronse un total de 34 programas, nos que participaron máis de 77 persoas convidadas procedentes de ámbitos moi diversos. A lingua e a literatura galegas estiveron moi presentes con programas dedicados ao Día Europeo das Linguas, ao Día da Tradución, ao Día das Escritoras, aos neofalantes, ás Letras Galegas, á toponimia ou ao patrimonio da Mariña. Polos nosos micrófonos pasaron escritoras, investigadores, profesionais da tradución, docentes, representantes da Real Academia Galega e persoas comprometidas coa promoción da nosa lingua e cultura.
A ciencia tamén ocupou un lugar destacado. Coñecemos o traballo de neurocientíficas, estatísticas, biólogas, investigadoras e divulgadoras. Radio Saúde Burela foi outro dos grandes eixes da tempada. Dedicamos numerosos espazos a promover hábitos de vida saudables e a resolver dúbidas sobre temas como a hixiene postural, a saúde afectivo-sexual, o coidado da pel, a saúde visual, as vacinas, as alerxias, o autismo ou a síndrome de Tourette, contando coa colaboración de médicos, enfermeiras, farmacéuticos, psicólogos, ópticos e outros profesionais sanitarios.
Ao longo do curso tamén viaxamos a través da historia, da música, do cine, do patrimonio e das tradicións. Achegámonos á historia de Sargadelos, descubrimos Mondoñedo e o patrimonio da Mariña, celebramos os Premios Mestre Mateo, o Día do Libro e o aniversario de CUAC FM, coñecemos diferentes oficios tradicionais e entrevistamos persoas vinculadas ao ámbito educativo, artístico e cultural.
Como é habitual, cada programa completouse con seccións fixas elaboradas polo alumnado, como A noticia do día, Pílulas das Ciencias, A palabra do mes, O corpo fala, Mulleres na historia, Micro Aberto e outras colaboracións especiais que enriqueceron cada emisión e permitiron ao alumnado desenvolver competencias comunicativas, dixitais e de traballo en equipo.
O curso rematou cunha programación centrada na oferta educativa do centro, na celebración do 40 aniversario do Hospital Público da Mariña, na Revista Galega de Educación e nun emotivo programa dedicado á xubilación de Neves, poñendo o broche final a unha tempada intensa e chea de aprendizaxes.
Neste curso, o equipo da radio escolar seguiu medrando coa incorporación de novo alumnado e profesorado. Nas sesións da tarde sumáronse estudantes de 1º e 2º da ESO: Xabi, Eloi, Eric, Eneko, Gael, Nadia, Carla, Dylan e Hugo, que participaron activamente na elaboración dos programas.
Pola súa banda, nas gravacións das mañás colaborou alumnado de PDC, Oratoria, Anatomía Aplicada e dos ciclos de Formación Profesional Básica, de grao medio e de grao superior da familia profesional de Administración, contribuíndo especialmente á preparación e realización das entrevistas.
O equipo docente tamén se ampliou coa incorporación de María, Yoni e Dani, cuxa participación reforzou a organización e o desenvolvemento do proxecto radiofónico ao longo do curso.
Grazas ao compromiso do alumnado, do profesorado responsable, de Lucía Rivas, a nosa fotógrafa, e de todas as persoas convidadas que aceptaron compartir o seu tempo e os seus coñecementos cos nosos micrófonos, Proxecto Neo continúa consolidándose como un proxecto educativo de referencia, aberto á comunidade e comprometido coa nosa lingua, a divulgación, a cultura e a educación.
Karina Parga Chao
Rematamos a 15ª edición de Proxecto Neo cun xantar de confraternidade entre os integrantes de Masa Coral Modelo Burela.
Aquí están as fotos da entrega de diplomas aos colaboradores de Proxecto Neo 25-26. (faltan o alumnado de Anatomía e dos ciclos)
A súa iniciativa de propoñer esta viaxe a un espazo protexido, como é un Parque Nacional, pareceunos moi axeitada e iniciamos os preparativos para a visita. Para entrar nas illas cómpre ter unha autorización da Xunta de Galicia, a cal é nomitativa, polo que teñen que constar, a nivel individual, os datos de cada persoa que quere ir ás Cíes. Sen estes permisos nin sequera se poden comprar os billetes do barco que realiza o transporte de viaxeiros.
