O alumnado de 4º ESO compuxo cancións de Nadal coa axuda da Intelixencia Artificial. Unha delas é "Nadal en Galiza", composición musical que acompañaron dunha coreografía para crear este videoclip co que nos felicitan estas festas.
19.12.25
VISITA AO IDIS
O xoves 11 de decembro, o alumnado de 1º Bacharelato das materias de Tecnoloxía, Anatomía Aplicada e Bioloxía, Xeoloxía e Ciencias Ambientais realizamos unha viaxe a Santiago de Compostela para visitar o Instituto De Investigación Sanitaria ou IDIS.
Ao chegar, entregáronnos unhas batas similares ás dun cirurxián e despois explicáronnos como funcionaba este centro de investigación. O noso primeiro guía contounos algúns datos, coma que traballan en conxunto distintas profesións (biólogos, médicos, enfermeiros, matemáticos, informáticos...) ou que traballaban en conxunto co hospital de Santiago.
A continuación, o guía separounos en grupos para ver diversos ámbitos nos que investigaban.
O grupo vermello (ou Oncomet) encargouse do ámbito do estudo do cancro. Ensináronnos como se estudaba con tamaños moi pequenos, utilizando o nanómetro, e facían nanoemulsións que se mesturaban cun axitador magnético, para despois introducirse en células afectadas polo cancro, para ver como se desenvolvían; ademais, tamén introducían células tumorais en peixes cebra, os cales son moi utilizados nas investigacións grazas a diversos factores tanto económicos coma biolóxicos, e ensináronnos o seu desenvolvemento embrionario.
Logo, cambiámonos de laboratorio e puidemos obter algunhas mostras do noso sangue e observalas no microscopio. Tamén puidemos ver algunhas outras salas onde traballaban informáticos que nos explicaron que estaban investigando.
O grupo verde (ou Axitador) tratou enfermidades renais herdables e tivemos a sorte de compartir unha xornada con profesionais deste ámbito. Comezamos realizando unha mostra dun ril enfermo procedente dun rato, o cal etiquetamos. Ademais, puidemos observar distintas placas baixo o microscopio, dende embrións enfermos de ratos ata células humanas en crecemento. Ao final desta incrible experiencia, tamén nos deixaron analizar distintos casos de problemas xenéticos de pacientes reais relacionados con este tipo de enfermidades.
O grupo amarelo (ou Placa Petri) visitou dous laboratorios: o primeiro de oftalmoloxía, no cal realizamos dúas probas para sacar sangue dunha arteria e outra, con axuda dun accesorio médico, metemos auga con colorante nun compoñente para manexar un fluído. No segundo laboratorio, ensináronnos métodos de esterilización.
O grupo violeta (ou Incubador) observou mortes súbitas por problemas cardiovasculares. A través dunha presentación, explicáronnos diversos coñecementos como: as causas que podían ter, se eran herdables, se eran fáciles de detectar... Tamén fixemos unha parte práctica na cal tivemos que analizar distintas mostras de ADN de persoas con problemas cardiovasculares; utilizamos un proceso chamado “PCR” para realizalo. Finalmente deixáronnos levar a cada un de nós a nosa mostra analizada previamente.
Ao rematar os nosos talleres, puidemos realizar unhas últimas preguntas a un biólogo que viña de Suecia e que dera unha charla anterior á nosa.
Despois, dirixímonos ao centro comercial para comer e desfrutar un pouco de tempo libre. Finalmente, volvemos en bus ata o Perdouro e demos por rematada esta viaxe tan interesante que nos permitiu coñecer un mundo científico que non estamos acostumados a ver.
Podes acceder a máis imaxes AQUÍ.
Laura Eijo Docampo - 1º de Bacharelato A
18.12.25
Fallo do concurso Taboleiros de Nadal 2025-26
Aquí tedes os taboleiros participantes no concurso deste ano.
Recordade que se valoraban a orixinalidade, a estética e a sustentabilidade a partes iguais. Despois de que o xurado puntuou os tres apartados, presentámosvos aquí, en primeiro lugar, os taboleiros dos grupos gañadores, seguidos dos restantes.
Os premios entregaranse o venres 19 de decembro.
Lamentablemente, algúns taboleiros foron descualificados por non aterse ás bases ou ás normas establecidas para o concurso. Aínda así todos están recollidos nesta presentación.
Moitos parabéns polo voso traballo en equipo!
17.12.25
A árbore de Nadal do curso 25-26
Este curso a nosa árbore foi construída para manterse en equilibrio grazas a un conxunto de esferas adornadas e colocadas unha sobre outra.
