A nosa primeira parada xa en Lugo foi o Museo Porta Miñá, onde puidemos
coñecer mellor a historia da cidade e o seu pasado romano. A visita foi moi interesante xa
que tivemos a oportunidade de que a guía do museo nolo explicase todo e nos ensinase
os restos da gran cloaca feita polos romanos que atravesa a cidade.
Despois, entrando pola porta situada fronte á catedral, demos un paseo pola
Muralla Romana de Lugo, onde aproveitamos para sacarnos fotos todos xuntos e para
desfrutar do bo día que tiñamos. Cando baixamos da Muralla, demos unha volta polo
centro de Lugo: vimos as estatuas dos escritores Ánxel Fole e Castelao (esta última está
situada enfronte do hotel onde se celebrou a 1ª Asemblea Nacionalista en 1918) e a Casa
dos Mosaicos. A media mañá fixemos unha pequena pausa para comer e descansar
antes de continuar coa xornada e asistir á primeira representación das Xornadas de
Teatro Grecolatino.
Collimos o autobús para ir á primeira obra, unha traxedia titulada Medea cuxo autor
é Eurípides.
Ao rematar, dirixímonos ao centro comercial As Termas, onde tivemos tempo libre
para comer con tranquilidade e facer algunhas compras.
Ás 16:15 h. volvemos subir ao autobús para asistir á segunda obra; nesta ocasión
tratábase dunha comedia titulada Cásina de Plauto: rimos moito e tamén nos entretemos.
Ao finalizar a función, subimos ao autobús e puxemos rumbo a Burela.
Foi un día diferente e moi divertido. Ademais de aprender cousas novas, pasámolo
moi ben todos xuntos e desfrutamos moito da experiencia.
Claudia Romo Leivas - 1º Bacharelato B
Sem comentários:
Enviar um comentário