Chegar ao porto de Vigo leva 3 horas desde Burela. Cando chegamos alí, o tempo era espléndido, aínda que na Mariña, e en gran parte do traxecto, estivo nubrado.
O percorrido no barco dura uns 45 minutos e, malia que non o parecía, ía vento e o catamarán movíase bastante sobre as ondas, xusto antes de chegar á illa. Desembarcamos e comezamos a nosa ruta guiados por Daniel Irimia, profesor de Bioloxía e Xeoloxía. O camiño iníciase na illa Norte ou de Monteagudo, que é a onde chega o barco de pasaxeiros e de aí partimos, pasando polo espigón, a lagoa e a praia para dirixirnos ao faro, xa na illa do Medio ou do Faro. Chegamos ata o Faro da Porta, pero como a mediodía as temperaturas xa eran moi altas, decidimos volver cara á praia de Rodas, tamén debido a que a marea xa estaba subindo e despois podía ser difícil atravesar o espigón e bordear a lagoa.
Daniel foinos explicando datos sobre a fauna e flora da illa. Desde o barco vimos golfiños e xa na illa observamos peixes besta ("ballesta"), badeixas, muxes...; distintos tipos de algas, plantas e aves. É incrible o atrevidas que son as gaivotas nas Cíes. Mentres estabamos na praia, foron capaces de abrir a cremalleira dalgunha mochila e sacar unha friameira con comida do seu interior. Ademais, atrevéronse con algunha prenda de roupa e algunha toalla. Está prohibido darlles de comer. Do contrario, collen aínda máis confianza e xa non as quitas de riba. Pero todo isto, ao final, fíxonos rir e foron anécdotas que levamos para contar.
Chegou o momento da viaxe de volta, despois de coñecer un espazo protexido e dunha agradable tarde de praia. Embarcamos rumbo a Vigo, onde nos esperaba o noso querido condutor, José Luis, para coller o autobús. Aínda quedaban varias horas para chegar a Burela.
Desde a organización de Aulas limpas, estamos moi satisfeitos da constancia que demostrastes vós e todos os grupos que estiveron tamén a moi bo nivel para manter as aulas máis limpas e ordenadas. O instituto é, durante bastantes horas ao día, o lugar no que traballades e convivides e vós sodes quen o podedes facer un espazo agradable. A orde e a limpeza tamén axudan ao benestar.
Moitos parabéns!
Podedes acceder a máis imaxes AQUÍ.
Miruca Parga Valiña - Vicedirectora
Esta experiencia axuda a derrubar prexuízos e a desestigmatizar a enfermidade. Compartir xuntos peiteados, conversas e sorrisos fixo visible que, máis alá dos esquecementos, permanece a auténtica persoa, co seu mundo e a súa importante historia. Vémolo no brillo dos seus ollos, na confianza que nace cando hai agarimo e respecto. Aprendemos que a beleza tamén é acompañar, escoitar e dar seguridade.
Para o noso alumnado, traballar neste contorno real convértese nunha lección inesquecible de educación e de vida. Practicaron técnicas, si, pero sobre todo practicaron valores: empatía, paciencia, responsabilidade, acompañamento, coidado e atención. Levamos connosco a certeza de que educar é, ao mesmo tempo, saber facer, ser e saber estar. Agardamos repetir moi pronto, seguirmos aprendendo xuntos e construír unha comunidade onde o cariño e a escoita sexa sempre o primeiro coidado que se lles ofrece ás persoas.
É unha sorte contar con xente coma vós, persoas que decidiron unirse para crear algo tan importante: un lugar de apoio, comprensión e acompañamento para quen máis o necesita. Nun momento no que moitas persoas non poden pedir axuda por si mesmas, estades aí, ofrecendo o voso tempo para comprendelos aportando valores: cariño, paciencia e humanidade.