É o resultado unha vez máis da aprendizaxe colaborativa. Para iso participaron os departamentos de Plástica, Relixión, Tecnoloxía, Administrativo e Fabricación Aditiva. A maior parte da decoración foise elaborando coa colaboración dos titores que traballaron cos seus grupos na aula.
16.12.25
Mercadiño de Nadal o xoves 18 e o venres 19 de decembro
Anímate e traer algún donativo para poder adquirir adornos de Nadal elaborados por alumnado do centro. Cada un deles custará de 1 a 3 euros.
Poderás compralos nos recreos do xoves 18 e do venres 19 e na última hora do venres.
A contía recadada será doada á Cruz Vermella.
15.12.25
Comezan os torneos de xadrez, damas e crebacabezas de San Xoán Bosco
O mércores 17 de decembro comezan os torneos de San Xoán Bosco.
Infórmate de cando compites no taboleiro de anuncios da saída do edificio 1.
9.12.25
Mención de honra para o IES Perdouro no III Premio ConVivimos
O IES Perdouro recibiu a mención de honra no III Premio ConVivimos, correspondente ao curso 2024-25.
O primeiro premio foi para o IES de Cacheiras, o segundo para o IES de Poio e o terceiro para o IES de Cotobade.
O noso proxecto chámase #EmociónsNoPerdouro e engloba a todo o centro a través dunha serie de actividades que teñen como obxectivo mellorar a convivencia e o benestar emocional da comunidade educativa. Algunhas das actuacións son a Semana do Benestar Emocional e a Convivencia, o Perdouroscopio, as titorías con atención ás emocións, etc.
As actividades realizadas o curso pasado tentan desenvolver as competencias básicas establecidas segundo o modelo do GROP (Grupo de investigación en Orientación Psicopedagóxica), un grupo interunivesitario de investigación recoñecido pola Generalitat de Cataluña e integrado por profesionais como Rafael Bisquerra. As capacidades traballadas co alumnado foron: conciencia, regulación e autonomía emocionais, competencia social e habilidades de vida e benestar.
Parabéns a todas as persoas que traballades diariamente para conseguir que a convivencia no IES Perdouro sexa cordial e respectuosa.
Podes acceder á noticia do xornal AQUÍ.
Mes da Ciencia en galego: obradoiro de estruturas e de cálculo
Quen dixo que as matemáticas non son divertidas?
Construír unha ponte ou darlle forma a unha cúpula. Estes foron algúns dos retos que afrontou o alumnado de 1º ESO no obradoiro de matemáticas co que se celebrou o Mes da Ciencia en Galego no IES Perdouro.
Para levar a cabo o obradoiro, o alumnado organizouse en grupos e cada equipo foi participando en diferentes actividades. Tres delas incluían materiais para elaborar distintas estruturas, concretamente, unha ponte con diversos paus, unha figura xeométrica formada por todos os sólidos platónicos e mais unha cúpula a partir de distintos patróns.
A proposta, organizada polo departamento de Matemáticas e conducida por Roberto Manín, profesor de Matemáticas no IES Galileo Galilei en Navia (Asturias) e coordinador da Feira da Ciencia dese mesmo centro, completouse con xogos interactivos de cálculo mental.
A iniciativa, que se realizou o 1 de decembro para que non coincidise co período de exames da primeira avaliación, tivo unha moi boa acollida por parte do alumnado, que demostrou que as matemáticas non só se estudan, senón que tamén se poden tocar, construír e, sobre todo, desfrutar.
Podedes acceder ás imaxes AQUÍ.
Eneko Oviedo Louzao - 1º ESO A e Salma Rocha Gomes - 1º ESO B
6.12.25
6 de decembro: Día da Constitución
Achegámonos a unhas datas moi importantes para a nosa historia recente: o 6 de
decembro, Día da Constitución Española. Ademais dela, en Galicia temos outro marco lexislativo, o Estatuto de Autonomía de
Galicia, que marca o comezo do autogoberno da nosa comunidade.
Estes días convídannos a lembrar a importancia de convivir nun marco común de
dereitos, liberdade e respecto, e tamén a valorar a identidade e a capacidade de
decisión que temos como galegos e galegas dentro de España.
Para celebrar estas datas, preparamos unha actividade interactiva en liña onde
poderás poñer a proba os teus coñecementos sobre a Constitución e o Estatuto.
Participa no Quizizz! accedendo ao seguinte enlace:
👉 Pincha aquí
A actividade estará dispoñible só por un tempo limitado e os dez primeiros serán
mostrados mais adiante como gañadores, así que non perdas a oportunidade de
xogar, aprender e competir cos teus compañeiros e compañeiras.
Anímate a participar e a coñecer un pouco máis sobre as normas que definen quen
somos e como nos organizamos como sociedade!