O voso compromiso fai máis levadeiro un camiño moi difícil para moitas familias. Grazas por crear ese ambiente de proximidade e solidariedade, por non deixar a ninguén só e perdido no camiño da vida, facendo fronte ao “síndrome do coidador queimado”, dando espazo e pulmóns para un respiro familiar e por demostrar cada día que a empatía e os coidados poden cambiar e mellorar vidas, alongalas e dignificalas.
Grazas de corazón por todo o ben que facedes. Queremos dedicar esta frase á vosa asociación, quen de conseguir transformar un sentimento colectivo nunha gran acción:
“Estou convencida de que os heroes máis grandes son aqueles que cumpren cos seus deberes diarios e os seus asuntos mentres o mundo xira ao seu redor. Creo que os sentimentos se perden nas palabras. Todos deberían ser transformados en accións, en accións que traian resultados”. — Florence Nightingale. (Nai da Enfermería)
Podedes acceder a máis imaxes AQUÍ.
Javier Rouco Martínez - Xefe de departamento de Imaxe persoal
Este curso a feira de tecnoloxía, ciencia e arte celebrouse o luns 1 de xuño e nela participaron 28 proxectos de diferentes departamentos. Nesta presentación expóñense a maior parte dos vosos traballos:
Organizados por grupos, debiamos darlle resposta a un reto. O mesmo podía ser escollido por nós, pasando diferentes fases: dende analizar a zona para avaliar cales son as necesidades principais do noso día a día, ata organizar chuvias de ideas para descubrir as solucións posíbeis. Todo isto é moito máis difícil do que parece. Escoller o reto xa non é tarefa fácil. Existen unha infinidade de temas que poderiamos abordar, mais foi iso mesmo o que nos levou a ter un total de tres retos completamente diferentes na nosa clase, para os que encontramos solucións creativas e viables. O proceso foi longo, pero divertido. Vivimos de preto o traballo en equipo, esencial dende o primeiro momento. Coñecer os compañeiros é importante para saber como funcionamos cada un no traballo. Saber adaptarse, ter empatía, escoitar ao do lado, saber comunicar a túa opinión... Todo iso foi o noso pan de cada luns pola tarde. O proxecto foi algo moi positivo. Posibilitou unha maneira de soltarnos, de coñecernos, de pensar con creatividade, de abrir a mente a novas ideas (incluso as que nos poderían parecer máis aloucadas).
Persoalmente, a min encantoume o traballo. Ao principio estaba moi perdida. Moitas opcións, non sabes ben que escoller, non sabes como vas traballar co equipo... Mais todo despois flúe como debe. Segundo iamos tendo máis clara a idea, mellor o pasabamos investigando e propoñendo ideas. Riamos moito, dende o principio ata a fin. E considero que é unha das cousas máis relevantes para desfrutar o proceso: saber rir cos compañeiros, amenizar o ambiente.
Levamos a cabo dende cuestionarios nos que participaron algúns dos nosos compañeiros dos ciclos administrativos básico e medio, ata un vídeo chamado “elevator pitch” co que non o puidemos pasar mellor. Foi toda unha aventura. O día que o gravamos non tivemos máis opción que quitar a vergoña. Falar á cámara non é doado, e moito menos con xente ao redor, xa que nós situámolo na estación de buses de Burela.
O noso reto consistiu en darlle resposta a unha necesidade moi presente na comarca: a pouca flexibilidade de medios e horarios de transporte que existen na Mariña. Pasamos por moitas opcións, a cada cal máis divertida, como instalar “tuc-tucs” como medio de transporte habitual. Mais a mellor idea á que chegamos foi a creación dunha páxina web, onde os usuarios encontraran toda a información de forma rápida e sinxela sobre os horarios de bus e tren, anuncios de bla-bla car, información sobre puntos de aluguer de bicicletas, etc.
O vídeo enfocámolo dende unha perspectiva dinámica e comercial. O proceso foi moi gracioso porque algunhas escenas foron difíciles de gravar (con numerosos ataques de risa), pero tamén vivimos a maxia do directo, podendo subirnos a un autobús grazas á amabilidade dun dos condutores que alí aparcaban. Sen dúbida, foi unha experiencia que nos uniu máis como grupo.
Deste proxecto levo os recordos e as anécdotas. Ao final, non deixa de ser unha práctica para o noso futuro laboral. É esencial saber traballar en equipo, saber falar en público e defender a nosa idea, ademais de pensar con creatividade, sen medo a comunicar a nosa opinión. Pero tamén é importante respectar as ideas dos demais, escoitar ao próximo, decidir en consenso co grupo. Aprendes a adaptarte á situación, a ter actitude, a propoñer e levar a cabo ideas (a base de proba-error, vendo cales funcionan e cales non) e, sobre todo, a desfrutar o proceso de aprendizaxe, que é o motor principal dunha boa educación.
Podedes ver algúns dos "elevator pitch" neste reel e tamén neste.
Lucía López López - 1º CS AF
.png)
A Revista Galega de Educación continúa a súa xeira de presentacións arredor do número 93, dedicado á radio escolar, cunha programación que levará o proxecto a diferentes puntos do país nas vindeiras semanas.
O luns 25 de maio, ás 17:00 h, o Salón de Plenos do Concello de Burela acollerá a presentación baixo o lema “A radio escolar”, coa participación de integrantes do Proxecto Neo, representantes do Consello Editorial e alumnado do IES Perdouro, que será tamén o encargado de moderar e dinamizar o acto.
Este ano a autora homenaxeada no Día das Letras é Begoña Caamaño, xornalista, escritora e activista comprometida co galego, co feminismo e con moitas causas que apoiou con firmeza e convicción.
Deixounos programas de radio nos que fomentou o coñecemento e a defensa da cultura galega; legounos novelas como Circe ou o pracer do azul e Morgana en Esmelle, nas que revisou personaxes femininos míticos e literarios dándolles unha proxección innovadora e, sobre todo, herdamos reflexións que continúan estando de actualidade.
Esta exposición foi elaborada polo alumnado de 3º ESO PDC coa colaboración de César Veiga, coordinador do EDLG, que realizou unha escolma con reflexións extraídas de entrevistas que lle realizaron a Begoña Caamaño en distintos medios. Dar a coñecer o seu pensamento é a nosa pequena homenaxe.
Onte celebraron a súa graduación nunha cea agradable na que coidaron os preparativos. Todos tiñamos un sobre con propostas para facer retos e xogar en grupo. Escoitamos discursos sinceros e emotivos que nos chegaron ao corazón. Ademais disto, repartiron diplomas personalizados a todo o profesorado usando a ironía. Aos profes fíxolles moita ilusión.
Despois da cea, celebramos a graduación con música e baile e hoxe pola mañá estaban puntualmente a primeira hora para dar recibimento aos compañeiros e docentes que intentaban esquivar as súas bromas como podían.
Aínda nos imos ver nestes días, ata que chegue a PAU, pero que saibades que estas portas sempre seguirán abertas para vós, para que veñades contarnos como vos vai, porque nos gustará saber que ides cumprindo os vosos soños.
Moitos parabéns por rematar esta etapa e moita sorte para o futuro!
AQUÍ tedes algunhas imaxes da xornada de onte.
O obxectivo deste certame é fomentar vocacións científicas e tecnolóxicas, desenvolvendo o pensamento lóxico, a creatividade e a resolución de problemas mediante a robótica educativa. Cando chegamos ao polideportivo onde se ía celebrar a olimpíada déronnos unha tarxeta de acreditación aos líderes de cada grupo, xunto cun horario onde poñía a que hora ía ser cada reto e contra quen competiamos. Estivemos uns minutos probando e dándolle os últimos retoques a cada programa antes do comezo das probas para que saísen o mellor posible.
O primeiro reto que realizamos foi a proba do "Varredor", a cal consistía en expulsar catro latas colocadas nunha plataforma circular elevada. Esta primeira proba non nos saíu moi ben en xeral, xa que foi a que menos tempo tivemos para practicar.