Se queres descubrir mais información sobre a Constitución Española e o Estatuto de
Autonomía podes visitar as seguintes páxinas oficiais:
Proxecto competencial - 4º ESO
2.12.25
3 de decembro: Día Internacional das Persoas con Discapacidade
A idea desta conmemoración partiu de que no ano 1976 a Asemblea Xeral da ONU decidiu poñer o ano 1981
como ano das persoas con discapacidade, levando a cabo así, durante este ano, múltiples actos para dar
visibilidade aos problemas que teñen estas persoas. Logo de que acabara este ano a Asemblea Xeral decidiu volver actuar para dar visibilidade a estas persoas: a Década das Persoas con Discapacidade
(1983-1992).
Ao acabar esta década de innumerables actividades foi cando se
propuxo poñer un día ao ano para honrar a loita e o traballo destas persoas.
Vemos así como cada ano hai conmemoracións de todo tipo, as cales adoitan incluír a
gobernos, organizacións non gobernamentais, institucións educativas e ao sector privado.
Para máis información, podedes consultar estas páxinas web:
Tamén podedes escoitar as recomendacións de Breogán e Manuel para que nos poñamos no lugar das persoas con discapacidade. Escoitade o seu podcast:
Breogán Fernández e Manuel Baño - 4º ESO A
1.12.25
Encontro literario con Antía Yáñez
O luns 24 de novembro visitou o IES Perdouro a escritora galega Antía Yáñez para falarnos sobre as personaxes femininas das súas obras, que describiu como feministas tamén.
Ao comezo da charla falounos da súa infancia, dos libros que a conduciron a ser hoxe en día o tipo de escritora que é. Lembraba libros coma os de Mortadelo e Filemón e moitos outros onde o papel das nenas sempre era secundario. Na saga dos “Cinco”, as dúas personaxes femininas eran moi distintas: Ana nunca quería facer nada e era moi medosa, mentres que Georgina era a que lideraba o grupo, pero ela considerábase un neno e queixábase constantemente de que as “cousas de nenas” eran delicadas. Inspirouse nesta colección para escribir o seu primeiro libro, O misterio de Portomarín, cambiando un personaxe masculino por un feminino.
Ela defendeu que as mulleres deben ter máis visibilidade (tanto escritoras como personaxes) e dábanlle moita rabia os estereotipos femininos, sobre todo nas novelas da súa época. Tan só sendo adolescente deuse conta das innumerables ideas erróneas acerca das mulleres e de como eran tratadas coma obxectos.
Nas novelas de amor que leu máis adiante (Cincuenta sombras de Grey, Culpa mía, After…) observou que sempre se repetía o mesmo padrón: unha muller inocente da cal se namora un home rico e mullereiro que cambia repentinamente por ela.
Outras obras que escribiu Antía Yáñez son: Be water, Senlleiras (primeiro libro que escribiu para xente adulta, onde as protagonistas son unha escusa para falar da violencia machista), Plan de rescate (onde trata de mostrar a inclusión non forzada, sen afondar na discapacidade senón na aventura) e O clan das Barbies.
Por último, recalcou a pouca visibilidade que a muller ten como escritora. Puxo como exemplo a J. K. Rowling, que usa ese pseudónimo para que non a confundisen polo seu nome de mulller e así conseguir máis lectores masculinos. Isto tristemente segue a pasar na actualidade: aínda que o 60% das autoras son mulleres, só as len menos dun 20 % dos homes mentres que cos autores varóns non pasa o mesmo.
Podedes ver máis imaxes AQUÍ.
Miranda Pernas Basanta - 1º Bacharelato A
Calendario de advento de recomendacións lectoras
Comeza o mes de decembro e con el iniciamos as recomendacións lectoras para esta época do ano.
O grupo de Biblioteca e o Equipo de Dinamización da Lingua galega preparou unha escolma e Ángela Alonso, profesora de Xeografía e Historia, deulle forma de calendario de advento. Nel tedes unha recomendación para cada día deste mes. Asemade, indícase a signatura para que, de xeito doado, sexa posible atopar as obras que se aconsellan nos andeis da biblioteca.
Mellor aula do mes de outubro: 1º de Bacharelato A
Parabéns para 1º Bacharelato A por ser a mellor aula do mes de outubro!
Todo estaba limpo e ordenado. Ademais de contar con recipientes para a recollida de material escolar e pilas.
Moito ánimo para o resto de grupos: 3º ESO A e 3º PDC son os seguintes con 121 puntos e tamén destacou a aula de 1º ESO A con 120.
 |
 |
Subscrever:
Comentários (Atom)
Perdourando de IES Perdouro baixo licencia Creative Commons Recoñecemento-NonComercial-SenObraDerivada 3.0 Unported License.