A seguinte proba foi o "Segue-liñas", que consistía en que o robot seguise unha liña e esquivase unhas latas colocadas no medio do circuíto. Neste reto, a maioría dos grupos conseguimos bos resultados, aínda que non o suficientemente bos coma para conseguir un premio.
Por último, realizamos unha quenda de roldas eliminatorias do reto do "Sumo", no cal tiñamos que expulsar o robot inimigo dun ring, conseguindo chegar un dos equipos a cuartos de final.
Ao finalizar a competición, fomos ao auditorio da Escola Politécnica de Ferrol, onde nos deron a todos os participantes unha medalla e logo realizaron a entrega de premios por categorías. Recibíronnos o director do centro, Vicente Díaz Casás e Esteben Jove Pérez, quen conduciu o acto.
Ao rematar a cerimonia, subimos ao bus camiño ao centro comercial Odeón para comer e ter tempo de lecer, aínda que algunhas tendas estaban pechadas por folga. Sobre as 16:30 h partimos de novo cara a Burela, a onde chegamos ás 18:30 h, facendo o traxecto pola estrada da costa.
Podedes acceder ás imaxes AQUÍ.
Iria Cortegaza, Diana Balsa e Sofía Ben - 4º ESO A e B
A primeira proba foi a grupal, a xincana. Nela entregáronlles distintas preguntas con fotografías relacionadas para contestar entre todos os compoñentes dos dous grupos; tras moito debater as respostas, esgotaron o tempo e comezaron o seu descanso previo ao test individual. Neste test había moita variedade de preguntas, dende cortes xeolóxicos e sismoloxía, ata visu de rochas ou formacións xeolóxicas.
Podedes acceder a máis imaxes AQUÍ e tamén AQUÍ.
Laura Eijo Docampo - 1º Bacharelato A.
O 16, 17 e 18 de marzo celebramos a III Semana do Benestar emocional e da convivencia.
Todas as actividades intentaron proporcionarvos momentos agradables cos compañeiros e docentes do centro. Estas actuacións pretenden contribuír a mellorar o voso benestar dentro e fóra do IES Perdouro. Convivir co resto de estudantes e docentes fóra da aula habitual aporta un coñecemento diferente das persoas que enriquece a convivencia e fortalece os lazos de amizade.
Neste vídeo preséntanse algúns dos momentos vividos estes días:
Podedes acceder a máis imaxes AQUÍ.
En colaboración co Centro de Educación Medioambiental Gaia do concello de Burela, a Fundación Expomar organizou a recollida de lixo da praia do Perdouro e informou ao alumnado dos efectos que os residuos teñen sobre a auga do mar, sobre os areais e sobre a flora e a fauna mariña.
Esta actuación pretende achegar o medio mariño a nenos e adolescentes, promover o seu coidado e fomentar o consumo de peixe entre os máis novos.
Podedes acceder a máis imaxes AQUÍ.
Comezamos ás 11:00 h., tendo uns minutos antes para repasar, poder comer algo e coñecer a nosa supervisora, Laura Fernández López, grazas á cal puidemos celebrar a Olimpíada no IES Perdouro.
A primeira proba foi a grupal, a Xincana. Nela entregáronnos distintas preguntas con fotografías relacionadas para contestar entre todos os compoñentes dos dous grupos; tras moito debater as respostas, esgotamos o tempo e comezamos o noso descanso previo ao test individual. Neste test había moita variedade de preguntas, dende cortes xeolóxicos e sismoloxía, ata VISU de rochas ou formacións xeolóxicas.
Pasámolo moi ben realizando todas as probas e aprendemos algúns conceptos novos moi interesantes; porén, o máis triste foi non poder facer o roteiro guiado con Fran Canosa, un recoñecido xeólogo do que xa desfrutamos en anteriores ocasións e co que aprendemos moito dunha maneira distinta ao realizarse fóra da aula.
Podedes acceder a máis imaxes AQUÍ.
Laura Eijo Docampo - 1º Bacharelato A
.png)
Para conmemorar o 8M, Día da Muller, o alumnado de Proxecto Competencial de 4º ESO B e PDC elaborou unha xeitosa revistiña con datos de utilidade sobre esta data.
Podedes botarlle unha ollada:
Grazas á Fundación Pere Mitjans de Barcelona, á Fundación Síndrome de Down e á ONCE, puidéronse identificar as súas necesidades e a partir de aí, deseñar e fabricar os útiles.
Son moitos os obxectivos que se conseguiron con este proxecto: a transferencia de coñecementos entre empresa e centros de formación, o desenvolvemento de competencias profesionais vencelladas á dixitalización, o deseño e testeo de retos e o desenvolvemento dun ecosistema de innovación estable que permitiu levar a cabo un gran labor social.
Parabéns para o alumnado e profesorado do noso CE en Fabricación aditiva!
Podedes acceder a máis imaxes AQUÍ.
O venres 13 de febreiro celebramos o Entroido.
Aquí tedes os vídeos das entretidas actuacións que preparastes.
Parabéns a todos os grupos pola vosa dedicación! Conseguistes que o festival de Entroido fora un éxito!
Grazas polo voso humor e creatividade!
E grazas tamén a Neves por facer de cámara para que todos poidamos desfrutar destes vídeos..png)
O servizo de mensaxería estará operativo ata o venres 13 de febreiro, 11h.
Adícalle á persoa que aprecias uns dos teus mellores versos. Deixa a túa carta na caixa instalada no hall de entrada. Non esquezas indicar o nome completo do/a destinatario/a e o seu curso e envíao nun sobre aberto.
Poderanse dirixir as cartas a calquera membro da comunidade educativa, sempre e cando estean escritas dende o respecto.
Tes ata o día 13 para mandar versos afectuosos a quen queiras.
Xa coñecemos os campións e subcampións dos Torneos San Xoán Bosco!
Durante os recreos, a biblioteca e o pavillón convertéronse en espazos de competición, convivencia e xogo grazas á implicación do equipo de biblioteca e á supervisión de Rodrigo Pinto Casas. Estes son os resultados:
👏 Moitos parabéns aos gañadores e gañadoras, e tamén a todas as persoas participantes por facer do deporte e do xogo unha parte esencial dos nosos recreos activos.
🏆 Queremos destacar tamén o excelente traballo do Departamento de Fabricación Aditiva, responsable do deseño e impresión dos magníficos trofeos.
📸 Podes acceder ao álbum de fotos AQUÍ.
.png)
Celebraranse no pavillón de 16:00h a 17:40h.
Competirán 2º ESO B e 4º ESO A en fútbol sala e 3º ESO B e 4º ESO B en baloncesto.
Poderán asistir ao partido o luns pola tarde estes grupos ao completo.
Que gañen os mellores! 🏆
O venres 13 de febreiro celebrarase o festival de Entroido.
Será a partir das 11:15h no patio central do IES Perdouro.
O profesorado titor deberá entregar esta ficha co alumnado participante do seu grupo en Vicedirección.
Facede a inscrición para poder participar e pasalo ben!
 |
 |
Parabéns para 2º Bacharelato B por ser a mellor aula do mes de novembro!
Foi a aula máis limpa e ordenada, seguida moi de preto por 2º Bacharelato A. En terceiro lugar, está a aula de 3º ESO A.
No mes de novembro as puntuacións subiron con respecto a outubro, o cal quere dicir que a limpeza e a orde melloraron. Anímamosvos a seguir traballando.
 |
 |
Foi elaborado polo alumnado de 4° ESO de Ed. Plástica dirixido pola súa profesora Andrea Mariz e coa colaboración de Pepe Blanco, artista mariñán que traballou como deseñador en Sargadelos.
Cada mes vai acompañado dunha ilustración arredor dunha peza de cerámica de Sargadelos e leva tamén unha breve explicación da orixe do deseño que aparece na imaxe.
Trátase dunha homenaxe a unha cerámica que forma parte do patrimonio cultural galego e que asemade contribúe ao seu coñecemento. Esperamos que vos agrade.
Podedes ver o resto dos meses AQUÍ.
Perdourando de IES Perdouro baixo licencia Creative Commons Recoñecemento-NonComercial-SenObraDerivada 3.0 Unported License.
.png)